1, 2. Yehova akapangetha vati ndthzili yendi mu kwana vanu?

YEHOVA Njambi wapwa muka-kwana. Vyuma vyoshe vituli navyo vyatunda kuli ikeye. Ngolinde na siliva na vyuma vyeka vya kutanga vyapwa vya Yehova, cho akavipangetha mu kukwatha vyuma vya kuyoya. (Myatho 104:13-15; Hanga. 2:8) Mu Mbimbiliya, mwakala myanja yaingi ije imwetha omwo Yehova wapangethelelemo ndthzili yendi mu kukwatha vanu vendi.

² Yehova wanene Vaisalele maana na mema ha myaka 40 ivakele mu mambo. (Kutu. 16:35) Ngechi, “wavanene vyoshe vije vivashakele.” (Nehe. 9:20, 21) Yehova wapangethele kapolofweto Elisha mu kulinga chikomoketho cha kutumitha tumathzi twatundondo twa fwile wa kulongwa. Echi chikomoketho chalingile Njambi, chakwathele uje fwile afwete mikuli yendi yoshe na kuwana vimbongo vya kuliyoyetha navyo na vana vendi. (2 Vimye. 4:1-7) Yehova wakwathele Yesu ane vanu vyakulya na vimbongo mu kukomoketha.—Mateo 15:35-38; 17:27.

3. Tuthimutwiya vika muno mu chilongetha?

³ Yehova atha kupangetha chuma choshe choshe mangana akwathe vyuma vya hano hathi vyanatanga. Nameme ngocho,  achitonda ngwendi vangamba vendi vapangethe vyuma vivali navyo mu kukundwiya vipangi vya mu munga yendi. (Kutu. 36:3-7; tandeni Vithimo 3:9.) Mwafwa vika Yehova atonda ngwendi tumwane vyuma vyetu vyavivwa? Vanu va kulongwa va kuthañulu vakwathele vati mu vipangi vivalingile vaje vemaneneneko Yehova? Munga yetu ikapangetha vati vimbongo vitukalambula ano matangwa? Evi vihula vavikumbulula muno mu chilongetha.

4. Mwafwa vika tunapande kukwatha mu vipangi vya Yehova?

⁴ Tukana Yehova mwafwa twamuthzema, cho lalo tushaka kumwetha kukandelela kuli ikeye. Tukakathama manene mutukathinganyeka ha vyuma vyanatulingila Yehova. Omwo Mwene Ndaviti wakele na kulumbununa ha vyuma vyatondekele mu kutunga tembele, wendekele ngwendi, vyuma vyoshe vitutambula vitunda kuli Yehova, cho na vije vitumwana ikeye natwanavyo.—Tandeni 1 Mithzimbu 29:11-14.

5. Vithoneka vimwetha vati ngwavyo kwana kutundilila kwithi ya mbunge, inapu ngila ya theho ya kulemethelamo Njambi?

⁵ Kwana kunapu lalo ngila ikwavo ya kulemethelamo Yehova. Mu chimona chendi, Yowano wathzivile vangamba va Yehova va mwilu vendeka ngwavo: “Mwene yetu na Njambi yetu. Yove wafwila kutambula vumpau na kathingimiko na ndthzili. Omwo yove watangele vyuma vyoshe, cho ku chithzango chove vavyanene kuyoya na mwonyo.” (Kujo. 4:11) Kuma kumutava ngweni Yehova nafwila kutambula vumpau na kathingimiko mu kumwana vyuma vyavivwa vituli navyo ndi? Yehova walekele Mosesa ngwendi ashike Vaisalele vakunguluke lutatu ha mwaka mu kumulemetha. Vaisalele muvakele na kuya ku viwano, vavashikile ngwavo, ‘vambate milambu’ mwafwa kulambula kwapwile ngila ya kulemethelamo Yehova. (Kwitu. 16:16) Mu ngila imo lika, kukundwiya na kumwetha kukandelela ku vipangi vya mu munga ya Yehova ya hano hathi mu kwana milambu, inapu ngila ya theho ya kulemethelamo Njambi.

6. Mwafwa vika kwana kwapwa kwakuvwa? (Kengeni chikupulo ha liputa 17.)

⁶ Kwana kwapwa kwakuvwa kuli yetu. Tunapande kupwa vaka-kwana, kethi vaka-kutambula lika. (Tandeni Vithimo 29:21.) Chakumwenako, mwanike natha kwana vithemi vendi vwana kutundilila ha vimbongo vivanamwana ovo vithemi vendi. Vithemi vakandelela manene kuli munavo ha kuvana ovwo vwana. Mwana wa munalume nambe wa munakathzi uje achili na kuyoya na vithemi vendi oku alinga vupainiya, natha kwana vithemi vendi vimbongo mangana valikwathethe. Nameme vithemi vakevo vanapande kwana munavo, oloni vanatha kutambula vwana vwendi mwafwa inapu ngila imo ije imwetha ngwavo nakandelela ku vyuma vivali na kumulingila. Mu ngila imo lika, Yehova athzivuka ngwendi kwana kwapwa kwakuvwa.

7, 8. Vanu va Yehova va kuthañulu vatwakelele vati mwanja mu kwana milambu ya kupangetha mu (a) vipangi vya kutunga? (b) vipangi vikwavo?

⁷ Vithoneka vinendeka manene ha kwana vyuma vi tuli navyo. Vithimbu vimo, milambu ivalambwile vanu va Yehova vaipangethele ku vipangi vya kutunga. Chakumwenako, Mosesa washikile ngwendi vanu valambule milambu ya kutungitha mbalaka, ngwe mwalingilile Mwene Ndaviti ha kutunga tembele. (Kutu. 35:5; 1 Mithzi. 29:5-9) Mu thimbu ya Mwene Yowashe, tupilisitu vakele na kupangetha vimbongo vivalambwile vanu mu kuvwahetha njuvo ya Yehova. (2 Vimye. 12:4, 5) Omwo vaka-Kilisitu va mu chikungulukilo cha mu thimbu ya tupositolo vathzivile ngwavo vandolome vavo vali mu njala ya  lyangengela, “vayongwele ngwavo umo na umo ha kati kavo akatume vukwathi ngwe mwanathela mu kukwatha vakwavo vaka-kukulahela vaje vakele mu Yundeya.”—Vili. 11:27-30.

⁸ Vithimbu vimo, vanu va Yehova valambwile vimbongo vije vyakwathele vaka-kutwamenena vipangi vya Njambi. Kwetheketha na Mashiko a Mosesa, Valevi kuvavanene mutamba wa kushwana, ngwe muvakele na kwanena miyati ikwavo. Oloni Vaisalele vakele na kwana Valevi chamulikumi mangana vakale na thimbu yaingi ya kupanga vipangi vya ku mbalaka. (Kula. 18:21) Mu ngila imo lika, Yesu na tupositolo vendi vawanene vukwathi kutundilila ku kwana kwa vanakathzi “vaje vapangethele vyavo mu kukwatha Yesu na vandongethi vendi.”—Luka 8:1-3.

9. Milambu ivakele na kulambula vanu va kunima vakele na kuiwana kuli?

⁹ Vanu vakele na kuwana vyuma vya kulambula mu vingila vya kulithethzathethza. Hamo milambu ivalambwile Vaisalele ya kutungitha mbalaka, vatundile nayo ku Ingito. (Kutu. 3:21, 22; 35:22-24) Mu vithimbu vya tupositolo, vaka-Kilisitu vamo valandethele vyuma vivakele navyo vya kufwa ngwe mahya nambe vinjuvo, vakele na kulambula vimbongo vyavo ku tupositolo. Cho tupositolo vakele na kupangetha ije milambu mu kukwatha vaje vakele mu vujene. (Vili. 4:34, 35) Vamo vakele na kutulika vimbongo ku mukulo mangana valambule mu chipangi cha Njambi. (1 Koli. 16:2) Ngechi, vanu voshe vaka-kufuka na tuhutu vanene milambu.—Luka 21:1-4.

10, 11. (a) Twatha kutembwinina vati sipilitu ya kwana ya vangamba va Yehova va kuthañulu? (b) Mukalithzivi vati nga mukwatha mu chipangi cha Vumwene?

¹⁰ Ano matangwa, netu vanatha kutuleka ngwavo twane milambu ya kupangetha mu vipangi vimo. Chakumwenako, hamo vaka-munango vashaka kututungila Njuvo ya Vumwene yaiha, nambe hamo vashaka kutuvwahethela Njuvo yetu ya Vumwene ije inavihya. Vanatha lalo kutuleka ngwavo twane milambu ya kulikwathetha mu kuvwahetha ofisi ya munango nambe ya kupangetha ku chiwano cha mutambela nambe kukwatha vandolome vetu vaje vanaliwana na vukalu vwa chishitumukila. Tukana lalo milambu mangana ikwathe vaje vakapangela ha ofisi yakama ya Vakaleho va Yehova ya mu kaye koshe, na vaje vali na kupangela ha ma ofisi a minango a mu kaye koshe. Milambu yetu lalo ili na kukwatha vamishinali na vapayiniya va kulitila na vantwama va kuthzenguluka. Chikungulukilo cheni lalo chikana milambu ije ikakwatha mu vipangi vya mu kaye koshe vya kutunga Vinjuvo vya Viwano Vyakama na Vinjuvo vya Vumwene vije vili na kukwatha vandolome vetu mu kaye koshe.

¹¹ Tuvavoshe twatha kukwatha mu chipangi cha Yehova chije chili na kulingiwa muno mu matangwa a kukotoka mu kwana milambu. Vwingi vwa milambu ikatundu ku vanu va kulithethzathethza. Tukaka eyi milambu mu tu vikasha twa mu Njuvo ya Vumwene kwalikalyetu, nambe kulambula kupangetha jw.org. Tunatha kuthinganyeka ngwetu mulambu wetu waundondo, kuwatha kukwatha. Oloni milambu yetu yaindondo ituli na kwana nga vaipandakana na milambu ikwavo, cho ikwatha mu vipangi vya Njambi. Vandolome vetu vamo vaje vali mu vuhutu, vanalifu na vaje vakele ku Masendoniya vaje valombele ngwavo vakwathe vakwavo nameme vapwile “vaka-kuhutwa.”—2 Koli. 8:1-4.

12. Munga yetu ili na kulinga vika mangana milambu yetu ipange mwamuvwa?

¹² Vaka-Chivunga cha Kutwamenena, vakalombela na kuthinganyekethetha muvinapande kupangela vimbongo vya mu munga  ya Njambi mu ngila yaivwa. (Mateo 24:45) Vimbongo vitukalambula vakavipangetha mu ngila inapande. (Luka 14:28) Kuthañulu tutumwa vakele na kupangetha milambu ivakele na kutambula ku vyuma vije vivaiyongwelele. Chakumwenako, Ezela wambatele milambu ya ngolinde na siliva na milambu ikwavo ije yamwanene mwene wa Vapelesha, cho waitwalele ku Yelusalema. Cho ndando ya milambu yoshe yambatele, ituvakana $100 miliyoni (U.S.) mu vimbongo vya matangwa ano. Ezela wamwene oyo milambu ngwendi inapu ya Yehova, cho wainyungililile mwamuvwa omwo wendele mu vungendthzi vwa vushonde. (Ezela 8:24-34) Kapositolo Paulu wakungulwile milambu ya kukwatha vandolome vendi vaje vakele mu Yundeya. Wavwahethele ngwendi vaje vambata ije milambu vainyungilila mwamuvwa mwafwa washakele ngwendi valinge “vya vuthunga, kethi lika ku mesho a Mwene embwe, oloni na ku mesho a vanu lalo.” (Tandeni 2 Kolinte 8:18-21.) Mu kutembwinina mwanja wa Ezela na Paulu, munga yetu nayo matangwa ano ili na kupangetha mwamuvwa milambu.

13. Tukalithzivi vati muvakatepululako vyuma vimo mu munga yetu?

¹³ Chakumwenako, nanga inatha kutumbama hathi na kuthimutwiya muvali na kupangethelamo vimbongo vyavo nambe muvanatha kwathiwithila vuyoye vwavo mangana vapangele Yehova mu kushula. Mukemwo muili na kupangela na munga ya Yehova. Mu myaka inahu vyuma vyavingi vinalivwethzelela mu munga yetu. Cho mu vithimbu vimo, vimbongo viyinapangetha munga yetu vinapu vyavingi kutuvakana vitukalambula. Ngechi, munga yetu inatepululako vyuma vimo mangana milambu yetu yathe kukwatha mu vipangi vya theho.

14-16. (a) Milambu yeni ili na kukwatha vati? (b) Vyuma viyinalingi munga ya Njambi vinamikwatha vati?

¹⁴ Vangamba va Yehova vavangi vaje vanamupangela ha myaka yaingi vakendeka ngwavo ano matangwa kuli vyuma vyavingi vya ku sipilitu kutuvakana myaka ya kunima. Chakumwenako, mu myaka inahu tunalimwena wembusaiti yetu ya jw.org na JW Broadcasting. Kutundoho lalo, Mbimbiliya ya New World Translationof the Holy Scriptures vanailumbununa mu vindaka vyavingi. Mu 2014/2015, ma sitendiyamu akama a kupwa 14 a muno mu kaye, oshe ashulile na vanu vaje vakungulukile ku Chiwano cha Mafuti cha matangwa atatu chije chakele na mutwe wa, “Mu Zwelepili Ku Bata Pili Mubuso Wa Mulimu!” Vanu voshe vaje vakungulukile vavwahelelele manene.

 ¹⁵ Vanu vavangi vali na kukandelela ku vukwathi vuvali na kuwana mu munga ya Yehova. Chakumwenako, munu na munakathzi wendi vaje vali na kupangela mu lifuti lya Asia, vendekele ha JW Broadcasting ngwavo: “Tuli na kupangela mu nganda imo yaindondo. Cho thimbu imo tukalithzivi manene vuli na kushaka kwivala vyuma vili na kulingiwa mu munga ya Yehova. Oloni mutukayongola vivindiyo vya kulithethzathethza vya ha JW Broadcasting, tukathzivi ngwe tuli hamo na vandolome vetu va mu kaye koshe. Vandolome na vandokathzi va kuno, vanavwahelela manene ha kukala na JW Broadcasting. Tukavathzivi muvakendeka ngwavo, munima ya kukenga vindiyo ya ngonde, tukalithzivi kushwenya kuyehi na vandolome va mu Chivunga cha Kutwamenena. Ngechi, vanavwahelela manene kukala mu munga ya Njambi.”

¹⁶ Kuli Vinjuvo vya Vumwene vya kweta ku 2,500 vivali na kutunga, vimo cho vali na kuvivwahetha. Muvashangumukile kukungulukila mu Njuvo ya Vumwene yaiha, vandolome na vandokathzi va mu chikungulukilo chimo cha ku Honduras vathonekele ngwavo: “Tunavwahelela manene kukala mu nanga ya Yehova ya mu kaye koshe ije inatukwatha kukala na Njuvo ya Vumwene mu chitingitingi chetu.” Vanu vavangi vanakandelela manene ha kutambula Mbimbiliya na mavulu aje avanalumbununa mu ndaka yavo. Vamo cho vanakandelela ha kuvana vukwathi vwa ku muvila nambe ha kumona vuvwa vunatundu mu kwambulwila ku mbunga na mu kupangetha tutambo mu chitingitingi chavo.

17. Muili na kupangelamo munga ano matangwa, kumwetha vati ngwavo Yehova ikeye ali na kuitwamenena?

¹⁷ Vaka-kaye vakakomoka muvakamono muchili na kwendela chipangi chetu chije chivali na kukundwiya na mavwana a kulyanukila lika. Mukulunu umo wa kampani yakama omwo wakamwene kuvakapulintila mavulu etu, wakalikomokelele manene ha kumona chipangi chakama chivali na kupanga vaka kulyana, chije chivali na kukundwiya na mavwana a kulyanukila, cho lalo kuvethi kulandetha aje mavulu. Wendekele ngwendi ngila itukalingilamo chipangi chetu ikomoketha. Mukemwo vene. Chipangi chetu chili na kuya kulutwe, mwafwa Yehova ikeye ali na kuchitwamenena.—Yombi 42:2.

18. (a) Vivethzikitho muka vituwana nga twana na ku kundwiya Vumwene vwa Njambi? (b) Twatha kulongetha vati vana vetu nambe vaje vachili vavaha mu chikungulukilo mangana vapwe vaka-kwana?

¹⁸ Yehova natuthingimika ha kututavetha kukwatha mu chipangi chendi chakama ano matangwa. Natukulahetha ngwendi atuvethzikitha nga tukundwiya chipangi cha Vumwene. (Mala. 3:10) Cho lalo, Yehova natukulahetha ngwendi nga twana na mbunge yetu yoshe, cho akatuvethzikitha. (Tandeni Vithimo 11:24, 25.) Kwana kukatuthzivitha kuvwaha mwafwa, “muli kujolela kwakama manene mu kwana kutuvakana mu kutambula.” (Vili. 20:35) Twatha kulongetha vana vetu nambe vaje vachili vavaha mu chikungulukilo, mu kuvakela mwanja na mu kuvanangula, mangana navo vawane kuvwahelela kuli mu kwana.

19. Echi chilongetha chinamikwatha vati?

¹⁹ Vyuma vyoshe vituli navyo vyatunda kuli Yehova. Nga twana Yehova, cho tumwetha ngwetu twakandelela manene ku vyuma vyoshe vyanatulingila. (1 Mithzi. 29:17) Muvakele na kwana milambu ya kutungitha tembele, “vanu vanene na chithzango kuli Shukulu Kalunga, chavavwathele manene ha kumona ngechi vanana vyavingi.” (1 Mithzi. 29:9) Tuvavoshe tutwaleleniho kwana Yehova mangana tupwe va kuvwahelela, mwafwa vyoshe vituli navyo vyatunda kuli ikeye.