ÑANDA ya mu Mbimbiliya ili ku Kushangumuka 22:6 imwetha ngwavo ha thimbu ya kulivwahethela kukana munendi kupwa ñombelo ku mwela wa kulyala, Avilahama “watwikile Isake vitale vya kukombelela navyo, oloni ikeye wambatele manungu a tuhya na moko. Cho vaile muvuvali vwavo.”

Mu Vithoneka, kuvamwethele chifwa chivakele na kuvwekelamo tuhya kuthañulu. Kwetheketha na chihula chili helu, muka-kuthoneka viñanda umo natuleka ngwendi “kwapwile kwakukalu kuli Avilahama na Isake kwambata tuhya mu vungendthzi vwavo vwa vulaha.” Ngechi echi chimwetha ngwavo vambatele chuma chimo cha kuvweketha tuhya.

Vakwavo vanamwetha lalo ngwavo kwakaluwile kulivwekele tuhya kuthañulu. Oloni kwapwile kwakwathi ku vanu kulahula tuhya ha mbweli. Vaka-kulilongetha vavangi vanamwetha ngwavo Avilahama wambatele ndeho ya mukota, ije yakele na manungu avokwele ku tuhya tuje twakele na kulavima vuthsiki vwoshe. (Isaya 30:14) Manungu a tuhya a chifwa echi apwile amathi kwenda nawo mu vungendthzi vwa vulaha, cho kwapwile kwakwathi ku vweka tuhya kupangetha vishoshovandthzi hoshe hoshe havahwimina.