MU NOVEMBER 1932, kwalingiwile vyuma vimo mu Nganda ya Mexico. Mu ngonde eyi vene vakele malaiti mu vitapalo vya muje mu nganda, cho vanu vavangi vakathamene. Oloni litangwa limo, kuli vyuma vikwavo vyalingiwile. Vaka-mithzimbu vaile na makamela avo kuikemanena kumboyo kukavandamena Joseph F. Rutherford uje wapwile ntwama wa Watch Tower Society ha thimbu ije. Vakaleho va mu nganda ya Mexico vavandamenene kutambula Ndolome Rutherford uje wethzile ku chiwano cha lifuti lyoshe cha matangwa atatu.

Mangazini ya The Golden Age yendekele ngwayo: “Echi chiwano chinapu cha kulitila, cho vakachanuka ha myaka yaingi muno mu Mexico na kuchithimutwiya.” Vika vyanenethele ngwavo chije chiwano chithsimane, nameme vanu vakeleko vapwile lika 150?

Thimbu kanda echi chiwano chilingiwe, kwakele lika vaka-kwambulula vavandondo mu Mexico. Kushwa mu 1919, vakele na kulinga viwano, oloni nambala ya vikungulukilo yakele na kutepuluka. Muvashokolwele ofisi ya munango mu Nganda ya Mexico mu 1929, kwamonekele ngwe vyuma vyenda mwamuvwa. Oloni kwasholokele vukalu vumo. Omwo kwakele mutambi uje wendekele ngwavo vaka-kwambulula kuvapandele kupandakana chipangi cha kwambulula na mingotho, painiya umo waluvalele, cho walikelele vupainiya na kulimungila kachivunga kendi ka vaka-kulilongetha Mbimbiliya. Ha thimbu vene eyi ntwama wa munango nendi walingile mulonga, cho vamutundithileho na kwingithaho weka. Vandolome na vandokathzi va kulongwa va mu Mexico vathzeyele manene.

Ndolome Rutherford watakamethele ava vandolome na vandokathzi na viñanda vivali vyendi vya ha chiwano na vikwavo vitanu vyendekele ha chithandthzi. Olu lwapwile lwa kulivanga kuli vaka-Mexico voshe kuthziva muthzimbu wauvwa ha chithandthzi. Munima ya chiwano, ntwama wamuha wa munango watakamethele na kunoneka mwamuvwa vipangi, cho Vakaleho vapangele na ntwima. Yehova wavavethzikithile.

Mu mwaka wateleko kwakele viwano vivali vya mutambela, chimo mu nganda ya Veracruz ije yakala kungenge ya lishali, chikwavo chakele mu Nganda ya Mexico. Kufwitangana kwa vandolome mu chipangi cha kwambulula kwanenele vyuma vyavivwa. Mu 1931 kwakele vaka-kwambulula va kupwa 82. Munima ya myaka 10, kwalivwethzelelele vaka-kwambulula vavangi. Ku Chiwano chakama chije chakele mu Nganda ya Mexico mu mwaka wa 1941, kwakungulukile vanu va kweta ku 1,000.

Mu 1943, Vakaleho valipatekele mapapelo a kulanya vanu ku chiwano chije chalingiwile mu vinganda 12 vya mu Mexico, chije chakele na mutwe wa kwendeka ngwavo: “Free Nation” (Lifuti lya Kupatuka). * Valipatekelewo muthingo na kunyengeletha imo ha nulo ikwavo cho ku mwongo. Eyi ikeyo ngila  ivapangethele Vakaleho mu kulanya vanu kushwa mu mwaka wa 1936.

Mangazini ya La Nación yendekele ha vuvwa vwatundile mu kupangetha aje mapapelo a kulanya ngwayo: “Ha litangwa lya kulivanga lya [chiwano], [Vakaleho] vavalekele kulanya vanu vavangi. Litangwa lyateleko vanu vapwile vavangi manene, cho mwela wa chiwano wakehele.” Evi vipangi vya kulanya vanu vyaluvalethele vaka-Katolika, ngechi vashangumukile kulwitha Vakaleho. Nameme vavalwithile, ava vandolome na vandokathzi kuvalikelele kulanya vanu. Mangazini ya La Nación yendekele lalo ngwayo: “Mu nganda mwoshe vamwene . . . vanalume na vanakathzi vanalipateka ‘mapapelo’ a kulanya vanu ku chiwano.” Ha liputa limo lyomwo mu mangazini vamwethele chikupulo cha vandolome vali mu tapalo ya mu Nganda ya Mexico. Haje ha chikupulo vathonekeleho ngwavo: “Mu vitapalo mwashulu vanu.”

Mu myaka oyo Vakaleho vavangi valyanene mwakama ha kuya ku viwano vije vyakele na kulingiwa mu Mexico. Vandolome na vandokathzi vavangi vakele ku myela ya kulyala kuje kukwetile minyau nambe kumboyo. Chikungulukilo chimo chathonekele ngwacho: “Kuno kwimbo lyetu kwakala lika ma telengilafu.” Vandolome na vandokathzi vakele na kwenda na mendi nambe kulonda tumelo ha matangwa amengi athinoni vakalonde kumboyo ije ivatwala ku mutambela wa chiwano.

Vakaleho vavangi vapwile vihutu, vathele kufwetela lika vungendthzi vwa kuya ku chiwano. Vakaleho vavangi vakele na kwetela kuli vandolome na vandokathzi vavo. Vamo vakele na kulala mu Vinjuvo vya Vumwene. Thimbu imo, vandolome na vandokathzi va kupwa 90, vaketelele ha munango, cho vakanene “munu na munu makatoni a kutongonona a kupwa 20 ha kulala.” Yearbook imo yendekele ngwayo ava vangendthzi valithzivile ngwavo haje ha makatoni hapwile “ha kuvothsiya na kushaluka kutuvakana kulala ha samende.”

Vakaleho vamo vavwahelele ha kulyana kuya ku chiwano cha vaka-Kilisitu. Ano matangwa, omwo nambala ya vaka-kwambulula ili na kulivwethzelela mu Mexico, vandolome na vandokathzi anga vachili neyi sipilitu ya kulyana. * Muthzimbu umo watundile ku munango mu 1949, wendekele hali vandolome va ku Mexico ngwawo: “Kukaluwa kwa vyuma kukwathzeyethele chithzemo chavo ku vyuma vya ku sipilitu, mwafwa munima ya chiwano na chiwano vakathimutwiya ha vyuma vivanalilongetha. Cho ava vandolome vakehula ngwavo: Tangwa lika tukakala na chiwano chikwavo?” Na matangwa ano, eyi ntwima hanga vachili nayo. Eyi inapu mithzimbu yetu ya kunima ya ku Central America.