Mithzimbu yathonekele Mateo kukundama ku kuthemuka na maputukilo a vuyoye vwa Yesu vyalithethze na mithzimbu yathonekele Luka, mwafwa kuvakele na viyongola vya kulifwa.

Viñanda vyathonekele Mateo vyakundamene kuli Yosefa. Wathonekele vyalingile Yosefa omwo wamwene chikute cha Maliya, nomwo kangelo walekele Yosefa vya chikute cha Maliya mu chilota novyo vyalingile Yosefa. (Mateo 1:19-25) Mateo watwaleleleho kuthoneka vya chilota cha lotele Yosefa omwo kangelo wamulekele kutewela ku Ingito na vungendthzi vwendi na nanga yendi na thimbu ya mulekele kangelo ngwavo eluke ku lifuti lya Isalele na viyongola vyakele navyo vya kukakala na nanga yendi mu Nazaleta. (Mateo 2:13, 14, 19-23) Mu tupetulu twakulivanga twa mukanda wa Mateo, lithzina lya Yosefa valitumbula lwakupwa 8, oloni lithzina lya Maliya valitumbula lika luwana.

Oloni Luka wathimutwiyiye manene ha vuyoye vwa Maliya. Wathimutwiyiye vya thimbu oyo kangelo Ngambiliyele washolokele kuli Maliya na vungendthzi vwa Maliya vwa kuya kuli Elizaveta nomwo Maliya washangathzalelemo Yehova. (Luka 1:26-56) Luka wathonekele majwi endekele Simone kuli Maliya kukundama ku thimbu ya kuyanda kwa Yesu. Omwo wathonekele vya vungendthzi vwa nanga ya Maliya vwa kuya ku tembele na Yesu, te ali na myaka 12, Luka wathonekele majwi a Maliya, kathonekele majwi endekele Yosefa. Luka wamwethele lalo ngwendi vyoshe vije vyalingiwile vyakundamene manene Maliya. (Luka 2:19, 34, 35, 48, 51) Mu tupetulu tuvali twa kulivanga mu mukanda wa Luka, lithzina lya Maliya valitumbula lwakupwa 12, oloni lithzina lya Yosefa valitumbula lika lutatu. Twamono ngwetu Mateo wathonekele manene vya vuyoye vwa Yosefa, oloni Luka wathonekele ha vipangi na vyuma vyaliwanene navyo Maliya.

Vyuma vyathonekele Mateo na Luka kukundama ku chikota cha Yesu navyo vyalithethzele lalo. Mateo wathonekele vya chikota cha Yosefa na kumwetha ngwendi Yesu muna Yosefa wa kulela, ikeye akashwana ha vumwene vwa Ndaviti. Mwafwa vika? Mwafwa Yosefa wathemukilile mu chikota cha Solomoni, muna Ndaviti. (Mateo 1:6, 16) Oloni Luka wathonekele vya chikota cha Maliya na kumwetha ngwendi Yesu shwana mpundu, “ngwe ku chithemwa chendi cha vunu” kutundilila mu chikota cha vumwene vwa Ndaviti. (Loma 1:3) Mwafwa vika? Maliya wapwile wa mu chikota cha Mwene Ndaviti mwafwa wathemukile kuli Natane muna Ndaviti. (Luka 3:31) Mwafwa vika Luka kathonekele ngwendi Maliya wapwile muna Heli? Mwafwa kuya na lishiko, vaka-kuthoneka vathonekele chikota cha vanalume lika. Omwo Luka wathonekele ngwendi Yosefa wapwile muna Heli, walumbunwine ngwendi Yosefa wapwile tolomweno ya Heli.—Luka 3:23.

Vyuma vyathonekele Mateo na Luka ha chikota cha Yesu vitukwatha tuthzivithithe ngwetu ikeye Mesiya ivapolofwetele. Vafaliseo na Vasanduki navo vathzivukile mwamuvwa chikota cha Yesu. Na matangwa ano mithzimbu yathonekele Mateo na Luka ikatakametha likulahelo lyetu, cho eyi mithzimbu inapu vukaleho vuje vutukwatha kukulahela ngwetu vyuma vyanatukulahetha Njambi vikalishulithilila.