1, 2. (a) Mwafwa vika vanu va mu thimbu ya Paulu vakele na kuthimutwiya manene vya vundungo na kupatuka? (b) Paulu wendekele ngwendi kuli kutunatha kuwana kupatuka kwa vuthunga?

VAKA-KILISITU va kulivanga vayoyele mu Vumwene vwa Valoma muje muvakele na kulishasha manene vanu ngwavo vathzivukile mashiko na kuthompa mwamuvwa, cho valithzivile ngwavo vanapatuka. Oloni vindungo vakevo valingithile Vumwene vwa Loma vukale na ndthzili na luthsimo. Ku vanu vaje vakele mu Loma, 30 pesenti vapwile vindungo. Vanu vavangi kwambatethelela na vaka-Kilisitu, vakele na kuthimutwiya manene ha vundungo.

² Mikanda yathonekele kapositolo Paulu inendeka manene ha kupatuka. Oloni viyongola vya Paulu vyapwile vya kukwatha vanu ku sipilitu kethi kulikoveletha mu viñanda vya lifuti ngwe muvakele na kulingila vanu vavangi ha thimbu ije. Paulu kakulahelele ngwendi vimyene va vanu nambe vifulumende vyatha kupatula vanu, oloni ikeye na vakwavo vaka-Kilisitu vapangele na ndthzili mu kukwatha vakwavo na kuvambulwila muthzimbu wauvwa wa Vumwene vwa Njambi na vyuma viyikalinga ndando ya  kupatula ya Kilisitu Yesu. Paulu wakwathele vakwavo vathzivuke kuje kukatundu kupatuka kwa vuthunga. Mu mukanda wendi wathonekelele vaka-Kilisitu va ku Kolinte, wendekele ngwendi: ‘Yehova ikeye sipilitu, cho kuje kuli sipilitu ya Yehova kukekwo kuli kupatuka.’—2 Koli. 3:17.

3, 4. (a) Vika vyalingithile Paulu endeke majwi ali ku 2 Kolinte 3:17? (b) Nga tushaka kulikuwa kupatuka kwa kutunda kuli Yehova, tunapande kulinga vika?

³ Mu mukanda uje wathonekelele vaka-Kolinte, Paulu wendekele vya vumpau vwa Njambi vuje vwavyathzimithile ku chihanga cha Mosesa omwo watundile ha Munkinda wa Sinai mu kwendeka na kangelo ka Yehova. Vanu muvamwene Mosesa vathzivile lyova, cho Mosesa walifwikile lilesu ku mesho endi. (Kutu. 34:29, 30, 33; 2 Koli. 3:7, 13) Oloni Paulu wendekele ngwendi: ‘Nga munu atengulukila kuli Yehova, lije lilesu vakalitunditha.’ (2 Koli. 3:16) Vika vyakele na kulumbununa Paulu?

⁴ Mu chilongetha chinahu, twalilongethele ngwetu Yehova uje watangele vyuma vyoshe ikeye muka-kupatula. Mukemwo twendeka ngwetu “kuje kuli sipilitu ya Yehova” kukekwo kuli kupatuka. Oloni nga tushaka kulikuwa kupatuka kwa Yehova, tunapande ‘kutengulukila kuli Yehova,’ kulumbununa kulikuta nendi vuthamba. Vaisalele muvetele mu mambo, kuvakele na kumona vyuma vyavivwa vyakele na kuvalingila Yehova. Vakaluwithile vimbunge na vithinganyeka vyavo, cho vakele na kulilingila vyuma muvashakelele vakevo vavenya mwafwa ya kupatuka mu Ingito.—Heve. 3:8-10.

5. (a) Sipilitu ya Yehova ikatupatula ku vika? (b) Vika twendekela ngwetu sipilitu ya Yehova yatha kukwatha munu kupwa wa kupatuka oku ali mu kamenga nambe mu vundungo? (c) Vihula muka vitunapande kukumbulula?

⁵ Sipilitu ya Yehova yatha kutupatula mu vingila vyavingi, kethi ku muvila lika. Sipilitu ya Yehova ikapatula vanu ku vundungo vwa vuvi na kuthsa na ku vundungo vwa vilongetha vya mu vulombelo vwa makuli. (Loma 6:23; 8:2) Oku kunapu kupatuka kwa vuthunga. Munu atha kulikuwa kupatuka kwa ku sipilitu nameme ali mu kamenga. (Kusha. 39:20-23) Evi vikevyo vyalingiwile kuli Ndolome Harold King ha thimbu yakele mu kamenga. Mwatha kuwana muthzimbu wendi ha JW Library. (Mubone mwatasaa INTERVIEWS AND EXPERIENCES > ENDURING TRIALS.) Oloni tuchikumbululeni evi vihula: Twatha kumwetha vati ngwetu twakandelela ku kupatuka kwetu? Cho twatha kupangetha vati mwamuvwa ndthzili yetu ya kulyangwila vya kulinga?

6. Vaisalele vamwethele vati ngwavo kuvakandelelele kuli Yehova uje wavapatwile?

⁶ Nga tuthzivuka theho ya chuma chimo chivanatwana, cho tukandelela ku munu uje natwanacho. Vaisalele kuvamwethele kukandelela kuli Yehova uje wavapatwile mu vundungo vwa mu Ingito. Munima ya vingonde vyavindondo kutunda ha vapatukilile mu vundungo, Vaisalele vashangumukile kuliveya ha vyakulya na vinyu vya mu Ingito na kutatoka, cho vashakele kwiluka ku Ingito. Vashangumukile kuthzema manene ‘vithi na vinende vya ngulu na malasiya na sapola ya mavundungulu na sapola yeka,’ kutuvakana kuthzema Yehova Njambi uje wavapatwile. Kuma tukomoka omwo Yehova waluvalelele vanu vendi ndi? (Kula. 11:5, 6, 10; 14:3, 4) Echi chinapu chilongetha kuli yetu.

7. Paulu wapangethele vati chije chinangulo chathonekele ku mukanda wa 2 Kolinte 6:1, cho twatha kumutembwinina vati?

⁷ Kapositolo Paulu wanangwile vaka-Kilisitu voshe ngwendi kuvapandele kwombwanetha  kupatuka kwanatwana Yehova kwitila muli Munendi Yesu Kilisitu. (Tandeni 2 Kolinte 6:1.) Anukeni ngweni chitakutaku cha Paulu chathzivile manene kuvavala, cho walithzivile kuvindama ha kukala mu vundungo vwa vuvi na kuthsa. Oloni wendekele ngwendi: “Kukandelela kuli Njambi hali Mwene yetu Yesu Kilisitu.” Vika wendekelele awa majwi? Walekele vakwavo vaka-Kilisitu ngwendi: ‘Omwo lishiko lya sipilitu lije litunenela mwonyo muli Kilisitu Yesu, linatupatula ku lishiko lya vuvi na kuthsa.’ (Loma 7:24, 25; 8:2) Netu tunapande kukandelela kuli Yehova uje natupatula ku vundungo vwa vuvi na kuthsa, ngwe mwalingile Paulu. Ndando ya kupatula yatulingitha tupangele Njambi na chitakutaku cha kujela na kuvwahelela.—Myatho 40:8.

8, 9. (a) Petulu wanangwile vika ha kupangetha mwamuvwa kupatuka kwetu? (b) Vukalu muka vutuli na kuliwana navwo ano matangwa?

⁸ Tunapande kumwetha kukandelela kwetu ha kupangetha mwamuvwa kupatuka kwanatwana Njambi. Kapositolo Petulu watunangwile ngwendi kutwapandele kupangetha mwamuvi kupatuka kwetu. (Tandeni 1 Petulu 2:16.) Kuma echi chinangulo kuchimyanukitha vyuma vivalingile Vaisalele mu mambo ndi? Echi chinangulo chitukwatha manene netu ano matangwa. Satana na vanu vali muno mu kaye kendi, vali na kushongangeya vanu kuthzala mwamuvi na kulya na kunwa manene na kulithzima vuli mu ngila yaivi. Vaka-kulandetha vakapangetha vanu vaje vasholoka mwamuvwa mangana vashongangeye vanu kulanda vyuma vije kuvashaka kulanda. Netu vanatha kutushongangeya kulinga ngocho, na kupangetha mwamuvi kupatuka kwetu.

⁹ Chinangulo cha Petulu, chinatha kukwatha vanu mu vingila vya kulithethzathethza. Chivakwatha kwangula sikola ya kukovela na vipangi vya kulinga mu vuyoye. Chakumwenako, vanike vaje vali ku masikola vali na kuvashongangeya ngwavo vapange na ndthzili mangana vaye ku masikola akama. Vanu vavangi vakaleke ava vana va sikola ngwavo nga vaya ku masikola akama, cho vakawana vipangi vyavivwa na kutambula vimbongo vyavingi, cho vanu vavathingimika. Vanike vatha kungumuka na kuthinganyeka ngwavo kulinga evi vyuma kunapu kwangula mwamuvwa vya kulinga mu vuyoye. Vyuma muka vivanapande kuthinganyeka vithemi na vanike?

10. Vika vitunapande kwanuka omwo tupangetha ndthzili yetu ya kulyangwila vya kulinga?

¹⁰ Vanu vamo vanatha kuthinganyeka ngwavo kwangula kuya ku sikola yakama nambe kujeneka kulinga ngocho, chapwa chuma cha ha kapandi, cho vanatha kulyangwila vyoshe vivashaka, vije vilitombola na chitakutaku chavo. Hamo vakanuka majwi athonekele Paulu kuli vaka-Kolinte omwo wehwile ngwendi: “Omwo vikajo kupatuka kwange kwakulinga vyoshe njishaka vachivindika omwo ha chitakutaku cha munu weka?” (1 Koli. 10:29) Nameme vene yetu vavenya tunapande kulyangwila masikola a kukovela na vipangi vya kulinga, tunapande kwanuka ngwetu kuli vimo vyatha kutunda mu vyuma vitwangula kulinga. Mukemwo Paulu wendekele ngwendi: “Vanatutavetha kulinga vyuma vyoshe, oloni kethi vyuma vyoshe vikwatha embwe.” (1 Koli. 10:23) Echi chimwetha ngwavo kutwapandele kulilingila vyoshe vyoshe vitushaka, oloni kuli vyuma vyavingi vitunapande kwaka mu vithinganyeka thimbu kanda twangule vya kulinga mu vuyoye.

11. Vika vyanatupatwila Njambi?

¹¹ Petulu wendekele ha vyuma vyamulingithile anangule vakwavo mu kupangetha  mwamuvwa kupatuka kwavo. Wendekele ngwendi, tunapande kupangetha kupatuka kwetu ngwe “vindungo va Njambi.” Ngechi, Yehova natupatula ku vundungo vwa vuvi na kuthsa kwitila muli Yesu mangana tulikundike kuli ikeye na kupwa ‘vindungo vendi.’

12. Vika vitulilongetha kuli Nowa na nanga yendi?

¹² Ngila yatha kutukwatha kupangetha mwamuvwa kupatuka kwetu na kujeneka kupwa vangamba va kaye, inapu kuthzethzama mu kupanga vipangi vya ku sipilitu. (Ngala. 5:16) Tuchithimutwiyeni ha mwanja wa Nowa na nanga yendi. Vayoyele mu lifuti muje mwakele vukenya na vilinga vikwavo vyavivi. Oloni kuvalikovelethele mu vilinga vya vanu vavakele na kuyoya navo. Vathele vati kulinga ngocho? Vathzethzamene mu vipangi vyavanene Yehova vya kushonga vwato na kukungulula vyakulya vyavo nevi vya tuthitu na kwambulula muthzimbu wa kwija kwa livathzi. “Ngechi vene, Nowa walingile vyoshe vije vyamushikile Njambi.” (Kusha. 6:22) Vuvwa muka vwatundilemo? Nowa na nanga yendi vovokele.—Heve. 11:7.

13. Yesu wanene chipangi muka kuli vaka-kumukavangeya?

¹³ Yehova natushiki ngwendi tulinge vika? Ha kupwa vandongethi va Yesu, twathzivuka chipangi chanatwana Njambi. (Tandeni Luka 4:18, 19.) Ano matangwa, njambi wa kano kaye nathzivaletha vanu vavangi ha mesho, cho vali mu vundungo vwa vilongetha vya makuli na vundungo vwa vimbongo na kujeneka kulikwatathana. (2 Koli. 4:4) Kunapu kuvethzika manene kutembwinina Yesu mu kukwatha vanu mangana vathzivuke Yehova Njambi na kumulemetha ha kupwa muka-kupatula. (Mateo 28:19, 20) Echi chipangi kuchapwile chachathi embwe. Mu mafuti amo, vanu vali na kulwitha manene Vakaleho. Ngechi, munu na munu napande kulihula ngwendi: ‘Njikapangetha ndthzili yange ya kulyangwila vya kulinga mu kupanga chipangi cha Vumwene ndi?’

14, 15. Vuvwa muka vunatundu mu chipangi cha kwambulula chije chivali na kulinga vanu va Yehova? (Kengeni chikupulo ha liputa 8)

¹⁴ Kukatutakametha kumona vanu vavangi vaje vanathzivuka ngwavo tuli na kuyoya mu  matangwa a kukotoka, cho vanathiwitha vuyoye vwavo mangana vapange na ndthzili chipangi cha kwambulula. (1 Koli. 9:19, 23) Vamo vali na kupangela mu vitingitingi vyavo, vakwavo cho vakayi na kupangela kuje kuli vujene vwakama. Mithzimbu imwetha ngwayo mu myaka 5 ineti, avalenji ya vapainiya va thimbu yoshe inalivwethzelela kutuvakana 1,100,000, cho lalo hanga ichili na kulivwethzelela. Ovu vukevwo vuvwa vunatundu mu kupangetha mwamuvwa ndthzili yetu ya kulyangwila vya kulinga mu kupangela Yehova.—Myatho 110:3.

¹⁵ Vika vyakwathele ava vandolome na vandokathzi kupangetha mwamuvwa ndthzili yavo ya kulyangwila vya kulinga? Tuchithimutwiyeni hali John na Judith vaje vapangelele mu mafuti a kulithethzathethza ha myaka 30. Vendekele ngwavo, omwo Sikola ya chipangi cha vupainiya ya shangumukile mu 1977, vapainiya vavashongangeyeye kuya na kukapangela kuje kwakele vujene vwakama. John wendekele ngwendi, kwathiwitha vuyoye na kwangula mwamuvwa vipangi kukekwo kwavalingithile vapange mwamuvwa echi chipangi. Muvaketele mu lifuti lyeka, kulombela kuli Yehova na kumukulahela manene kwavakwathele vakolethele vukalu vwa kulilongetha ndaka yeka na chithemwa cheka na kwithzilila yoyethi ya kuje ku lifuti. Valithzivile vati mu myaka ivapangele chipangi cha kwambulula? John wendekele ngwendi: “Njalithzivile ngwange njili na kupanga chipangi cha kulitila chije kanda njipangeho laja. Yehova wanjinyungile mwamuvwa ngwe mwakalingi chithemi wa munalume wa chithzemo kuli munedi. Njathzivithithile mwamuvwa viulumbununa mukanda wa Yakomba 4:8 uje wendeka ngwawo: ‘Shwenyeni kuyehi na Njambi, cho na ikeye lalo, akashwenya kuyehi neni.’ Njathzivukile ngwange njawanene vyuma vinjakele na kutonda. Njashakele kupwa wa kuvwahelela mu kuyoya kwange.”

16. Vanu vamo vanapangetha vati mwamuvwa ndthzili yavo ya kulyangwila vya kulinga?

¹⁶ Vanu vamo kuvatha kupanga thimbu yailaha mu chipangi cha thimbu yoshe ngwe muvalingilile va John na Judith mwafwa ya vyuma vimo. Oloni vanu vavangi vakapangetha mwamuvwa thimbu na chashu chavo mu vipangi vya kutunga vije vili na kulingiwa mu kaye koshe. Chakumwenako, muvakele na kutunga vinjuvo vya ku chikota chetu ku Warwick, New York vandolome na vandokathzi va kweta ku 27,000 valyanene mu vipangi. Vamo vakapangeleko chalumingo chimo vakwavocho ha mwaka wamutunu nambe kutuvakana. Vwingi vwavo vechelele vipangi vyavo mangana vakakwathe oku ku chipangi. Vanatwakela mwanja wauvwa mu kupangetha ndthzili yanatwana Njambi ya kulyangwila vya kulinga mu kushangathzala na kuthingimika Yehova.

17. Vivethzikitho muka vivakalikuwa vaje vali na kupangetha mwamuvwa ndthzili yavo ya kulyangwila vya kulinga?

¹⁷ Twavethzika manene ha kuthzivuka Yehova na kukala mu vulombelo vwa vuthunga vuje vuli na kupatula vanu vavangi. Ngechi, mu vyuma vyoshe vitwangula kulinga, tunapande kumwetha ngwetu tuli na kukandelela ku kupatula kwa Njambi. Kutwapandele kupangetha mwamuvi oku kupatuka kwanatwana Njambi, oloni tunapande kuchipangetha mu kupangela Yehova na ndthzili yetu yoshe. Nga tulinga ngocho, cho tukulahela ngwetu tukalikuwa vivethzikitho vya Yehova omwo ovu vupolofweto vukalishulithilila, vwa kwendeka ngwavo: “Vya kutanga ku litangwa limo vikapatuke ku vundungo vwa kuthsa, cho vikakale na vumpau vwa kupatuka kwa vana va Njambi.”—Loma 8:21.