1-3. (a) Mukanda wa Myatho 147 mpamo vauthonekele mu thimbu muka? (b) Vika vitulilongetha ha kutanda mukanda wa Myatho 147?

NGA munu nalingi mwamuvwa chipangi chimo chivanamwana nambe nga nasholola chifwa chachivwa cha vunjambi, vakamushangathzala. Nga munu vamushangathzala, cho Yehova Njambi tunapande kumushangathzala manene. Ndthzili yendi yakama na chithzemo chendi ku vanu chije chamwethele ha kutuma Munendi kwa kututhsila, vinapande kutushongangeya tumushangathzale.

² Muka-kuthoneka mukanda wa Myatho 147 washangathzalele Yehova. Cho lalo washongangeyeye na vakwavo vashangathzale Njambi.—Tandeni Myatho 147:1, 7, 12.

³ Kututhzivuka mwamuvwa uje wathonekele mukanda wa Myatho 147, oloni mpamo ou muka-kwimba wayoyele mu thimbu ije Yehova wapatwile Vaisalele mu vundthzinda vwa Mbambilone na kuvelwitha ku Yelusalema. (Myatho 147:2) Ou muka-kwimba, mpamo washangathzalele Yehova omwo watavethele Vaisalele valemethe lalo Njambi yavo wa vuthunga. Oloni wendekele lalo vyuma vikwavo vyamulingithile ngocho. Vika vene ovyo? Vika vimilingitha ‘mushangathzale’ Njambi mu kuyoya kweni?—Mwatho 147:1.

4. Vaisalele vaje vakele mu vundthzinda valithzivile vati omwo Mwene Siluse wavapatwile, cho mwafwa vika?

⁴ Achithinganyekeni muvalithzivilile Vaisalele omwo vakakele mu vundthzinda mu Mbambilone. Vaje vavafungulwile vavashendumwine ngwavo ‘vavembile myatho ya kujolela ya ku Siyone.’ Ha thimbu ije, te vanyongetha laja nganda ya Yelusalema muje vakele na kulemethela Yehova. (Myatho 137:1-3, 6) Vayunda kuvashakele kwimba. Ha thimbu eyi vimbunge vyavo vyathzeyele, cho vashakele kuvathzembeleka. Oloni kwetheketha na muje vwendekelele vupolofweto vwa Njambi, Siluse mwene wa Vapelesha ikeye wavapatwile. Wahyanene Mbambilone na kwendeka ngwendi: “Shukulu Kalunga . . . nanjana moko ya kumutungila Njuvo mu Yelusalema . . . Ngechi vene, ololo, yeni voshe vaje vanapu vanu va Njambi, yeniko, cho Shukulu Kalunga akale hamo neni.” (2 Mithzi. 36:23) Ou muthzimbu wathzivithile manene kuvwaha Vaisalele vaje vakele mu Mbambilone.

5. Muka-kwimba wendekele vika ha ndthzili ya Yehova ya kukangwitha?

⁵ Yehova kathzembelekele lika mbunga ya Vaisalele, oloni wathzembelekele umo na umo wavo. Na matangwa ano mukemwo mwakalingila. Muka-kwimba wathonekele vyakalingi Njambi ngwendi: “Akangwitha vaka-kuthzeya mu vimbunge, na kuthaka vimbandu vyavo.” (Myatho 147:3) Yehova akakwatha vaje vali mu vukalu, vupwe vwa ku muvila nambe vwa mu vithinganyeka. Na matangwa ano Yehova nalivwahethela kututhzembeleka na kutukwatha tukale na vithinganyeka vyavivwa. (Myatho 34:18; Isaya 57:15) Akatwana mana na ndthzili mangana vitukwathe kulikoletha omwo tuliwana na vukalu vwoshe vwoshe.—Yako. 1:5.

6. Ñanda ya muka-kwimba ya vingongonothi, ije ili ku Myatho 147:4 itulongetha vika? (Kengeni chikupulo ha liputa 17)

⁶ Muka-kwimba wendekele lalo ha vya kutanga vya mwilu ngwendi Yehova “alava vingongonothi na kuviluka mathzina avyo vyoshe.” (Myatho 147:4) Mwafwa vika wendekele vya vingongonothi vya mwilu lalo? Achithinganyekeni ha ñanda eyi: Muka-kwimba wamwene vingongonothi oloni kathzivukile ngwendi vingayi. Mu kwita kwa myaka, vanu vanamono ngwavo vingongonothi vyavingi manene. Vanu vamo vathinganyeka ngwavo mu mulalavithzi wa Milky Way muli mabiliyoni a vingongonothi. Cho kuli milalavithzi ikwavo yaingi manene mwilu. Kukwethi munu natha kulava vingongonothi vyoshe. Oloni Ishamatanga naluku ngongonothi na ngongonothi lithzina. Echi chimwetha ngwavo vingongonothi vyoshe vyapwa vya theho kuli Yehova. (1 Koli. 15:41) Vaticho ha vanu va hano hathi? Njambi uje athzivuka hayakala ngongonothi na ngongonothi, amithzivuka mwamuvwa ha kapandi keni, athzivuka kumwakala nomwo mumulithzivila na vyuma vimutonda na thimbu imuvitonda.

7, 8. (a) Yehova mwakakwatha vanu vendi vaje vali mu vyetheko, vyuma muka vyakaka mu vithinganyeka? (b) Endekeni chakumwenako chije chimwetha ngwavo Yehova wakala na ngothzi ya kukwatha vanu va kujeneka kulumbunuka.

⁷ Yehova kethi kumyaka lika mbunge, oloni ali na ndthzili ya kumikwatha mu vukalu vweni, cho lalo washaka kulinga ngocho. (Tandeni Myatho 147:5.) Thimbu imo munatha kulithziva ngweni vukalu vumunaliwana navwo vwakama manene, cho lalo kumwatha kuvukanyamena. Njambi athzivuka hayalenga ndthzili yeni, ‘athzivuka ngechi yeni mwapwa likungu.’ (Myatho 103:14) Ha kupwa vanu va kujeneka kulumbunuka tunatha kwilukila ilukila kulinga vuvi. Ovu vuvi vunatha kupwa kuthevuka mu kwendeka nambe kuthzivila vakwetu chipululu ha vyuma vivali navyo nambe kukala na  tulingolingo twatuvi. Yehova wapwa wa kujela mu vyuma vyoshe, oloni akatuthzivithitha.—Isaya 40:28.

⁸ Mpamo neni mwanuka thimbu yamikwathele Yehova omwo mwaliwanene na vyetheko. (Isaya 41:10, 13) Chakumwenako, painiya umo wa lithzina lya Kyoko wathzeyele omwo vamutumine kukapangela ku mwela weka. Yehova wamwethele vati ngwendi wathzivithithile vukalu vwou ndokathzi? Vandolome na vandokathzi va kuje kwaile Kyoko vanangukile mwakele na kulithzivila, cho vamukwathele. Walithzivile lika ngwe Yehova amuleka ngwendi: “Njakuthzema, kethi lika omwo unapu u payiniya embwe, oloni u munange, cho lalo unalyana kunjipangela. Njishaka ushuvuluke ha kupwa Mukaleho wange.” Muka-ndthzili yoshe namwetha vati ngwendi “athzivuka vyuma vyoshe” mu kuyoya kweni?

9, 10. Vukwathi muka vwakalivanga kwana Yehova kuli vanu vendi? Endekeni chakumwenako.

⁹ Thimbu imo mukatondo vukwathi vwa ku muvila. Chakumwenako, munatha kulishoshomwena mwakuwanena vyakulya. Oloni Yehova ikeye muka-kunyoketha nyondthzi ije ikamenetha vimbuto na kuvikoletha, cho lalo ikeye akana makololo vyakulya. (Tandeni Myatho 147:8, 9.) Twakulahela na vimbunge vyetu vyoshe ngwetu Yehova atukwatha ku muvila, ngechi lika mwakanyungila makololo.—Myatho 37:25.

¹⁰ Chuma cha theho manene chakatwana Yehova chinapu vukwathi vwa ku sipilitu na kutwana ‘kwoloka [kwendi] kuje munu na umo wahi atha kuthzivithitha.’ (Fili. 4:6, 7) Chakumwenako, Mutsuo na munakathzi wendi va ku Japan valimwenenene vukwathi vwa Yehova mu 2011 omwo kwakele mankimba akama aje akupupile ha njuvo yavo. Valondele ha chiluli cha njuvo yavo kutewa aje mankimba. Vwingi vwa vitenga vyavo vyaile na mema. Valalele mu mulili wa njuvo yavo ya helu ya mu chivali, muje mwakele lithuthulungu vwi, cho lalo mwatonwele manene. Lyamukwavo mutondo, vashakethzekele chakulya cha ku sipilitu cha kuvatakametha. Vawanene lika livulu lya Yearbook of Jehovah’s Witnesses lya mu 2006. Omwo Mutsuo washangumukile lika kufukulamo, wamwene kamutwe ka kwendeka ngwavo: “The Deadliest Tsunamis Ever Recorded” (Mankimba Akama Aje Aviyithile Vyuma Vyavingi). Mu 2004, mu Sumatra mwakele lindunduma lije lyanenethele mema a mu kalunga ndonga akaviyithe vyuma vyavingi manene. Mutsuo na munakathzi wendi valilile muvatandele eyi ñanda. Valithzile ngwavo Yehova wavaka mbunge ha kuvana muthzimbu wa kuvatakametha ku sipilitu ha thimbu ivakele mu vukalu. Yehova wavakwathele na ku muvila kupangetha vandolome. Ava vandolome vavanene vyuma vya kulikwathetha. Oloni vandolome vaje vendelele chikungulukilo chavo vakevo vavatakamethele manene. Mutsuo wendekele ngwendi: “Njalithzivile ngwe Yehova wakele muyehi manene netu na kutunyungilila. Echi chatuthzembelekele manene.” Njambi akatukwatha tahi ku sipilitu athina atukwathe ku muvila.

11. Vanu vaje vashaka ngwavo Njambi avakwathe vanapande kulinga vika?

¹¹ Yehova nalivwahethela thimbu yoshe ‘kukwatha vaka-kulikehetha.’ (Myatho 147:6a) Oloni tunapande kulinga vika mangana Yehova atukwathe? Tunapande kulikuta vuthamba nendi. Tupwa vavuthamba vendi nga tulikehetha. (Zefa. 2:3) Vanu va kulikehetha vakavandamena ngwavo Njambi amanethe vukalu vunasholoka na kuvwahetha vyuma vije vinavihya. Vanu va chifwa echi vakathzivitha Yehova kuvwaha ku mbunge.

12, 13. (a) Nga tushaka ngwetu Njambi atukwathe, tunapande kulihenga ku vyuma muka? (b) Vanu va kufwa vati vaje vakathzivitha Yehova kuvwaha ku mbunge?

 ¹² Oloni “vaka-vuvi [Njambi] avawithila hathi.” (Myatho 147:6b) Awa majwi anapu a vuthunga. Tunapande kuthzinda vije vyathzinda Yehova mangana tulimwene chithzemo chendi chije kuchethi kutenguluka na kujenjuka ku vutenu vwendi. (Myatho 97:10) Chakumwenako, tunapande kuthzinda vupangala. Echi chilumbununa ngwavo tunapande kuthzinda na vyuma vije vyatha kutushongangeya kuvulinga vya kufwa ngwe kuyongola vikupulo vya mushelengwa. (Myatho 119:37; Mateo 5:28) Kunatha kukaluwa kulinga ngocho, oloni tunapande kulifwita mangana Yehova atuvethzikithe.

¹³ Tunapande kukulahela Yehova mu kulwa eyi ndthzita, kethi tulikulahele yetu vavenya. Kuma atha kulithziva mwamuvwa nga tukulahela “mu ndthzili ya tuvalu” nambe ngwetu vukwathi vutundilila ku vimunga vya vanu ndi? Embwe. Cho lalo kutwapandele kukulahela “mashwalale va kunyanyama,” kulumbununa kulikulahela yetu vavenya nambe kukulahela ngwetu vakwetu vanu vatwovola. (Myatho 147:10) Oloni tunapande kukulahela Yehova na kumulomba vukwathi. Kethi kujuka kutolilila ku malombelo etu ngwe muvakalingila vanu, oloni akatutolilila, nameme tumulomba chuma chimo vithimbu vyavingi. Yehova “avwahelela lika muli vaje vamukomoka, na muli vaje voshe vakulahela mu chithzemo chendi chije kuchethi kutenguluka.” (Myatho 147:11) Twatha kukulahela ngwetu, mwafwa ya chithzemo chendi chije kuchethi kutenguluka, atwalelelaho kutunyunga na kutukwatha kuhyana mashungu etu amavi.

14. Vika vyatakamethele muka-kwimba?

¹⁴ Kuli vyuma vyanatwana Yehova vije vitulingitha tukulahele ngwetu akakwatha vanu vendi nga vali mu vujene. Omwo muka-kwimba wathinganyekele vyakutungulula vivumbe vya Yelusalema, washangathzalele Yehova ngwendi: “Omwo ikeye akoletha vikolo vyove, na kuvethzikitha vanu vove. Ikeye ana kwoloka kulu ku vinginga vyove.” (Myatho 147:13, 14) Muka-kwimba walithzivile mwamuvwa ha kuthzivuka ngwendi Njambi akoletha vikolo vya nganda mangana anyungilile vaka-kumulemetha.

15-17. (a) Thimbu imo tunatha kulithziva vati omwo tuliwana na vyetheko, oloni Yehova akatukwatha vati kupangetha Lijwi lyendi? (b) Endekeni chakumwenako chije chisholola omwo, ‘vanu vakononokela mashiko’ a Njambi.

¹⁵ Munatha kuliwana na vukalu vuje vwatha kuminenela vishoti. Yehova atha kumyana mana a kulifwita na vukalu vweni. Muka-kwimba wendekele hali Njambi ngwendi “atuma mashiko endi hathi, cho vanu vawononoka.” Cho omwo wendekele ngwendi Yehova ‘afwika hathi na mbundu na kushandola mema a kukonda na kutuma nyondthzi ya mamanya,’ muka-kwimba wendekele ngwendi: “Na umo wahi atha kuthimpa ku lithika lije lyakatumu.” Wendekele lalo ngwendi Yehova “ashika, cho aje mema a kukonda athangunuka.” (Myatho 147:15-18) Njambi yetu uje wakala na mana a kulitila na ndthzili yoshe, uje ali na ndthzili ha nyondthzi ya mamanya na mema a kukonda, atha kumyana ndthzili ya kutakamena vukalu vwoshe vumuliwana navwo.

¹⁶ Ano matangwa, Yehova ali na kututwamenena kupangetha Lijwi lyendi Mbimbiliya. Cho ‘vanu vononoka’ omwo vavana vyakulya vya ku sipilitu ha thimbu inapande. Achithinganyekeni ha vukwathi vutukawana mu kutanda Mbimbiliya na mavulu akatuvwahethela “ndungo wa kulongwa na kunyanyama” na mu kukenga mavindiyo a ha JW Broadcasting na mu kutanda na kutolilila ku viñanda vya ha jw.org na kuthimutwiya na vakulunu na kulikwatathana na vakwetu  vaka-Kilisitu. (Mateo 24:45, NWT) Evi vyuma vimwetha ngwavo Yehova akathzambula kutwana mashiko endi.

¹⁷ Simone walimwenenene mulyamukwathelele Lijwi lya Njambi. Wathinganyekele ngwendi katha kuthzivitha Njambi kuvwaha ku mbunge, mwafwa ya futithi yakele nayo ha kulivanga. Oloni omwo waliwanene na vukalu vuje vwamuthzeyethele manene, walombele Yehova mangana amukwathe. Cho lalo, wathzethzamene mu kulilongetha Mbimbiliya ha kapandi. Wendekele ngwendi: “Kukwethi thimbu injalithzivile ngwange Yehova nanjumbila kuti.” Echi chamukwatha atwaleleleho kukala na vithinganyeka vyavivwa.

18. Mwafwa vika mulithziva ngweni Yehova naminyungu mwamuvwa, cho vika vimilingitha ‘mumushangathzale’?

¹⁸ Muka-kwimba wathzivukile mwamuvwa ngwendi Njambi wathzemene manene vanu vendi va kuthañulu. Vakevo lika vanu vatambwile “majwi” a Njambi na “vilongetha vyendi na mashiko endi.” (Tandeni Myatho 147:19, 20.) Ano matangwa twavethzika, mwafwa yetu lika twapwa Vakaleho va Yehova. Kuthzivuka Yehova na kupangetha vinangulo vya mu Lijwi lyendi kunatulingitha tulikute vuthamba nendi. Neni mukashangathzala Yehova na kushongangeya vakweni kulinga ngocho ngwe mwalingile uje wathonekele Myatho 147 ndi?