Vihula vya Vaka-Kutanda
Kuma kwapwa kwakuvwa kuli muka-Kilisitu kukala na vuta vwa tuhya mangana alyamene ku vakwavo vanu ndi?
Nambe ngwavo vaka-Kilisitu vatha kulyamena mu vingila vimo, oloni valinga ngocho mu kukavangeya vinangulo vya mu Mbimbiliya. Evi vinangulo vikatukwatha kuthzivuka mwakulikwathethela vitwa vya kufwa ngwe vuta vwa tuhya mu kulinyungilila ku vakwetu vanu. Tuchithimutwiyeni hali evi vinangulo:
Yehova wamona myonyo ya vanu kupwa ya theho manene. Muka-kwimba Ndaviti wathzivukile ngwendi Yehova ikeye ‘muka-kwana mwonyo ku vyuma vyoshe.’ (Myatho 36:9) Nga muka-Kilisitu alyamena nambe kuvingilila vikwata vyendi, alinga mwathela mwoshe mangana kethi athsiye munu na kukala na mulonga wa maninga.—Kwitu. 22:8; Myatho 51:14.
Nameme kulikwathetha chuma choshe mu kulyamena kwatha kunena mulonga wa maninga, oloni kulikwathetha vuta kwatha kunenetha ngwavo tuthsiye munu mu kushaka nambe mu kujeneka kuvandamena. * Nga vaka-kulwitha vamona ngwavo munu alikwathetha vuta mu kulyamena vakalingi muvathela mwoshe kulyohyela, cho echi chinatha kunena vuthsi.
Yesu kathinganyekele vya kulyamena omwo walekele vandongethi vendi ngwendi vambate mikwale yavo ha thimbu ya mamanethelelo a vuyoye vwendi vwa hano hathi. (Luka 22:36, 38) Yesu wendekele ha mikwale mu kulongetha vandongethi vendi, oloni kalumunwine ngwendi vaipangethe mu kulyamena ku vitothzi vavo. (Luka 22:52) Omwo Petulu wavulumwine ndungo ya kapilisitu wakama, Yesu wamulekele ngwendi: “Shomeka mukwale wove mu chindalo chawo.” Kutundoho, Yesu walekele vaka-kumukavangeya ngwendi: “Voshe vaje vapangetha mikwale yavo vakanyonga ku mikwale yavo.” Echi chinangulo chichipanga na matangwa ano.—Mateo 26:51, 52.
Mukanda wa Mika 4:3, umwetha ngwavo vanu va Njambi “vakafula mikwale yavo kupwa matemo, na makunga kupwa vimoko vya kunongetha miti.” Vilinga vyavivwa vya vaka-Kilisitu va vuthunga vilikwatathana na majwi a kuhwiminina athonekele kapositolo Paulu ngwendi: “Nga umo na kuviyithila, kethi umwilwithile vuvi vwendi lalo embwe. . . . Lingeni vyuma vyoshe ngwe mumunathela na kuyoya mu kwoloka kuli munu na munu.” (Loma 12:17, 18) Nameme waliwanene mu tuyando twakama twa kufwa ngwe ‘vushonde vwa vethzi,’ Paulu kalikwathethele vitwa mu kulyamena, oloni wakele vyuma vya ku sipilitu kulutwe kutuvakana vya ku muvila. (2 Koli. 11:26) Paulu wakulahelele Yehova na mana ali mu Mbimbiliya, mana aje “amavwa manene kutuvakana vitwa vya ndthzita.”—Kwambu. 9:18.
Vaka-Kilisitu vamona mwonyo kupwa wa theho manene kutuvakana vyuma vya ku muvila. “Kuyoya kwa munu kukwakundamene ku vyuma vyali navyo.” (Luka 12:15) Nga majwi amavwa kuwamanetha vukalu, vaka-Kilisitu va kunyanyama vakakavangeya majwi a Yesu, uje wendekele ngwendi: “Kethi ulinge shambandinga kuli munu uje akulinga mwamuvi.” Echi chinatha kulumbununa kumwana vyuma vyoshe vyatonda. (Mateo 5:39, 40; Luka 6:29) * Chuma cha theho manene chitunapande kulinga chinapu kulinyungilila. Nga ‘kutulyaletha na vyuma vituli navyo,’ oloni tuyoya mwamuvwa na vakwetu vatwakala navo, cho echi chitunyungilila ku mapwepwe.—1 Yowa. 2:16; Vithi. 18:10.
Vaka-Kilisitu vakathingimika vitakutaku vya vakwavo. (Loma 14:21) Nga vaka-Kilisitu vathziva ngwavo munu umo mu chikungulukilo ali na vuta vwa tuhya vwa kulyamena ku vanu, cho echi chinatha kuvakomoketha nambe kuvathzeyetha. Chithzemo chikecho chikatulingitha tuthingimike vitakutaku vya vakwetu na kujeneka kulilingila vyuma vitushaka lika yetu.—1 Koli. 10:32, 33; 13:4, 5.
Vaka-Kilisitu vaketheka muvathela mwoshe kulinga vyuma vyavivwa. (2 Koli. 4:2; 1 Petu. 5:2, 3) Nga muka-Kilisitu atwalelelaho kukala na vuta nameme vanamunangula kupangetha Vithoneka, cho owo muka-Kilisitu kethi na kulinga mwamuvwa. Cho kuvatha kumwana chipangi mu chikungulukilo. Echi chinatha kulingiwa nambe kuli muka-Kilisitu uje atwalelelaho kupanga chipangi cha kulikwathetha vuta. Kunapu kwakuvwa kushakethzeka chipangi cheka! *
Muka-Kilisitu natha kulyangwila vingila vya kulyamena na kwamena nanga yendi nambe kunyungilila vikwata vyendi ngwe mwanatha kwangwila kupanga chipangi chije kuchakundamene ku kulikwathetha vuta. Evi vinangulo vya mu Mbimbiliya vimwetha mana a Njambi, nomwo mwatuthzemenamo. Mu kukavangeya evi vinangulo, vaka-Kilisitu va kukola ku sipilitu vakalyangwila kujeneka kukala na vuta vwa tuhya vwa kulinyungilila navwo ku vakwavo vanu. Vathzivuka ngwavo woshe uje atolilila kuli Njambi na kukavangeya vinangulo vya mu Mbimbiliya akakala mu kwoloka.—Myatho 97:10; Vithi. 1:33; 2:6, 7.
Ha ñavava yakama vaka-Kilisitu kuvakalikulahela vakevo vavenya, oloni vakakulahela Yehova mu kuvamena
^ par. 3 Muka-Kilisitu natha kulyangwila kukala na vuta vwa tuhya vwa kulikwathetha ku kuyomba tuthitu twa mbelela nambe kulyamena ku vikashama va mu shwata. Nga kutulikwathetha vuta, cho tunapande kutundithamo vilyanga na kuvutulika kulako. Nga mu mutambela mutwakala vakavindika vanu kukala na vitwa mu vinjuvo vyavo, cho vaka-Kilisitu valinga mwamuvwa kuthingimika owo mashiko.—Loma 13:1.
^ par. 2 Nga mushaka kuthzivuka vyavingi ha ñanda ya kulyamena kuli vaka-kupika, kengeni ñanda ya mu Awake! ya March 8, 1993 ya mutwe wa “Mwakulinyungilila Kuli Vaka-kupika.”
^ par. 4 Nga mushaka kuthzivuka vyavingi ha ñanda ya kupanga chipangi chije chinakundama ku kulikwathetha vuta, cho kengeni Tawala ya Mulibeleli ya November 1, 2005, lipu. 31; na Watchtower ya July 15, 1983, lipu. 25-26.