Thzivileni Mema ku Mbunge “Vanu Voshe”
YESU mwalongethele vandongethi vendi mwakwambulwila viñanda vyavivwa, wathzivukile ngwendi kethi vanu voshe vatambula muthzimbu wauvwa. (Luka 10:3, 5, 6) Mu chipangi chetu cha kwambulula twatha kuwana vanu vaje vatulwitha nambe kutwendeka mwamuvi. Cho kwatha kutukaluwila kuthzivila vanu vatwambulwila mema ku mbunge.
Munu muka-mema ku mbunge akamono vukalu vwa vakwavo, cho akalithzivi ngwe muvalinakulithzivila na kushaka kuvakwatha. Nga kututhzivila mema ku mbunge vanu vaje vatwambulwila, cho kutukala na ntwima mu chipangi chetu. Nga tuthzivila vanu mema ku mbunge, cho kunapu lika ngwe tuli na kwaka vikuni ha liko mangana tuhya tutwaleleleho kushukuma.—1 Tesa 5:19.
Twatha kuthzivila vati vanu mema ku mbunge nameme kulinga ngocho kethi kwakwathi? Tuchithimutwiyeni hali Yehova na Yesu na kapositolo Paulu mangana tumone mutwatha kuvatembwinina.
TEMBWININENI YEHOVA UJE WAPWA MUKA-MEMA KU MBUNGE
Ha myaka yaingi, Yehova nakolethela vukalu vwa kushaula lithzina lyendi. Oloni “akatetela vaje kuvethi kumukandelela na vaje vaka-vuvi.” (Luka 6:35) Ngothzi yendi naimwetha mu kukala na mbunge ya kuvandamena. Yehova washaka ngwendi “vanu voshe” vakovoke. (1 Tima 2:3, 4) Nameme Njambi wathzinda vuvi, oloni wamona vanu kupwa va theho, cho kashakele ngwendi kunyonge nambe munu umo.—2 Petu 3:9.
Yehova athzivuka ngwendi Satana wapwa chitongwe mu kukwitha vanu. (2 Koli 4:3, 4) vanu vavangi vanavalongetha vilongetha vya makuli na futithi yaivi kushwa ku vwanike vwavo, ngechi kukavakaluwila kutambula vuthunga. Yehova washaka kuvakwatha. Tuthzivuka vati ngocho?
Tuchimoneni vyalingile Yehova kuli vaka-Nenevayi. Nameme vaka-Nenevayi vakele manene na vukenya, oloni Yehova wendekele kuli Yona ngwendi: ‘Kuma yange kunjatha kuthzivila mema ku mbunge Nenevayi, nganda ije yakama, muje muli vanu va kutuvakana 120,000, vaje kuvathzivuka vuvwa na vuvi ndi?’ (Yona 4:11) Yehova wathzivilile ngothzi vaka-Nenevayi mukemwo watumine Yona kukavanangula.
Ngwe mwa Yehova, netu twamona vanu kupwa va theho. Twatha kumutembwinina nga tukwatha munu uje atolilila nameme kamwetha kwakako manene mbunge.
TEMBWININENI YESU UJE WAPWA MUKA-MEMA KU MBUNGE
Yesu watembwininine Ishe, cho wathzivililile vanu ngothzi vaje vashakele kulilongetha vya Njambi. “Omwo wamwene vimbunga vya vanu, wavathzivilile mema ku mbunge, omwo vakele na kuyandangela na kujuka, ngwe vimanga kuvethi na kanyungi.” (Mateo 9:36) Yesu wamwene vukalu vwoshe vuvakele navwo vanu, cho wanangukile lalo ngwendi vaje vakele na kumutolilila vavalongethele vilongetha vya makuli na kuvayandetha kuli vantwama vavo va vulombelo. Nameme wathzivukile ngwendi kuli vukalu vwonowetha vanu kutambula muthzimbu, oloni Yesu “wavalongethele vyuma vyavingi.”—Mako 4:1-9.
Kethi muluvale nga munu imwambulwila kamitolilila ha vungendthzi vwa kulivanga
Vyuma vikatenguluka mu kuyoya kwa munu, cho thimbu yeka natha kutolilila ku vuthunga
Nga vanu vavyana kutambula muthzimbu wetu, cho tunapande kulihula ngwetu, vika vyavalingitha ngocho? Vamo vanatha kukala na vithinganyeka vyavivi ha Mbimbiliya na hali vaka-Kilisitu mwafwa ya vilinga vyavivi vya vanu vaje valishasha ngwavo vapwa vaka-Kilisitu. Hamo vamo vavalekele vyuma vya makuli ha vyuma vitwakulahela. Vamo vanatha kwonowa kututolilila mwafwa vatewa kuvajola kuli vanu vavatunga navo nambe vaka-nanga yavo.
Vamo vatukathimutwiya navo mu lihya vanatha kuvyana kututolilila mwafwa ya vukalu vuvali navwo. Kamishinali wa lithzina lya Kim wendekele ngwendi: “Ku mutamba umo wa chitingitingi kutukambulwila, vanu vavangi vanavayandetha manene mu ndthzita, cho vyuma vyavo vyoshe vinanyongo. Kuvethi na lilavelelo lya vuyoye vwa kulutwe. Vanathzeye manene, cho kuvethi kukulahela munu. Omu mu chitingitingi tukathimutwiya manene na vanu vaje vakalwitha manene muthzimbu wetu. Litangwa limo, vanu vamo vanjilingile mwamuvi.”
Nameme vamulwithile, Kim wathzivilile vati vanu mema ku mbunge? Wendekele ngwendi muvakanjilingi mwamuvi njikanuka majwi ali ku Vithimo 19:11 aje amwetha ngwawo: ‘Muka-mana akathimpi mu kuluvala kwendi.’ Kwanuka vivanaliwana navyo vanu va mu chitingitingi chitukambulwila kunanjikwatha kuvathzivila mema ku mbunge. Cho lalo, kethi voshe vakavyana kuvambulwila. Omu mu chitingitingi, tulimo na mangendthzi a kwilukila.”
Twatha kulihula ngwetu, ‘Ngwe yange njili mu chifwa chavo, cho vanjambulwila Muthzimbu wa Vumwene ngwe njinalingi vati?’ Chakumwenako, vati nga vanatuleke vyuma vya makuli hali Vakaleho va Yehova ha myaka yaingi? Mu chifwa ocho, hamo netu tunatha kukumbulula mu ngila yaivi na kushaka kututhzivila mema ku mbunge. Nga tupangetha majwi a Yesu aje endeka ngwawo tulinge vanu ngwe muje mutushakela ngwetu vatulingemo, cho kutushongangeya kuvathzivila ngothzi nameme kwakukalu kulinga ngocho.—Mateo. 7:12.
TEMBWININENI PAULU UJE WAPWILE MUKA-MEMA KU MBUNGE
Kapositolo Paulu wathzivilile mema ku mbunge vaje vamulwithile. Mwafwa vika? Mwafwa kevalele chifwa chakele nacho kunima. Wendekele ngwendi: “Ha kulivanga njendekele vyuma vyavivi hali ikeye na kumupaketha na kumushaula. Oloni Njambi wanjithzivilileko mema ku mbunge omwo te kanda njikulahele, cho kunjathzivukile chuma muka chije njakele na kulinga.” (1 Tima 1:13) Wanangukile ngwendi Yehova na Yesu vamutetelelele manene. Ku vanu vaje vakele na kwambulwila wamweneko vamo vaje vakele na vifwa vije vyakele navyo kunima.
Ha vithimbu vimo, Paulu wakele na kuliwana na vanu vaje vakulahelele manene vyuma vya makuli. Walingile vati? Mukanda wa Vilinga 17:16 ngwawo omwo Paulu wakele mu Atena, ‘sipilitu yendi yaluvalele manene omwo wamwene muje mu nganda munashulu tumponya.’ Nameme ngocho, Paulu watengulwile kuje kuluvala kwendi mu kwana vukaleho vwavuvwa. (Vili 17:22, 23) Wambulwilile vanu va miyati ya kulithethzathethza mangana ‘ovoleko vamo nga chitava kulingamo.’—1 Koli 9:20-23.
Twatha kutembwinina Paulu nga tuthzivuka vilinga vyavivi na vyuma vya makuli vivakulahela vanu na kuwana ngila yaivwa ya kuthimutwiya navo “viñanda vyavivwa, viñanda vya kwoloka.” (Isaya 52:7) Ndokathzi wa lithzina lya Dorothy wendekele ngwendi: “Mu chitingitingi chetu vanu vavangi vanavalongetha ngwavo Njambi wapwa wa kuminina mbunge, cho lalo wapwa muka-kutondethetha milonga. Njikavashangala omwo vakulahela kuli Njambi, ngechi njikavaleke viyendeka Mbimbiliya ha chithzemo cha Yehova na vyuma vyakatulingila kulutwe.”
“HYANENI VUVI NA VUVWA”
Omwo tuli kuyehi na kuhwa kwa “matangwa a kukotoka,” vilinga vya vanu vavangi vatwambulwila ‘vipwa vyavivi manene.’ (2 Tima 3:1, 13) Oloni kutwapandele kwechelela ovu vuvi vutwonowethe kuthzivila vanu mema ku mbunge nambe kutwonowetha kupwa va kuvwahelela. Yehova atwana ndthzili ya ‘kuhyana vuvi na vuvwa.’ (Loma 12:21) Jessica uje wapwa painiya wendekele ngwendi: “Njikathimutwiya na vanu vaje kuvapwile va kulikehetha na vaje vakombwanetha muthzimbu utukambulula. Oku kukanjiluvaletha. Munjikashangumuka kuthimutwiya na munu, njikalombo mu mbunge kuli Yehova mangana anjikwathe kumona munu ngwe mwakamumwena ikeye. Oku kukanjilingitha njikale na viyongola vyavivwa vya kukwatha munu injithimutwiya nendi.”
Tutwaleleleniho kushakethzeka vaje vashaka kukayoya myaka yoshe
Vamo vatha kututolilila nga tukala na likakateya mu kuvakwatha valilongethe vya Njambi
Tunapande lalo kuwana vingila vya kutakamethelamo vakwetu vaka-Kilisitu. Jessica wendekele ngwendi: “Nga mukwetu muka-Kilisitu naliwana na vukalu, kunjethi kwendeka manene vya vukalu vwendi. Oloni njikatengulula vya kwendeka, maneneni vyuma vyavivwa vitunawana mu chipangi chetu cha kwambulula, nameme vamo kuvatutambwile mwamuvwa.”
Yehova athzivuka vukalu vutukaliwana navwo mu lihya. Akavwahelela manene nga tumwetha ngothzi ku vanu. (Luka 6:36) Nameme ngocho, Yehova kakathzivila mema ku mbunge vanu vaje kuvatenguluka. Twakulahela ngwetu athzivuka thimbu yakamanetha futithi yaivi. Thimbu kanda amanethe eyi futithi yaivi, tunapande kwambulula mu vwathi vwathi. (2 Tima 4:2) Tutwaleleleniho kwambulula na ntwima na kuthzivila “vanu voshe” mema ku mbunge.
