Munatanda mwamuvwa mangazini a ololo a Kaposhi ka Kukengela ndi? Tuchimoneni indi mwatha kukumbulula evi vihula:

Mwafwa vika vithemi vaje vanajalukila kweka vanapande kwangula mwamuvwa ndaka mangana vakwathe vana vavo ku sipilitu?

Vana veni vanatha kulilongetha ndaka ya ku mutambela kumunajalukila omwo vaya ku sikola nomwo veha na vakwavo. Kulilongetha vindaka vikwavo kuvakwatha manene. Vithemi vanapande kunanguka ndaka ivathzivithitha mwamuvwa vana vavo mangana vatakame ku sipilitu, omwo valikwatathana hamo lika na chikungulukilo chije chikapangetha ndaka yomwo mu chitingitingi nambe ndaka yavo ya chithemwa. Vithemi vaka-Kilisitu vanapande kutakametha tahi likulahelo lya vana vavo.—w17.05, lipu. 9-11.

Yesu wehwile Petulu ngwendi: “Wanjithzema kutuvakana ava ndi?” Cho omwo wendekele ngwendi “ava” walumbunwine vika? (Yowano 21:15)

Hamo Yesu walumbunwine vithi vaje vakele kuyehi nendi nambe chipangi cha kuthsiya vithi. Munima ya kuthsa kwa Yesu, Petulu welukilile ku chipangi chendi cha kuthsiya vithi. Vaka-Kilisitu vanapande kumona ngwavo vipangi vyavo vya ku muvila kuvivonowetha kupangela Njambi.—w17.05, lipu. 22-23.

Mwafwa vika Avilahama walekele munakathzi wendi aleke vaka-Ingito ngwendi wapwile ndokathzi yendi? (Kusha. 12:10-13)

Kwendeka lika vuthunga, Sala wapwile ndokathzi ya Avilahama. Ngwe Sala wendekele ngwendi wapwile munakathzi wa Avilahama ngwe Avilahama vamuthsiyile na kwonowetha mbuto ije ivamukulahethele kuli Njambi.—wp17.3, lipu. 14-15.

Vika vyalingile Elias Hutter mangana akwathe vaje vashakele kulilongetha ndaka ya Chihevelu?

Wakwathele vana va sikola vathzivuke kulithethza kwakele ha majwi mpundu a Chihevelu a mu Mbimbiliya na tumajwi twakuvwethzelelako, tuje twakele ku maputukilo na kumamanethelelo a lijwi. Wakele na kuthoneka lijwi mpundu mu vulombo vwa kuthzivala manene, cho tumajwi twa ku maputukilo na kumamanethelelo katuthonekele mu vulombo vwa kuthzivala manene. Eyi ngila ikeyo lalo ivapangethele na mu kuthoneka Mbimbiliya ya New World Translation of the Holy Scriptures—With References ku majwi a kwinikila.—wp17.4, lipu. 11-12.

Vyuma muka vyanapande kwanuka muka-Kilisitu ha kukala na vuta vwa tuhya mangana alyamene ku vakwavo vanu?

Napande kwanuka ngwendi: Njambi wamona kuyoya kupwa kwa theho. Yesu kalekele vaka-kumukavangeya ngwendi vakale na mikwale ya kulyamena nayo. (Luka 22:36, 38) Tunapande kufula mikwale yetu na kuipwitha matemo. Kuyoya kwapwa kwa theho manene kutuvakana vufuko. Tushaka kuthingimika vitakutaku vya vakwetu na kuvakela mwanja wauvwa. (2 Koli. 4:2)—w17.07, lipu. 31-32.

Mwafwa vika viñanda vyathonekele Mateo na Luka kukundama ku vuyoye vwa Yesu vyalithethzele?

Mateo wathonekele vyalingile Yosefa omwo wamwene chikute cha Maliya, nomwo kangelo walekele Yosefa atewele ku Ingito, na thimbu yakeluka. Luka wathimutwiyiye manene ha vuyoye vwa Maliya. Chakumwenako, wendekele ha vungendthzi vwa Maliya vwa kuya kuli Elizaveta na vyuma vyalingile omwo Yesu wathalele ku tembele te achili mwanike.—w17.08, lipu. 32.

Vyuma muka vyashakele kwonowetha Mbimbiliya kukalako?

Mu kwita kwa thimbu, majwi na lumbunwithi yawo vikatenguluka. Vithimbu vimo vaka-fulumende vakele nakwangwila vanu vavo ndaka ivapandele kulikwathetha. Vanu vavangi valwithile manene vaje valumbunwine Mbimbiliya mu vindaka vivakele na kulikwathetha manene vanu.—w17.09, lipu. 19-21.

Kuma twakala na kangelo muka-kutunyungilila ndi?

Embwe. Yesu wendekele ngwendi tungelo twa vandongethi vendi vakele mwilu oku vanatala ku mesho a Njambi. (Mateo 18:10) Oloni Yesu walumbunwine ngwendi tungelo vakaka mbunge umo na umo wa vandongethi vendi, cho kuvethi kuvanyungilila mu kukomoketha.—wp17.5, lipu. 5.

Chithzemo muka chije chapwa cha theho manene?

Chithzemo chivatumbula ngwavo a·gaʹpe chije chemana ha vinangulo vya mu Mbimbiliya chikecho chapwa cha theho manene. Chinambatethelela na kuthzivila vakwetu mema ku mbunge na ngothzi. Cho lalo, echi chithzemo cha vuthunga chikalisholola mu vilinga vya kukwatha vakwetu na mbunge yetu yoshe.—w17.10, lipu. 7.