1, 2. Mwafwa vika tunapande kuthimutwiya vya kuthzembeleka vaje vanathsitha? (Kengeni chikupulo ha liputa 12.)

SUSI wendekele ngwendi: “Nameme kuneti mwaka kutunda hanathsila munetu, oloni tuchili mu vuthiwa vwakama. Ndolome umo wendekele ngwendi: “Omwo munakathzi wange wathsile, njathzivile manene kuvavala ku mbunge.” Vanu vavangi vakalinyenge manene nga vanathsitha. Vaka-Kilisitu vavangi vanathsitha vanu vavathzema ha thimbu ije kuvavandamenene. Nambe munathsitha nambe vakweni vakevo vanathsitha, mwatha kulihula ngweni: ‘Vyuma muka vyatha kuthzembeleka vaje vanathsitha?’

² Vanu vakendeka ngwavo nga kuneti myaka yaingi, cho vuthiwa vutepuluka. Kuma kwita kwa myaka kumanetha vuthiwa vwa munu ndi? Fwile umo wendekele ngwendi: “Vyuma vyalinga munu vikevyo vitepulula nambe kuvwethzelela ku vuthiwa vwendi.” Ngechi lika mwa mbandu muyatha kwola nga twakaho vumbanda vuje vunapande, na vuthiwa navwo vwatha kutepuluka  nga kuli vamo vatuthzembeleka mwamuvwa. Vika vyatha kuthzembeleka vaje vanathsitha?

3, 4. Mwafwa vika tukulahela ngwetu Yehova athzivuka vuthiwa vwa vanu vaje vanathsitha?

³ Tate yetu wa chithzemo Yehova, ikeye muka-kuthzembeleka wakama. (Tandeni 2 Kolinte 1:3, 4.) Yehova, muka-kuthzembeleka mu chithzemo, nakulahetha vanu vendi ngwendi: “Yange muka-kumitakametha.”—Isaya 51:12; Myatho 119:50, 52, 76.

⁴ Tate yetu wa chithzemo nendi walithzivile vuthiwa omwo vavuthamba vendi vathsile, va kufwa ngwe Avilahama na Isake na Yakomba na Mosesa na Mwene Ndaviti. (Kula. 12:6-8; Mateo 22:31, 32; Vili 13:22) Lijwi lya Njambi ngwalyo Yehova ashungwiya kukathangula ava vanalume. (Yombi 14:14, 15) Ava vanalume vakavwahelela na kupwa va kulikangula. Anukeni lalo ngweni Yesu, uje wathzivithile Njambi kuvwaha wathsile vuthsi vwavuvi manene. (Vithi. 8:22, 30) Yehova walithzivile manene kuvavala ku mbunge omwo munendi wathsile.—Yowa. 5:20; 10:17.

5, 6. Yehova atha kututhzembeleka vati?

⁵ Netu twakukahela ngwetu Yehova atukwatha. Tunapande kumuleka vuthiwa vwetu mu lilombelo. Kukatuthzembeleka kuthzivuka ngwetu Yehova akamono kuvavala kutukathzivi, cho akatuthzembeleka mu ngila ije inapande. Akatuthzembeleka vati?

⁶ Ngila imo yakatuthzembelekelamo Njambi inapu ya ‘vukwathi vwa sipilitu ya kujela.’ (Vili. 9:31) Eyi sipilitu ya Njambi ikatukwatha manene nga tuli mu vuthiwa. Yesu wakulahethele ngwendi: Tate yetu wa mwilu ‘akana sipilitu ya kujela kuli vaje vamulomba.’ (Luka 11:13) Susi, itunavanga kwendeka wendekele ngwendi: “Twakele na kulomba kuli Yehova thimbu yoshe mangana atuthzembeleke. Ngechi kwoloka kwa Njambi kwanyungile vimbunge na viyongola vyetu”—Tandeni Filipu 4:6, 7.

7, 8. Mwafwa vika twakulahela ngwetu Yesu atha kututhzembeleka?

⁷ Yesu Muna Njambi, washolwele mwamuvwa ngothzi ya Yehova mu majwi na mu vilinga, omwo wakele hano hathi. (Yowa. 5:19) Yesu wethzile mu kuthzembeleka “vaka-vimbunge vya kupokoka” na “voshe vaje vali na kulila.” (Isaya 61:1, 2; Luka 4:17-21) Yesu wathzivilile vanu ngothzi na kuthzivithitha vukalu vwavo na kuwana vingila vya kuvakwathelamo.—Heve. 2:17.

⁸ Ha thimbu yapwile mwanike, Yesu wathzivile vuthiwa omwo ya kuthsa kwa vanu va mu nanga yendi na vavuthamba vendi. Chasholoka ngwe Yosefa, ishe ya Yesu uje wamulelele, wathsile te Yesu achili mwanike.  *Yesu wakele mu vuthiwa vwakama ha thimbu oyo, cho lalo wathzivilile ngothzi vaina na vandolome na vandokathzi vendi.

9. Yesu wamwethele vati ngothzi omwo Lazalu wathsile?

⁹ Yesu mwashangumukile chipangi chendi, wathzivukile vukalu vuvali wanene navwo vanu na kuvathzivila ngothzi. Achithinganyekeni mwalithzivilile Yesu omwo kavuthamba kendi wa ha mbunge Lazalu wathsile. Nameme Yesu wathzivukile ngwendi  atha kuthangula Lazalu, oloni wapokokele mbunge ngwe muvapokokelele vimbunge va Maliya na Mata. Walithzivile manene vuthiwa, cho nendi washangumukile kulila.—Yowa. 11:33-36.

10. Mwafwa vika twakulahela ngwetu Yesu akathzivila vanu ngothzi matangwa ano?

¹⁰ Ngothzi yamwethele Yesu yatha kutukwatha vati matangwa ano? Vithoneka ngwavyo, “Yesu Kilisitu ikeye umolika na ithzau na lelo na ku myaka yoshe.” (Heve. 13:8) Muka-kututwamenena ku “mwonyo” athzivuka mukwafwila kukala mu vuthiwa, cho “atha kukwatha vaje vali na kumona vyetheko.” (Vili. 3:15; Heve. 2:10, 18) Ngechi, twakulahela ngwetu Kilisitu akathzivila vanu ngothzi na kuthzivithitha vuthiwa vwavo na kuvathzembeleka ha thimbu ije ‘vanajeneka.’—Tandeni Vahevelu 4:15, 16.

11. Vithoneka muka vikamithzembeleka manene?

¹¹ Ñanda ya kuthsa kwa Lazalu na vuthiwa vwalithzivile Yesu ha thimbu oyo, inapuko imo ya viñanda vije vyakala mu Lijwi lya Njambi vije vikatuthzembeleka. Echi chalitombola na majwi akwendeka ngwavo ‘vyuma vyoshe vivathonekele mu Vithoneka vavithonekele mu kutulongetha, ngechi tukale na lilavelelo lya kutunda ku lukakateya na ku kutakametha kuje kutunda ku Vithoneka.’ (Loma 15:4) Nga muli mu vuthiwa, cho evi vithoneka vinatako vyatha kumithzembeleka:

• “Shukulu Kalunga ali muyehi na vaje vanathzeye mu vimbunge, ikeye amena vaje vanajeneka chinyangavili [lilavelelo].”—Myatho 34:18, 19.

• ‘Omwo viyongola mu mbunge yange vyatumine, oloni yove [Yehova] wanjithzembelekele na kunjithzivitha kuvwaha.’—Myatho 94:19.

• “Mwene yetu Yesu Kilisitu vavenya, na Njambi Tate yetu, uje watuthzemene na mu kutetela kwendi watwanene kutakama kuje kukwethi kutenguluka na chinyangavili cha kukola, amitakamethe na kumikoletha.”—2 Tesa. 2:16, 17. *

12. Ngila muka imo ya theho itwatha kuthzembelekelamo vakwetu?

¹² Chikungulukilo cha vaka-Kilisitu chikathzembeleka manene vaje vali mu vuthiwa. (Tandeni 1 Tesaloka 5:11.) Mwatha kutakametha na kuthzembeleka vati vaje vali na “kulinyenga”? (Vithi. 17:22) Anukeni ngweni “kuli thimbu ya kwoloka kulu, na thimbu ya kuthimutwiya.” (Kwambu. 3:7) Dalene, uje wapwa fwile wendekele ngwendi: “Vaje vali mu vuthiwa vanapande kwendeka vili ku mbunge yavo. Ngechi nga vamileka vukalu vwavo, cho kethi muvavatwiye, oloni vatolilileni mwamuvwa. Junia, uje wakele na shongo yendi wa munalume uje walithsiyile vavenya wendekele ngwendi: “Nameme kumwatha kuthzivithitha vuthiwa vuvali navwo, oloni valithziva mwamuvwa nga muvathzembeleka.”

13. Vanu vakamwetha vati vuthiwa?

¹³ Anukeni lalo ngweni vanu vakamwetha vuthiwa mu vingila vya kulithethzathethza. Vamo kunatha kuvakaluwila kwendeka vili ku mbunge yavo, mwafwa ya vuthiwa vwakama. Lijwi lya Njambi ngwalyo: “Mbunge na mbunge ithzivuka vukalu vwayo, cho naumo wahi atha kuvwahelela nayo.” (Vithi. 14:10) Nameme vakwetu vatuleka muvali na kulithzivila, oloni kutwethi kuthzivithitha vivalumbununa mu kushula.

14. Twatha kuthzembeleka vati vaje vanathsitha?

 ¹⁴ Thimbu imo kunatha kutukaluwila kuthzivuka vya kwendeka omwo tuthzembeleka vakwetu. Oloni Mbimbiliya yatuleka ngwayo: “Majwi a kwendeka mwamuvwa akahwimitha mbunge.” (Vithi. 12:18) Vamo vanapangetha mbuloshuwa ya Muta Mutu Yo Mu Lata H’a Timela mu kuthzembeleka vakwavo. * Oloni chuma chakama chimunapande kulinga chinapu ‘kulila na vaje vali na kulila.’ (Loma 12:15) Gaby uje wathsithile munalume wendi wendekele ngwendi: “Njikalili manene munjikanuka munalume wange. Nga vakwetu valila nange, cho njikamono ngwange vali na kunjithzembeleka. Ha thimbu eyi, njikamono lalo ngwange kethi yange lika njili mu vuthiwa.”

15. Twatha kuthzembeleka vati vakwetu nga kukatukaluwila kwendeka navo chitona mesho? (Kengeni chipalo cha “ Majwi Amavwa a Kuthzembeleka.”)

¹⁵ Nga kukatukaluwila kuthzembeleka vakwetu chitona mesho, cho twatha kuvatumina kati ije ili na majwi a kuvathzembeleka nambe kuvatumina kamuthzimbu kupangetha intaneti nambe foni nambe kuvathonekela mukanda. Twatha kuvatumina majwi a mu chithoneka aje atha kuvathzembeleka, nambe kuvanukitha ha vifwa vyavivwa vyakele navyo muka-kutoka nambe kuvalekako vyuma vyavivwa vije vyamithzivithile kuvwaha. Junia wendekele ngwendi: “Njikalithziviko inaho omwo njikatambula tumithzimbu twa kunjithzembeleka na tuvilanyo twa kutunda ku vakwetu vaka-Kilisitu. Vilinga vya chifwa echi vikamwetha ngwavo vanjithzema na kunjaka mbunge.”

16. Ngila muka ikwavo itwatha kupangetha mu kuthzembeleka vakwetu?

 ¹⁶ Kulombelela vakweni vaka-Kilisitu inapuko ngila ikwavo ya kuvathzembeleka. Thimbu imo tukonowa kulombela mwafwa ya kupokoka manene vimbunge, oloni tunapande kwetheka mutwathela mwoshe kuvalombelela kutundilila kwithi ya mbunge mangana tuvathzembeleke. Dalene wendekele ngwendi: “Vandokathzi muvakanjendela, njikavalombo ngwange valombele. Muvakashangumuka kulomba kuvethi kuthzituka, kukapwa muje, majwi avo ashangumuka kuthzivika mwamuvwa na kulomba kutundilila kwithi ya vimbunge vyavo. Likulahelo lyavo na chithzemo chavo na kunjaka mbunge kwavo kunatakametha likulahelo lyange.”

17-19. Mwafwa vika tunapande kutwalelelaho kuthzembeleka vakwetu?

¹⁷ Vanu vamo vakalithzivi vuthiwa mu vingila vya kulithethzathethza. Ngechi, vendeleni thimbu yoshe, kethi lika ha thimbu ya vya kuthsa, oloni na hanima ya vya kuthsa omwo vavushoko na vavuthamba vavo vanavathethze likalyavo. “Vathamba vamwetha chithzemo chavo thimbu yoshe, vavushoko vanathemukila ngechi vamwene hamo tuyando.” (Vithi. 17:17) Vakwetu vaka-Kilisitu vatha kututhzembeleka mwakama nga tuli mu vuthiwa mangana tukolethe.—Tandeni 1 Tesalonika 3:7.

¹⁸ Anukeni ngweni vaje vanathsitha vakalithzivi manene vuthiwa ha thimbu ya kwanuka litangwa, nambe kutolilila ku myatho imo nambe kukenga vikupulo vimo, nambe kupanga vipangi vimo nambe kunika kwa lwengo lumo nambe kuthziva majwi amo nambe ha vithimbu vimo vya mukati ka mwaka. Vaje vanathsitha vaka-limbo lyavo vatha kulithziva manene vuthiwa omwo vaya likalyavo ku Chanukitho nambe ku chiwano. Ndolome umo wendekele ngwendi: “Njayongwele kulinga kachilika ka kwanuka litangwa lyetu lya vulo, oloni kwanjikaluwilile. Ngechi vandolome na vandokathzi vamo vavwahetheleko ka chilika ka kuvwahelela na vavuthamba vange va ha mbunge mangana njijeneke kukala likalyange.”

¹⁹ Vaje vanathsitha vashaka kuvathzembeleka thimbu yoshe, kethi ha thimbu lika ya vilika embwe. Junia wendekele ngwendi: “Vanu vakalithzivi mwamuvwa nga vavakwatha na kuvathzembeleka ha thimbu yoshe yoshe. Kukwatha munu ha thimbu yoshe yoshe kukamutakametha manene.” Nameme kutwatha kumanetha vuthiwa vwoshe vuvali navwo vanu omwo ya kuthsitha munu ivathzema, oloni twatha kuvathzembeleka na kuvatakametha nga tuvakwatha. (1 Yowa. 3:18) Gaby wendekele ngwendi: “Njikandelela manene kuli Yehova ha kulikwathetha vakulunu vaje vanjikwathele mu vukalu vunjakele navwo. Vukwathi vwavo vwanjikwathele kumona ngwange Yehova wanjithzema manene.”

20. Vikulahetho vya Yehova vikatutakametha vati?

²⁰ Kukatuthzembeleka manene kuthzivuka ngwetu Yehova, Njambi uje akatuthzembeleka ololo amanetha vuthiwa na kutunenela kuvwahelela omwo “vathsi voshe vakathziva lijwi lyendi, [Kilisitu] cho vakatuhuka mu vimbumbo vyavo.” (Yowa. 5:28, 29) Yehova nakulahetha ngwendi: “akanyongetha ndthzili ya kuthsa na kuthikumuna mithothzi ku mesho a munu na munu.” (Isaya 25:8) Ha thimbu oyo, kukukakala ‘kulila,’ oloni vanu voshe mu kaye ‘vakavwahelela na vaje vali na kuvwahelela.’—Loma 12:15.