1. Majwi muka a kutakametha aje endekele Yehova omwo vamutengulukilile mu lihya lya Endeni?

YEHOVA namwetha ngwendi wapwa Njambi muka-kuthzembeleka, kushwa lika havathevukilile vanu va kulivanga. Omwo Andama watengulukilile Njambi mu lihya lya Endeni, Njambi wakulahethele ngwendi akatakametha vatekulwila va Andama. Njambi kayengwile nanga ya Andama. Vupolofweto vuvanathoneka ku mukanda wa Kushangumuka 3:15 vumwetha ngwavo, Njambi akanyongetha “linyoka wa kuthañulu,” Satana Liyavolo na vilinga vyendi vyoshe vyavivi.—Kujo. 12:9; 1 Yowa. 3:8.

2. Yehova watakamethele vati Nowa?

² Nowa uje wapwile ngamba ya Yehova, wayoyele mu kaye muje mwashulile vanu vaka-vilinga vyavivi, cho ikeye na nanga yendi,  vakevo lika vakele na kulemetha Yehova. Vukenya na vilinga vya vupangala vije vyalithalele manene, kuvyathzeyethele Nowa. (Kusha. 6:4, 5, 11; Yunda 6) Hamo Nowa wathzeyele. Oloni Yehova wamulekele muthzimbu uje wamutakamethele atwaleleleho ‘kwenda na Njambi.’ (Kusha. 6:9) Yehova walekele Nowa ngwendi akanyongetha kaje kaye kakavi, cho wamwanene chipangi chapandele kulinga mangana ovole nanga yendi. (Kusha. 6:13-18) Yehova Njambi watakamethele Nowa.

3. Yoshwa vamutakamethele vati? (Kengeni chikupulo ha liputa 15)

³ Yoshwa nendi vamwanene chipangi chakama manene cha kutwamenena vanu va Njambi na kuvatwala mu Lifuti lya Chikulahetho. Echi chipangi chambatethelele na kulwa vindthzita na mashwalale vandthzili vaje vakele muje mu lifuti. Kwakele vyuma vyavingi vyathele kuthzivitha Yoshwa lyova. Ngechi, Yehova walekele Mosesa ngwendi atakamethe Yoshwa. Njambi wendekele ngwendi: “Shika Yoshwa, mukolethe na kumuthimpitha, omwo ikeye akatatwamenena vanu ava na kuvajavwitha muthambwa na kushwana lifuti lije liunamono.” (Kwitu. 3:28) Thimbu kanda Yoshwa ashangumuke chipangi, Yehova wamutakamethele ha kumuleka ngwendi: “Anuka vinjinakushiki ngechi ukolethe na kuthimpa. Kethi uthzive lyova nambe kujujuka, omwo yange Kalunga Njambi yove, njili hamo nove kwoshe kuwukaya.” (Yosh. 1:1, 9) Awa majwi amutakamethele manene.

4, 5. (a) Yehova watakamethele vati vanu vendi va kuthañulu? (b) Yehova watakamethele vati Munendi?

⁴ Yehova katakamethele lika munu umo, oloni wakele na kutakametha vanu vendi voshe. Watakamethele Vayunda vaje vakele mu vundthzinda ku Mbambilone. Yehova wavalekele ngwendi: “Kethi muthzive lyova, yange njili hamo neni. Kethi mujaje, yange Njambi yeni. Njikamitakametha na kumikwatha, njikaminyunga na kumyamena.” (Isaya 41:10) Awa majwi atakamethele vaka-Kilisitu va kuthañulu, cho achili na kutakametha vanu va Njambi ano matangwa.—Tandeni 2 Kolinte 1:3, 4.

⁵ Yesu nendi vamutakamethele kuli Ishe. Ha litangwa livamumbwitikile, wathzivile lijwi litunda mwilu ngwalyo: “Ou ikeye Munange injathzema, njili na kuvwahelela hali ikeye.” (Mateo 3:17) Awa majwi atakamethele Yesu ha thimbu yakele na kupanga chipangi chendi hano hathi.

6. Chithimo cha vangamba vaje vavanene vimbongo chikatutakametha vati?

⁶ Yesu watembwininine Ishe mu kutakametha vanu. Chithimo cha Yesu cha kukundama ku matangwa a kukotoka cha vangamba vaje vavanene vimbongo chikatakametha vanu va Njambi. Shukulu wa vaje vangamba wathzumbangeyeye ngamba na ngamba wa kulongwa ngwendi: “Unalingi mwamuvwa manene, u ngamba wamuvwa wa kulongwa. Walongwele ku vyuma vyavindondo, ngechi vene, njikakupwitha muka-kunyunga vimbongo vyavingi. Kovela mu kuvwahelela kwa shukulu yove.” (Mateo 25:21, 23) Awa majwi akatutakametha kutwalelelaho kupangela Yehova mu kulongwa.

7. Yesu watakamethele vati tupositolo vendi, kwambatethelela na Petulu?

⁷ Tupositolo va Yesu valikananganene ngwavo iya wapwile wakama mukati kavo, oloni Yesu wavanangwile ngwendi vapandele kupwa va kulikehetha na kupwa vangamba, kethi vimyene embwe. (Luka 22:24-26) Petulu wathzivithile Yesu shwamwa ha vithimbu vyavingi. (Mateo 16:21-23; 26:31-35, 75) Yesu kavyanene kulikwatathana na Petulu, oloni  wamukwathele na kumutakametha, cho wamulekele ngwendi atakamethe vakwavo vandolome.—Yowa. 21:16.

8. Hezekiya wakanyamethele vati vimyata va vanu vendi va mu Yunda?

⁸ Thimbu kanda Yesu aije hano hathi, na kwakela vanu mwanja mukutakametha vakwavo, vangamba va Yehova va kulongwa vathzivukile theho ya kulitakametha umo na mukwavo. Va Asilya muvatondele kwakulwitha va Yunda, Hezekiya wakungulwile mashwalale na vanu, cho wavakanyamethele. “Cho, vanu vakanyamene omwo majwi endekele.”—Tandeni 2 Mithzimbu 32:6-8.

9. Livulu lya Yombi litulongetha vika ha kutakametha vakwetu?

⁹ Nameme Yombi wakele mu tuyando, oloni wanangwile vanalume vatatu vaje ‘vamuthzeyethele’ mangana vathzivuke mwakuthzembelekela vakwavo. Wavalekele ngwendi ngwe ikeye wapwile ngwe vakevo ngwe ‘wavatakamethele na kuvanangula na kwendeka kuli vakevo na kuvathzembeleka.’ (Yombi 16:1-5) Yombi vamutakamethele kuli Elihu na kuli Yehova.—Yombi 33:24, 25; 36:1, 11; 42:7, 10.

10, 11. (a) Mwafwa vika muna Njefeta vapandele kumutakametha? (b) Veya vatunapande kutakametha manene ano matangwa?

¹⁰ Munu mukwavo ivakanyamethele kuthañulu wapwile muna Njefeta wa mumbanda. Thimbu kanda aye na kulwa na va Amoni, Lyako Njefeta, wakulahethele Yehova ngwendi nga akahyana mu ndthzita, cho munu wa kulivanga akamushesha akamwana kuli Yehova mangana akapangele ku mbalaka. Munendi wa mumbanda ikeye wamusheshele omwo watundile ku ndthzita. Njefeta walinyengele manene. Oloni wanyungile chikumiyo chendi, cho watwalele uje munendi ku Shilo mangana akapangele ku Mbalaka mu kuyoya kwendi kwoshe.—Maako 11:30-35.

¹¹ Njefeta kwamukaluwilile kulinga ngocho, cho kwakaluwilile na munendi lalo, oloni uje munendi wathingimikile chikumiyo cha vaishe. (Maako 11:36, 37) Uje mumbanda walyanene kujeneka kushomboka na kukala na vana mangana lithzina lya ishe liye kulutwe. Vanu vapandele kumuthzembeleka manene. Mbimbiliya ngwayo: ‘Ngechi ha mwaka na mwaka ha matangwa awana, vambanda vakele na kuya na kushangathzala muna Njefeta wa ku Ngilyande.’ (Maako. 11:39, 40) Na vaka-Kilisitu vavathzike vaje vali na kupangetha mwamuvwa vuthzike vwavo ku “vipangi vya Mwene” navo tunapande kuvashangathzala na kuvatakametha—1 Koli. 7:32-35.

12, 13. Petulu ‘watakamethele vati vakwavo’?

¹² Ha vuthsiki vuje tai Yesu kanda athse, walekele kapositolo Petulu ngwendi: “Simoni, Simoni, Satana nalombo ngechi amyetheke yeni voshe, kwangununa vavavwa ku vavavi ngwe muka-kulima mwakangununa tiliku kulijungu. Oloni yange njinakulombelela Simoni, ngechi kukulahela kwove kethi kuhwe. Cho omwo ukatenguluka na kwiluka kuli yange, unapande kukakatakametha vakweni.”—Luka 22:31, 32.

¹³ Petulu ikeye wapwile ngundthzi mu chikungulukilo cha vaka-Kilisitu va mu thimbu ya tupositolo. (Ngala. 2:9) Watakamethele vandolome vendi ha Pentekosita na munima yolyo litangwa. Ku mamanethelelo a chipangi chendi, wathonekelele mukanda vakwavo vaka-Kilisitu. Wavatakamethele ngwendi: ‘Njinamithonekela mukanda ou waundondo, . . . njishaka kumitakametha na kumyana vukaleho ngechi oku kukekwo kutetela kwa  vuthunga vwa Njambi. Imaneni mbe mu kutetela.’ (1 Petu. 5:12) Mikanda ya Petulu ya kuhwiminina inathzembeleka vaka-Kilisitu ha myaka yaingi. Cho netu ituthzembeleka omwo tuli na kuvandamena kulishulithilila kwa vikulahetho vya Yehova.—2 Petu. 3:13.

14, 15. Mikanda ya kuhwiminina ya kapositolo Yowano inatakametha vati vaka-Kilisitu ha myaka yaingi?

¹⁴ Kapositolo Yowano nendi wapwile ngundthzi mu chikungulukilo cha vaka-Kilisitu va mu thimbu ya tupositolo. Mikanda yendi ije yendeka ha chipangi cha Yesu inatakametha vaka-Kilisitu ha myaka yaingi, cho ichili na kututakametha ano matangwa. Ikeye lika wathonekele majwi a Yesu aje amwethele ngwavo vandongethi va Yesu vakavathzivukila ha kulithzema umo na mukwavo.—Tandeni Yowano 13:34, 35.

¹⁵ Kuli vithimpi vikwavo vya vuthunga vili mu mikanda itatu ya Yowano. Nga tulithziva manene mulonga ha vuvi vatunalingi, cho tutakama omwo tuthzivuka ngwetu “maninga a Yesu, . . . atujeletha ku vuvi vwoshe.” (1 Yowa. 1:7) Cho lalo nga tutwalelelaho kulithziva ngwetu tuli na mulonga mu vimbunge vyetu, kukatutakametha kuthzivuka ngwetu “Njambi ikeye wakama manene kutuvakana chitakutaku chetu” nambe ngwetu vimbunge vyetu. (1 Yowa. 3:20) Yowano ikeye lika wendekele ngwendi: “Njambi wapwa chithzemo.” (1 Yowa. 4:8, 16) Mukanda wendi wa mu chivali nou wa mu chitatu ushangathzala vaka-Kilisitu vaje vali na kutwalelelaho “kuyoya mu vuthunga.”—2 Yowa. 4; 3 Yowa. 3, 4.

16, 17. Kapositolo Paulu washongangeyeye vika vaka-Kilisitu va kulivanga?

¹⁶ Mu chita cha myaka cha kulivanga, hamo Paulu ikeye watakamethele manene vandolome vendi. Chasholoka ngwe mu chita cha myaka cha kulivanga, tupositolo vavangi vaje vathalele mu Yelusalema vakevo vakele mu chivunga cha kutwamenena. (Vili. 8:14; 15:2)  Vaka-Kilisitu va mu Yundeya vakele na kwambulula vya Yesu Kilisitu ku vanu vaje vakulahelele ngwavo Njambi wapwa umo lika. Sipilitu ya tumine Paulu kuya na kwambulwila vanu va ku Loma vaje vakele na kulombela tumponya.—Ngala. 2:7-9; 1 Tima. 2:7.

¹⁷ Paulu wapangelele mu mitambela yaingi ya mu lifuti livatumbula ano matangwa ngwavo Turkey na Greece na Italy, cho washimbikile vikungulukilo vya vaka-Kilisitu na mu mitambela ya vaje kuvapwile Vayunda. Ava vaka-Kilisitu vavaha ‘vavapakethele kuli vanu vavo,’ cho kwapandele kuvatakametha. (1 Tesa. 2:14) Mu myaka ya kushwenya ku 50 C.E., Paulu wathonekelele chikungulukilo chachiha cha Tesalonika ngwendi: “Thimbu yoshe tukakandelela kuli Njambi hali yeni voshe, cho thimbu yoshe tukamitumbula mu malombelo etu. Omwo tukanuka ku mesho a Njambi yetu na Tate yetu vipangi vya kukulahela kweni na kundangana kwa chithzemo na chinyangavili cha kukola mbe.” (1 Tesa. 1:2, 3) Cho lalo wavashongangeyeye kulitakametha umo na mukwavo omwo wendekele ngwendi: “Litakametheni umo na mukwavo na kulikwatha umo na mukwavo.”—1 Tesa. 5:11.

18. Chivunga cha kutwamenena cha mu chita cha myaka cha kulivanga chatakamethele vati Filipu?

¹⁸ Chivunga cha kutwamenena cha mu chita cha myaka cha kulivanga chakele na kutakametha vaje vakele na kutwamenena hamo lika na vaka-Kilisitu voshe. Filipu mwakele na kwambulula vya Kilisitu ku Samaliya, chivunga cha kutwamenena chakele na kumutakametha na kumukwatha. Echi chivunga chatumine Petulu na Yowano, kukalombelela vaka-kukulahela vavaha mangana vatambule sipilitu ya kujela. (Vili. 8:5, 14-17) Filipu na vaje voshe vaka-kukulahela vavaha vavwahelelele manene omwo chivunga cha kutwamenena chavatakamethele.

19. Uje mukanda watundile ku chivunga cha kutwamenena wakwathele vati chikungulukilo cha vaka-Kilisitu va mu thimbu ya tupositolo?

¹⁹ Mu kwita kwa thimbu, chivunga cha kutwamenena chaliyongwele, na kumona indi vaka-Kilisitu voshe vaje kuvapwile Vayunda vapandele kutuhuka tahi ngwe muvalingile Vayunda kwetheketha na Lishiko lya Mosesa. (Vili. 15:1, 2) Muvatondethethele mu Vithoneka, Sipilitu ya kujela yavakwathele kunanguka ngwavo kutuhuka kukwapwile kwa theho, cho vathonekelele mikanda ku vikungulukilo mangana vavaleke vithinganyeka vya chivunga cha kutwamenena. Cho vamo va mu chivunga cha kutwamenena vatwalele ije mikanda ku vikungulukilo. Vika vyatundilemo? “Omwo vanu valavele uje mukanda, vavwahelelele manene ha muthzimbu wa kuvatakametha.”—Vili. 15:27-32.

20. (a) Chivunga cha Kutwamenena chinatakametha vati vandolome na vandokathzi mu lifuti lyoshe? (b) Chihula muka chitukakumbulula mu chilongetha chinatako?

²⁰ Ano matangwa, Chivunga cha Kutwamenena cha Vakaleho va Yehova, chikatakametha vaka-nanga ya Mbetele na vaje vali mu chipangi cha kulitila hamolika na vandolome na vandokathzi mu kaye koshe. Cho tukatakama ngwe muvatakamenene vaka-Kilisitu va mu chita cha myaka cha kulivanga muvathzivile muthzimbu wa kuvatakametha. Mu mwaka wa 2015, Chivunga cha Kutwamenena chatuwithile mbuloshuwa ya Mukutele ku Jehova, ije inatakametha manene vandolome na vandokathzi mu lifuti lyoshe. Kuma vaje vali na moko ya kutwamenena vakevo lika vanapande kutembwinina Yehova mu kutakametha vakwavo ndi? Tukakumbulula echi chihula mu chilongetha chinatako.