SYLVIANA wa myaka 27 uje wapwa painiya, wendekele ngwendi: “Kuthziva vyuma vyavivwa vivakaliwanene navyo vavuthamba vange vaje vakapangelele kuje kwakele vapainiya vavandondo, kwanjishongangeyeye njiye na kukapangela kuje kuli vujene.” Oloni wendekele lalo ngwendi: “Njathzivile lyova kukapangela kuje kuli vujene vwakama.”

Neni mukalithzivi ngwe mwalithzivilile Sylviana ndi? Kuma mukathinganyeka kuya na kukapangela kuje kuli vujene vwa vaka-kwambulula ndi? Mukalishoshomwena ngweni kumwatha kushulithilila chilengo cheni ndi? Nga mukemwo, cho kethi muthzeye. Yehova nakwatha vandolome na vandokathzi vavangi kuhyana vukalu vuje vunethi kuvonowethele kukapangela kuje kuli vujene vwakama. Tuchithimutwiyeni ha lifuti lya Madagascar lije lyapwa likanda lya mu chiwana ku vukama mu kaye mangana tumone omwo Yehova wakwathelelemo vandolome na vandokathzi vamo.

Ha myaka 10 kunima, vaka-kwambulula va kutuvakana 70 na vapainiya vaje vatundile ku mafuti a kupwa 11 * vakapangelele mu Madagascar, muje mwakala vanu vakathingimika manene Mbimbiliya. Kutundoho, vaka-kwambulula va mu Madagascar navo vanalyana kuya na kwambulula muthzimbu wa Vumwene mu mitambela yoshe yomwo mu lifuti. Tuchimutwiyeniko vanu vamo vanapangela omwo mu lifuti.

Louis na munakathzi wendi Perrine, va ku France vaje vali na myaka ya kutuvakana 30 vakapangelele ku Madagascar. Ha myaka yaingi, vakele na kuthinganyeka vya kukapangela ku lifuti lyeka, oloni Perrine wakwatakwatele ku mathinde. Perrine wendekele ngwendi: “Njathzivile lyova kukapangela ku lifuti kuje kunjathzivukile. Njalishoshomwenene kuthethza vaka-nanga yetu na chikungulukilo chetu na njuvo yetu yakama na mitambela itwathzivukile na vipangi vitwakele na kulinga ha litangwa na litangwa. Vukalu vunjapandele kuhyana vwapwile kulishoshomwena.” Mu 2012, Perrine wathimpile, ngechi waile na Louis kukapangela ku . Akalithzivi vati ha vyuma vivalyangwilile kulinga? Perrine wendekele ngwendi: “Yehova natukwatha na kututakametha ku sipilitu mu kuyoya kwetu.” Louis nendi wendekele ngwendi: “Njavwahelelele manene omwo twakele ku Chanukitho lwa kulivanga mu Madagascar na kumona vanu  vatwalilongethele navo Mbimbiliya va kupwa 10 vaija na kukunguluka netu.”

Vika vyavakwathele mangana vatwaleleleho kupanga chipangi chavo nameme kwasholokele vukalu? Valombelele kuli Yehova mangana avane ndthzili ya kutakamena vukalu vwavo. (Fili. 4:13) Louis wendekele ngwendi: “Twalimwenenene ngwetu Yehova nakumbulula malombelo etu na kutwana ‘kwoloka kwa Njambi.’ Twakelele manene mbunge ku chipangi chetu chije chatunelele kuvwahelela. Cho lalo, vavuthamba vetu va ku France vatutuminine mithzimbu kupangetha intaneti na mikanda ya kututakametha.”—Fili. 4:6, 7; 2 Koli. 4:7.

Yehova wavethzikithile manene va Louis na Perrine mwafwa ya kukoletha kwavo. Louis wendekele ngwendi: “Mu October 2014, vatulanyele ku Sikola ya Mbimbiliya ya Vaka-Kilisitu va Kulyambata * mu France. Kutulanya kuya ku sikola, kwapwile vwana vwa kutunda kuli Yehova vuje kutukevala.” Omwo vamanethele sikola, vavatumine kukapangela lalo ku Madagascar.

Didier na Nadine va ku France, vaile ku Madagascar mu 2010, te vali na myaka ya kutuvakana 50. Didier wendekele ngwendi: “Twalingile vupainiya te tuchili tu vanike, cho twakele na vana vatatu vatwakele na kulela. Muvakolele vana vetu, twathinganyekele kukapangela ku lifuti lyeka.” Nadine wendekele ngwendi: “Kuthethza vana vetu, kwanjilingithile njikwatekwate ku mathinde, oloni vana vetu vendekele ngwavo, ‘nga muya na kukwatha kuje kuli vujene, cho tuvwahelela manene.’ Vana vetu vatushongangeyeye kukapangela ku lifuti lyeka. Nameme twakala kulyala navo, oloni tukavwahelela kuthimutwiya na vana vetu thimbu yoshe.”

Didier na Nadine vawanene manene vukalu ha kulilongetha ndaka ya Malagasy. Nadine wendekele mu kuvwahelela ngwendi: “Ha thimbu ino tunakolo laja.” Vika vyavakwathele kulilongetha eyi ndaka? Ha kulivanga, valikwatathanene na chikungulukilo chije chapangethele Chifrench. Ngechi, omwo vamwene ngwavo vatha kwendekako ndaka ya Malagasy, cho vanungulukilile mu chikungulukilo chije chakele na kupangetha eyi ndaka. Nadine wendekele ngwendi: “Vanu vavangi vatukawana mu lihya vashaka manene kulilongetha Mbimbiliya. Vakakandelela manene mutukavendela. Ha kulivanga njamwene ngwange evi vyuma kuvyatha kulingiwa. Njavwahelela manene kulingila vupainiya muno mu chitingitingi. Munjikenduka mutondo, mu mbunge yange njikendeka ngwange, ‘njavwahelela manene, lelo njiya na kwambulula.’”

Didier mwakanuka thimbu yashangumukile kulilongetha ndaka ya Malagasy akalithzivi kuvwaha. Didier ngwendi: “Munjatwamenenene chilongetha mu chikungulukilo, kunjakele na kuthziva vikumbululo vya vandolome na vandokathzi. Oloni njakele na kwendeka lika ngwange, ‘twakandelelako.’ Munima ya kukandelela kuli ndokathzi uje wakumbulwile, vaje vatumbamene kuyehi nendi vapikile ku mitwe kumwetha ngwavo chikumbululo chendi kuchavwahele. Vwathi vwathi, njenikile ndolome, cho njakulahela ngwange hamo wakumbulwile mu kuthungama.”

Ha chiwano cha mutambela cha mu 2005 Thierry na Nadia vayongwele vweho vwa “Pursue Goals That Honor  God.” Ovu vweho vwa mu Mbimbiliya vwa kukundama kuli Timateo vwavakwatele manene ku vimbunge, cho vwavashongangeyeye kukapangela kuje kuli vujene vwakama vwa vaka-kwambulula vya Vumwene. Thierry wendekele ngwendi: “Ku mamanethelelo ovu vweho, thimbu tuchikanda ku mavoko, njajendamenene munakathzi wange na kumwihula ngwange, ‘tukapangela kuli?’ Munakathzi wange wakumbulwile ngwendi, nendi vikevyo vyakele na kuthinganyeka.” Munima ya matangwa, vashangumukile kulingako vyuma vimo mangana vashulithilile chilengo chavo. Nadia wendekele ngwendi: “Twashangumukile kutepulula ku vitenga vyetu, cho twathethzeleko lika vije vyafwile mu visulao vyetu viwana.”

Mu 2006 vaile ku Madagascar, cho vakalikuwile chipangi chavo cha kwambulula. Nadia wendekele ngwendi: “Vanu vatukathimutwiya navo, vakatuthzivitha manene kuvwaha.”

Oloni munima ya myaka 6, kuli vukalu vuvaliwanene navwo. Ina ya Nadia, Marie-Madeleine, uje wakele ku France wawile, cho wapokokele livoko na kuvulumuka ku mutwe. Munima ya kuthimutwiya na ndotolo ya Marie-Madeleine, Thierry na Nadia vathanene vaina ngwavo vakakale navo ku Madagascar. Nameme Marie-Madeleine wakele na myaka 80, oloni washuvulukile kuya kuli vana vendi. Akalithzivi vati ha kuyoya mu lifuti lyeka? Wendekele ngwendi: “Kukapu kwakukalu kwithzilila yoyethi yaiha, oloni njikalithzivi kupwa wa theho mu chikungulukilo nameme kunjethi na ndthzili ya kulinga vyavingi. Kukala na vana vange kukekwo kunanjithzivitha manene kuvwaha mwafwa kunavakwatha vatwaleleleho na chipangi chavo cha kwambulula.”

Ndolome Riana ali na myaka 22. Wakolelele mu Alaotra Mangoro, mutamba wa vwilo manene wa ku ngangela ya Madagascar. Ou ndolome wakele na mana ku sikola, cho wayongwele kuya ku masikola akama nga amanetha. Oloni omwo walilongethele Mbimbiliya, watengulwile vithinganyeka vyendi. Wendekele ngwendi: “Njalifwitile kumanetha sikola yange ya sekondali, cho njakulahethele Yehova mu lilombelo ngwange, ‘nga njipasa, cho njishangumuka vupainiya.’” Omwo wamanethele sikola, Riana washulithilile chikulahetho chendi. Waile na ndolome uje wapwile painiya, cho wakawanene ka chipangi kamo kaje kamukwathele kulinga vupainiya. Riana wendekele ngwendi: “Njalyangwilile chilengo chachivwa manene.”

Oloni vavushoko va Riana kuvathzivithithile chuma chamulingithile ajeneke kuya ku ma sikola akama. Wendekele ngwendi: “Vatate na vanananu na vakuku vanjishongangeyeye ngwavo njiye ku ma sikola akama. Oloni kunjalikelele kulinga vupainiya.” Riana wakele na vithinganyeka vya kukapangela kuje kuli vujene vwakama. Vika vyamulingithile akale neli lishungu? Wendekele ngwendi: “Vethzi vakovelele mu njuvo yetu, cho vanjivilile vyuma vyavingi. Vaje vethzi vanjanukithile majwi a Yesu a kutulikila ‘vufuko mwilu.’ Njalifwitile kushakethzeka vufuko vwa ku sipilitu.” (Mateo 6:19, 20) Wakapangelele ku mutambela wa kulako wa mu Madagascar kuje kwakele lilanga lyakama. Kutunda kwakele kuya okwo ku mutambela, apwa makilomita 1,300. Oku ku mutambela kwakala vanu vavatumbula ngwavo va Antandroy. Vika vyaililileko?

Thimbu kanda vachimwivile vitenga vyendi, Riana washangumukile kulilongetha Mbimbiliya na vanalume vavali va va Antandroy. Walilongethele majwi amo a mu ndaka yavo, cho wathinganyekele ngwendi wapandele kukakwatha va Antandroy vaje kanda vachithziveho laja muthzimbu wa Vumwene. Wendekele ngwendi: “Njalombelele kuli Yehova mangana anjikwathe kukapangela ku mutambela kuje kuvakele na kwendeka ndaka ya Chitandroy.”

Riana waile kuje ku mutambela, oloni wakaliwanene na vukalu vumo. Kwamukaluwilile kuwana vipangi. Munalume umo wamwihwile ngwendi: “Vika viunethzila kuno? Vanu va kuno vakai na kushakethzeka vipangi kuje kuunatundu.” Munima ya vyalumingo vivali, Riana waile ku chiwano cha mutambela te nathala lika na tu vimbongo twatundondo. Ha litangwa lya mamanethelelo lya chiwano cha mutambela, ndolome umo wakele chuma chimo mu mbolotho ya Riana. Ocho chuma, chapwile vimbongo vije vyamukwathele kuwana ngila ya kwiluka ku Antandroy na kukashangumuka mingotho ya kulandetha yogurt. Riana wendekele ngwendi: “Njalimwenenene mwanjikwathelelemo Yehova ha thimbu yaivwa. Ngechi, njatwaleleleho kukwatha vanu vaje kanda vachililongethe vya Yehova.” Cho lalo mu chikungulukilo mwakele vipangi vyavingi. Riana wendekele lalo ngwendi: “Njakele na kwendeka viñanda kushwa kumo.  Yehova wakele na kunjilongetha kwitila mu munga yendi.” Na thimbu ino Riana hanga achili na kukwatha vanu vavangi vaje vakendeka Chitandroy mangana vathzivuke Yehova na Vumwene vwendi.

Yehova natukulahetha ngwendi: “Woshe uje ali mu lifuti ashaka chivethzikitho, vakamuvethzikitha kuli Njambi wa kulongwa.” (Isaya 65:16) Nga tulifwita kuhyana vukalu vuje vwatha kutwonowetha kulinga vyavingi mu chipangi cha Njambi, cho Yehova atuvethzikitha. Anukeni vyalingiwile kuli Sylviana itunendeka ku maputukilo eyi ñanda. Walishoshomwenene manene ngwendi katha kukapangela kuje kuli vujene. Mwafwa vika walishoshomwenene? Wendekele ngwendi: “Lindi lyange lya chimoshwe lyapwa lyalihi. Ngechi, njikanjalikita, cho njikajuka vwathi.”

Nameme ngocho, mu 2014, Sylviana waile na ndokathzi Sylvie Ann uje wapwa painiya wa mu chikungulukilo chavo, cho vakapangelele ku mutambela wa kulako, cho kutunda hembo lyavo kuyako apwa makilomita 85. Nameme Sylviana wakele mu vukalu, oloni washulithilile chilengo chendi, cho oku kwamunenelele vivethzikitho vyavingi. Wendekele ngwendi: “Munima ya mwaka umo, Doratine, injakele na kulilongetha nendi Mbimbiliya vamumbwitikile ha chiwano cha chitingitingi.

Ngechi mutunathzivila muvanendekela vaje vanapangela kuje kuli vujene, netu nga tulifwita kuhyana vukalu mangana tulinge vyavingi mu chipangi cha Njambi, cho tulimwena chikulahetho cha Yehova ku vangamba vendi cha kwendeka ngwavo: “Njikamitakametha na kumikwatha.” (Isaya 41:10) Cho vuthamba vwetu na Yehova vukanyama. Kutundoho, nga tulyana na vimbunge vyetu kupangela mu lifuti mutwakala nambe kupangela ku lifuti lyeka, cho twatha kulivwahethela vipangi vya Njambi vitukalinga mu kaye kakaha. Didier itunendeka ku maputukilo, wendekele ngwendi: “Kupangela kuje kuli vujene vwakama, kukakwatha munu alivwahethele vyuma vya kulutwe.” Ngechi, voshe vaje vashaka kulinga vyavingi mu chipangi cha Njambi tuvashongangeya ngwetu vashangumuke kulivwahethela.