1, 2. Mu 2018 tukakala na chilika muka chakama chije chikakwatathana vanu, cho mwafwa vika? (Kengeni chikupulo ha liputa 12.)

HA 31 MARCH, 2018, omwo litangwa liya na kulauka, vanu va Njambi vavangi na vaka-vimbunge vyavivwa vakakunguluka ku chilika cha ha mwaka cha Kulya kwa Mwene kwa Chingwethzi, nambe ngwetu ku Chanukitho cha Kuthsa kwa Yesu. Echi chilika chikalingiwa ha mwaka na mwaka, cho lalo chikakwatathana vanu vavangi mu kaye koshe.

² Yehova na Yesu vakavwahelela manene ha kumona vanu vavangi mu kaye koshe vakunguluka ku chilika cha kulitila. Mbimbiliya yapofwetele ngwayo kukakala “mbunga yakama, na umo wahi wathele kulava vanu voshe vaje. Vatundile ku miyati yoshe na ku mafuti oshe na ku vanu voshe na kuvindaka vyoshe,” cho vatambekele ngwavo: “Kwamena kwatunda kuli Njambi yetu, uje natumbama ha litanda, na kuli Muna Manga.” (Kujo. 7:9, 10) Echi chilika cha ha mwaka cha Chanukitho, chikanene kathingimiko kuli Yehova na Yesu.

3. Vihula muka vivakumbulula muno mu chilongetha?

 ³ Kuli vihula vimo vivakumbulula muno mu chilongetha. (1) Twatha kulivwahethela vati ha kapandi mangana tukawane vukwathi ku Chanukitho? (2) Chanukitho chikakwatha vati vanu va Njambi valikwatathane? (3) Umo na umo wetu napande kulinga vika mangana akundwiye likwatathano? (4) Tangwa kukakala chanukitho chamamanethelelo ndi? Nga mukemwo, cho chikakalako mwaka uka?

4. Mwafwa vika tunapande kwetheka mutwathela mwoshe mangana tukakale ku Chanukitho?

⁴ Thinganyekeni theho ili ha kukala ku chanukitho. Anukeni ngweni kukunguluka kwapwa ngila ya kulemethelamo Njambi. Yehova na Yesu vakamono vaje vakalifwiti kuya ku chilika cha theho manene cha ha mwaka. Tushaka ngwetu Yehova na Yesu vamone ngwavo twetheka mutwathela mwoshe kukakala ku Chanukitho. Nga vilinga vyetu vimwetha ngwavo twamona kukunguluka kupwa kwa theho, cho Yehova athoneka mathzina etu “mu livuli lya chanukitho” nambe ngwetu “mu livulu lya mwonyo” muje muli mathzina a vaje vakawana kuyoya kwa myaka yoshe.—Mala. 3:16; Kujo. 20:15.

5. Nga tuli muyehi na litangwa lya Chanukitho, twatha vati ‘kulyetheka yetu vavenya tumone indi tuva-kakukulahela’?

⁵ Nga tuli muyehi na litangwa lya Chanukitho, cho tuwaneniko thimbu ya kulombela na kulilula mangana tumone muvunakanyamena vuthamba vwetu na Yehova. (Tandeni 2 Kolinte 13:5.) Twatha kulinga vati ngocho? Mu ‘kulyetheka yetu vavenya tumone indi tuva-kakukulahela.’ Twatha kulyetheka yetu vavenya ha kulihula ngwetu: ‘Kuma njakulahela ngwange njili mu munga ya Yehova ije ili na kulinga chithzango chendi ndi? Kuma njili na kulinga munjathela mwoshe kwambulula na kulongetha vanu viñanda vyavivwa vya Vumwene ndi? Kuma vilinga vyange vili na kumwetha ngwavyo tuli mu matangwa a kukotoka, cho lalo kaye ka Satana kali muyehi na kunyonga ndi? Kuma likulahelo linjakele nalyo kuli Yehova na Yesu ha thimbu injalikundikile kuli Njambi, hanga lichinakanyama ndi?’ (Mateo 24:14; 2 Tima. 3:1; Heve. 3:14) Kuthinganyekethetha ha vihula evi, kutukwatha tuthzivuke indi likulahelo lyetu linakanyama.

6. (a) Vika vyatha kukatuwanetha kuyoya kwa myaka yoshe? (b) Mukulunu umo akalivwahethela vati Chanukitho ha mwaka na mwaka, cho munatha kumutembwinina vati?

⁶ Tandeni na kuthinganyekethetha ha Vithoneka vije vimwetha theho ya Chanukitho. (Tandeni Yowano 3:16; 17:3.) ‘Kuthzivuka’ Yehova na ‘kukulahela’ Yesu, ikeyo lika ngila itwala ku kuyoya kwa myaka yoshe. Nga tushaka kulivwahethela Chanukitho, cho twanguleniko viñanda vimo vitulilongetha vije vitushwenyetha kuyehi na Yehova na Yesu. Tuchithimutwiyeni vyakele na kulinga ndolome umo uje napu mukulunu ha myaka yaingi. Ou ndolome, wakele na kutulika viñanda vimo vije vikakala mu mangazini a kulithethzathethza a Kaposhi ka Kukengela vije vithimutwiya ha Chanukitho na ha chithzemo cha Yehova na Yesu kuli yetu. Nga Chanukitho chili muyehi ou ndolome wakele na kwituluka omu mu viñanda na kuthinganyekethetha ha theho yechi chilika. Ha vithimbu vimo wakele na kuvwethzelelako lalo ñanda imo nambe vivali vya mu mangazini. Ou mukulunu, nawana vukwathi mu kwituluka mu viñanda vyakatulika na kutanda Vithoneka vya Chanukitho na kuthinganyekethethaho, cho ha kulinga ngocho, akalilongetha vyuma vyaviha mwaka na mwaka. Cho wakele na kulithziva ngwendi chithzemo chendi kuli Yehova na Yesu chili na kukanyama ha mwaka na mwaka. Neni nga mulilongetha mu ngila eyi, cho muthzema manene Yehova na Yesu na kuwana vukwathi vwakama ku Chanukitho.

7. (a) Yesu walombele vika ha vuthsiki vuje vwalingile chilika cha Kulya kwa Mwene kwa Chingwethzi? (b) Vika vimwetha ngwavo Yehova nakumbulula lilombelo lya Yesu?

⁷ Ha vuthsiki vuje vwalingile chilika cha Kulya kwa Mwene kwa Chingwethzi, Yesu walombelelele vaka-kumukavangeya ngwendi, valikwatathane ngechi mwanalikwatathanena ikeye na Ishe. (Tandeni Yowano 17:20, 21) Chili vene Yehova nakumbulula eli lilombelo lya kulitila lya Munendi, mukemwo vanu vavangi vanathzivuka ngwavo Yehova watumine Yesu. Vakaleho va Yehova vanalimwena ngwavo Chanukitho chikakwatathana vanu va Njambi. Vanu va mu mafuti amangi na vikova vya kulithethzathethza vakalikungulula mu mitambela ya kulithethzathethza mu kaye koshe. Ku mitambela imo, vanu vakakathama ha kumona vanu va miyati ya kulithethzathethza valikungulwila hamo mu kulemetha Njambi, cho vakamono ngwavo kulinga ngocho kukwapandele. Yehova na Yesu vakavwahelela kumona eli likwatathano.

8. Yehova wanene Ezekiyele muthzimbu muka?

⁸ Ha kupwa vanu va Yehova kutwatha kukathama ha kumona eli likwatathano, mwafwa Yehova wapolofwetele laja ngwendi mukemwo muchikafwa. Tuchithimutwiyeni ha muthzimbu wapolofwetele Ezekiyele wa kunungakana viti vivali, chiti cha “Yunda” na chiti cha “Yosefa, NWT.” (Tandeni Ezekiyele 37:15-17.) Kaposhi ka Kukengela ka Silozi ka July 2016, ha mutwe wa “Vihula vya Vaka-Kutanda,” kendekele ngwako: “Yehova walekele Ezekiyele ngwendi Vaisalele vakalikwatathana omwo vakelukila mu Lifuti lya Chikulahetho. Ovu vupolofweto vwendeka lalo vya likwatathano lya vanu va Njambi va mu matangwa a kukotoka.”

9. Vupolofweto vwa Ezekiyele vuli na kulishulithilila vati mwaka na mwaka ha Chanukitho?

⁹ Kushwa mu mwaka wa 1919, Yehova wakongweyeye na kukwatathana va kuvwavetha vaje vemanenako chiti “cha Yunda.” Kutundoho, omwo mbunga ya vimanga veka ije imanenako chiti “cha Yosefa” yashangumukile kulikwatathana na va kuvwavetha, cho evi vivunga vivali vyapwile “vutanga vumo.” (Yowa. 10:16; Zaka. 8:23) Yehova wakulahethele kunungakana evi viti vivali na kuvipwitha chiti chimo chije chili mu livoko lyendi. (Ezeki. 37:19) Ha thimbu ino, evi vivunga vivali vili na kupangela hamo mu kuvitwamenena kuli Mwene Yesu Kilisitu uje ivapolofwetele lalo ngwavo ikeye ‘Ndaviti ngamba’ ya Njambi. (Ezeki. 37:24, 25) Eli likwatathano lya kulitila lyathonekele Ezekiyele, lili na kusholoka mwaka na mwaka omwo va kuvwavetha na “vimanga veka” vakalikungulwila hamo na kulinga chilika cha kwanuka kuthsa kwa Yesu. Vika vyanatha kulinga umo na umo wetu mangana akundwiye eli likwatathano?

10. Twatha kulikwatathana vati na vanu va Njambi?

¹⁰ Ngila ya kulivanga ya kukundwiyamo likwatathano na vanu va Njambi inapu kulikehetha. Yesu mwakele hano hathi, wanangwile vandongethi vendi ngwendi vapwe va kulikehetha. (Mateo 23:12) Nga tupwa va kulikehetha, cho kutukala na sipilitu ya mu kaye ya kulijundula. Oloni tulipokwetha kuli vaje vali na kututwamenena, cho lalo kwononoka kwa chifwa echi kwapwa kwa theho manene mwafwa kukanene likwatathano mu chikungulukilo. Kutundoho lalo, kulikehetha kukathzivitha Njambi kuvwaha mwafwa “akavyana vaka-kulyaletha, oloni akamwetha kutetela kuli vaka-kulikehetha.”—1 Petu. 5:5.

11. Kuthinganyekethetha ha vulumbunwithi vwa vifwitha vya ha Chanukitho kutukwatha vati kukundwiya likwatathano?

¹¹ Ngila ya mu chivali itwatha kukundwiya likwathano inapu kuthinganyeka ha vulumbwinithi  vwa vifwitha vitukalikwathetha ku Chanukitho. Thimbu kanda chilika chishangumuke na ha thimbu ya chilika tunapande kuthinganyeka ha vyuma viyimanena likende na vinyu. (1 Koli. 11:23-25) Likende imanena muvila wa Yesu wa kujeneka vuvi, cho vinyu vimanena maninga endi aje etikile. Oloni kuli vyuma vyeka lalo vitunapande kuthzivuka, kethi kuthzivuka lika vivilumbununa vifwitha vya ha chanukitho. Anukeni ngweni kuli vyuma vivali vyakama vyalivungila mu ñombelo ya Kilisitu. Yehova wamwethele chithzemo ha kutwana Munendi, cho lalo na Yesu wamwethele chithzemo ha kulyana kututhsila. Kuthinganyeka ha chithzemo chavo kutushongangeya kuvathzema. Chithzemo cha kuthzema Yehova na kuthzema vakwetu vaka-Kilisitu, chinapu ngwe mukole uje utukutila hamo lika na kukoletha likwatathano lyetu.

12. Mu chithimo cha ngamba wa kujeneka kuthambetha, Yesu walumbunwine vati vyatonda Yehova kuli yetu?

¹² Ngila ya mu chitatu itwatha kukundwiya likwatathano lyetu inapu kuthambetha vakwetu kutundilila kwithi ya mbunge. Nga tuthambetha vaje vanatuvulumwina, cho tumwetha ngwetu twakandelela manene ku ñombelo ya Kilisitu ije inathiwitha vuvi vwetu vavuthambethe. Tuchithimutwiyeni ha chithimo chatele Yesu chije chili ku Mateo 18:23-34. Lihuleni ngweni: ‘Njikapangetha vyalongethele Yesu ndi? Kuma njikakwata mbunge na kuthambetha vakwetu vaka-Kilisitu ndi? Kuma njalivwahethela kuthambetha vaje vanjivulumwina ndi?’ Nameme ngocho, kuli vuvi vumo vuje vwapwa vwavukalu kuvuthambetha kuli vanu va kujeneka kulumbunuka. Oloni echi chithimo chitulongetha vyatonda Yehova kuli yetu. (Tandeni Mateo 18:35.) Yesu walumbunwine ngwendi Yehova katha kututhambetha nga kututhambetha vandolome vetu. Echi chinapu chilongetha chakama indi vati? Nga tuthambetha vakwetu kwetheketha nomwo mwalongethelelemo Yesu, cho twatha kunyungilila likwatathano lyetu.

13. Kuthambetha vakwetu kunena vati likwatathano na kwoloka?

¹³ Nga tuthambetha vakwetu, cho tukala navo mu kwoloka. Anukeni chinangulo cha kapositolo Paulu uje wendekele ngwendi: “Nyungeni mwamuvwa manene kulitombola kwa mbunga ije yanamyana [sipilitu] ha  kwoloka chije chinamikutila hamo lika muvavoshe.” (Efeso 4:3) Ha Vingonde vino vya Chanukitho na ha litangwa lya Chanukitho, thinganyekeni manene mumuli na kuyoyela na vakweni. Lihuleni ngweni: ‘Kuma njikakala na likitikiti ku mbunge ndi? Kuma njikapanga na ndthzili mu kukundwiya likwatathano na kwoloka ndi?’ Evi vinapu vihula vya theho vitunapande kuthinganyekethethaho ha vingonde vya Chanukitho cha uno mwaka.

14. Twatha kumwetha vati ngwetu tuli na ‘kusholola chithzemo mu kuliyandela umo na mukwavo’?

¹⁴ Ngila ya mu chiwana ya kukundwiyamo likwatathano inapu kukala na chithzemo mu kutembwinina Yehova uje wakala na chithzemo. (1 Yowa. 4:8) Kutwapandele kwendeka vakwetu vaka-Kilisitu ngwetu: “Njinatha kuvathzema, oloni kunjavashakele.” Vithinganyeka vya chifwa echi kuvilitombola na chinangulo cha Paulu uje wendekele ngwendi, tunapande ‘kusholola chithzemo chetu mu kuliyandela umo na mukwavo.’ (Efeso 4:2) Anukeni ngweni Paulu kendekele lika ngwendi ‘tuliyandele umo na mukwavo.’ Oloni wendekele lalo ngwendi tunapande ‘kusholola chithzemo.’ Awa majwi analithethze. Mu vikungulukilo vyetu muli vanu va kulithethzathethza vaje vananenemo Yehova. (Yowa. 6:44) Omwo Yehova ikeye navanene, oku kulumbununa ngwavo wavathzema. Cho yetu vika vitwendekela vakwetu vaka-Kilisitu ngwetu kutwapandele kuvathzema? Tunapande kukala na chithzemo mwafwa Yehova ikeye natuleke ngwendi tulinge ngocho.—1 Yowa. 4:20, 21.

15. Tuthzivuka vati ngwetu tangwa kukakala Chanukitho cha mamanethelelo?

¹⁵ Tangwa kukakala Chanukitho cha mamanethelelo. Tuthzivuka vati ngocho? Paulu wathonekelele vaka-Kilisitu va kuvwavetha va ku Kolinte mukanda wa kulivanga wa kuhwiminina kukundama ku kwanuka kuthsa kwa Yesu ha mwaka na mwaka ngwendi: ‘Ambululeni kuthsa kwa mwene noho akaija.’ (1 Koli. 11:26) Lijwi lya “akaija” lyendelela na lijwi lya “kwija” lije lyendekele Yesu mu vupolofweto vwendi kutaletha ku matangwa a kukotoka. Yesu wendekele ha ñavava yakama ije ili muyehi ngwendi: “Chithzivukitho cha Muna Munu chikasholoka mwilu, cho miyati yoshe ya vanu hano hathi vakalila Mbimbi mitwe omwo vakamona Muna Munu ali na kwija ha mashelwa na ndthzili na vumpau vwakama. Cho lupembo lwakama lukaimba, cho [Yesu] akatuma tungelo twendi ku vimbango viwana vya hano hathi, cho vakakungulula vanu vendi vaje vangwile kutunda kushongo imo ya kaye na kweta ku shongo ikwavo ya kaye.” (Mateo 24:29-31) Thimbu ya ‘kukungulula vaje vavanangula’ inataletha kuli vaka-Kilisitu va kuvwavetha vaje vachili hano hathi omwo vakatambula vwana vwavo vwa kukayoya mwilu. Eyi thimbu, ikalingiwa ku mamanethelelo a ñavava yakama thimbu kanda ndthzita ya Alamangindone yete. Kutundoho, voshe vakupwa 144,000 vakalikwatathana na Yesu mu kulwitha vimyene va hano hathi. (Kujo. 17:12-14) Ngechi, chanukitho chitukalinga thimbu kanda vachikungulule va kuvwavetha na kuya mwilu chikecho chikapwa cha mamanethelelo, mwafwa ha thimbu oyo, cho Yesu ‘naija.’

16. Mwafwa vika mwalyangwila kukakala ku Chanukitho cha mwaka uno?

¹⁶ Tulyangwileni kukakala ku Chanukitho chije chikakalako lya 31 March, 2018 mangana tukawane vukwathi vwakama. Cho lalo, tutwaleni lutwe kulomba kuli Yehova mangana atukwathe kukundwiya likwatathano lije lili mukati ka vanu va Njambi. (Tandeni Myatho 133:1.) Anukeni ngweni tangwa tukalinga Chanukitho cha mamanethelelo. Ha thimbu ino, tulingeni mutwathela mwoshe mangana tukakale ku Chanukitho, cho lalo, tukalikuwe likwatathano lije litukakala nalyo ha thimbu ya Chanukitho.