Tu Vanu va Yehova
“Wavethzika muyati wa vanu vaje Njambi ikeye napu Shukulu Kalunga kavo, vavethzika vanu vaje vanangula Njambi ngechi vapwe vuswana vwendi.”—MYATHO 33:12.
MYATHO: 40, 50
1. Vika twendekela ngwetu Yehova ikeye vavenya vyuma vyoshe? (Kengeni chikupulo ha liputa 22)
YEHOVA ikeye vavenya vyuma vyoshe. Ikeye vavenya “lilu lya mwilu ya melu, na kaye, na vyoshe vilimo.” (Kwitu 10:14; Kujo 4:11) Vanu navo vapwa va Yehova mwafwa ikeye wavatangele. (Myatho 100:3) Oloni kushwa kuthañulu, Njambi nangula vivunga vya vanu vamo kupwa vanu vendi.
2. Veya vavanendeka mu Mbimbiliya vaje vapwa vanu va Yehova va kulitila?
2 Chakumwenako, ku Myatho 135 Yehova wendekele hali Vaisalele va kuthañulu vaje vakele na kumulemetha ngwendi vapwile “vufuko vwendi.” (Myatho 135:4) Cho lalo mu livulu lya Hoziya vendekelemo ngwavo vanu vaje kuvapwile Vaisalele navo vakapwa vanu va Yehova. (Hozi 2:23) Vupolofweto vwa Hoziya vwalishulithilile omwo Yehova wangwile vanu vaje kuvapwile Vayunda ngwendi vakayule hamo na Kilisitu. (Vili 10:45; Loma 9:23-26) Ou “muyati wa kujela” wapwa “vanu va [Yehova] vavenya” va kulitila vaje vanavwavetha na sipilitu yendi ya kujela, cho navangula mangana vakayoye mwilu. (1 Petu 2:9, 10) Vati cho vaka-Kilisitu vavangi vaje vali na lilavelelo lya kuyoya hano hathi? Yehova wavamona kupwa “vanu” vendi vaje “vanangula.”—Isaya 65:22.
3. (a) Veya vanapu vavuthamba va Yehova Matangwa ano? (b) Vika vituthimutwiya muno mu chilongetha?
3 Matangwa ano, “mbunga yaindondo” ije ili na lilavelelo lya kukayoya mwilu na “vimanga veka” vaje vali na lilavelelo lya kuyoya hano hathi, vanapu “vutanga vumo,” cho Yehova wavamona kupwa vanu vendi. (Luka 12:32; Yowa 10:16) Tukandelela manene kuli Yehova ha kututavetha kulikuta vuthamba nendi. Muno mu chilongetha tuthimutwiya ha vingila vitwatha kumwethelamo kukandelela kuli Yehova ha kutwangula kupwa vanu vendi.
TUNAPANDE KUKUNDIKA VUYOYE VWETU KULI YEHOVA
4. Twatha kumwetha vati kukandelela kuli Yehova ha kututavetha kulikuta vuthamba nendi, cho Yesu walingile vika?
4 Tumwetha ngwetu twakandelela kuli Yehova nga tulikundika kuli ikeye na kutumbwitika. Nga vatumbwitika, cho tumwetha ngwetu tunapu tu vanu va Yehova vaje vanalyana kumupangela na vimbunge vyetu vyoshe. (Heve 12:9) Yesu nendi walingile chuma cha kulifwa omwo vamumbwitikile. Cho kwafwile lika ngwe aleka Yehova ngwendi: “Njithzema kulinga chithzango chove.” (Myatho 40:7, 8) Nameme Yesu wakele ku muyati uje walikundikile laja kuli Yehova, oloni walyanene kuli Njambi.
5, 6. (a) Yehova walingile vika ha thimbu ivambwitikile Yesu? (b) Mwanja muka umwetha ngwavo Yehova akavwahelela mutukalikundika kuli ikeye, nameme wapwa vavenya vyuma vyoshe?
5 Yehova walingile vika ha thimbu ivambwitikile Yesu? Mbimbiliya ngwayo: “Omwo Yesu vamumbwitikile, vwathivwathi omwo watundile mu mema, cho mwilu mwashokolokele, cho wamwene mundthzindthzime wa Njambi watongamene hali ikeye ngwe katela. Cho mwilu mwatundile lijwi ngwalyo, ‘ou ikeye Munange injathzema, njili na kuvwahelela hali ikeye.’” (Mateo 3:16, 17) Nameme Yesu walikwatathanene na Ishe thimbu yakama, oloni Yehova wavwahelelele kumona Munendi alyana kulinga chithzango chendi. Na matangwa ano, Yehova akavwahelela nga tulikundika kuli ikeye, cho akatuvethzikitha kulutwe.—Myatho 149:4.
6 Chakumwenako, achithinganyekeni hali munalume uje nalimi mundele. Cho litangwa limo munendi apokola chikundi cha mundele na kwana chithemi chendi kupwa vwana. Kuma uje mundele kethi wa ishe ndi? Mwana atha kwana vati Ishe mundele kupwa vwana okuni ikeye naulimi? Chithemi wa chithzemo katha kulihula evi vihula. Oloni avwahelela kutambula vuje vwana, mwafwa vumwetha ngwavo mwana wathzema chithemi chendi. Uje chithemi amona chije chikundi cha mundele kupwa cha theho manene kutuvakana mindele yoshe ili mu lihya. Yehova akalithzivi manene kuvwaha nga tulyana kumupangela na vimbunge vyetu vyoshe.—Kutu 34:14.
7. Malakiya wathonekele vika hali Yehova mwakamwenamo vaje vanalyana kumupangela na vimbunge vyavo vyoshe?
7 Tandeni Malakiya 3:16. Nga kanda muchilikundike kuli Njambi na kumimbwitika, cho thinganyekeni ha vuvwa vwa kulinga ngocho hano vene. Kushwa ha thimbu imwakele mwimo lya vithemi veni mwapwile mu vanu va Yehova ngwe mukunafwila ku vanu voshe. Nameme ngocho, nga mulyana kuli Yehova na kulinga chithzango chendi, cho avwahelela manene mwafwa amona ngwendi mwathingimika chiyulo chendi. (Vithi 23:15) Yehova akamono vaje vanalyana kumupangela na vimbunge vyavo vyoshe, ngechi akathoneka mathzina avo mu “livulu lya chanukitho.”
8, 9. Yehova watonda vika kuli vaje vavanathoneka mu “livulu lya chanukitho”?
8 Kuli vyuma vitunapande kulinga mangana lithzina lyetu valithoneke mu “livulu lya chanukitho.” Malakiya wendekele ngwendi tunapande ‘kuthzivila lyova Shukulu Kalunga na kumuthingimika.’ Nga tulemetha munu weka nambe chuma cheka kutuvakana kulemetha Njambi na mbunge yetu yoshe, cho lithzina lyetu valitunditha mu livulu lya Yehova lya mwonyo lya chifwitha.—Kutu 32:33; Myatho 69:28.
9 Kuli vyuma vyavingi vyalivungila mu kulikundika kuli Yehova kethi kukulahetha lika ngwetu tulinga chithzango chendi na kutumbwitika mu mema. Kulikundika na kutumbwitika vyapwa vya kathimbu kakandondo lika. Oloni omwo tuchili na kuyoya tunapande kutwalelelaho kwononoka mashiko a Yehova na kumwetha ngwetu tu vanu vendi ha thimbu ino na kulutwe.—1 Petu 4:1, 2.
TUNAPANDE KUVYANA FUTITHI YA VAKA-KAYE
10. Kulithethza muka kunapande kukala mukati ka vanu vaje vali na kupangela Yehova na vaje kuvethi na kumupangela?
10 Mu chilongetha chinahu, tunalilongethele hali Kaini na Solomoni na Vaisalele vaje vavanathoneka mu Mbimbiliya. Voshe valithzivile ngwavo vakele na kulemetha Yehova, oloni kuvamuthingimikile na vimbunge vyavo vyoshe. Eyi myanja imwetha ngwavo vaje vathzema Yehova na vimbunge vyavo vyoshe vanapande kwimanena vuthunga na kuthzinda vuvi. (Loma 12:9) Malakiya mwamanethele kwendeka vya “livulu lya chanukitho,” Yehova wendekele lalo ha “kwangunuka kuli hakati ka vaka-vuthunga na vaka-vuvi na hakati ka vaje vaka-kupangela Njambi na vaje kuvethi kumupangela.”—Mala 3:18.
11. Mwafwa vika vakwetu vanapande kumona ngwavo twapwa tu Vakaleho va Yehova?
11 Kuli chuma chikwavo lalo chitunapande kulinga mangana tumwethe ngwetu twakandelela kuli Yehova ha kutwangula kupwa tu vanu vendi. Kukola kwetu ku sipilitu kunapande ‘kusholoka ku vanu voshe.’ (1 Tima 4:15; Mateo 5:16) Lihuleni ngweni: ‘Vakwetu vakamono ngwavo njalyana kupangela Yehova na mbunge yange yoshe ndi? Kuma njikalisholola kupwa Mukaleho wa Yehova ndi?’ Omwo Yehova natwangula kupwa tu vanu vendi, avihilila manene nga tulishweka ku vanu ngwetu twapwa tu Vakaleho va Yehova.—Myatho 119:46; tandeni Mako 8:38.
Yoyethi yeni ikamwetha ngwayo mwapwa mu Vakaleho va Yehova ndi? (Kengeni palangilafu 12, 13)
12, 13. Vika kwapwila kwakukalu kuthzivuka vanu vamo indi vapwa Vakaleho va Yehova?
12 Chaluvinda, vanu vamo kukapu kwakukalu manene ‘kuvangununa kuli vaje vali na kupangela Njambi na vaje kuvethi na ku mupangela,’mwafwa vali na kutembwinina “mundthzindthzime wa hano ha kaye.” (1 Koli 2:12) Eyi ikeyo sipilitu ya “chithemwa cha mashungu a vunu.” (Efeso 2:3) Chakumwenako, nameme vali na kutunangula thimbu yoshe ha thzalethi na sholwethi, oloni vavangi hanga vachili na kutembwinina chifwa cha vaka-kaye. Vakathzala vithzalo vya kuthata na kuhwalala, nameme vali ku viwano. Vamo vali na kutehula na kulivinda mu kutembwinina vaka-kaye. (1 Tima 2:9, 10) Ngechi, nga vali mu mbunga kwakukalu kuvathzivuka ngwavo vapwa Vakaleho va Yehova nambe vapwa ‘vavuthamba va kaye.’—Yako 4:4.
13 Kutundoho, Vakaleho vamo vachili na kutwalelelaho kutembwinina futithi ya vaka-kaye. Vaka-Kilisitu vamo, nga vali ku vilika, kinithi yavo na vilinga vyavo vikatuvakana theteko. Vamo vakatumu vikupulo vyavo na tumithzimbu twavo ha intaneti vije kuvapandele kulinga vanu va kukola ku sipilitu. Hamo kuvavendekelele kuli vakulunu va mu chikungulukilo, oloni vatha kungumuna vakwavo vaje vashaka kupangela Yehova mu ngila yaivwa.—Tandeni 1 Petulu 2:11, 12.
Kethi mwechelele vilinga vya vakweni vimyonowethe kutwalelelaho kupangela Yehova
14. Tunapande kulinga vika mangana tunyungilile vuthamba vwetu na Yehova?
14 Kaye kali na kushongangeya vanu vakale na ‘mashungu amavi a vunu, aje vanu vamona na kushungwiya na vyuma vyoshe vya muno mu kaye vije vivali na kulyaletha navyo.’ (1 Yowa 2:16) Ha kupwa tu vanu va Yehova, vanatunangula ngwavo, ‘tuvyane yoyethi ya kujeneka kulemetha Njambi na mashungu amavi, na kuyoya yoyethi ya kulemetha Njambi mu kulinyunga na mu kuthungama.’ (Tito 2:12) Vanu vanapande kumona ngwavo tuli na kupangela Yehova na mbunge yetu yoshe mu endekethi yetu na kulya na kunwa na thzalethi na sholwethi yetu na mu vipangi vyetu.—Tandeni 1 Kolinte 10:31, 32.
‘TULITHZEMENI MANENE UMO NA MUKWAVO’
15. Mwafwa vika tunapande kuthzema vakwetu vaka-Kilisitu na kuvathzivila ngothzi?
15 Nga tuyoya mwamuvwa na vakwetu vaka-Kilisitu, cho tumwetha ngwetu vuthamba vwetu na Yehova vwapwa vwa theho. Navo vapwa vanu va Yehova. Nga thimbu yoshe twanuka awa majwi, cho tutwalelelaho kuyoya mwamuvwa na vandolome na vandokathzi vetu na kuvathzivila ngothzi na kuvathzema. (1 Tesa 5:15) Yesu walekele vaka-kumukavangeya ngwendi: “Nga mulithzema umo na mukwavo, athinoni voshe vakathzivuka ngechi mu vandongethi vange.”—Yowa 13:35.
16. Chakumwenako muka chivanendeka mu Mashiko a Mosesa chije chimwetha mwakamwenamo Yehova vanu vendi?
16 Tuchithimutwiyeni ha chakumwenako echi mangana tuthzivuke mutunapande kuyoyela na vakwetu mu chikungulukilo. Vyuma vya kupangetha vije vyakele ku tembele ya Yehova vavikundikile ku kulemetha kwa vuthunga. Mashiko a Mosesa amwethele mwakunyungila mwamuvwa evi vyuma vya kupangetha, cho vaje vakele na kuviviyitha vakele na kuvathsiya. (Kula 1:50, 51) Nga Yehova wanyungilile mwamuvwa vije vyuma vya kupangetha, cho akanyungu mwamuvwa vanu vendi vaje vanalikundika kuli ikeye. Yehova wendekele kuli vanu vendi ngwendi: “Woshe akamipupa akapupa chuma cha theho manene kuli yange.”—Zaka 2:8.
17. Yehova ‘akatolilila na kuthziva’ vika?
17 Malakiya wendekele hali Yehova ngwendi ali na ‘kutolilila na kuthziva’ omwo vanu vendi vali na kuthimutwiya. (Mala 3:16) Yehova “athzivuka vaje vanapu vendi.” (2 Tima 2:19) Athzivuka mwamuvwa vyuma vyoshe vitukendeka na kulinga. (Heve 4:13) Nga twendeka mwamuvi vakwetu vaka-Kilisitu, Yehova ali na ‘kutolilila na kuthziva.’ Yehova akamono nga tukatambula vangendthzi na kwana na kuthambetha na kuthzivila vakwetu ngothzi.—Heve 13:16; 1 Petu 4:8, 9.
‘YEHOVA KAKAVYANA VANU VENDI’
18. Tumwetha vati ngwetu twakandelela kuli Yehova ha kupwa vanu vendi?
18 Tushaka kukandelela kuli Yehova ha kupwa tu vanu vendi. Nga tulikundika kuli ikeye, cho tumwetha ngwetu tuli na mana, cho lalo tu vanu vendi. Nameme tuli na kuyoya “mu kaye ka kupengapenga na hakati ka vanu vaka-vuvi,” tushaka vanu vamone ngwavo tu vanu vaje “vaka-kujeneka mulonga na vaka-kujeneka kapayo, . . . na kutwa cheke hakati kavo ngwe vingongonothi vitwa cheke mwilu.” (Fili 2:15) Tunapande kujenjuka kulinga vyuma vyavivi. (Yako 4:7) Twathzema na kuthingimika vakwetu vaka-kulemetha Yehova mwafwa na vakevo vapwa vanu va Yehova.—Loma 12:10.
19. Yehova akavethzikitha vati vanu vendi?
19 Mbimbiliya ngwayo: ‘Yehova kakavyana vanu vendi.’ (Myatho 94:14) Njambi nakulahetha kulinga ngocho nameme tuliwane na vukalu vwa kufwa vati. Nameme kuthsa kukwatha kututunditha ku chithzemo chetu kuli Njambi. (Loma 8:38, 39) ‘Nga tuyoya, tuli na kuyoyela kuli Yehova, cho nga tuthsa, tuli na kuthsila kuli Yehova. Ngechi vene, nambe tuyoya nambe tuthsa, tunapu tu vanu Yehova.’ (Loma 14:8) Twavandamena kukamona Yehova mwakathangula vavuthamba vendi vaje vanathsi. (Mateo 22:32) Nameme matangwa ano tuli na kulikuwa vivethzikitho vyavingi. Mbimbiliya ngwayo: “Wavethzika muyati wa vanu vaje Njambi ikeye napu Shukulu Kalunga kavo, vavethzika vanu vaje vanangula Njambi.”—Myatho 33:12.
