1. Vika twendekela ngwetu tuli na kuyoya mu thimbu ya kulitila?

TULI na kuyoya mu thimbu ya kulitila. Ngechi muje muyapolofwetelele Mbimbiliya, Yehova ali na kukungulula “mbunga yakama ije . . . ili na kutunda ku miyati yoshe na ku mafuti oshe na ku vanu voshe na ku vindaka vyoshe.” Vaje vavanakungulula vanapu mbunga yakama ya ndthzili ya vanu va kutuvakana 8 milyoni, vaje vanavwahelela “mu kupangela [Njambi] mutanya na vuthsiki.” (Kujo. 7:9, 15; Isaya 60:22) Kushwa kuthañulu, kanda kuchikaleho vanu vavangi vaje vathzema Njambi na vakwavo vanu ngwe lelo lino.

2. Chithzemo muka chivali nacho vanu vaje vanalyangununa kuli Njambi? (Kengeni chikupulo ha liputa 22.)

² Mbimbiliya yapolofwetele lalo ngwayo mu matangwa a kukotoka, vanu vaje vanalyangununa kuli Njambi, vakalithzema manene vakevo vavenya. Kapositolo Paulu wathonekele ngwendi: “Ha thimbu ya matangwa a kukotoka . . . , vanu vakapwa vaka-kulithzema vakevo vavenya, vaka-kuthzema vimbongo . . . Vaka-kuthzema manene thenga kutuvakana kuthzema Njambi.” (2 Tima. 3:1-4) Echi chithzemo chinalithethze na chithzemo chivakala nacho vaka-Kilisitu va vuthunga. Vanu vaje valithzema vakevo vavenya kuvethi kupwa va kuvwahelela. Echi kulithzema manene chikecho chili na ‘kukaluwitha’ vyuma mu kaye.

3. Tuthimutwiya vika muno mu chilongetha, cho mwafwa vika?

 ³ Paulu wathzivukile ngwendi vaka-Kilisitu vakaliwana na vukalu mwafwa vakayoya na vanu vaka-kulithzema manene vakevo vavenya. Mukemwo wanangwile ngwendi, lihengeni ku vanu vaje vali na chithzemo cha makuli. (2 Tima. 3:5) Nameme ngocho kutwatha kulihenga mu kushula ku vanu va chifwa echi. Cho twatha kulihenga vati ku vilinga vyavivi vya vanu vaje vanatuthzengeleka mangana tuthzivithe Yehova kuvwaha ku mbunge? Tuchithimutwiyeni kulithethza kuli mukati ka chithzemo cha vunjambi na chithzemo chili ku 2 Timateo 3:2-4. Kulinga ngocho kutukwatha tumone chithzemo chitunapande kukala nacho, mangana tupwe va kuvwahelela.

4. Mwafwa vika kukwavihile nga munu alithzema ikeye vavenya mu ngila yaivwa?

⁴ Kapositolo Paulu wathonekele ngwendi: “Vanu vakapwa vaka-kulithzema vakevo vavenya.” Kuma kwapwa kwakuvi munu kulithzema ikeye vavenya ndi? Embwe mwane. Mwafwa Yehova watutangele na chifwa cha kulithzema yetu vavenya. Yesu wendekele ngwendi: “Unapande kuthzema mukweni ngwe muwalithzema yove vavenya.” (Mako 12:31) Nga kutulithzeme yetu vavenya, cho kutwatha kuthzema vakwetu. Vithoneka vimwetha lalo ngwavyo: “Vanalume vanapande kuthzema vanakathzi vavo ngwe muvakathzeme mivila yavo vavenya. Munalume uje athzema munakathzi wendi alithzema ikeye vavenya. Naumo wahi wathzinda muvila wendi vavenya. Oloni aulitha na kuulela.” (Efeso 5:28, 29) Ngechi, kulithzema yetu vavenya mu ngila yaivwa kunapande.

5. Mwatha kulumbununa vati vanu vaje valithzema vakevo vavenya?

⁵ Chithzemo chivanendeka ku 2 Timateo 3:2 kethi cha vuthunga. Chinapu chithzemo cha makuli. Vanu vaje valithzema vakevo vavenya, vakalimono kupwa va theho manene kutuvakana vakwavo. (Tandeni Loma 12:3.) Vakaka manene mbunge kuli vakevo vavenya kutuvakana vakwavo. Nga vanaviyitha, kuvethi kulitavela mulonga, oloni vakavangeya vakwavo. Munu umo uje akendeka ha vyuma vya mu Mbimbiliya, wethekethele vanu vaje valithzema vavenya ku ‘kathitu umo wa kulifwa na chiningi uje akalivungavunga mangana athzive kushaluka mukati na kutuhula mishomo hanja mangana vakwavo kethi vamushwenye.’ Na vanu vaje valithzema vakevo vavenya kuvethi kupwa va kuvwahelela.

6. Vika vikatundu mu kuthzema Njambi?

⁶ Vaka-kulilongetha Mbimbiliya ngwavo, kapositolo Paulu walivangele kwendeka ngwendi vanu vakalithzema vakevo vavenya, athinoni endeke ha vifwa vikwavo vyavivi vije vinalithala manene muno mu matangwa a kukotoka. Oku kulithzema kukekwo kukanene vifwa vikwavo vyavivi. Oloni vanu vaje vathzema Njambi vakala na vifwa vyavivwa. Mbimbiliya ngwayo, chithzemo cha vunjambi chikemi vushuka vwavuvwa. Chakala na kujolela na kwoloka na lukakateya na ngothzi na vuvwa na kulongwa na kulinyunga. (Ngala. 5:22, 23) Muka-kwimba myatho wathonekele ngwendi: “Vanavethzika vanu vaje Njambi yavo ikeye Shukulu Kalunga.” (Myatho 144:15) Yehova wapwa Njambi wa kuvwahelela, cho na vanu vendi vapwa va kuvwahelela. Kutundoho, vanu vaje valithzema vakevo vavenya, vashaka lika kuvana, oloni vanu va Njambi vakevo vakawana kuvwahelela mwafwa vakalyana mu kukwatha vakwavo.—Vili. 20:35.

7. Vihula muka vitukwatha kuthzivuka hachinapu chithzemo chetu kuli Njambi?

⁷ Twatha kuthzivuka vati ngwetu sipilitu ya kulithzema yetu vavenya ili na kuthzeyetha chithzemo chetu kuli Njambi? Tuchithimutwiyeni ha chinangulo chili ku Filipu 2:3, 4 chije chendeka ngwavo: ‘Kethi mulinge chuma chimo na viyongola vya chipululu, nambe na mashungu a kulishasha, oloni likehetheni ku mesho a umo na umo, thimbu yoshe yongoleni vakweni ngwe vanapu vavavwa  kumihyana yeni. Thimbu yoshe shakethzekeni vije vyatha kuthzivitha vakweni kuvwaha, kethi mulithzivithe yeni vavenya kuvwaha.’ Tunatha kulihula ngwetu: ‘Njikapangetha echi chinangulo mu kuyoya kwange ndi? Njashaka kulinga chithzango cha Njambi na mbunge yange yoshe ndi? Njikalyana kukwatha vakwetu mu chikungulukilo na mu chipangi cha kwambulula ndi?’ Kulyana yetu vavenya kukwapwile kwakwathi. Kwatonda kupanga na ndthzili. Oloni tukavwahelela manene kuthzivuka ngwetu tuli na kupanga na Njambi wa hakamwa ya vyoshe.

8. Vika vivanalingi vanu vamo mwafwa ya kuthzema Njambi?

⁸ Kuthzema Njambi kunalingitha vamo vathethze vipangi vyavo vyakama na kulyana kupangela Yehova thimbu yoshe. Chakumwenako, Ericka wapwa ndotolo wa ku United States. Wathethzele chipangi chendi cha vundotolo na kupwa painiya wa thimbu yoshe, cho napangela mu mafuti amangi na munalume wendi. Ou ndokathzi wendekele ngwendi: “Vyuma vitunaliwana navyo mu kukwatha vanu vaje vakendeka ndaka yeka na vavuthamba vatunawana, vinatulingitha tupwe va kuvwahelela mu kuyoya kwetu. Nameme njichili na kuthaka, oloni njikapangetha thimbu na ndthzili yange mu kukwatha vanu ku sipilitu na kukwatha chikungulukilo, cho oku kunanjilingitha njipwe wa kuvwahelela manene mu kuyoya kwange.”

9. Mwafwa vika kuthzema vimbongo kukwatha kunena kuvwahelela?

⁹ Paulu wathonekele ngwendi, vanu vakapwa “vaka-kuthzema vimbongo.” Chakumwenako, painiya umo wa ku Ireland wathimutwiyiye na munalume umo vya Njambi. Owo munalume watundithile chikwama chendi mu mbolotho, na kushomonamo vimbongo na kumumwethavyo, cho wendekele mu kulishasha ngwendi: “Ou ikeye njambi yange.” Nameme kethi vanu voshe vakendeka ngocho, oloni kaye koshe kanashulu na vanu vaje vathzema manene vimbongo. Mukemwo Mbimbiliya yanangula ngwayo: “Uje woshe athzema manene vimbongo katha kuviwana, uje woshe athzema manene vufuko katha kuvuwana.” (Kwambu. 5:10) Vanu vaka-kuthzema manene vimbongo vashaka kulilundikila vimbongo vyavingi, oloni kulinga ngocho kukavanenela lika “vuthiwa vwavungi.”—1 Tima 6:9, 10.

10. Angule wathonekele vika ha vufuko na ha vuhutu?

¹⁰ Nameme ngocho tuvavoshe twatonda vimbongo mwafwa vikatukwatha mu vingila vimo. (Kwambu. 7:12) Nga munu ali na vyuma vya kupwamo, kuma atha kupwa wa kuvwahelela ndi? Eyo. (Tandeni Muka-kwambulula 5:12.) Angule muna Njake wathonekele ngwendi: “Kethi njipwe muka-kufuka, nambe kupwa muka-kuhutwa, njane vyakulya vije vinanjipande.” Twatha kuthzivithitha vyuma vyamwendekethele ngwendi kethi apwe kahutu. Walumbunwine ngwendi kuhutwa manene kumulingitha apwe mwithzi, cho vwithzi vukashawitha lithzina lya Njambi. Cho mwafwa vika walombele lalo ngwendi kethi apwe muka-kufuka manene? Wathonekele lalo ngwendi: “Nga njikala na vyuma vyavingi hamo kunjikakuthzeme.” (Vithi. 30:8, 9) Hamo neni mwatha kwanuka vanu vaje vakulahela manene vufuko vwavo kutuvakana Njambi.

11. Yesu wanangwile vika ha vimbongo?

¹¹ Vanu vaje vathzema vimbongo kuvatha kuthzivitha Njambi kuvwaha. Yesu wendekele ngwendi: “Munu na umo wahi atha kupangela vashukulu vavali, kuvanga athzindeho umo na kuthzemaho mukwavo, nambe apwa wa kulongwa ku umo na kushaula mukwavo. Cho kuwatha kupangela Njambi na kupangela lalo vimbongo.” Mukemwo wanangwile ngwendi: “Kethi mulitulikile vufuko vwa hano hathi, haje hali tunembulu na ñalawe vikakuvuvihitha, cho hali na vethzi lalo vatuva na kuvwiva. Oloni litulikileni vufuko vwa mwilu, muje tunembulu  nameme ñalawe kuvyatha kuvuvihitha, nambe vethzi kuvatha kuvutuva na kuvwiva.”—Mateo 6:19, 20, 24.

12. Kwathiwitha vuyoye kukalingitha vati munu apangele Njambi mu kushula? Endekeni chakumwenako.

¹² Vanu vavangi vanamono ngwavo kwathiwitha vuyoye kunavanenela kuvwahelela, cho vanawana thimbu yaingi ya kupangela Yehova. Chakumwenako, Jack walandethele njuvo yendi yakama na mingotho yakele nayo mangana awane thimbu ya kulinga vupainiya na munakathzi wendi. Wendekele ngwendi: “Kwapwile kwakukalu kuthethza njuvo yetu yaivwa na vyuma vyetu. Oloni ha myaka yaingi njakele na kulithziva kuthzeya nga njinalembuka, mwafwa ya vukalu vunjakele na kuliwana navwo ku vipangi. Oloni munakathzi wange uje wapwile painiya wa thimbu yoshe wapwile wa kuvwahelela thimbu yoshe. Cho wanjilekele ngwendi, ‘Ntwama wa vipangi vyange wapwa wa kulitila.’ Ha thimbu ino, nange njinapu painiya, cho tuvavoshe tuli na kupangela Ntwama wa kulitila, Yehova.”

13. Twatha kuthzivuka vati viyongola vyetu ha vimbongo?

¹³ Nga tushaka kuthzivuka viyongola vituli navyo ha vimbongo, cho tunapande kuthinganyekethetha mutwatha kukumbulwilamo evi vihula: ‘Kuma njakulahela vyuma viyendeka Mbimbiliya ha vimbongo na kuvikavangeya mu kuyoya kwange ndi? Kuma vimbongo vikevyo vyapwa vya theho manene mu kuyoya kwange ndi? Kuma kuthzema vufuko kuli na kuthzeyetha vuthamba vwange na Yehova na vakwetu vanu ndi? Njakulahela ngwange Yehova atha kunjana vyuma vinjitonda ndi?’ Twatha kukulahela ngwetu Yehova katha kwivala vaje vanamukulahela.—Mateo 6:33.

14. Tunapande kukala na viyongola muka ha vyuma vya thenga?

¹⁴ Muno mu matangwa a kukotoka vanu vanapu “vaka-kuthzema manene thenga.” Munu uje alithzema ikeye vavenya nambe kutonda vimbongo mu ngila yaivwa kaviyithile. Mu ngila imo lika, kukala na vithinganyeka vyavivwa ha vyuma vya thenga nakwo kukwavihile. Yehova katondo ngwendi tulivindike ku vyuma vyoshe vije vyatha kututhzivitha kuvwaha ku mbunge. Mbimbiliya yashongangeya vanu va kulongwa ngwayo: “Twalaho kulya vyakulya  vyove na kuvwahelela, nwa vinyu vyove na mbunge ya kujolela.”—Kwambu. 9:7.

15. Thenga ya chifwa muka ivanendeka ku 2 Timateo 3:4?

¹⁵ Ku 2 Timateo 3:4 vanendeka ngwavo vanu vakathzema manene thenga, kuvakathzeme Njambi. Eyi vesi chili vene imwetha ngwayo vanu vanakela mbunge ku vyuma vya thenga kutuvakana kuthzema Njambi. Muka-kulilongetha umo wathonekele ngwendi: “Eyi vesi kuimwetha ngwayo vanu vakathzemako Njambi kamandondo. Oloni imwetha ngwayo vakamuthzinda mu vuyoye vwavo.” Echi chinapu chinangulo chakama ku vanu vaje vathzema manene thenga. “Vaka-kuthzema manene thenga” vanapu vanu vaje vongumuka na thenga ya mu kaye.—Luka 8:14.

16, 17. Yesu natwakela mwanja muka wauvwa ha vyuma vya thenga?

¹⁶ Yesu wakele na viyongola vyavivwa ha vyuma vya thenga. Waile ku chilika cha vulo na ku ‘chilika chakama.’ (Yowa. 2:1-10; Luka 5:29) Omwo vinyu vyahwile kuje ku chilika cha vulo, Yesu watengulwile mema kupwa vinyu. Thimbu imo, Yesu walile na kunwa, oloni vanu vamo vamuvangeyeye ngwavo wathsa ha kulya na kunwa.—Luka 7:33-36.

¹⁷ Nameme ngocho, Yesu kakelele manene mbunge ku vyuma vya thenga. Oloni kupangela Yehova kukekwo kwapwile kwa theho manene mu kuyoya kwendi, cho lalo wapangele na ndthzili mu kukwatha vanu. Walyanene kuyanda na kuthsila ha chiti cha kuyandethela mangana ovole vanu vavangi. Yesu walekele vaka-kumukavangeya ngwendi: “Munavethzika omo vamishaula na kumiyandetha na kumivangeya vya makuli vyeka na vyeka omwo yange. Vwaheleleni na kujolela manene, omwo vanamitulikila chikandelela cheni chakama mwilu. Omwo omu mukemwo muvayandethelele vaka-kwimanena vaje valivangele kulutwe lweni.”—Mateo 5:11, 12.

18. Vihula muka vitukwatha kuthzivuka indi twathzema manene thenga?

¹⁸ Twatha kuthzivuka vati viyongola vyetu ha vyuma vya thenga? Tulihuleni ngwetu: ‘Kuma vyuma vya thenga vikevyo vyapwa vya theho manene kuli yange kutuvakana kukunguluka na kwambulula ndi? Kuma njikalivindika kulinga vyuma vimo mangana njipangele Njambi mu kushula ndi? Kuma njikangula vyuma vya thenga vije vinalitombola na mashiko a Yehova ndi? Kuthzema Njambi mu vuthunga kutulingitha twangule vyuma vyavivwa vya thenga vije vimuthzivitha kuvwaha ku mbunge.—Tandeni Mateo 22:37, 38.

19. Vanu muka vaje kuvatha kupwa va kuvwahelela?

¹⁹ Ha myaka 6,000 ineti, Satana nayandetha manene vanu. Mu kaye munashulu vanu vaka-kulithzema vakevo vavenya na vaka-kuthzema vimbongo na vaka-kuthzema manene thenga. Cho lalo vashaka lika kunyanyamena vakwavo na kwaka viyongola vyavo mu mutamba wa kulivanga. Vanu va chifwa echi kuvatha kupwa va kuvwahelela. Oloni muka-kwimba wamwethele vyuma Vinena kuvwahelela omwo wathonekele ngwendi: ‘Navethzika munu uje ali na Njambi ya Yakomba ngechi amukwathe, munu uje lilavelelo lyendi lili muli Shukulu Kalunga Njambi yendi.’—Myatho 146:5.

20. Kuthzema Njambi kunamikwatha vati kupwa va kuvwahelela?

²⁰ Vanu va Yehova Njambi vakala na chithzemo cha vuthunga mukati kavo, cho nambala yavo ili na kulivwethzelela mwaka na mwaka. Ovu vunapu vukaleho vuje vumwetha ngwavo Vumwene vwa Njambi vuli na kuyula, cho ololo vunena vivethzikitho vyavingi hano ha kaye. Kuvwahelela kwa vuthunga kukatundu mu kulinga chithzango cha Njambi, cho oku kukathzivitha Njambi yetu wa Hakamwa ya vyoshe kuvwaha. Cho vanu vaje vathzema Yehova vakapwa va kuvwahelela ku myaka yoshe. Mu chilongetha chinatako, tukathimutwiya ha vifwa vivakala navyo vanu vaje valithzema vakevo vavenya nomwo muvinalithethzela na vifwa vivakala navyo vangamba va Yehova.