VAKA-KILISITU va mu chita cha myaka cha kulivanga vafwitanganene mu kwambulwila vanu vavangi “viñanda vyavivwa vya Vumwene.” (Mateo 24:14) Vamo vaile na kwambulwila ku mafuti eka. Chakumwenako, kapositolo Paulu waile na kwambulwila ku mwela umo uje vatumbula ano matangwa ngwavo Turkey omwo wapwile mu mangendthzi endi a vumishinali. * Munima ya myaka 2,000, mu 2014, mu Turkey vandolome na vandokathzi valyanene kuya na kwambulwila vanu. Mwafwa vika valyanene kupanga echi chipangi? Veya valyanene kuchipanga?

Mu Turkey mwakala vaka-kwambulula va kutuvakana ku 2,800. Oloni vanu vakalamo vapwa 79 milyoni. Echi chimwetha ngwavo muka-kwambulula umo napande kwambulwila vanu va kupwa 28,000. Vaka-kwambulula vanambulwila lika vanu vavandondo vomwo mu lifuti. Vandolome na vandokathzi valyanene kuya na kwambulwila mu Turkey, mwafwa vashakele kwambulwila vanu vavangi mu thimbu yaindondo. Vandolome na vandokathzi va ku mafuti eka vakupwa 550, vaje vathzivukile kwendeka ndaka ya Chiturkish vaile kukapangela hamo lika na vaka-kwambulula va mu Turkey. Vuvwa muka vwatundilemo?

Vambulwilile vanu vavangi. Vandolome va mu chikungulukilo cha Istanbul vathonekele ngwavo: “Vanu muvakele na kutumona twitangana, vehwile ngwavo: ‘Muli mu chiwano cha kulitila ndi? Tuli na kumona Vakaleho va Yehova vetangana manene’” Vandolome va mu chikungulukilo chije chakala mu nganda ya Izmir, vathonekele ngwavo: “Munalume umo uje akapangela haje haikemanena minyau wehwile mukulunu umo ngwendi: ‘Vika vili na kulingiwa? Vipangi vyeni vyalivwethzelela ndi?’” Chili vene vanu vanangukile ngwavo kuli kampeni.

Vandolome na vandokathzi vaje vatundile ku mafuti eka valikuwile kwambulula. Steffen, wa ku Denmark, wendekele ngwendi: “Litangwa na litangwa njakele na kwambulwila vanu vaje kanda vathziveho laja vya Yehova. Njalithzivile ngwange njili na kukwatha vanu vathzivuke Yehova.” Jean-David wa ku France wathonekele ngwendi: “Twambulwilile ku vinjuvo ha viola vyavingi. Cho vanu vavwahelele manene. Vavangi kuvathzivukile  Vakaleho va Yehova. Ha njuvo na njuvo itwambulwilile, twavamwethele vindiyo na kuvathethzela mavulu.”

Vaka-kwambulula va kupwa 550 vanene vanu mavulu akupwa 60,000 mu vyalumingo vivali lika. Eyi kampeni yanenethele ngwavo vanu vavangi vathzivuke vuthunga.

Vaka-kwambulula vashangumukile kupanga na ndthzili mu lihya. Chipangi cha kwambulula cha shongangeyeye vandolome na vandokathzi va ku Turkey vakale na ntwima ya kwambulula. Vaka-kwambulula vavangi vathinganyekele kupanga chipangi cha thimbu yoshe. Mu mwaka umo, totala ya vapayiniya yalivwethzelelele na 24 pesenti hanima ya kampeni.

Vandolome na vandokathzi vaje vatundile ku mafuti eka vendekele ha vuvwa vwatundile mu kampeni omwo velukile ku mafuti avo. Şirin, ndokathzi wa ku Germany, wathonekele ngwendi: “Vandolome na vandokathzi va ku Turkey kuvethi kuthziva shwamwa omwo vambulula mu chintulu. Oloni yange njikathzi shwamwa kwambulula mu chintulu. Njakandelela manene ku kampeni na ku mwanja wauvwa wa vandolome va ku Turkey na ku malombelo avo, vananjikwatha kupwa wa kuthimpa omwo njambulula mu chintulu. Njathele kwambulwila na mu tapalo na kwana matilakiti. Hano njatha kwambulula mu kuthimpa kutuvakana munjafwile laja.”

Johannes wa ku Germany wendekele ngwendi: “Chipangi cha kwambulula chanjilongetha vyavingi. Vandolome na vandokathzi va ku Turkey vathzema kulongetha vanu vavangi vuthunga. Vakambulwila vanu thimbu yoshe. Omwo njelukile ku Germany njakapangethele vyuma vinjalilongethele kuli vakevo. Njikambulwila vanu vavangi kutuvakana munjalingilile kunima.”

Zeynep wa ku France, wendekele ngwendi: “Eyi kampeni yanjikwathele manene. Yanjikwathele kupwa wa kuthimpa manene na kukulahela Yehova.”

Vaka-kwambulula vapangelele hamo lika. Chithzemo na likwatathano lya vandolome na vandokathzi vaje vatundile ku mafuti eka lyatushongangeyeye manene. Jean-David itunavanga kwendeka, wendekele ngwendi: “Twalimwenenene chithzemo cha vandolome na vandokathzi vetu. Vatutambwile mwamuvwa ngwe vavuthamba na vavushoko vwavo. Vatwanene vinjuvo mwakulala. Ñanda injikatanda mu mavulu etu, ije imwetha ngwavo twapwa nanga imo, inapu ya vuthunga, mwafwa  njalimwenayo. Njavwahelela manene kupwa Mukaleho wa Yehova, cho njikakandelela ha kunjana echi chipangi cha kwambulula.”

Claire wa ku France, wendekele ngwendi: “Tuvavoshe twapwa nanga imo lika nameme tutunda ku Denmark ku France ku Germany nambe ku Turkey. Kunapu lika ngwe Njambi natunditha vinginga vyoshe vya mafuti.”

Stéphanie wa ku France, wendekele ngwendi: “Kampeni ya kulitila yatulongetha ngwavo chuma chakama chikatukwatathana hamo lika chinapu chithzemo chetu kuli Yehova, kethi muyati nambe chithemwa embwe.”

Vandolome na vandokathzi vaje vatundile ku mafuti eka vathinganyekele vya kujalukila ku Turkey mangana vakakwathe mu chipangi cha kwambulula. Vamo vanalingi vene ngocho. Ngechi, tukandelela manene kuli vandolome na vandokathzi vanalyana kukapangela kuje kuli vujene.

Chakumwenako, kwakele kachivunga ka vaka-kwambulula va kupwa 25 vaje vakele kulako na mbonge. Ha myaka yaingi kwakele lika mukulunu umo lika. Vaka-kwambulula vomwo mu kachivunga vavwahelelele manene kutambula vandolome na vandokathzi va ku Germany na ku Netherlands va kupwa 6 vaje vaile na kuvakwatha mu 2015.

Vuvwa muka vuvanendeka vaje vaile na kupangela ku Turkey? Nambe ngwavo vithimbu vimo valiwanene na vukalu, oloni kupangela kuje kuli vujene kukanene kuvwahelela. Tuchithziveni vivanendeka vamo:

Federico, uje wakele na myaka ya kukokela ku 43, uje wajalukilile ku Spain na munakathzi wendi wendekele ngwendi: “Kujeneka kukala na vyuma vyavingi kunanjikwatha kupwa wa kushuvuluka, cho kunanjikwatha lalo njakele mana ku vyuma vya thetho manene. Kuma Federico washaka ngwendi vakwavo vapange echi chipangi ndi? “Eyo.” Wendekele ngwendi. “Nga mujalukila ku lifuti lyeka na kukakwatha vanu vathzivuke Yehova, cho Yehova amikwatha, mwafwa muli mu mavoko endi. Mulithziva ngweni chili vene Yehova ali na kuminyungilila.”

 Rudy, wa ku Netherlands wa myaka ya kutuvakana 50, uje wambata, wendekele ngwendi: “Kupangela kuje kuli vujene vwakama kukanjithzivitha kuvwaha, mwafwa uthimutwiya na vanu vavangi vaje kuvathzivuka vya Njambi. Kumona vanu vatambula vuthunga kukatuthzivitha kuvwaha manene.”

Sascha, wa ku Germany, wa myaka ya kutuvakana 40, uje wambata, wendekele ngwendi: “Munjikayi mu lihya, njikawana vanu vaje kanda vathziveho vuthunga. Kukwatha ava vanu vathzivuke Yehova kukanjithzivitha manene kuvwaha.”

Atsuko, wa ku shomboka wa ku Japan, wa myaka ya kutuvakana 30, wendekele ngwendi: “Kunima, njashakele ngwange Alamangindone ije vwathi. Oloni omwo njaile ku Turkey, njakamwene ngwange Yehova achili na kuvandamena vanu vavangi vatenguluke. Kumona omwo ali na kwendethelamo vyuma Yehova, kukanjishongangeya njishwenye kuyehi nendi.”

Ndokathzi Alisa, wa ku Russia, wa myaka ya kutuvakana 30, wendekele ngwendi “Kukapangela kuje kuli vujene kunanjilingitha njilimwene vuvwa vuli mu kupangela Njambi. (Myatho 34:8) Wendekele lalo ngwendi: “Yehova wapwa Tate, na kavuthamba kange wa ha mbunge, uje injinatanekeya mwamuvwa mu kuyoya kwange. Njalimwena vyuma vyavivwa na kuwana vivethzikitho vyavingi.”

Kampeni ya ku Turkey yalingithile ngwavo muthzimbu wauvwa wete ku vanu vavangi. Oloni muchili chitingitingi chakama muje kanda muchete ou muthzimbu. Vaje vaile na kukapangela ku vujene ku Turkey, vakawaneneko vanu vavangi vaje kanda vathziveho vya Yehova. Neni mushaka kukapangela mu chitingitingi cha kufwa ngwe echi ndi? Tumishongangeya ngwetu: ‘Mukenge mu mahya, vimbuto vinahi laja, ngechi muviteje.’ (Yowa. 4:35) Mwatha kukapangela kuje kuli ‘vimbuto vinahi laja ngechi mukaviteje’ ndi? Nga mwatha, cho shangumukeni kulivwahethela. Anukeni ngweni kufwitangana manene mu chipangi cha kwambulula muthzimbu wauvwa na kweta ku “mamanethelelo a hathi” kuminenela vivethzikitho vyavingi.—Vili. 1:8.