“TAMBOKENI mwane. Munenduka vati?”

Hamo neni mukapangetha awa majwi mu kumeneka vanu. Hamo mumukameneka vanu mukavakandelela mu mavoko nambe kuvavumbatela. Kulimeneka kwalithethzathethza kwetheketha na vithemwa na mafuti a vanu, oloni kukwalithethzele manene. Kunapu kujeneka chithzemo na kathingimiko nga kutumeneka vanu nambe kujeneka kuvakumbulula nga vatumeneka.

Oloni vanu vamo kuvethi kushuvuluka kumeneka vakwavo. Vamo vakonowa kumeneka vakwavo mwafwa ya shwamwa na kulithziva ngwavo kuvapwile va theho. Vamo kukavakaluwila kumeneka vanu va muyati weka na chithemwa cheka nambe vaje vakuthsimana. Oloni nambe kumeneka vanu mu vwihi muli vuvwa vwakama manene.

Lihuleni ngweni: ‘Vuvwa muka vuli mu kumeneka vanu? Lijwi lya Njambi lyendeka vika ha kumeneka vanu?’

Kapositolo Petulu mwatambwile Konelyasi uje kapwile Kayunda, mu chikungulukilo cha vaka-Kilisitu, Petulu wendekele ngwendi: “Njambi kethi na kangu.” (Vili 10:34) Kutundoho, Petulu wathonekele ngwendi, Njambi “ashaka ngechi voshe vatenguluke kutunda ku vivi vyavo.” (2 Petu. 3:9) Tunatha kuthinganyeka ngwetu eyi mikanda ipanga lika kuli munu uje achili na kulilongetha vuthunga. Oloni Petulu wanangwile vaka-Kilisitu ngwendi: “Thingimikeni munu woshe, thzemeni vavuthamba veni vaka-kukulahela.” (1 Petu 2:17) Kuma kutwapandele kumeneka vanu voshe nameme twalithethza ku miyati na vithemwa noku kuvatunda ndi? Nga tulinga ngocho, cho tumwetha ngwetu twavathingimika na kuvathzema.

Kapositolo Paulu walekele vanu vaje vakele mu chikungulukilo ngwendi: “Litambuleni umo na mukwavo, ngwe mwanamitambula Kilisitu.” (Loma 15:7) Paulu watumbwile mathzina a vaje ‘vamukwathele.’ Ano matangwa, tunapande kukanyametha manene vandolome na vandokathzi vetu mwafwa Satana natenuka manene, cho ali na kulwitha vanu va Njambi.—Kolo. 4:11; Kujo. 12:12, 17.

Vithoneka vimwetha ngwavyo kumeneka vakwetu kukwatha manene kutuvakana kuvaleka lika ngwetu valithzive kushuvuluka.

Omwo thimbu yetele ya kunungulwila kuyoya kwa Muna Njambi mwimo lya Maliya, Yehova watumine kangelo kuli Maliya. Kangelo washangumukile kwendeka ngwendi: “Kwoloka kukale nove. Mwene ali hamo nove, cho nakuvethzikitha manene.” Maliya “wakele na chitanga,” mwafwa kathzivukile vyalingithile kangelo amumeneke mu ngila oyo. Uje kangelo mwamwene ngocho, wendekele ngwendi: “Kethi uthzive lyova Maliya, omwo unawana kutetela kuli Njambi.” Wamulumbunwinine ngwendi chapwile chithzango cha Njambi kuli ikeye kukita Mesiya. Maliya katwaleleleho kukala mu vitanga, oloni wononokele, ngechi wakumbulwile ngwendi: “Yange njinapu nji ngamba ya Shukulu Kalunga chilingiwe kuli Yange ngwe muunendeka.”—Luka 1:26-38.

Uje kangelo wavethzikile manene ha kumutuma kuli Yehova, ngechi wamwene ngwendi kwendeka na vanu va kujeneka kulumbunuka kwapwile kwa theho. Washangumukile kumumeneka. Tulilongetha vika ku mwanja wendi? Tunapande kumeneka vakwetu thimbu yoshe na kuvashongangeya. Majwi etu amandondo lika atha kukwatha vakwetu valithzive ngwavo vanapu vanu va Yehova.

Paulu wathzivukile mathzina a vanu vavangi mu vikungulukilo vya mu Asia Minor na Europe. Mu mikanda yendi wakele na kutumbula vanu vakele na kumeneka.  Kuli mathzina anatumbula mu mukanda wa Loma kapetulu 16. Paulu wakele na kumeneka vakwavo vaka-Kilisitu. Watumbwile Fwivi “ndokathzi yetu,” cho washongangeyeye vandolome ngwendi: “Mumutambule mu lithizina lya Mwene, ngwe muje muvakalingi vanu va Njambi, cho mukwatheni vyoshe vije ashaka kuli yeni.” Paulu wamenekele lalo va Pilisila na Akwila ngwendi “njinavakandelela, kethi yange lika, oloni lalo na vikungulukilo vyoshe vya vaje kethi Vayunda.” Wamenekele lalo vamo vaje kuvathsimanene manene ano matangwa ngwendi vindu kuli “kavuthamba kange Epaenetase” na “Talafaena na kuli Talafosa vaje vapanga mu vipangi vya Mwene.” Paulu wakele na kumeneka vandolome na vandokathzi vendi thimbu yoshe.—Loma 16:1-16.

Achithinganyekeni kuvwaha kuvathzivile ha kuvanuka. Oku kwavalingithile valithzeme umo na mukwavo na kuthzema Paulu. Kuvameneka mu chithzemo kwashongangeyeye vaka-Kilisitu na kukanyametha likulahelo lyavo. Kumeneka vakwetu mu ngila ije imwetha ngwavo twavaka mbunge na kuvashangathzala kukatukwatathana ha kupwa vangamba va Njambi va kulongwa.

Paulu mwetele ku chithilo cha Puteoli tai ali na kuya ku Loma, vandolome vamusheshele. Omwo Paulu wavamwene, “wakandelele kuli Njambi na kulitakametha.” (Vili 28:13-15) Ha vithimbu vimo tukameneka vanu mu kuvamwethwila nambe kuvambaimba. Echi kumeneka chatha kukwatha vaje vanombwa nambe vaje vali mu vuthiwa.

Ndongethi Yakomba wapandele kunangula vakwavo na ndthzili. Vaka-Kilisitu vamo vakele na kulinga vupangala vwa ku sipilitu ha kulikuta vuthamba na kaye. (Yako. 4:4) Oloni tuchimoneni majwi ashangumukile kwendeka Yakomba mu mukanda wathonekele:

“Mukanda wa kutunda kuli yange Yakomba, ngamba ya Njambi na Mwene Yesu Kilisitu, vindu kuli vanu voshe va Njambi vaje vanashandokela mu kaye mwoshe.” (Yako. 1:1) Kwapwile kwakwathi kupangetha chinangulo chendi mwafwa majwi endi amwethele ngwawo vanapwitha hamo mu kupangela Njambi. Nga tulikehetha, cho kutukwatha tushangumuke kuthimutwiya na vanu viñanda vya theho mu ngila yaivwa.

Nameme tumeneka vanu mu vwihi oloni valithziva mwamuvwa nga tuvameneka mu vuthunga na mu chithzemo. Tunapande kulinga ngocho nameme chisholoka ngwe kuvakako mbunge. (Mateo 22:39) Ndokathzi umo wa ku Ireland mwaketele ku Njuvo ya Vumwene tai viwano vili muyehi na kushangumuka. Omwo wakovelele mukati, ndolome umo wamumwene, cho wamumwethwilile na kwendeka ngwendi: “Tambokeni mwane. Twavwahelela kumimona.” Uje ndokathzi kakumbulwile, oloni watumbamene lika.

Munima ya vyalumingo, uje ndokathzi walekele uje ndolome ngwendi wakele na kulifwita na vukalu vumo ku njuvo. Wendekele lalo ngwendi: “Njathzeyele manene lije litangwa, cho njashakele kwonowa kuya ku Njuvo ya Vumwene. Vyuma vyoshe vitwakalilongethele ku viwano kunjivyanuka, oloni njanukako lika muwanjimenekele. Njalithzivile kushuvuluka muwanjimenekele. Njakandelelako.”

Uje ndolome kathzivukile kumeneka kwendi mukwakwathelelemo uje ndokathzi. Uje ndolome wendekele ngwendi: “Mwanjilekele vukwathi vwawanenene mu majwi ange amehi njamwene ngwange njalingile mwamuvwa kumumeneka. Njavwahelelele manene.”

Solomoni wathonekele ngwendi: “Umbila likende lyove ha mema mwafwa munima ya matangwa ukaliwana lalo.” (Kwambu. 11:1, NWT) Nga twaka mbunge kukumeneka vakwetu, maneneni vakwetu vaka-Kilisitu, cho tuvakwatha na kulikwatha yetu vavenya. Ngechi, kethi twombwanethe vuvwa vuli mu kumeneka vakwetu.