Njathemukile mu 1937, ha lihya livatumbwile ngwavo kolkhoz lije lyakala kuyehi na mbonge ya Tokmok mu lifuti lya Kyrgyzstan. Vaka-nanga yange vapwile Vakyrgyz, cho twakele na kwendeka Chikyrgyz. Vithemi vange vapwile vaka-kupanga mu lihya lije livatumbwile ngwavo kolkhoz, cho vakele na kupanga kushwa mutondo kutwala mangwethzi. Vaje vakele na kupanga haje ha lihya vakele na kuvana vyakulya thimbu yoshe, oloni vakele na kuvafweta vimbongo lumo ha mwaka. Oku kwalingithile vanana vawane vukalu ha kutulela, yange na shongo yange wa munakathzi. Njakele lika ku sikola ha myaka itanu, cho njatundileko na kushangumuka kupanga thimbu yoshe ha lihya lije livatumbwile ngwavo kolkhoz.

Mu mutambela mutwakele mwakele manene vuhutu, cho vanu vakele na kufwitangana manene mangana vawane vyuma vya kulikwathetha mu vuyoye. Munjapwile njimukwenje, kunjathinganyekele manene ha vuyoye vwange vwa kulutwe. Kunjathinganyekele ngwange kuthzivuka Yehova Njambi na viyongola vyendi kwatha kutengulula kuyoya kwange. Muthzimbu wauvwa wetele ku vanu va mu Kyrgyzstan mu ngila ya kukathametha. Vanu va ku kunto ya Kyrgyzstan vakevo vashangumukile kuthziva ou muthzimbu wauvwa.

Vanu va mu Kyrgyzstan vashangumukile kulilongetha vya Yehova Njambi mu ma 1950. Kwapwile kwakukalu kulongetha vanu va mu Kyrgyzstan vya Njambi. Mwafwa vika? Mwafwa lifuti lyavo lyakundamene ku Union of Soviet Socialist Republics (USSR), cho vathzivukile manene vya vupolitiki. Vakaleho va Yehova vaje  vakele mu mafuti a USSR kuvalikovelethele mu viñanda vya vaka-kaye. (Yowa. 18:36) Ngechi, vavayandethele ngwe muvakele na kuyandethela vaka-kulwitha fulumende. Oloni vaka-fulumende kuvatha kwonowetha vanu va vimbunge vyavivwa kulilongetha Lijwi lya Njambi. Mu vuyoye vwange, njalilongethele ngwange kuli Yehova “vyuma vyoshe vyavyathi.”—Mako 10:27.

Kupaketha Vakaleho va Yehova kwalingithile vuthunga vwete mu Kyrgyzstan. Mwafwa vika? Mwafwa vitothzi va fulumende ya USSR vakele na kuvatwala ku vundthzinda ku Siberia. Omwo vavapatwile, vwingi vwavo vakele na kuya ku Kyrgyzstan, cho vamo te vanalilongetha laja vuthunga. Chindthzinda umo uje watwalele vuthunga ku Kyrgyzstan wapwile Emil Yantzen, uje wathemukilile mu Kyrgyzstan mu 1919. Emil vamutwalele ku chilombo cha kuyandethela, cho wakawaneneko Vakaleho va Yehova. Wakalilongethele vuthunga, cho welukile kwimbo lyavo mu 1956. Emil wakukele kuyehi na nganda ya Sokuluk ije yakala mu mutambela mutwakele. Chikungulukilo cha kulivanga mu Kyrgyzstan chakele mu Sokuluk, cho vachishimbikile mu 1958.

Munima ya mwaka umo, Victor Vinter wajalukilile ku Sokuluk. Ou ndolome wa kulongwa vamuyandethele manene. Ha kulivanga, vamukutile myaka itatu. Cho lwa mu chivali va mukutile lalo myaka itatu, mwafwa ya kuvyana kulikoveletha mu viñanda vya vaka-kaye. Vamukutile lalo myaka 10 mu kamenga, cho wakele lalo myaka itanu mu vundthzinda. Oloni awa mapaketho kuonowethele vanu kulilongetha vuthunga.

Mu 1963 mu Kyrgyzstan mwakele Vakaleho va kweta ku 160, cho vwingi vwavo vatundile ku Germany na ku Ukraine na ku Russia. Umo wavo wapwile Eduard Varter, uje wapwile chindthzinda, ivambwitikilile ku Germany mu 1924. Vaka-Nazi vatwalele Eduard ku chilombo cha vafunge mu ma 1940, cho munima ya myaka yaindondo vaka-fulumende ya USSR navo vamutwalele mu vundthzinda. Mu 1961, ou ndolome wa kulongwa waile ku mbongi ya Kant ije yakala kuyehi na nganda yetu.

Elizabeth Fot, ngamba ya Yehova wa kulongwa nendi wakele mu Kant. Wakele na kuliyoyethela ha kutunga vithzalo. Ou ndokathzi wakele na vutongwe vwa kutunga, ngechi vandotolo na valongethi vakele na kulanda vithzalo kuli ikeye. Umo wa vaje vakele nalanda vithzalo kuli uje ndokathzi wapwile Aksamai Sultanalieva, uje washombokele ku munalume muka-kuthompetha vanu mu nkuta. Aksamai mwakele na kwija na kulanda vithzalo kuli Elizabeth, wakele na kwihula vihula vya kukundama ku vuyoye na vyuma vikalingiwa nga munu nathsi. Elizabeth wamukumbulwile vihula vyoshe kupangetha Mbimbiliya. Kukapwa muje, Aksamai nendi wapwile muka-kwambulula muthzimbu wauvwa na ntwima.

Ha thimbu ije, Nikolai Chimpoesh wa ku Moldova, vamwangwile kupwa ntwama wa kuthzenguluka, cho wapangele echi chipangi ha myaka 30. Nikolai kakele lika na kwendela vikungulukilo, oloni wakele lalo na chipangi cha kuthoneka mavulu na kuwapangethzela vanu. Vaka-fulumende vanangukile echi chipangi chakele na kulinga. Eduard Varter wanangwile Nikolai ngwendi: “Nga vaka-fulumende vakwihula, cho unapande kuvakumbulula ngwove awa mavulu akatundu ku chikota chetu, ku Brooklyn. Unapande kutala kapokola wa vaka-KGB shwi mu mesho. Kuwapandele kuthziva lyova.”—Mateo 10:19.

Munima ya kuthimutwiya na Eduard, Nikolai vamukwatele vaka-KGB na kumutwala ku ofisi yavo yakama ya mu Kant. Wendekele vyuma vyakaliwanene navyo kuje kuvamutwalele ngwendi: “Kapokola wanjihwile kutukatunditha mavulu atukapangetha. Njamulekele ngwange akatundu ku Brooklyn. Echi chikumbululo  chamwonowethele vya kwendeka. Wanjilekele ngwendi njiye, cho kanjithanene lalo.” Vaje Vakaleho va kuthimpa vatwaleleleho kwambulula muthzimbu wauvwa mu nganda yetu ya ku kunto ya Kyrgyzstan. Mutwalilongethele vya Yehova hamo lika na vaka-nanga yange mu ma 1980, mwevwangwe te nalilongethavyo laja.

Mairambubu wakele ku Naryn, mutamba umo wa mu Kyrgyzstan. Litangwa limo mu August 1974, wethzile na kumona shongo yange wa munakathzi, cho kukekwo kunjamuthzivukilile. Njamuthzemene oho vene. Cho olyo vene litangwa likelyo litwalyambatele.

Mu January 1981, Mairambubu wathzivile aje majwi atunendeka ku maputukilo a ino ñanda omwo wakele na kuya ku chitanda mu mbasi. Mwevwange washakele kulilongetha vyavingi, ngechi wehwile uje munakathzi lithzina lyendi na kumulomba keyala yendi. Wamulekele ngwendi ikeye Apun, oloni walingile mu kunyanyama, mwafwa mu ma 1980 vipangi vya Vakaleho vavishokele. Apun kanene Mairambubu keyala yendi, oloni ikeye wambatele keyala yetu. Munakathzi wange wavwahelele omwo wetele ha njuvo.

Mairambubu wendekele ngwendi: “Njinathzivi muthzimbu wauvwa manene. Munakathzi umo nanjileke ngwendi, vuthsi ololo vuhwa. Cho lalo vikashama vikakala na vanu.” Yange njathzivile lika ngwe vithimo vya ngocho. Njamukumbulwile ngwange: “Vandamena tahi achije mangana twakuthzive vyavingi.”

Munina ya vingonde vitatu, Apun wethzile ku njuvo yetu. Kutundoho, vandokathzi vakwavo vashangumukile kutwendela, cho twathzivukile Vakaleho vaje vapwile va Kyrgyz. Vaje vandokathzi vatulongethele vya Yehova na viyongola vyendi. Vatutandelele mu livulu lya From Paradise Lost to Paradise Regained. * Ha kuwana ngwe eli livulu lyapwile lika limo mu nganda ya Tokmok, cho twalithononwene na mavoko.

Twashangumukile kulilongetha vupolofweto vuje vuli ku Kushangumuka 3:15. Ovu vupolofweto vukalishulithilila kwitila muli Yesu uje wapwa Mwene wa Vumwene vwa Njambi vwa Vumesiya. Ou unapu muthzimbu wauvwa wanapande kuthziva munu na munu. Cho oku kwatushongangeya tuwambulwilile vakwetu. (Mateo 24:14) Vuthunga vwa mu Mbimbiliya vwatengulwile kuyoya kwetu mu vwathi vwathi.

Ndolome wa mu Tokmok watulanyele ku chilika cha vulo. Yange na munakathzi wange twamwene ngwetu Vakaleho vakalingi vyuma mu kathingimiko. Kuje ku  chilika kukwakele vwala, cho vanu vakeleko vakele na kulinga vyuma mu kathingimiko. Vanu vacho valithethzele na vaje vatwakele na kumona ku vilika vikwavo vya vulo vaje vakele na kupenda vwala na kulinga vyuma vyavivi na kwendeka vakwavo mwamuvi.

Twakele na kuya ku viwano vya vaka-Kilisitu mu Tokmok. Evi viwano twakele na ku vilingila mushwata nga kunaki mwamuvwa. Vandolome na vandokathzi vathzivukile ngwavo tupokola vali na kuvashakethzeka, ngechi vangwile ndolome avaleke nga tupokola vali na kwija. Mu ndombo, twakele na kulingila viwano vyetu mu njuvo. Vithimbu vimo, tupokola vakele na kwija ku njuvo itwalikungulwilile mangana vamone vitwakele na kulinga. Mu July 1982, yange na mwevwange Mairambubu vatumbwikile mu ndonga ya Chüy, ngechi tuvavoshe twapandele kupwa va kunyanyama. (Mateo 10:16) Vandolome vakele na kwija muvundondo, cho twalikungulwilile mushwata. Twembile myatho ya Vumwene na kutolilila ku ñanda ya chimbwitiko.

Mu 1987, ndolome umo wanjilekele ngwendi njikalimone na munu wa ku Balykchy, uje watondole kulilongetha vya Njambi. Kutunda hembo lyetu kuya kuje kwakele owo munalume, apwile maola awana, kwenda mu kumboyo. Munima ya kwambulwila vithimbu vyavingi mu Balykchy, twawanene vanu vavangi vaje vavwahelelele kulilongetha vya Njambi. Eyi yapwile thimbu yaivwa ya kuvwethzelela ku chipangi chetu cha kwambulula.

Yange na mwevwange Mairambubu twakele na kuyayaya lwalwingi ku Balykchy. Vithimbu vimo twakele na kukothela kuje vene, cho kumamanethelelo a chalumingo, twekele na kuya na kwambulula na ku viwano. Vanu vavangi vakele na kutambula manene mavulu etu. Mutwakele na kutunda ku Tokmok, twakele na kwambatela mavulu mu vinjeke vivakele na kwambatela vukola, vije vivatumbwile ngwavo mishok. Vinjeke vivali vya kushula vya mavulu vyakele na kuhwa vwathi. Mutwakele na kuya ku Balykchy, twakele na kwambulwila na vanu vaje vatwakele na kwenda navo mu kumboyo.

Mu 1995, vashimbikile chikungulukilo chachiha mu Balykchy, munima ya myaka 8 itwakele na kwambulwile muje mu mbongi. Twakele na kufweta vimbongo vyavingi kutunda ku Tokmok na kuya ku Balykchy. Vimbongo vitwakele navyo vyapwile vyavindondo, cho twathele vati? Ndolome umo wakele na kutwana vimbongo vitwakele na kulikwathetha. Yehova wamwene ntwima yetu ya kwambululwila vanu muthzimbu wauvwa, ngechi watushokolwelele “vinjanena vya mwilu.” (Mala. 3:10) Njalimwena ngwange vyuma vyoshe vyapwa vyavyathi kuli Yehova.

Mu 1992, vanjangwile kupwa mukulunu. Cho yange wa kulivanga kupwa mukulunu ku Vakyrgyz mu lifuti. Mu chikungulukilo mutwakele cha ku Tokmok, twalikuwile vipangi vyavingi. Twakele na kulongetha vana va sikola vavangi vaje vakele na kwendeka Chikyrgyz, vaje vakele ha masikola akama. Umo wa vaje vatwakele na kulongetha ali na kupanga mu Komiti ya Munango, cho vavali vapwa vapayiniya va kulitila. Twakwathele lalo vanu ku viwano. Ku maputukilo a ma 1990, mavulu etu akele mu ndaka ya Chirussia, cho twakele na kwendeka eyi vene ndaka ku viwano. Oloni vanu vavangi mu chikungulukilo vapwile Vakyrgyz, mwafwa ikeyo yapwile ndaka yavo ya chithemwa. Njakele na kuvanungulwila mu Chikyrgyz, mangana vathzivithithe mwamuvwa vuthunga.

Yange na Mairambubu, twathzethzamene mu kulela vana vetu. Twakele na kuya na vana vetu mu kwambulula na ku viwano vya chikungulukilo. Munetu wa  munakathzi Gulsayra, uje wakele na myaka 12, wakele na kwambulula vuthunga vwa mu Mbimbiliya ku vanu vaje vakele na kwita mu ngila. Cho vana vetu valilongethele manene kukwata Vithoneka mu mitwe. Kulinga ngocho kwakwathele vana vetu na vatekulyetu vathzeme vipangi vya mu chikungulukilo. Hakati ka vana vetu va kupwa 9 na vatekulyetu va kupwa 11, va kupwa 16 vali na kutwalelelaho kupangela Yehova na vithemi vavo.

Vandolome na vandokathzi vaje vashangumukile chipangi cha Yehova mu ma 1950 vatha kukathama ha kumona vyuma mu vinatengulukila. Kushwa mu ma 1990, tunalikuwu kwambulula muthzimbu wauvwa mu kuthzituka na kukunguluka mu vwingi.

Mu 1991, yange na mwevwange twaile ku chiwano chetu cha mutambela cha kulivanga chije chakele mu Alma-Ata, ije ivatumbula ano matangwa ngwavo Almaty, mu Kazakhstan. Mu 1993, vandolome va ku Kyrgyzstan vavwahethele ngwavo tulingile chiwano cha mutambela lwa kulivanga mu sitendiyamu ya Spartak, ije yakala mu Bishkek. Vaka-kwambulula vajelethele ije sitendiyamu ha chalumingo chimo thimbu kanda chiwano chishangumuke. Mukulunu wa sitendiyamu wavwahelelele manene, ngechi katufwetethele.

Mu 1994, kuli chuma chimo chakama chalingiwile. Vashangumukile kuthoneka mavulu etu mu ndaka ya Kyrgyz. Mavulu etu vali na kuwalumbununa mu ndaka ya Kyrgyz ha munango wa Bishkek. Mu 1998 vaka-mashiko vatavethele Vakaleho kutwalelelaho na chipangi chavo mu Kyrgyzstan. Munga yetu inalivwethzelela, cho mu Kyrgyzstan muli vaka-kwambulula va kutuvakana 5,000. Ano matangwa, tuli na vikungulukilo vya kupwa 83 na vivunga vya kupwa 25 vije vili na kulikwathetha ndaka ya Chichinese na Vundele, na Chikyrgyz na Chirussia na ndaka ya tuveveve ya mu Russia na Chiturk na Chiuighur na Chiuzbek. Ava vandolome na vandokathzi va ku vithemwa vya kulithethzathethza, vali na kupangela Yehova mu kulikwatathana. Yehova ikeye nalingitha evi vyuma vyoshe vilingiwe.

Yehova watengulwile vuyoye vwange. Vaka-nanga yange vapwile vihutu, ngechi njakele lika ku sikola ha myaka itanu. Oloni Yehova nanjipangetha kupwa mukulunu wa mu chikungulukilo na mu kulongetha vyuma vya mu Mbimbiliya ku vanu vaje valilongethele manene kunjituvakana. Yehova atha kutukwatha kulinga vyuma vije visholoka kupwa vyavikalu. Vyuma vinjinaliwana navyo vikanjishongangeya kutwalelelaho kukulahela Yehova mwafwa kuli ikeye “vyuma vyoshe vyavyathi.”—Mateo 19:26.