MWAKAWALI, vandolome vavangi vavangwile kupwa vakulunu na vaka-kupangela mukati ka Vakaleho va Yehova mu kaye koshe. Nga neni vamyangwile, cho munapande kuvwahelela na chipangi cheni chachiha chivanamyana.

Oloni vithimbu vimo munatha kulishoshomwena ha chipangi chivanamyana. Jason uje ivangwile kupwa mukulunu te achili mukwenje, wendekele ngwendi: “Muvanjangwile, njalishoshomwenene manene ha chipangi chivanjanene.” Mosesa na Njelemiya navo vathinganyekele ngwavo kuvatha kupanga chipangi chavanene Yehova. (Kutu. 4:10; Njele. 1:6) Nga neni mukalithzivi ngocho, cho vika vimikwatha mangana mutwaleleleho kupanga chipangi chivanamyana? Tuchithimutwiyeni ha mwanja wa ndongethi Timateo.—Vili. 16:1-3.

Timateo hamo wakele na myaka ya kukokela ku 20 omwo kapositolo Paulu wamwangwile ngwendi apange nendi. Ha kupwa mwanike, hamo Timateo wakwatakwatele ku mathinde mwafwa ya kuthinganyeka ngwendi katha kupanga chipangi chivamwanene. (1 Tima. 4:11, 12; 2 Tima. 1:1, 2, 7) Oloni mukwita kwa myaka, Paulu walekele vaka-chikungulukilo cha ku Filipu ngwendi: “Nga chinapu chithzango cha Mwene, njili na chinyangavili [lilavelelo] cha kutuma Timateo vwathi kuli yeni . . . Kunjethi na munu wa kulifwa nendi.”—Fili. 2:19, 20.

Vika vyalingithile Timateo apwe mukulunu wa kulitila? Tuchithimutwiyeni ha vyuma vya kupwa 6 vitulilongetha kuli ikeye.

1. Wathzemene manene vanu. Paulu walekele vandolome va ku Filipu ngwendi: “[Timateo] ali na chishota mbunge hali yeni.” (Fili. 2:20) Timateo wathzemene manene vanu. Washakele kuvakwatha ku sipilitu, cho walyanene na mbunge yendi yoshe na kuvakwatha.

Kumwapandele kupwa ngwe muka-kwendetha minyau wa kwimana mbunge uje naka lika mbunge kwaya na kuthethza vanu vaje vashaka kulonda mu munyau wendi. Ndolome William uje napu mukulunu ha myaka ya kutuvakana 20 wanangwile vakulunu na vaka-kupangela vaje vavanangula ololo ngwendi: “Thzemeni vandolome veni. Nangukeni vujene vwavo, kethi muvathindiye kukavangeya lika mashiko.”

2. Wathzemene manene vyuma vya ku sipilitu. Paulu mwethekethele Timateo ku vakwavo vakeleko ha thimbu ije, wendekele ngwendi: “Munu na munu ali na kulimwena vyendi vavenya, kethi ha viñanda vya Yesu Kilisitu.” (Fili. 2:21) Paulu wathonekele ou mukanda tai ali Loma. Wanangukile ngwendi vandolome va muje mu nganda vathzethzamene manene na vyuma vya ku muvila. Kuvakele manene mbunge ku vyuma vya ku sipilitu. Oloni Timateo ikeye wathzethzamene na vyuma vya ku sipilitu. Omwo thimbu yetele ya kuvwethzelela ku vipangi vyendi vya kwambulula muthzimbu wauvwa, wamwethele sipilitu ngwe ije yakele nayo Isaya uje wendekele ngwendi: “Yange unoye. Njitumeni.”—Isaya 6:8.

Mwatha kupanga vati vipangi vyeni vya ku muvila na vipangi vyeni vya ku sipilitu? Cha kulivanga thzivukeni vipangi vije vyapwa vya theho manene. Paulu wendekele ngwendi: ‘Anguleni vyavivwa.’ (Fili. 1:10) Twamekeni vipangi vya Njambi kulutwe. Chamuchivali, athiwitheni vuyoye vweni. Echeleni vyuma  vije vyatha kumiviyithila thimbu na ndthzili yeni. Paulu wanangwile Timateo ngwendi: “Tewa ku mashungu a vukwenje, pangela lika vuthunga na kukulahela na chithzemo na kwoloka.”—2 Tima. 2:22.

3. Wapangele na ndthzili chipangi cha Njambi. Paulu wanukithile vaka-Filipu ngwendi: “Oloni yeni vavenya mwathzivuka vatijo Timateo nasholola vukaleho vwendi, ikeye napu ngwe mwana ali na kupanga hamo na ishe ha muthzimbu wauvwa.” (Fili. 2:22) Timateo kakele na vulwa. Wapangele na ndthzili hamo lika na Paulu, cho oku kwatakamethele vuthamba vwavo.

Ano matangwa, vipangi vinalithala manene mu munga ya Njambi. Mupwa va kuvwahelela kulinga evi vipangi, cho kumilingitha lalo mulikwatathane na vandolome na vandokathzi veni. Ngechi, lyakeleni chilengo cha ‘kupanga na ndthzili mu vipangi vyeni kuli Mwene.’—1 Koli. 15:58.

4. Wapangethele vyuma vyalilongethele. Paulu wathonekelele Timateo ngwendi: “Yove unakavangeya kulongetha kwange na futithi yange na vutumbe vwa kuyoya kwange, unanongonona kukulahela kwange na kuthimpa kwange na lukakateya lwange.” (2 Tima. 3:10) Timateo vamwanene vipangi vyakama mwafwa wakele na kupangetha vyuma vyalilongethele.—1 Koli. 4:17.

Kuli munu umo akaminangula ku sipilitu ndi? Nga wahi, cho shakethzekeniko umo. Tom, uje napu mukulunu ha myaka yaingi wendekele ngwendi: “Mukulunu umo uje wapangele echi chipangi ha myaka yaingi walikutile nange vuthamba na kunjilongetha vyavingi. Njakele na kumwihula mwakulingila vyuma vimo, cho njapangethele vinangulo vyendi. Oku kwanjilingithile njipange chipangi cha Njambi na mbunge imo.”

5. Watwaleleleho kulilongetha ikeye vavenya. Paulu wanangwile Timateo ngwendi: “Linyunge yove vavenya mu kuyoya kwa vunjambi.” (1 Tima. 4:7) Muka-kweha, akakala na muka-kumulongetha, oloni nendi napande kulilongetha ikeye vavenya. Paulu washongangeyeye Timateo ngwendi: “Ana thimbu yove ku kulava lijwi kuli vanu na ku kwambulula na ku kulongetha. . . . Panga manene ha vyuma evi, cho lilambule yove vavenya ku vyuma evi, ngechi vipangi vyove visholoke kuli voshe.”—1 Tima. 4:13-15.

Neni munapande kuvwethzelela ku vutongwe vweni. Koleni ku sipilitu na kuthzivuka muili na kupangelamo munga ya Njambi ano matangwa. Cho lalo kumwapandele kulikulahela manene na kuthinganyeka ngweni muthzivuka vyuma vyavingi. Oloni munapande kutondethetha nga kuli ñanda imo inasholoka. Munapande ‘kulinyunga yeni vavenya na kwilula vilongetha vyeni’ ngwe mwalingile Timateo.—1 Tima. 4:16.

6. Wakulahelele sipilitu ya Yehova imutwamenene. Paulu wanukithile Timateo ha chipangi chendi cha kwambulula ngwendi: ‘Nyunga vyuma vyavivwa vije vivanakundika ha ndthzili ya [sipilitu] ya kujela ije ili na kuyoya muli yetu.’ (2 Tima. 1:14) Timateo wapandele kukulahela sipilitu ya Njambi mangana imukwathe kupanga mwamuvwa chipangi chivamwanene.

Donald uje napu mukulunu ha myaka yaingi, wendekele ngwendi: “ Vakulunu na vaka-kupangela vanapande kutakametha vuthamba vwavo na Njambi. Nga valinga ngocho, cho ‘vavavwethzelela ku ndthzili’ yavo. Kuvakwatha lalo Valikwatathane mwamuvwa na vandolome vavo nga valomba sipilitu ya Njambi na kusholola vushuka vwa ku sipilitu.”—Myatho 84:7; 1 Petu. 4:11.

Kukatutakametha manene kumona vandolome vavangi vavanangula kupwa vakulunu nambe vaka-kupangela omwo vakola ku sipilitu. Jason itunavanga kwendeka, wendekele ngwendi: “Kutunda lika havanjangwilile kupwa mukulunu njalilongetha vyuma vyavingi, cho Njikapanga echi chipangi na mbunge imo lika. Ha thimbu ino, njili na kulikuwa echi chipangi, cho njikamono ngwange kuchilinga kunapu kuvethzika kwakama.”

Mutwalelelaho kukola ku sipilitu ndi? Lyangwileni kukavangeya mwanja wa Timateo. Nga mulinga ngocho, cho Njambi amipangetha mangana mukwathe vanu vendi.