Lijwi limo lya Chihevelu linatha kulumbununa vyuma vyavingi. Ngechi, evi vingila vivali vitukwatha kuthzivuka chifwa cha vanu vavanendeka omu mu Mwatho:

1. Achithinganyekeni vivanendeka mu kapetulu koshe. Lijwi lya “cho” livanathoneka mu vesi 12, limwetha ngwavo vivethzikitho vivanendeka mu vesi 12 kutwala 14, vinakundama kuli vanu vaka-vuthunga vaje vanendeka ngwavo ‘twovole na kutupatula’ kuli vaka-vuvi (vesi 11). Evi vivethzikitho vanavyendeka na mu vesi 15, muje vanendeka luvali hali “vanu vaje Njambi yavo ikeye Shukulu Kalunga” ngwavo, “vanavethzika.”

2. Ovu vupolofweto vunalitombola na Vithoneka vikwavo vije vyendeka ha vivethzikitho vivakalikuwa vanu va kulongwa. Mukanda wa Myatho 144:12-15 umwetha ngwavo Ndaviti wakulahelele ngwendi omwo Njambi akapatula Vaisalele ku vitothzi vavo, akavavethzikitha mangana vapwe vanu va kuvwahelela na kukala na vyuma vyavingi. (Levi. 26: 9, 10; Kwitu. 7: 13; Myatho 128: 1-6) Chakumwenako, ku mukanda wa Kwituluka mu Mashiko 28:4 ngwavo: “Shukulu Kalunga akamivethzikitha na kumyana vana vavangi na vimbuto vyavingi, hamo na vingombe na vimanga vavangi.” Ha thimbu yayulile Solomoni muna Ndaviti, Vaisalele vayoyele mu kwoloka, cho vakele na vyuma vyavingi. Vivethzikitho vivalikuwile vanu mu chiyulo cha Solomoni vimwetha vivethzikitho vivakalikuwa vanu mu Vumwene vwa Mesiya.—1 Vimye. 4: 20, 21; Myatho 72: 1-20.

Ngechi, tunamono ngwetu Mukanda wa Myatho 144, unendeka ha lilavelelo livalinalyo vangamba va Yehova. Omwo Njambi akanyongetha vaka-vuvi, vanu vendi vakayoya mu kwoloka na kukala na vyuma vyavingi myaka yoshe.—Myatho 37: 10, 11.