1, 2. (a) Vika kwapwila kwa theho kukundama ku mutambela wa Yehova? (b) Tuthimutwiya vika muno mu chilongetha?

KUKAKATEYA kuli Yehova kwapwa kwakuvwa manene. Naumo wai wakala na ndthzili na mana nambe chithzemo kutuvakana Njambi yetu. Iya mukati ketu kashaka kukakateya kuli Njambi? (Myatho 96:4-6) Vangamba va Njambi vamo vanonowa kutwalelelaho kukundama kuli Yehova mu thimbu ya vyetheko.

² Muno mu chilongetha tuthimutwiya ha myanja ya vanu vaje valithzivile ngwavo vali na kulemetha Njambi, okuni valinga vyuma vije vimuthzivitha kuvihya ku mbunge. Eyi myanja ili na vilongetha vya theho manene vije vitukwatha tutwaleleleho kupangela Yehova mu kulongwa.

3. Mwafwa vika Yehova wanangwile Kaini, cho wamulekele vika?

³ Tuchithimutwiyeni hali Kaini. Walithzivile ngwendi wakele na kulemetha lika Yehova. Oloni kulemetha kwa Kaini kwapwile kwa ngocho kuli Njambi. Kaini wechelelele vithinganyeka vyavivi, ngechi vyakolele mu mbunge yendi. (1 Yowa 3:12) Yehova  wanangwile Kaini ngwendi: “Nga walingile mwamuvwa ngwe njinatambula mulambu wove, oloni omwo walingi vuvi, vuvi vwa kuvandamena ku chikolo ngwe ndumba. Vushaka kukunyongetha, oloni unapande kuvuhyana.” (Kusha 4:6, 7) Kwafwile lika ngwe Yehova aleka Kaini ngwendi: “Nga utenguluka na kukundama kuli yange, cho njikala nove.”

4. Kaini walingile vika omwo vamwanene thimbu ya kutenguluka na kukundama kuli Yehova?

⁴ Ngwe Kaini watengulwile vithinganyeka vyendi, ngwe Yehova wamuthambethele. Oloni Kaini katolililile ku vyuma vyamunangwile Njambi. Vithinganyeka na mashungu endi amavi vyamutwamenenene kukulinga vuvi vwakama. (Yako 1:14, 15) Hamo Kaini mwapwile mwanike kathinganyekele ngwendi tangwa akatengulukila Yehova. Oloni mu kwita kwa thimbu Kaini walingile chuma chimo cha kukathametha manene. Watengulukilile Njambi na kuthsiya shongo yendi.

5. Vyuma muka vyatha kutwonowetha kuwana vivethzikitho kuli Yehova?

⁵ Ngwe mwa Kaini, na muka-Kilisitu natha kulithziva ngwendi ali na kupangela Yehova okuni vilinga vyendi vinapu vyavivi. (Yunda 11) Chakumwenako, muka-Kilisitu natha kukala na vithinganyeka vyavivi na chipululu nambe kuthzinda mukwavo muka-Kilisitu. (1 Yowa 2:15-17; 3:15) Vithinganyeka vya chifwa echi vyatha kulingitha munu alinge vuvi. Munu natha kulinga ngocho nameme ali na ntwima mu chipangi cha kwambulula na kukunguluka thimbu yoshe. Vakwetu kuvatha kuthzivuka vili mu mbunge yetu, oloni Yehova ikeye akamono vyuma vyoshe, cho atha kuthzivuka indi tunakundama kuli ikeye na mbunge yetu yoshe.—Tandeni Njelemiya 17:9, 10.

6. Nga tukala ku mutambela wa Yehova, cho atukwatha vati ‘tuhyane’ vilinga vyavivi?

⁶ Nameme ngocho, Yehova akatwana thimbu ya kutenguluka. Nga munu nathevuka na kutunda kuli Njambi, Yehova akendeka ngwendi: ‘Iluka kuli yange, cho njikutambula.’ (Mala 3:7) Yehova washaka ngwendi tuhyane vuvi, maneneni ha thimbu itulithziva ngwetu tunathzeye. (Isaya 55:7) Nga tulinga ngocho, cho Njambi atwana ndthzili ya ku sipilitu na mu vithinganyeka na ku muvila mangana ‘tuhyane’ vuvi vuje vunatukakateya.—Kusha 4:7.

7. Vika vyathsiyile vuthamba vwa Solomoni na Yehova?

⁷ Tulilongetha vyavingi kuli Mwene Solomoni. Mwapwile mwanike, walombele Yehova ngwendi amutwamenene. Njambi wamwanene mana na kumwana chipangi cha kutunga tembele yaivwa manene mu Yelusalema. Oloni vuthamba vwa Solomoni na Yehova vwathsile. (1 Vimye 3:12; 11:1, 2) Lishiko lya Njambi lyavindikile mwene wa Kahevelu kwambata ‘vanakathzi vavangi, kutewa mbunge yendi ikatanguka.’ (Kwitu 17:17) Solomoni kononokele, ngechi wambatele vanakathzi va kupwa 700. Cho wambatele lalo vanakazi va mbanja va kupwa 300. (1 Vimye 11:3) Vwingi vwa vanakathzi vendi kuvapwile Vaisalele, cho kuvalemethele Njambi. Ngechi, Solomoni kononokele mashiko a Njambi mwafwa wambatele vanakathzi va ku miyati yeka.—Kwitu 7:3, 4.

8. Vuvi muka vwakama vwalingile Solomoni kuli Yehova?

⁸ Solomoni mwashangumukile kwombwanetha mashiko a Yehova kwamulingithile alinge vuvi vwakama manene. Solomoni watungile mutula wa kulemethela njambi wa munakathzi ivatumbwile ngwavo Asitalete na mutula ukwavo wa kulemethela njambi wa makuli Kemoshe. Walikwatathanene na vanakathzi  vendi mu kulombela vinjambi va makuli. Watungile eyi mitula mu myela yaingi ha munkinda uje walithungamene na Yelusalema kuje kwatungile tembele ya Yehova. (1 Vimye 11:5-8; 2 Vimye 23:13) Hamo Solomoni wathinganyekele ngwendi Yehova amwechelela kulinga vuvi, chakama lika nga atwalelelaho kwana viñombelo ku tembele.

9. Vukalu muka vwatundile mu kujeneka kwononoka kwa Solomoni?

⁹ Oloni Yehova kethi kwechelela vuvi. Mbimbiliya ngwayo: “Shukulu Kalunga waluvalele na Solomoni, omwo kononokele, cho wakengethele nima kuli Shukulu Kalunga . . . , uje washolokele kuli ikeye vithimbu vivali, cho wamushikile ha chuma echi vene, ngechi kapandele kukava vinjambi veka lalo embwe, oloni Solomoni kombileko mbunge ku vije vyamushikile Shukulu Kalunga.” Ngechi, Njambi kamukwathele nambe kumuvethzikitha. Vatekulwila va Solomoni kuvayulile mu Isalele, cho valiwanene na vukalu vwakama ha myaka yaingi.—1 Vimye 11:9-13.

10. Vyuma muka vyatha kuthsiya vuthamba vwetu na Yehova?

¹⁰ Vyuma vyatha kuthsiya vuthamba vwetu na Yehova vinapu kulikuta vuthamba na vanu vaje kuvethi kuthingimika mashiko endi ngwe mukwafwile kuli Solomoni. Vamo vanatha kulikwatathana na chikungulukilo, oloni kuvakanyamene ku sipilitu. Vakwavo vanatha kupwa vavushoko vwetu nambe vandambo nambe vatukapanga navo nambe vatukakovela navo sikola vaje kuvethi kulemetha Yehova. Nga tulikuta vuthamba na vanu vaje kuvethi kuthingimika mashiko a Yehova, cho vatha kuthsiya vuthamba vwetu na Njambi.

11. Tunapande kulinga vika nga vanu vatukalikwatathana navo vashaka kuthsiya vuthamba vwetu na Njambi?

¹¹ Tandeni 1 Kolinte 15:33. Vanu vavangi vaje kuvethi kulikwatathana na chikungulukilo vanatha kukala na futithi yaivwa na vifwa vyavivwa. Nga vanu vamulithzivuka navo mukemwo muvafwila, cho muthinganyeka ngweni kunapu kwakuvwa kulikuta navo vuthamba ndi? Lihuleni ngweni, nga njilikwatathana navo, vuthamba vwange na Yehova vufwa vati? Vanjikwatha kuvukanyametha ndi? Vika vili mu vimbunge vyavo? Chakumwenako, vivakendeka thimbu yoshe vimwetha ngwavo vashaka kulanda lika vuthzalo vuje vunatuhuka ololo na kuthzema vimbongo na tumakina na thenga nambe vufuko ndi? Kuma vapwa vaka-lufwe nambe vaka-lyepe lya kutuvakanetha ndi? Yesu wanangwile ngwendi: “Kanwa kakendeka vije vyashulu mu mbunge.” (Mateo 12:34) Nga munanguka ngweni vanu vamukalikwatathana navo vathsiya vuthamba vweni na Yehova, cho mulinga mwamuvwa kujeneka kulikwatathana navo.—Vithi 13:20.

12. (a) Yehova walingile vika kuli Vaisalele muvatundile mu Ingito? (b) Vaisalele vakumbulwile vati omwo Njambi wavalekele ngwendi vamulemethe na vimbunge vyavo vyoshe?

¹² Tulilongetha vyavingi ku vyuma vyalingiwile kuli Vaisalele muvatundile mu Ingito. Mbunga yoshe yakungulukile ku Munkinda wa Sinai. Mu chimona, Yehova walisholwele kuli vakevo mu lishelwa lya kuthzivala. Yehova walingithile ngwendi kukale chililimo na mihyato na vwithi, cho vathzivile lalo lijwi lyakama lya lupembo. (Kutu 19:16-19) Ha thimbu eyi, Yehova walisholwele kuli Vaisalele vathzivuke ngwavo Njambi washaka kumupangela na mbunge yoshe. Wavakulahethele ngwendi akala navo nga vamuthzema na kunyunga mashiko endi. (Tandeni Kutuhuka 20:1-6) Mu ngila ikwavo, Yehova wavalekele ngwendi: “Nga mukundama ku mutambela wange, cho nange njikundama ku mutambela weni.” Mulithziva vati ha chikulahetho echi chachivwa cha kutunda kuli Yehova Njambi? Hamo mwendeka ngwe muvendekelele Vaisalele vaje “vakumbulwile ngwavo, ‘tukalinga vyuma vyoshe vije vyanendeka Shukulu Kalunga.’” (Kutu 24:3) Oloni mu kwita kwa thimbu, kuli vyuma vimo vyethekele kulongwa kwa Vaisalele.

13. Vika vyethekele kulongwa kwa Vaisalele?

¹³ Vaisalele vathzivile lyova muvamwene lishelwa lya kuthzivala na mihyato na vimwetho vyeka vya kutewetha vije vyatundile kuli Njambi. Muvakele ku Munkinda wa Sinai, Mosesa wavalekele ngwendi akapwa muka-kuvendekelako kuli Yehova. (Kutu 20:18-21) Mosesa wakele helu lya munkinda thimbu yailaha manene. Kuma Vaisalele vakele mu chitanga mu mambo mwafwa ya kujeneka kumona ntwama yavo ivakulahelele ndi? Hamo likulahelo lya Vaisalele lyemanene ha kumona Mosesa. Valishoshomwenene manene, cho valekele Alone ngwavo: “Kutuzivuka chuma mukajo chinalingiwa kuli ou munalume Mosesa, ou watutwamenenene kututunditha mu Ingito, oloni yove unapande kutupangela njambi ngechi atutwamenene.”—Kutu 32:1, 2.

14. Vithinganyeka muka vya kuhenga vivakele navyo Vaisalele, cho Yehova walithzivile vati?

¹⁴ Vaisalele vathzivukile ngwavo kulemetha tumponya vwapwile vuvi vwakama kuli Yehova. (Kutu 20:3-5) Oloni valemethele muna ngombe wa ngolinde. Nameme valingile vuje vuvi vwakama, Vaisalele vathinganyekele mu kuhenga ngwavo vachili ku mutambela wa Yehova. Vika twendekela ngocho? Mwafwa Alone wendekele ngwendi kulemetha uje muna ngombe kwapwile kulinga “chiwano cha kuthingimika Shukulu Kalunga.” Yehova walithzivile vati? Walithzivile ngwendi vanamushaula. Ngechi, Yehova walekele Mosesa ngwendi vanu “vanalingi vuvi,” cho “vanathethza ngila ije njavashikile kuyikava.” Yehova ‘waluvalele manene,’ cho wayongwele kunyongetha Vaisalele voshe.—Kutu 32:5-10.

15, 16. Mosesa na Alone vamwethele vati ngwavo vakakateyeye ku mutambela wa Yehova? (Kengeni chikupulo ha liputa 17)

¹⁵ Yehova kayongwele lalo kunyongetha Vaisalele. Mu ngothzi yendi, wanene thimbu kuli vaje vapwile va kulongwa mangana vakundame ku mutambela wendi. (Kutu 32:14) Mosesa mwamwene Vaisalele vaimba na kukinina muna ngombe wa ngolinde, wamwambatele na kumuthanyothzola. Cho watambekele ngwendi: “Munu woshe uje nakundama ku mutambela wa Shukulu Kalunga aije kuno.” Ngechi vene, “Valevi voshe vakungulukile na kumuthzengeleka.—Kutu 32:17-20, 26.

¹⁶ Nameme ngwavo ha kulivanga Alone wamungile kamponya, oloni watengulukile na kukala  hamo na Valevi voshe ku mutambela wa Yehova. Ava vanu va kulongwa kuvakundamene lika ku mutambela wa Yehova, oloni valyangunwine lalo ku vanu va vilinga vyavivi. Valingile mwamuvwa, mwafwa lije litangwa kwathsile vanu vavangi vaje valemethele kamponya. Oloni vaje vakundamene ku mutambela wa Yehova vavakulahethele vyuma vyavivwa.—Kutu 32:27-29.

17. Majwi a Paulu a kukundama ku muna ngombe wa ngolinde atulongetha vika?

¹⁷ Tulilongethako vika? Kapositolo Paulu watunangwile ngwendi: “Vyuma vyoshe evi vinapu chimwetho kuli yetu, mu kutunangula . . . kethi tulemethe tumponya, ngwe muvalingile vamo vavo. Cho vavithonekele mu kutunangula yetu. Omwo tuli na kuyoya ha thimbu ije ili kuyehi na mamanethelelo. Ngechi vene, uje aliyongola ngwendi nemana mbe anyanyame manene kutewa awa.” (1 Koli 10:6, 7, 11, 12) Ngwe mwendekelelemo Paulu, nameme vaka-kulemetha Njambi mu vuthunga vatha kulikoveletha mu vilinga vyavivi. Vaje vakalikoveletha mu vilinga vyavivi vatha kuthinganyeka ngwavo vachinakundama ku mutambela wa Yehova. Oloni kushaka lika kupwa kavuthamba ka Yehova nambe kuthinganyeka ngwetu tu va kulongwa, kukulumbununa ngwavo tuli ku mutambela wa Yehova.—1 Koli 10:1-5.

18. Vika vyatha kututunditha kuli Yehova, cho vukalu muka vutundamo?

¹⁸ Ngwe muvayayavalele Vaisalele ngwavo Mosesa neshwala ha munkinda wa Sinai, netu twatha kuyayavala ngwetu litangwa lya kuthompa kwa Yehova na kwija kwa kaye kakaha vineshwala. Twatha kuthinganyeka ngwetu evi vikulahetho vichili kulako manene na kulishulithilila nambe ngwetu kuvikalishulithilila. Vithinganyeka vya chifwa echi vyatha kutulingitha twake vyuma vya ku muvila kulutwe na kutwonowetha kulinga chithzango cha Yehova. Mu kwita kwa thimbu, twatha kulyangununa kuli Yehova na kulinga vyuma vyavivi vije kutwayongwele ngwetu twatha kuvilinga ha thimbu itwakele na likulahelo lya kukanyama.

19. Vyuma muka vya theho vije kutwapandele kwivala, cho mwafwa vika?

¹⁹ Kethi twivale ngwetu Yehova watonda ngwendi twononoke kuli ikeye na kumupangela na mbunge yetu yoshe. (Kutu 20:5) Kulyangununa kuli Yehova kulumbununa kulinga chithzango cha Satana, cho kwatha kukoveletha munu mu vukalu vwakama. Mukemwo Paulu atwanukitha ngwendi: “Yeni kumwatha kunwa ku nganja ya Mwene na kunwa lalo ku nganja ya mindthzindthzime ya kujwala, kumwatha kulya ku metha ya Mwene na kulya lalo ku metha ya mindthzindthzime ya kujwala.”—1 Koli 10:21.

20. Yehova atha kutukwatha vati nga tunalingi vuvi?

²⁰ Kaini na Solomoni na Vaisalele vakele na thimbu ya ‘kutenguluka na kwiluka kuli Njambi.’ (Vili 3:19) Yehova kethi kuthzambwila kuhitha vaje vanalingi vuvi. Yehova wathambethele Alone. Ano matangwa, Yehova ali na kutunangula kupangetha Mbimbiliya na mavulu a kukundama ku Mbimbiliya nambe mukwetu muka-Kilisitu. Nga tutava kutunangula, cho Yehova atuthzivila ngothzi.

21. Tunapande kulinga vika nga tuliwana na chetheko chije chitwonowetha kupwa va kulongwa kuli Yehova?

²¹ Kuli vyuma vimo vikalingitha Yehova atutetele. (2 Koli 6:1) Kutetela kwendi kukatwana thimbu ya “kuvyana yoyethi ya kujeneka kulemetha Njambi na mashungu amavi.” (Tandeni Tito 2:11-14.) Omwo tuli na kuyoya muno mu matangwa a kukaluwa, tuliwana na vyuma vije vyatha kutwonowetha kupangela Yehova na mbunge yetu yoshe. Tulyangwileni kukundama kuli ikeye mwafwa ‘Yehova ikeye lika itunapande kwononoka na kupangela na kukakateya.’—Kwitu 10:20.