1. Vyuma muka vikatuthzivitha manene kuvwaha ku mbunge?

TUKAVWAHELELA manene kuthziva kulivwethzelela kwa chipangi chivali na kulinga vanu va Yehova. Mwakawali tunatwamenenene vilongetha vya Mbimbiliya vya kutuvakana 10,000,000. Oku kumwetha ngwavo cheke cha vangamba va Njambi chili na kutwa. Achanukeni vwingi vwa vanu va vimbunge vyavivwa vatwakungulukile navo ha Chanukitho. Cho vakulilongethele vya chithzemo cha Njambi ha kutwana munendi kupwa ndando ya kupatula.—1 Yowa 4:9.

2, 3. (a) Vyuma muka vije kuvyatwonowethele ‘kutwa cheke ngwe vingongonothi’? (b) Kwetheketha na majwi a Yesu ali ku Mateo 5:14-16, tuthimutwiya vika muno mu chilongetha?

² Mu kaye koshe yetu vanu va Yehova tukendeka vindaka vya kulithethzathethza. Oloni, oku kukwatwonowethele kulikwatathana mu kushangathzala Tate yetu wa mwilu Yehova. (Kujo 7:9) Nameme twalithethza ku vindaka na mafuti, oloni tuvavoshe twatha ‘kutwa cheke ngwe vingongonothi vitwila cheke mu kaye.’—Fili. 2:15.

³ Kupwa va kutona na kulikwatathana kwetu na kuya kulutwe  kwa chipangi chetu, vili na kwana Yehova vumpau. Muno mu chilongetha tuthimutwiya evi vyuma muvili na kwanenamo Yehova vumpau.—Tandeni Mateo 5:14-16.

4, 5. (a) Mu vingila muka mutukatwilamo cheke? (b) Vuvwa muka vutunda mu kukala na ngothzi? (Kengeni chikupulo ha liputa 21)

⁴ Kaposhi ka Kukengela ka June 1, 1925 ha mutwe wa “Light in the Darkness,” [Cheke mu Kaye ka Lithuthulungu], kendekele ngwako: “Wahi atha kupwa wa kulongwa kuli Mwene muno mu matangwa a kukotoka . . . kuvanga awane vingila vyatwilamo cheke ikeye vavenya.” Kendekele lalo ngwako: “Munu atha kulinga ngocho nga ambulula muthzimbu wauvwa ku vanu va hano hathi na kuyoya mu kulitombola na cheke.” Ngechi, kwambulula muthzimbu wauvwa na kupwitha vanu kupwa vandongethi, inapu ngila imo ya kutwilamo cheke chetu. (Mateo 28:19, 20) Cho lalo, vilinga vyetu vyavivwa vyana vumpau kuli Yehova. Vanu vatukawana ha vinjuvo na vaka-kwenda mu vingila, vakamono vifwa vyetu. Kumeneka vanu na ndthzandthzu na kuvamwethwila mu chithzemo kumwetha chifwa chetu na Njambi itukalombela.

⁵ Yesu walekele vandongethi vendi ngwendi: ‘Omwo mukovela mu njuvo, menekeni vavenya njuvo.’ (Mateo 10:12) Mu mutamba mwakele na kwambulwila Yesu na tupositolo vendi, vanu vakele na kutambula mwamuvwa vangendthzi mu vinjuvo vyavo. Oloni matangwa ano mu mitambela imo vanu kuvethi na kulinga ngocho. Nameme ngocho, nga tukala na viyongola vyavivwa na ndthzandthzu na kulumbunwina vanu vitunendela, cho valithziva kushuvuluka. Chuma chachivwa manene chitunapande kulinga thimbu kanda tuthimutwiye na munu, chinapu kumumwethwila. Kulinga ngocho kunapu kwa theho nameme vandolome na vandokathzi vambulwila ku mbunga kupangetha katambo. Ha thimbu itwambulwila ku mbunga vanu vavwahelela nga tuvamwethwila na kuvameneka mu chithzemo. Oku kuvalingitha vaije ku katambo na kwambata mavulu. Nga mukala na ngothzi, cho kumipwila kwakwathi kuthimutwiya na vanu.

6. Tukulukathzi vamo va kulyambata vapangele vati na ndthzili mu chipangi cha kwambulula?

⁶ Vaka-kwambulula va kulyambata va ku England vaje vapwa tukulukathzi vakonowa kwambulwila ha njuvo na njuvo mwafwa ya mishongo. Valyangwilile kutwa cheke ha njuvo yavo. Vakele na kujala mavulu a kukundama ku Mbimbiliya ha metha nga vithemi vaya na kwambata vana vavo ha sikola ije yakele hayehi navo. Kushaka kulilongetha vuthunga kwalingithile vanu vavangi vambate mavulu a Questions Young People Ask—Answers That Work, Volyumu 1 na 2. Ndokathzi umo wa painiya wa mu chikungulukilo chavo nendi walikwatathanene navo. Ndthzandthzu ya uje ndokathzi na kulifwita kwa vaje vaka-kulyambata, vyalingithile vithemi vamo vatave kulilongetha Mbimbiliya.

7. Mwatha kukwatha vati vangendthzi vaje vanaija mu chitingitingi cheni?

⁷ Ha myaka inahu, mu mafuti amangi munajemukila mapituka vavangi. Munapande kulinga vika mangana mukwathe ava vanu vathzivuke Yehova na viyongola vyendi? Ha kulivanga, lilongetheni mwakwindwithila mu ndaka ya vangendthzi vaje vanaija mu chitingitingi cheni. JW Language app yatha kumikwatha kulinga ngocho. Kutundoho, lilongetheni majwi amathi mangana muwane mwa kwendekela navo. Cho mwatha kuvamwetha mavindiyo na mavulu a kulithethzathethza a mu ndaka yavo aje ali ha jw.org.—Kwitu 10:19.

8, 9. (a) Tukalilongetha vika ku viwano vyetu vya mukati ka chalumingo? (b) Vithemi vatha kukwatha vati vana vavo vakumbulule ha thimbu ya viwano?

⁸ Yehova natwana Chiwano cha Vuyoye na  Chipangi mangana tupange na ntwima mu chipangi cha kwambulula. Vitukalilongetha oku ku chiwano vikatukwatha tulinge mwamuvwa mangendthzi a kwilukila na kutwamenena vilongetha vya Mbimbiliya.

⁹ Vanu vatukalanya ku viwano vakamono vana vetu muvakakumbulula ha thimbu ya viwano. Vithemi longetheni vana veni kukumbula mu majwi avo mangana vatwe cheke. Vikumbululo vyavo vya kutundilila kwithi ya mbunge vinakwatha vanu vatukalanya ku viwano vyetu vamone ngwavo tukalilongetha vuthunga.—1 Koli. 14:25.

10. Kulemetha kwa nanga kukalingitha vati nanga ilikwatathane?

¹⁰ Ngila ikwavo imwatha kutwilamo cheke cheni inapu kukundwiya likwatathano mu nanga yeni na mu chikungulukilo cheni. Vithemi vatha kulinga ngocho nga vatwamenena kulemetha kwa nanga thimbu yoshe. Mu vithimbu vimo, vamo vakayongola JW Broadcasting ya ngonde na ngonde ha thimbu yavo ya kulemetha kwa nanga. Muvakamanetha kuiyongola vakathimutwiya muvatha kupangethela vyuma vivanalilongetha. Ha thimbu ya kulemetha kwa nanga, chithemi napande kwanuka ngwendi kuthzivithitha kwa mwanike wamundondo kwalithethza noku kwa mwanike uje nakoloko. Anguleni chilongetha chije chinapande, mangana munu na munu wa mu nanga awane vukwathi.—Myatho 148:12, 13.

11-13. Vanu voshe vatha kukundwiya vati likwatathano mu chikungulukilo na kukwatha vakwavo vatwe cheke?

¹¹ Vanike vatha kukundwiya vati likwatathano mu chikungulukilo na ku kukwatha vakwavo vatwe cheke? Vanike vaka-Kilisitu akeni mbunge ku tukulukathzi. Mwatha kuvehula mu kathingimiko vyuma vivanaliwana navyo mu kupangela Njambi. Kulinga ngocho kwakuvwa manene mwafwa kukwatha yeni na vakevo mutwe cheke cha vuthunga. Cho lalo tuvavoshe tunapande kulinga mutwathela mwoshe kutambula mwamuvwa vaje vanaija na kukunguluka netu ku Njuvo ya Vumwene. Nga mulinga ngocho, cho mukundwiya likwatathano na kukwatha vangendthzi vatwe cheke. Omwo mumeneka vangendthzi vamwethwileni mu chithzemo na kuvakwatha vawane ha kutumbama. Vathzimbuleni kuli vandolome na vandokathzi mangana valithzive kuthzituka.

¹² Nga vanamyana chipangi cha kutwamenena chiwano cha kuya mu lihya, mwatha kukwatha tukulukathzi mangana vambulule. Vatha  kuvangwila chitingitingi chije chinavapande. Mu vithimbu vimo mwatha kuvangula vapange hamo na mwanike uje atha kuvakwatha ku muvila. Mwatha lalo kwaka mu viyongola vaje vali na kwonowa kupanga vyavingi mwafwa ya mishongo na kalethi yavo. Kunanguka kweni na kwaka vakweni mbunge kukwatha vanike na tukulukathzi na va kukola ku sipilitu na vaje kanda vakole ku sipilitu vambulule muthzimbu wauvwa na ntwima.—Levi. 19:32.

¹³ Muka-kwimba wendekele ngwendi: “Kengeni muvwapwa vuvwa na kuvwahelela omwo vanu va Njambi vakala hamo na mbunge imo.” (Tandeni Myatho 133:1, 2) Vaisalele muvakele hamo na vakwavo vaka-kulemetha Yehova, vakele na kuwana vukwathi vwakama. Kwapwile ngwe mathzi a kuvwavetha aje akele na lwengo lwaluvwa na kushuvulwitha. Kaleni na viyongola vyavivwa hali vandolome na vandokathzi veni mangana mukundwiye likwatathano. Nga mukemwo mu muli na kulinga, cho twamishangala manene. Kuma mwatha kulinga mumwathela mwoshe kulitanekeya mwamuvwa na vandolome na vandokathzi veni voshe ndi?—2 Koli. 6:11-13.

14. Munapande kulinga vika mangana mutwe cheke mu chitingitingi cheni?

¹⁴ Munapande kulinga vika mangana mutwe cheke cha vuthunga vwa mu Mbimbiliya mu chitingitingi cheni? Endekethi yeni na vilinga vyeni vya ngothzi vyatha kukwatha vanu vatambule vuthunga. Lihuleni ngweni: ‘Vanu vanjatunga navo vakanjimono vati? Kuma vakamono ngwavo njuvo yange na vyuma vyange vikwavo vyapwa vya kujela ndi? Kuma njikashakethzeka vingila vya kukwathelamo vakwetu ndi?’ Nga muthimutwiya na vakweni Vakaleho, vehuleni vamileke omwo ngothzi na vilinga vyavo vyavivwa vinakwathelamo vavushoko vwavo na vanu vavatunga navo na vakwavo vavakapanga navo nambe vavakakovela navo sikola. Muvwahelela manene nga muthziva vyuma vyavivwa vinatundu mu vilinga vyavo vyavivwa.—Efeso 5:9.

15. Vika kwapwila kwa theho kutwalelelaho kupwa va kutona?

¹⁵ Tunapande kunanguka thimbu ituli na kuyoya mangana tutwaleleleho kutwa cheke. Yesu welukilile kunangula vandongethi vendi ngwendi: “Toneni.” (Mateo 24:42; 25:13; 26:41) Nga tuthinganyeka ngwetu ‘ñavava yakama’ ili kulako na kwija, cho kutwatha kumona ngwetu chipangi cha kwambulula tunapande kuchilinga vwathi vwathi. (Mateo 24:21) Nga tulinga ngocho, cheke chetu chithsithsivala nambe kuthzima.

16, 17. Munapande kulinga vika mangana mutwaleleleho kupwa va kutona?

¹⁶ Tuvavoshe tunapande kutwalelelaho kupwa va kutona mwafwa vuvi vuli na kulivwethzelela manene muno mu matangwa a kukotoka. Yehova naka thimbu yakamanetha vuvi vwoshe. (Mateo 24:42-44) Mu thimbu ino, pweni va kuthimpa na kutwalelelaho kupwa va kutona. Tandeni Lijwi lya Njambi ha litangwa na litangwa na kulombela thimbu yoshe. (1 Petu. 4:7) Tembwinineni myanja yaivwa ya vandolome na vandokathzi vaje vanatwalelelaho kupwa va kutona na kutwa cheke. Mwanja umo wauvwa vanawendeka mu Kaposhi ka Kukengela ka Silozi ka April 15, 2012, liputa 18-21 ha mutwe wa “Ni Zwezipili ku Swala Mungundo wa Kubo ya Mujuda ka Lilimo ze 70.”

¹⁷ Lithzilitheni vipangi vyavivwa na vavuthamba vavavwa. Kulinga ngocho kumikwatha mupwe va kuvwahelela, cho lalo mumona ngweni thimbu ili na kuthzambula vwathi. (Efeso 5: 16) Chita cha myaka kunima vandolome vetu vathzethzamene manene mu kupanga vipangi vyavingi. Oloni matangwa ano tuli na ku panga vyuma vyavingi manene mu ndthzili ya Yehova. Tuli na kutwa manene cheke kutuvakana thimbu ya kunima.

18, 19. Vakulunu va mu chikungulukilo vatha kutukwatha vati tupwe va kutona na kupanga na ndthzili? Endekeni chakumwenako.

 ¹⁸ Likulahelo lyetu likakanyama manene, mutukathzivuka ngwetu kujeneka kulumbunuka kukwatwonowethele kupangela Yehova mu ngila yaivwa. Cho lalo tunapande kukandelela kuli Yehova ha kutwana vakulunu va chikungulukilo kupwa “vwana kuli vanu.” (Tandeni Efeso 4: 8, 11, 12.) Thimbu yakamyendela mukulunu, tolilileni mwamuvwa ku vyuma vyaminangula.

¹⁹ Vakulunu vavali va ku England vendelele vaka-kulyambata vaje vakele na vukalu mu vulo vwavo. Munakathzi walithzivile ngwendi munalume wendi kakele na kumutwamenena mu vyuma vya ku sipilitu. Munalume wendekele ngwendi kapwile mulongethi wamuvwa, cho kavwahethele thimbu ya kulemetha kwa nanga kwa thimbu yoshe. Vaje vakulunu vanukithile vaje vaka-kulyambata mwanja wa Yesu. Yesu wakele na kunyungilila vandongethi vendi na kwaka mbunge ku vyuma vivakele na kutonda. Vaje vakulunu vakwathele wa munalume atembwinine mwanja wa Yesu. Vashongangeyeye wa munakathzi akale na mbunge ya kuthimpa. Vaje vakulunu vakwathele lalo vaje vaka-kulyambata mwakupangela hamo mangana vakale na thimbu ya kulemetha kwa nanga na vana vavo vavali. (Efeso 5: 21-29) Mu kwita kwa thimbu vaje vakulunu vathzumbangeyeye manene wa munalume ha kufwitangana kwendi. Cho lalo vamushongangeye atwaleleleho kukulahela sipilitu ya kujela imukwathe kupwa mutwe wa nanga wa kukola ku sipilitu. Chithzemo cha vaje vakulunu chakwathele ije nanga itwaleleleho kutwa cheke.

20. Vuvwa muka vutundamo nga mutwa cheke?

²⁰ Muka-kwimba wembile ngwendi: “Navethzika munu uje ononoka Shukulu Kalunga, munu uje anyunga mashiko a Shukulu Kalunga.” (Myatho 128:1) Nga mutwa cheke ha kukala na futithi ije ikundwiya likwatathano na kushongangeya vanu vapangele Njambi na kutwalelelaho kupwa va kutona, cho mupwa va kuvwahelela. Vanu vamona vilinga vyeni vyavivwa, cho oku kuvalingitha vashangathzale Tate yetu.—Mateo 5:16.