1, 2. (a) Vanu vaje vali na kutwamenena mukati ka Vakaleho va Yehova vanalithethze vati na ava va mu malombelo eka? (b) Tuthimutwiya vika muno mu chilongetha, nechi chinatako?

“IYA ntwama yeni?” Echi chikecho chihula chivakavehula Vakaleho va Yehova. Mukemwo mu vulombelo vwavwingi, munalume nambe munakathzi umo, vatha kumwangula kupwa ntwama nambe mwene. Oloni yetu tukavakumbulula mu kushuvuluka ngwetu, Ntwama yetu kapwile munu wa kujeneka kulumbunuka. Ntwama yetu wapwa Kilisitu, uje ivathangwile, uje lalo akakavangeya kutwamenena kwa Ishe, Yehova.—Mateo 23:10.

² Oloni kuli lalo munga ya vanu ije, tutumbula ngwetu “ndungo wa kulongwa na kunyanyama,” ije ili na kutwamenena vanu va Njambi ano matangwa. (Mateo 24:45) Cho tuthzivuka vati ngwetu Yehova ali na kupangetha Munendi, uje kutwethi na kumona mu kututwamenena? Muno mu chilongetha nechi chinatako, tuthimutwiya omwo Yehova napangethelamo vanu vamo ha myaka yaingi mu kutwamenena vanu vendi. Omu mu vilongetha vivali, tuthimutwiya ha vyuma vitatu vije vinapu vukaleho vwa kumwetha ngwavo Yehova wakele na kutwamenena vaje vanu, cho lalo, hanga napu Ntwama na matangwa ano.—Isaya 58:11.

3. Vika vyakwathele Mosesa mangana athe kutwamenena Vaisalele?

³ Sipilitu ya kujela yakwathele vaje vemaneneneko Njambi. Achithinganyekeni  hali Mosesa, uje vanene chipangi cha kupwa ntwama ya Vaisalele. Vika vyamukwathele mangana athe kupanga chije chipangi chakama manene? Yehova “wanene mundthzindthzime wendi kuli Mosesa”. (Tandeni Isaya 63:11-14.) Yehova watwaleleleho kutwamenena vanu vendi omwo wanene Mosesa sipilitu ya kujela.

4. Vaisalele vanangukile vati ngwavo Mosesa wakele na sipilitu ya kujela? (Kengeni chikupulo ha liputa 18 )

⁴ Omwo na umo wahi wamona sipilitu ya kujela, cho Vaisalele vanangukile vati ngwavo ikeyo yakele na kupanga kuli Mosesa? Sipilitu ya kujela ikeyo yakwathele Mosesa kulinga vikomoketho na kwambulula lithzina lya Njambi kuli Falao. (Kutu. 7:1-3) Sipilitu ya kujela yakwathele lalo Mosesa akale na vifwa vyavivwa vya kufwa ngwe chithzemo na kulikehetha na lukakateya, vije vyamulingithile kupwa ntwama ya Vaisalele. Walithethzele manene na vantwama va mu mafuti akwavo vaje vapwile vakulishaka vakevo vavenya. (Kutu. 5:2, 6-9) Ovu vwapwile vukaleho vwakushula, vuje vwamwethele ngwavo Yehova wangwile Mosesa kupwa ntwama ya vanu Vendi.

5. Lumbununeni omwo Yehova wanenenemo vanalume vakwavo va mu Isalele sipilitu ya kujela mangana vatwamenene vanu vendi.

⁵ Kutundoho, Yehova wapangethele sipilitu yendi ya kujela mu kukwatha vanalume, vaje wangwile kupwa vantwama va vanu vendi. “Yoshwa muna Nune, washulile na mana a mundthzindthzime wa Njambi.” (Kwitu. 34:9) “Mundthzindthzime wa Shukulu Kalunga wethzile hali Ngilyone.” (Maako 6:34) Cho lalo, “mundthzindthzime wa Shukulu Kalunga wethzile na ndthzili hali Ndaviti.” (1 Samwe. 16:13) Ava vanalume voshe, vakulahelele sipilitu ya Njambi ivakwathe, cho eyi sipilitu yavakwathele kulinga vyuma vije vanethi kwonowa kulinga mu ndthzili yavo vavenya. (Yosh. 11:16, 17; Maako 7:7, 22; 1 Samwe. 17:37, 50) Ngechi, Yehova wavashangalele ha vyuma vya kukomoketha vivalingile.

6. Mwafwa vika Njambi washakele ngwendi vanu vendi vathingimike vantwama va mu Isalele?

⁶ Vaisalele vapandele kulinga vati omwo valimwenenene vukaleho vwa kumwetha ngwavo sipilitu ya kujela yakele na kutwamenena vaje vanalume? Omwo vanu valinyenyetele ha kutwamenena kwa Mosesa, Yehova wavehwile ngwendi: “Vithimbu vingayi vanu ava vakanjishaula?” (Kula. 14:2, 11) Kwendeka lika vuthunga, Yehova wangwile Mosesa na Yoshwa na Ngilyone na Ndaviti kupwa va Ntwama vaje vamwimaneneneko. Omwo ava vanu vononokele kuli vaje vanalume, cho vononokele kuli Yehova, uje wapwa Ntwama.

7. Tungelo vakwathele vati Mosesa?

⁷ Tungelo vakwathele vaje vemaneneneko Njambi. (Tandeni Vahevelu 1:7, 14.) Yehova wapangethele tungelo mu kutuma Mosesa na kumwana mashiko na kumutwamenena. Yehova watumine Mosesa “kupwa muka-kushwana vanu na kuvapatula ha kukwatha kwa kangelo uje wamusholokelele mu liputa.” (Vili. 7:35) Njambi wapangethele “tungelo” ha kwana majwi a Lishiko kuli Mosesa, lije lyapangethele mu kulongetha Vaisalele. (Ngala. 3:19) Cho Yehova wamulekele lalo ngwendi: “Iluka ukatwamenene vanu na kuvatwala ku mwela uje unjakulekele. Kenga, kangelo kange ikeye akakutwamenena.” (Kutu. 32:34) Mbimbiliya kuyendekele ngwayo Vaisalele vamwene kangelo hendi alinga evi vipangi. Oloni mwatwamenenenemo Mosesa na kulongetha vanu kwamwethele mwamuvwa ngwavo kuli ndthzili ya kutuvakana ya vunu ije yamukwathele.

8. Tungelo vakwathele vati Yoshwa na Hezekiya?

⁸ Yoshwa uje wengile Mosesa, nendi vamutakamethele kuli “muka-kushika ndthzita ya Shukulu Kalunga” mu kutwamenena vanu va Njambi na kulwitha Vakanana, cho vanu va Isalele vahyanene. (Yosh. 5:13-15; 6:2, 21) Kutundoho,  mashwalale va ndthzili va va Asilya vajajethele Mwene Hezekiya ngwavo vashandola Yelusalema. “Kangelo ka Shukulu Kalunga waile ku chilombo cha va Asilya, wathsiyile mashwalale va kupwa 185,000” ha vuthsiki vumo lika.—2 Vimye. 19:35.

9. Kuma Vaisalele kuvapandele kwononoka vanu vaje vemanenene Njambi omwo vapwile va kujeneka kulumbunuka ndi? Lumbununeni.

⁹ Tungelo va kulumbunuka vakwathele vanu va kujeneka kulumbunuka. Mosesa wonowele kuthingimika Yehova. (Kula. 20:12) Yoshwa wombwanethele kushakathzeka vukwathi kuli Njambi thimbu kanda alikumiye na Vangimbiyone. (Yosh. 9:14, 15) Thimbu imo Hezekiya “walyalethele manene.” (2 Mithzi. 32:25, 26) Nameme ava vanalume vapwile va kujeneka kulumbunuka, oloni Vaisalele vapandele kuvononoka. Yehova wapangethele tungelo mu kukwatha ava vanalume. Chili vene, Yehova wakele na kutwamenena vanu vendi.

10. Lishiko lya Njambi lyatwamenenene vati Mosesa?

¹⁰ Lijwi lya Njambi lyatwamenenene vaje vemaneneneko Njambi. Mbimbiliya yatumbula lishiko lije vanene kuli vanu Vaisalele ngwavo “Lishiko lya Mosesa.” (1 Vimye. 2:3) Oloni Vithoneka vimwetha ngwavo Yehova ikeye Muka-kwana mashiko, cho Mosesa wapandele kukava lije Lishiko. (2 Mithzi. 34:14) Omwo Yehova wamulekele mwakushimbikila mbalaka, “Mosesa walingile vyuma vyoshe ngwe muje mwamushikile Shukulu Kalunga.”—Kutu. 40:1-16.

11, 12. (a) Yoshwa na vimyene vakwavo vaje vayulile vanu va Njambi vapandele kulinga vika? (b) Lijwi lya Njambi lyakwathele vati vantwama va vanu va Njambi?

¹¹ Kushwa hashangumukilile kuyula, Yoshwa wakele na livulu lya Mashiko a Njambi. Vamulekele ngwavo, “lilave kutambekela thimbu yoshe . . . mutanya na vuthsiki, ngechi wononoke vyuma vyoshe vije vanathonekamo.” (Yosh. 1:8) Kutundoho, vimyene voshe vateleko vaje vayulile vanu va Njambi navo valingile chuma chakulifwa. Vapandele kutanda Lishiko litangwa na litangwa na kuthoneka kopi na “kunyunga mwamuvwa majwi oshe a lishiko eli na vithzilika na kuvilinga.”—Tandeni Kutwiluka mu Mashiko 17:18-20.

¹² Lijwi lya Njambi lyakwathele vati vanalume vaje vapwile vantwama? Achithinganyekeni vyalingile Mwene Yosiya. Omwo vawanene livulu muje mwakele Lishiko lya Mosesa, muka-kuthoneka wa Yosiya washangumukile kumulavelalyo. * Mwene walingile vati? “Omwo mwene wathzivile vije valavele mu livulu lya Lishiko, watavwile vuthzalo vwendi.” Kuli vikwavo lalo vyalingile. Lijwi lya Njambi lya mutwamenenene ashangumuke chipangi cha kunyongetha tumponya na kuvwahetha vya chiwano cha Pasovala. (2 Vimye. 22:11; 23:1-23) Yosiya na vantwama vakwavo va kulongwa vononokele na kutengululako vimo ha kutwamenena vanu va Njambi, mwafwa Lijwi lya Njambi lyakele na kuvatwamenena. Okwo kutenguluka kwa vyuma kwalingithile vanu va Njambi va kuthañulu vayoye mwaya chithzango chendi.

13. Vantwama va vanu va Njambi valithethzele vati na vantwama va vaka-mafuti?

¹³ Ava vimyene va kulongwa valithethzele na vaje vantwama va vaka-mafuti eka, mwafwa vakevo vajendamenene ha mana a vunu na vithinganyeka vyavo. Mu chiyulo cha Vakanana, vanu vakele na kulinga vyuma vyavivi vya kufwa ngwe kulala na kavushoko na vundeyi na kulala na tuthitu na kukombelela vana vavo na kulemetha tumponya. (Levi. 18:6, 21-25) Cho lalo, vantwama va va Mbambilone na Ingito, kuvakele na kukavangeya mashiko aje akundamene ku kujela, aje Njambi wanene kuli Vaisalele. (Kula. 19:13) Oloni vanu va Njambi va kuthañulu valimwenenene omwo vantwama vavo va kulongwa va va kwathelele kupwa va kujela ku sipilitu na  mu vilinga na ku muvila. Mwa vuthunga vene, Yehova wakele na kuvatwamenena.

14. Mwafwa vika Yehova wanyanyamethele vantwama vamo vaje vatwamenenene vanu vendi?

¹⁴ Nameme vaje vantwama va kulongwa, va vanu va Njambi valifwitile kukavangeya mashiko a Njambi, oloni thimbu imo vakele na kuthevuka. Cho lalo, vantwama vaje kuvononokele kuli Yehova kuvatavethele sipilitu ya kujela ya Njambi na tungelo na Lijwi lyendi kuvatwamenena. Thimbu imo, Yehova wavanyanyamethele nambe kwingitha munu weka ha vuntwama. (1 Samwe. 13:13, 14) Omwo thimbu yetele, Njambi wangwile munu uje ali na ndthzili manene kutuvakana vanalume vaje vapangethele.

15. (a) Tupolofweto vamwethele vati vyakwija kwa ntwama wa kulitila? (b) Ntwama muka ivapolofwetele?

¹⁵ Ha myaka yaingi, Yehova wapolofwetele ngwendi akangwila vanu vendi ntwama wa kulitila. Mosesa walekele Vaisalele ngwendi: “Shukulu Kalunga Njambi yeni akamitumina muka-kwimanena ngwe yange wa kutunda hakati keni vavenya, cho mukamwononoka.” (Kwitu. 18:15) Isaya wapolofwetele ngwendi, ou munu akapwa “ntwama na muka-kushika miyati ya vanu.” (Isaya 55:4) Cho lalo, Ndanyele vamuhwimininine athoneke vya kwija kwa “ntwama uje wakwangula.” (Ndanye. 9:25) Kumamanethelelo, Yesu Kilisitu walitumbwile ikeye vavenya ngwendi napu “Ntwama” ya vanu va Njambi. (Tandeni Mateo 23:10.) Vandongethi va Yesu valyangwilile kumukavangeya, cho vakulahelele ngwavo Yehova ikeye wamwangwile. (Yowa. 6:68, 69) Vika vyavakwathele vakulahele ngwavo Yehova wapangethele Yesu Kilisitu mu kutwamenena vanu vendi?

16. Vika vyamwethele ngwavo sipilitu ya kujela yatakamethele Yesu?

¹⁶ Sipilitu ya kujela yatakamethele Yesu. Omwo Yesu vamumbwitikile, Yowano Muka-kumbwitika wamwene “lilu linashokoloka, cho mundthzindthzime watundile mwilu watongamene hali ikeye ngwe katela.” Kutundoho, “mundthzindthzime wamutwalele mu mambo.” (Mako 1:10-12) Sipilitu ya kujela ya Njambi yakwathele Yesu kulinga vikomoketho na kwendeka viñanda vya Njambi na ndthzili, ha thimbu yakele hano hathi. (Vili. 10:38) Cho lalo, sipilitu ya kujela yakwathele Yesu akale na vifwa vyavivwa vya kufwa ngwe chithzemo na kujolela na likulahelo lya kukanyama. (Yowa. 15:9; Heve. 12:2) Yesu ikeye lika ntwama walingile vyuma vije vyasholwele ngwavo vamwangwile kuli Yehova.

17. Tungelo vakwathele vati Yesu?

¹⁷ Tungelo vakwathele Yesu. Munima ya kumbwitika Yesu, “tungelo vethzile na kumukwatha.” (Mateo 4:11) Omwo kwathalele viola vyavindondo ngwavo vamuthsiye, “kangelo watundile mwilu washolokele kuli ikeye mu kumutakametha.” (Luka 22:43) Yesu wakulahelele ngwendi Yehova atuma tungelo vakumukwathe  ha thimbu yatondele vukwathi mu kushulithilila chithzango cha Njambi.—Mateo 26:53.

18, 19. Lijwi lya Njambi lyatwamenenene vati Yesu mu vilinga na mu vilongetha?

¹⁸ Lijwi lya Njambi lyatwamenenene Yesu. Kushwa lika hashangumukilile chipangi chendi, Yesu watavethele Vithoneka kumutwamenena. (Mateo 4:4) Mukemwo, kwononoka ku Lijwi lya Njambi kukekwo kwa munenethelele alyane kuthsila ha chiti cha kuyandethela. Nameme majwi amamanethelelo endekele, atundile mu vupolofweto vuje vwatalethele kuli Mesiya. (Mateo 27:46; Luka 23:46) Oloni vantwama va vulombelo va mu thimbu ije, kuvathingimikile Lijwi lya Njambi omwo lyavavindikile kukavangeya vithemwa vyavo. Yesu welukilile kwendeka majwi a Yehova aje endekele kwitila muli kapolofweto Isaya ngwendi: “Vanu ava vali na kunjithingimika lika na majwi avo, oloni vimbunge vyavo vili kulyala nange. Chinapu changocho kuli vakevo kunjilemetha, omwo vakevo vali na kulongetha mashiko a vanu ngwe akewo anapu mashiko ange.” (Mateo 15:7-9) Kuma Yehova nethi kwangwile ava vanu kupwa vantwama va vanu vendi ndi?

¹⁹ Yesu watavethele Lijwi lya Njambi kumutwamenena mu vilinga na mu vilongetha. Omwo vakulunu va vulombelo vamwihwile vihula vya kukundama ku vulombelo, ikeye kajendamenene ha mana amangi akele nawo na vyuma vyathzivukile. Oloni wakavangeyeye vyuma vyakele mu Vithoneka. (Mateo 22:33-40) Kalekele lika vaka-kumutolilila mithzimbu ya kuyoya kwendi kwa mwilu nambe omwo vatangelelemo melu, oloni “washokolwele mana avo ngechi vathzivuke Vithoneka.” (Luka 24:32, 45) Yesu wathzemene Lijwi lya Njambi, cho washakele manene kulekako vakwavo vyuma vyakelemo.

20. (a) Yesu wamwethele vati kathingimiko kuli Njambi? (b) Kulithethza kwa Yesu na Helonde Angilipa I kutulongetha vika hali vantwama va kwangula kuli Yehova?

²⁰ Nambe ngwavo Yesu wakomokethele vaka-kumutolilila na “majwi endi endekele,” oloni wanene vumpau kuli Mulongethi wendi Yehova. (Luka 4:22) Omwo munalume umo wa kufuka wethekele kushangathzala Yesu, ha kumutumbula ngwendi “Mulongethi wamuvwa,” Yesu wamukumbulwile mu kathingimiko ngwendi: “Vika unjitumbwila ngwove njiwamuvwa? Naumo wahi wamuvwa kuvanga Njambi lika.” (Mako 10:17, 18) Walithethzele manene na Helonde Angilipa I uje wapwile mwene nambe ngwetu ntwama wa Vayunda munima ya myaka 8. Ha thimbu ya chilika, Helonde wathzalele “vikoveyo vyendi vya vumwene.” Cho vanu, vatambekele ngwavo “kethi munu ali na kwendeka embwe, oloni njambi.” Helonde walyalethele ha kumushangathzala, “kanene kathingimiko kuli Njambi. Cho mainyo vamulile, cho wathsile.” (Vili. 12:21-23) Chili vene, naumo wahi hali vanu vaje vamumwene nethi kwendeka ngwendi Yehova ikeye wangwile Helonde kupwa ntwama. Oloni kuli vukaleho vuje vwamwethele ngwavo Yesu wapwile wakwangula kuli Njambi, cho thimbu yoshe wathingimikile Yehova ha kupwa Ntwama Wakama wa vanu vendi.

21. Vika vitukathimutwiya mu chilongetha chinatako?

²¹ Vuntwama vwa Yesu vwapwa vwa myaka yaingi. Omwo wathangukile, wendekele ngwendi: “Moko yoshe ya mwilu neyi ya hano hathi vananjanayo . . .cho anukeni ngweni njikakala neni matangwa oshe noho ha kukotoka kwa kaye.” (Mateo 28:18-20) Oloni Yesu ha kupwa munu wa ku sipilitu wa mwilu uje kutwatha kumona, nethi kutwamenena vati vanu va Njambi hano hathi? Yehova nethi kwangula iya, kukwatha Yesu mu kutwamenena vanu vendi? Cho vaka-Kilisitu vanethi kuthzivuka vati vanu vamwimanenako? Mu chilongetha chinatako, vakakumbulula ovyo vihula.