“Ikeye Akwane Vyoshe Viwushaka cho . . . Matumbe Ove Aye Kulutwe”
“Vwahelela muli Shukulu Kalunga, cho akakwana vije viwushaka.”—Myatho 37:4.
MYATHO: 89, 140
1. Vika vyanapande kuthinganyeka mwanike ha vuyoye vwendi vwa kulutwe, cho mwafwa vika kapandele kulishoshomwena manene? (Kengeni chikupulo ha Liputa 22.)
VANIKE neni muthzivuka ngweni thimbu kanda muye vungendthzi munapande tahi kuthinganyeka okwo kumuya ndi? Vuyoye vwapwa ngwe vungendthzi, cho munapande kuthinganyeka mwamuvwa kumushaka kuya thimbu muchili mu vanike. Kukakaluwa kwangula mwamuvwa vya kulinga. Heather, wendekele ngwendi: “Njikalishoshomwena, mwafwa viwangula kulinga vinakundama ku kuyoya kwove kwoshe.” Oloni kethi muthzive lyova. Yehova naleke vanu vendi ngwendi: “Kethi mujaje, yange Njambi yeni. Njikamitakametha na kumikwatha.”—Isaya 41:10.
2. Muthzivuka vati ngweni Yehova washaka ngwendi mwangule kulinga vyuma vyavivwa vije vikamikwatha?
2 Yehova amishongangeya ngwendi mwangule vwino vimushaka kukalinga kulutwe. (Kwambu. 12:1; Mateo 6:20) Washaka ngwendi mupwe va kuvwahelela. Vyuma vyavivwa vitukamono na kuthziva na kulya, vimwetha ngwavo Njambi watwaka mbunge. Achithinganyekeni mwakatunyungilamo Njambi na kutulongetha mwakuyoyela. Yehova akendeka kuli vaje vavyana kumwononoka ngwendi: “Mwalingile vyuma vije njathzinda. . . . Vaje vanjilemetha . . . vakavwahelela, oloni yeni mukakala na shwamwa. Vakaimba na kujolela, oloni yeni mukalila na kupokoka vimbunge.” (Isaya 65:12-14) Yehova akavwahelela nga vanu vendi vangula mwamuvwa vya kulinga.—Vithi. 27:11.
ANGULENI KULINGA VYUMA VIJE VIKAMINENELA KUVWAHELELA
3. Yehova washaka ngwendi mulinge vika?
3 Yehova ashaka ngwendi mukalinge vyuma muka kulutwe? Washaka ngwendi vanu vamuthzivuke na kumupangela mu kulongwa mangana vapwe va kuvwahelela. (Myatho 128:1; Mateo 5:3) Echi chimwetha ngwavo tunalithethze na tuthitu vaje vathzivuka lika kulya na kunwa mema na kuthema. Njambi watonda ngwendi mwangule kulinga vyuma vya theho, kutuvakana vije vivakalingi tuthitu. Ishamatanga yeni wapwa “Njambi muka-chithzemo,” na “vumpau,” uje watangele vanu “mu chifwa chendi.” (2 Koli. 13:11; 1 Tima. 1:11; Kusha. 1:27) Muvwahelela nga mutembwinina Njambi yetu muka-chithzemo. Vati, mwamonaho laja vuvwa vwa majwi akwendeka ngwavo: “Muli kujolela kwakama mu kwana kutuvakana mu kutambula” ndi? (Vili. 20:35) Awa majwi apwa a vuthunga. Yehova washaka ngwendi mwangule kulinga vyuma vije vimwetha ngwavo mwathzema vakweni na kuthzema Njambi.—Tandeni Mateo 22:36-39.
4, 5. Vika vyanenethele ngwavo Yesu apwe wa kuvwahelela?
4 Eni vanike, Yesu Kilisitu namyakela mwanja wauvwa. Nendi wakele na kweha na kulithzima vuli omwo wapwile mwanike. Lijwi lya Njambi ngwalyo, kuli “thimbu ya kujolela . . . na thimbu ya kukina.” (Kwambu. 3:4) Yesu washwenyene kuyehi na Yehova mu kutanda Vithoneka. Omwo wakele na myaka 12, valongethi va mu tembele valikomokelele “mana endi na kukumbulula kwendi” ha vyuma vya ku sipilitu.—Luka 2:42, 46, 47.
5 Yesu wapwile wa kuvwahelela mu vuyoye vwendi vwoshe. Vika vyamunenelele kuvwahelela? Wathzivukele ngwendi Njambi washakele ngwendi ambulule “viñanda vyavivwa kuli tuhutu . . . na kutonetha tupuputwa ngechi vamone.” (Luka 4:18) Yesu wavwahelele mwafwa walingile vyuma vyashakele Njambi ngwendi avilinge. Mukanda wa Myatho 40:8 ngwawo: “Njambi yange njithzema kulinga chithzango chove.” Yesu wathzemene kulongetha vanu vya Ishe wa mwilu. (Tandeni Luka 10:21.) Munima ya kulongetha munakathzi vya kulemetha kwa vuthunga, Yesu walekele vandongethi vendi ngwendi: “Vyakulya vyange vinapu kwononoka chithzango cha uje wanjitumine na kumanetha vipangi vyanjanene ngechi njivilinge.” (Yowa. 4:31-34) Kuthzema Njambi na vanu kwalingithile Yesu apwe wa kuvwahelela. Neni mupwa va kuvwahelela nga mulinga ngocho.
6. Mwafwa vika munapande kuleka vaka-Kilisitu va kuhya vilengo vyeni?
6 Vaka-Kilisitu vavangi vakavwahelela omwo vakashangumuka chipangi cha vupayiniya thimbu vachili vanike. Lekeni ava vapayiniya vilengo vyeni. “Ha kujeneka kunangula kwakuvwa, vyuma vikaviya, oloni nga kuli munga ya vaka-kunangula, vyuma vikavwaha.” (Vithi. 15:22) Ava vanu va kuhya ku sipilitu vamileka ngwavo vyuma vimulilongetha mu chipangi cha thimbu yoshe vimikwatha mu vuyoye vweni vwoshe. Yesu watwaleleleho kulilongetha omwo wakele hano hathi, nameme wavangele kulilongetha vyavingi kuli Ishe wa mwilu. Chakumwenako, wawanene kuvwahelela mu kulongetha vanu muthzimbu wauvwa na mu kukolethela vyetheko. (Tandeni Isaya 50:4; Heve. 5:8; 12:2) Tuchithimutwiyeni ha vipangi vya thimbu yoshe vije vyatha kuminenela kuvwahelela.
VYUMA VIKANENE KUVWAHELELA KULI VAKA-KWAMBULULA
7. Mwafwa vika vanike vavangi vathzema chipangi cha kupwitha vanu kupwa vandongethi?
7 Yesu wendekele ngwendi: “Yeni oni ku . . . vanu na kuvapwitha vandongethi . . . Mateo 28:19, 20) Mulinga mwamuvwa nga mulyangwila chipangi cha kupwitha vanu kupwa vandongethi, mwafwa chapwa chachivwa, cho chikashangathzala Njambi. Munapande kukala na thimbu yaingi ya kulilongetha mangana mupange echi chipangi mu vutongwe ngwe muvakalilongethela vanu vipangi vyeka. Ndolome Timothy, uje washangumukile chipangi cha vupayiniya te achili mwanike wendekele ngwendi: “Njathzema chipangi cha thimbu yoshe mwafwa kuchilinga kumwetha ngwavo njathzema Yehova. Ha kulivanga, kwanjikaluwilile kushangumuka vilongetha vya Mbimbiliya, oloni omwo njajalukilile ku chitingitingi cheka, njakashangumukile vilongetha vya Mbimbiliya vyavingi mu ngonde imo lika. Ndongethi yange umo washangumukile kwija ku Njuvo ya Vumwene. Hanima ya kukovela Sikola ya Mbimbiliya ya Vandolome va Vathzike, * vanjitumine kukapangela ku mwela weka, kuje kunjakashangumukile kutwamenena vilongetha vya Mbimbiliya viwana. Njathzema kulongetha vanu, mwafwa njikamono omwo sipilitu ya kujela ili na kutengulwila vuyoye vwavo.”—1 Tesa. 2:19.
valongetheni.” (8. Vanike vamo vaka-Kilisitu vanapanga vati chipangi cha kupwitha vanu kupwa vandongethi?
8 Vanike vamo vaka-Kilisitu vanalilongethako vindaka vyeka. Chakumwenako, Jacob, wa ku North America, wathonekele ngwendi: “Munjakele na myaka 7, vwingi vwa vaje vanjakovelele navo sikola vakele na kwendeka ndaka ya Vietnam. Njashakele kuvambulwila vya Yehova, ngechi mu kwita kwa thimbu, njayongwele kulilongetha ndaka yavo. Njapangethele Kaposhi ka Kukengela ka Vundele mu kulilongetha ndaka ya Vietnam. Kutundoho, njalikwatele vuthamba na vandolome na vandokathzi va mu chikungulukilo chije chapangethele ndaka ya Vietnam. Ngechi, njashangumukile vupayiniya omwo njakele na myaka 18. Mukwita kwa thimbu, njaile ku Sikola ya Mbimbiliya ya Vandolome va Vathzike. Echi chinanjikwatha kutwalelelaho mu chipangi change cha vupayiniya, cho hano yange lika mukulunu mu chivunga chije chikapangetha ndaka ya Vietnam. Vwingi vwa va Vietnam vanakomoka omwo njathzivuka kwendeka ndaka yavo. Vakanjilanya ku vinjuvo vyavo, cho echi chikanjikwatha kulilongetha navo Mbimbiliya. Vamo vanavambwitika.”—Etheketheni Vilinga 2:7, 8.
9. Chipangi cha kupwitha vanu kupwa vandongethi chatha kumilongetha vika?
9 Chipangi cha kupwitha vanu kupwa vandongethi chimilongetha kupanga mwamuvwa vipangi na kuthimutwiya na vanu mu vutongwe na kupwa va kuthimpa na kukala na mana. (Vithi. 21:5; 2 Tima. 2:24.) Chipangi cha kwambulula chimikwatha kuthzivuka Vithoneka vije vitakametha likulahelo lyeni. Chimikwatha lalo kupangela hamo na Yehova.—1 Koli. 3:9.
10. Vika vyatha kuminenela kuvwahelela nameme mupangela mu chitingitingi muje vanu vakavyana kutambula muthzimbu wauvwa?
10 Nameme vanu vavangi vavyana kutambula muthzimbu wauvwa mu chitingitingi cheni, oloni mwatha kulikuwa chipangi cha kwambulula. Chipangi cha kwambulula chapwa cha mbunga. Voshe mu chikungulukilo vakashakethzeka vanu va vimbunge vyavivwa. Nameme ndolome nambe ndokathzi ikeye lika nakwatha munu kulilongetha vuthunga, oloni voshe mu chikungulukilo vanakala na kupangela hamo lika, cho voshe vakavwahelela. Chakumwenako, Brandon uje wapwile payiniya wapangele myaka 9 mu chitingitingi muje vanu vavangi vakele na kuvyana kutambula muthzimbu wauvwa. Wendekele ngwendi: “Njathzema kwambulula muthzimbu wauvwa, mwafwa Yehova washaka ngwendi tuwambulule. Njashangumukile kulinga vupayiniya munima ya kumanetha sikola. Njikashongangeya vanike va mu chikungulukilo chetu, cho njikathzivi mwamuvwa kuvamona omwo vakola ku sipilitu. Munima ya kukovela Sikola ya Mbimbiliya ya Vandolome va Vathzike, vanjitumine kukapangela kweka. Nameme vanu vaje vanjakele na kwambulwila kuvetele ha kuvambwitika, oloni vakwetu vanakwatha Kwambu. 11:6.
vanu vavangi kupwa vandongethi. Njavwahelela manene ha kupanga echi chipangi cha vupayiniya.”—VUVWA VUTUNDA MU VYUMA VIMWANGULA KULINGA
11. Vipangi muka vivali na kulinga vanike vavangi mu munga ya Njambi?
11 Kuli vipangi vyavingi mu munga ya Yehova. Chakumwenako, vanike vavangi vali mu chipangi cha kutunga. Kutondeka Vinjuvo vyavingi vya Vumwene. Chipangi cha kutunga evi Vinjuvo chapwa cha kujela, chikathzivitha vanike vaje vachilinga kuvwaha na kwana Njambi vumpau. Kupangela hamo lika na vakwetu vaka-kukulahela mu chipangi cha Njambi kukatunenela kuvwahelela. Chipangi cha kutunga chimikwatha manene mwafwa chimilongetha mwakulinyungila ku vimonde na kupanga na ndthzili na kulikwatathana na vaka-kutwamenena.
Vaje vali mu chipangi cha thimbu yoshe vali na kulikuwa vivethzikitho vyavingi (Kengeni palangilafu 11-13)
12. Chipangi cha vupayiniya chiminenela vivethzikitho muka vikwavo?
12 Ndolome Kevin wendekele ngwendi: “Kushwa ku vwanike njakele na lishungu lya kupangela Yehova thimbu yoshe. Cho munjakele na myaka 19 njashangumukile vupayiniya. Njakele na kupanga na ndolome uje wapwile muka-kutunga vinjuvo, mangana njiwaneko vya kulikwatha navyo. Njalilongethele kupandeka vinjuvo na kutokeka vinjanena na mapito. Kutundoho, njakapangele myaka ivali na chivunga cha vaka-kukwatha vanu vali mu vukalu na mu kutungulula Vinjuvo vya Vumwene na vinjuvo vya vandolome. Omwo njathzivile mutambi wa kulomba vaka-kutunga ku South Africa, njalithonekethele, cho vanjitambwile. Njili na kulikuwa chipangi cha kutunga Vinjuvo vya Vumwene muno mu Africa. Vakwetu vanjikatungu navo, vanapu lika ngwe vaka-nanga yange. Twakala hamo lika, cho tukalilongetha Mbimbiliya hamo lika na kupangela hamo lika. Njikalikuwu kwambulula na vandolome va kulithethzathethza ha chalumingo na chalumingo. Vyuma vinjangwile kulinga ku vwanike, vinanjikwatha kupwa munu wa kuvwahelela mu vukulunu.”
13. Kupangela ha Mbetele kukanenela vati vanike kuvwahelela?
13 Vanike vamo vaje vashulithilile viyongola vyavo vya kupangela Yehova vali na kupangela ha Mbetele. Kupangela ha Mbetele kuminenela kuvwahelela, mwafwa vipangi vyoshe vimulinga vinapu vya Yehova. Vaka-Mbetele vakakwatha mu kuvwahetha vyakulya vya ku sipilitu. Dustin, uje wapangela ha Mbetele wendekele ngwendi: “Njalyangwilile kupanga chipangi cha thimbu yoshe omwo njakele na myaka 9, cho njashangumukile vupayiniya omwo njamanethele sikola. Munima ya mwaka umo na vingonde 6, vanjithanene kukapangela ha Mbetele. Njakalilongethele kupangetha likina lya kupulintitha mavulu na kupangetha vikompyuta. Ha Mbetele, njikathzivi muvakatambeka lwa kulivanga vya kulivwethzelela kwa chipangi cha kwambulula cha mu kaye koshe. Njathzema kupangela ha Mbetele mwafwa chipangi chitukapanga chikakwatha vanu vashwenye kuyehi na Yehova.”
MULYANGWILA KUKALINGA VYUMA MUKA MU KUYOYA?
14. Vika vimunapande kulinga mangana mukapange chipangi cha thimbu yoshe?
14 Vika vimunapande kulinga mangana mukapange chipangi cha thimbu yoshe? Kukala na vifwa vya ku sipilitu kumikwatha kupangela Yehova mu kulongwa. Ngechi, lifwiteni kulilongetha Lijwi lya Njambi na kuthinganyekethetha ha vyuma vimunatanda na kupangetha vyuma vimunalilongetha ku viwano vya chikungulukilo. Lilongetheni mwakupwila muka-kwambulula wa vutongwe thimbu muchili ku sikola. Lilongetheni kuthzema vanu mu kuvehula vihula mu kathingimiko na kutolilila mwamuvwa ku vikumbululo vyavo. Lyaneni kukwatha mu vipangi vya chikungulukilo vya kufwa ngwe kujeletha na kuvwahetha Njuvo ya Vumwene. Yehova washaka kupangetha vaka-kulikehetha na vaje vali na chithzango cha kupanga. (Tandeni Myatho110:3; Vili. 6:1-3) Kapositolo Paulu wapangele na Timateo mu chipangi cha vumishinali, mwafwa vandolome ‘vamushangathzalele manene.’—Vili 16:1-5.
15. Vika vimikwatha kuthzivuka mwa kuliyoyethela?
15 Vaka-kupangela Njambi thimbu yoshe vanapande kuthzivuka mwakuliyoyethela. (Vili. 18:2, 3) Mwatha kulilongethako vipangi vimo vije vimikwatha kuwana chipangi cha thimbu yaindondo mu chitingitingi cheni. Ihuleni ntwama yeni wa kuthzenguluka na vapayiniya va mu chitingitingi cheni mangana vamikwathe kwangula mwamuvwa vya kulinga. Vehuleni vipangi vivanapande kulinga vapayiniya. Mbimbiliya ngwayo: “Kundika matumbe ove kuli Shukulu Kalunga, cho ukavethzika mu kuya kulutwe.”—Vithi. 16:3; 20:18.
16. Kupangela Yehova mu vwanike kumikwatha kukapanga vati mwamuvwa vipangi vikwavo kulutwe?
16 Yehova washaka ngwendi ‘muwane’ vuyoye vwavuvwa. (Tandeni 1 Timateo 6:18, 19.) Chipangi cha thimbu yoshe chimikwatha kulikwatathana na vandolome na vandokathzi vaje vali na kupanga echi chipangi, cho kumikwatha kukola ku sipilitu. Vavangi vanamono ngwavo kupangela Yehova mu vwanike kunavakwatha kuwana munu wamuvwa wa kulyambata nendi. Kakangi vaje vanapanga chipangi cha vupayiniya thimbu kanda vakovele mu vulo, vanatwalelelaho mu vupayiniya nameme munima ya kukovela mu vulo.—Loma 16:3, 4.
17, 18. Mwafwa vika munapande kuthinganyeka mwamuvwa thimbu kanda mwangule vya kulinga?
17 Munapande kuthinganyeka mwamuvwa thimbu kanda mwangule vya kulinga. Mukanda wa Myatho 20:4 ngwawo: “Ikeye akwane vyoshe viwushaka, cho mu lithzina lya Njambi, matumbe ove oshe aye kulutwe.” Thinganyekeni mwamuvwa ha vyuma vimushaka kukalinga mu vuyoye vweni. Thzivukeni vyuma vyali na kulinga Yehova mu thimbu ino nomwo mumwatha kukwatha mu vipangi vyendi. Cho, anguleni kulinga vyuma vije vimuthzivitha kuvwaha ku mbunge.
18 Kupangela Yehova na mbunge yeni yoshe kuminenela kuvwahelela mwafwa ikeyo yoyethi yana Njambi vumpau. “Vwahelela muli Shukulu Kalunga, cho akwana vije viwushaka.”—Myatho 37:4.
^ par. 7 Eyi sikola vanayingitha na Sikola ya Vaka-Kwambulula vya Vumwene.