1, 2. Umo na umo wetu napande kuthzivithitha vika? (Kengeni chikupulo ha liputa 27.)

NGECHI mutunathimutwiyiye mu chilongetha chinahu, Liyavolo akalishasha ngwendi Yehova akayulu mwamuvi, cho lalo vanu vatha kuyoya mwamuvwa nga valiyula vakevo vavenya. Kuma majwi a Satana apwa a vuthunga ndi? Vati cho ngwe vanu vaje vanalyangwila kuliyula vakevo vavenya vayoya myaka yoshe, kuma vatha kuyoya mwamuvwa kwa kujeneka kuvatwamenena kuli Njambi ndi? Ngwe yeni ngwe mwatha kupwa va kuvwahelela nga muliyula yeni vavenya na kuyoya myaka yoshe ndi?

² Wahi atha kumikumbulwila ovyo vihula. Munu na munu napande kuthinganyekaho. Nga mulinga ngocho, cho mumona ngweni chiyulo cha Njambi chikecho chachivwa. Kukwethi chiyulo cha kulifwa nacho. Ngechi, tunapande kuchikundwiya na mbunge yetu yoshe. Mbimbiliya yamwetha ngwayo chiyulo cha Njambi chapwa chachivwa. Tuchithimutwiyeni ha vyuma viyinendeka Mbimbiliya ha vuvwa vwa chiyulo cha Yehova.

3. Vika twendekela ngwetu Yehova ikeye napande kuyula vyuma vyoshe?

³ Yehova ikeye napande kuyula vyuma vyoshe mwafwa wapwa  Njambi wahakamwa ya vyoshe na Ishamatanga. (1 Mithzi. 29:11; Vili. 4:24) Mu chimona cha ku mukanda wa Kujombolola 4:11, vaje vakayula na Kilisitu mwilu va kupwa 144,000 vakele na kwendeka ngwavo: “Mwene yetu na Njambi yetu. Yove wafwila kutambula vumpau na kathingimiko na ndthzili. Omwo yove watangele vyuma vyoshe, cho ku chithzango chove vavyanene kuyoya na mwonyo.” Chili vene, Yehova ikeye napande kuyula vanu na tungelo, mwafwa ikeye watangele vyuma vyoshe.

4. Mwafwa vika kutengulukila chiyulo cha Njambi kunapu kupangetha mwamuvi ndthzili ya kulyangwila vya kulinga?

⁴ Nachimo chanatanga Satana chahi. Ngechi, katha kuyula vyuma vyoshe mwamuvwa. Omwo Satana na munalume na munakathzi va kulivanga vatengulikilile Yehova vamwethele sipilitu ya kulyaletha. (Njele. 10:23) Ha kupwa vanu vaje vakele na ndthzili ya kulyangwila vya kulinga vathele kulyangununa na Njambi. Oloni vapandele kulinga ngocho ndi? Embwe. Ndthzili ya kulyangwila vya kulinga ikathiwitha vanu valyangwile vyuma vya kulithethzathethza ha litangwa na litangwa. Oloni kulinga ngocho kukwapandele kuvanenethela vatengulukile Ishamatanga uje Wavanene Mwonyo. Chili vene kutengulukila Yehova kunapu kupangetha mwamuvi ndthzili ya kulyangwila vya kulinga. Yehova muka-kuyula mu vuthunga ikeye napande kutuyula. .

5. Mwafwa vika tukulahela ngwetu vyakangula kulinga Njambi vinapu vyavivwa?

⁵ Kuli chuma chikwavo chimwetha ngwavo Yehova ikeye napande kuyula. Akapangetha ndthzili yendi mu ngila yaivwa. Yehova wendekele ngwendi: ‘Chithzemo change chapwa cha myaka yoshe, cho njikalingi vya vuthunga na kuthungama. Evi vikevyo vyuma vikanjithzivitha kuvwaha.’ (Njele. 9:24) Ha kupwa muka-ndthzili yoshe na muka-vuthunga, Njambi kethi kutala ku vanu ngwendi vamukwathe kuthzivuka vya vuthunga nevi vyavivwa. Njambi ikeye nana vanu mashiko a kuthoneka. Twatha kukulahela ngwetu mashiko na vinangulo na vyuma vyakangula kulinga vyapwa vyavivwa mwafwa ‘akashwana vumwene vwendi mu kuthungama na vuthunga.’ (Myatho 89:14; 119:128) Nameme Satana ali na kulishasha ngwendi chiyulo cha Yehova kuchethi mwamuvwa, oloni ikeye nonowa kulingila vanu vyuma vyavivwa.

6. Vika twendekela ngwetu Yehova ikeye napande kuyula kano kaye?

⁶ Cho lalo Yehova ikeye napande kuyula, mwafwa ali mana a kunyunga vyuma vyoshe vya kutanga. Chakumwenako, Njambi wanene Munendi ndthzili ya kukangwitha mishongo ije ivonowele kukangwitha vandotolo. (Mateo 4:23, 24; Mako 5:25-29) Mukumona kwa Yehova, echi kuchapwile chikomoketho. Athzivuka mwamuvwa vikalingiwa, cho lalo ali na ndthzili ya kumanetha mishongo yoshe. Ali na ndthzili lalo ya kuthangula vathsi na kumanetha vukalu vwa kufwa ngwe mandunduma.

7. Mana a Yehova anatuvakana vati mana a vanu va Satana?

⁷ Vanu va Satana vali na kulifwita kutonda mwakumanethela vukalu vuli muno mu kaye, oloni Yehova lika ikeye ali na mana akunena kwoloka. (Isaya 2:3, 4; 54:13) Omwo tulilongetha vya mana a Yehova, tulithziva ngwe mwalithzivilile kapositolo Paulu uje wathonekele ngwendi: “Vufuko vwa Njambi vwapwa vwavungi manene. Kuthzivuka kwendi na mana endi vyapwa vya kulova manene. Iyajo atha kulumbununa matumbe endi? Iyajo atha kuthzivuka vingila vyendi?”—Loma 11:33.

8. Vika vimithzivitha kuvwaha ku mbunge ha kumona mwalinakuyulilamo Yehova?

⁸ Mbimbiliya kuimwetha lika ngwavo chiyulo  cha Yehova chapwa cha vuthunga. Imwetha lalo vyuma vilingitha chiyulo chendi chipwe cha kulitila. Chuma chikwavo chinapu kuyula kwendi mu chithzemo. Tukalithzivi kuvwaha ku mbunge ha kumona mwakapangethela mwamuvwa ndthzili yendi ya kuyula. Wapwa “muka-kutetela na mema ku mbunge, uje kethi kuluvala vwathi, muka-kulongwa na muka-kumwetha chithzemo chije kuchethi kutenguluka.” (Kutu. 34:6) Njambi akathingimika vangamba vendi. Akatunyungu mwamuvwa kutuvakana mutunatha kulinyungila yetu vavenya. Vyakalishasha Satana vyapwa vya makuli, mwafwa Yehova akana vyuma vyavivwa kuli vangamba vendi va kulongwa. Mukemwo watwanene Munendi umo lika mangana tukawane mwonyo wa myaka yoshe.—Tandeni Myatho 84:11; Loma 8:32.

9. Tuthzivuka vati ngwetu Njambi akaka mbunge kuli umo na umo wetu?

⁹ Yehova washaka ngwendi vanu vendi voshe vayoye mwamuvwa. Ngechi, akaka lalo mbunge kuli munu na munu. Chakumwenako, mu vita vya myaka vitatu, Yehova wangwile mako na kuvana ndthzili ya kwamena vanu vendi Vaisalele ku mavoko a vitothzi vavo. Ha thimbu ije ya kukaluwa, wathele kunyunga Lute uje kapwile Kaisalele uje walyanene kulikwatathana na vulombelo vwa vuthunga. Yehova wavethzikithile Lute na kumwana munalume na mwana. Oloni kethi ovyo lika. Omwo Lute akathanguka, akathzivuka ngwendi munendi wakundamene ku chikota chathemukilile Mesiya. Achithinganyekeni mwakalithzivila Lute omwo akathzivuka ngwendi muthzimbu wa vuyoye vwendi vauthonekele mu livulu lya mu Mbimbiliya livaluka lithzina lyendi.—Lute 4:13; Mateo 1:5, 16.

10. Vika twendekela ngwetu Yehova kethi kuyula mu ngila yaivi?

¹⁰ Yehova kethi kuyula vanu mu ngila yaivi. Washaka ngwendi vanu vapwe va kuvwahelela. (2 Koli. 3:17) Ndaviti wendekele ngwendi: “Thingimikeni na kushangathzala Shukulu Kalunga, ndthzili yendi na vuvwa vwendi vili mu njuvo yendi ya kujela.” (1 Mithzi. 16:7, 27) Na muka-kwimba Etane wathonekele ngwendi: “Yove Shukulu Kalunga, vanavethzika vanu vaje vakulemetha na myatho, vanu vaje venda mu cheke chove. Omwo hali yove tuli na kujolela litangwa lyoshe, cho tuli na kukushangathzala ha vuvwa vwove.”—Myatho 89:15, 16.

11. Vika vyatha kutukwatha tukulahele ngwetu chiyulo cha Yehova chapwa chachivwa manene?

¹¹ Kuthinganyekethetha ha vuvwa vwa Yehova thimbu yoshe kutukwatha tukulahele ngwetu chiyulo chendi chapwa chachivwa manene. Netu tulithziva ngwe mwalithzivilile muka-kwimba uje wathonekele ngwendi: “Litangwa limo lya kukala mu njuvo yove, lyalivwa kutuvakana matangwa 1,000 a kukala kweka.” (Myatho 84:10) Kuma awa majwi anapu a vuthunga vene ndi? Ha kupwa Ishamatanga wetu, Yehova athzivuka vyuma vitunajeneka vije vitukwatha tupwe va kuvwahelela, cho akatwanavyo. Mashiko akatwana Njambi akatukwatha tupwe va kuvwahelela, nameme kuwononoka kunatha kukaluwa.—Tandeni Isaya 48:17.

12. Vika vikatulingitha twimanene chiyulo cha Yehova?

¹² Mbimbiliya imwetha ngwayo munima ya myaka 1,000 yakayula Kilisitu, vanu vamo vakatengulukila chiyulo cha Yehova. (Kujo. 20:7, 8) Vika vikavashongangeya kulinga ngocho? Liyavolo muvakamupatula mu kamenga hanga aketheka kungumuna vanu voshe, ngwe mwali na kulingila matangwa ano. Aketheka kukwitha vanu ngwendi vanu vatha kuyoya myaka yoshe kwa kujeneka kwononoka kuli Yehova. Ovwo kethi vuthunga. Oloni achithinganyekeni ha chihula echi: Kuma Satana atha kukatungumuna ndi? Nga twathzema Yehova na kumona ngwetu ikeye lika atha kuyula vyuma  vyoshe mwamuvwa, cho kutukongumuka. Kutukalishungwiya kulyangununa ku chiyulo cha Yehova chachivwa.

13. Kutembwinina Njambi kumwetha vati ngwavo tuli na kwimanena chiyulo chendi?

¹³ Tunapande kwimanena chiyulo cha Yehova na mbunge yetu yoshe. Ngwe mutunamwena, ikeye napande kutuyula, cho lalo ikeye lika atha kuyula mwamuvwa. Twimanena chiyulo cha Yehova nga tutwalelelaho kukala na futithi ya kujela na kumupangela mu kulongwa. Ngila muka ikwavo itwatha kwimanena chiyulo cha Njambi? Twatha kulinga ngocho nga tulinga vyuma mwashakela Yehova. Nga tulinga vyuma mwanatha kuvilingila Yehova, cho tumwetha ngwetu twashaka chiyulo chendi.—Tandeni Efeso 5:1, 2.

14. Mitwe ya vinanga na vakulunu mu vikungulukilo vatha kutembwinina vati Yehova?

¹⁴ Mbimbiliya yalongetha ngwayo Yehova akapangetha ndthzili yendi mu chithzemo. Mitwe ya vinanga na vakulunu mu vikungulukilo kuvapandele kupangetha mwamuvi moko ivanavana. Oloni vanapande kutembwinina Yehova. Paulu nendi watembwininine Njambi na Munendi. (1 Koli. 11:1) Paulu kathzivithile vakwavo shwamwa nambe kuvathindiya kulinga vyuma vyashakela ikeye. Oloni wakele na kuvalambelela. (Loma 12:1; Efeso 4:1; Filim. 8-10) Mukemwo mwakalingila vyuma Yehova. Ngechi, mukemwo muvanapande kulingila vaje vathzema na kwimanena chiyulo chendi.

15. Kuthingimika vaka-kutwamenena kumwetha vati ngwavo twathzema chiyulo cha Yehova?

¹⁵ Tukamono vati vanu vanangula Njambi ngwendi vatutwamenene? Kulikwatathana navo mu kathingimiko, kunapu kwimanena chiyulo cha Yehova. Nameme kututhzivithitha mwamuvwa vivanangwila kulinga chuma chimo, oloni tushaka kutwalelelaho kwononokela mashiko a Njambi. Vaka-kaye kuvethi kulinga ngocho, oloni mukemwo muvinapande  kwendela vyuma mu chiyulo cha Yehova. (Efeso 5:22, 23; 6:1-3; Heve. 13:17) Njambi watuthzema, cho nga tumwononokela tuwana vukwathi vwakama.

16. Vaka-kwimanena chiyulo cha Njambi vakangula vati vya kulinga?

¹⁶ Vyuma vitwangula kulinga navyo vyatha kumwetha indi twimanena chiyulo cha Njambi. Yehova kethi kwakela vanu mashiko mu vyuma vyoshe. Oloni mu kushaka kutukwatha, natumwetha lika vithinganyeka vyendi. Chakumwenako, katwanene mashiko aje amwetha muvanapande kuthzalela vaka-Kilisitu. Oloni namwetha ngwendi washaka tuthzale na kusholoka mu ngila yaivwa ije inapande vaka-Kilisitu. (1 Tima. 2:9, 10) Kashakele lalo ngwendi twangule kulinga vyuma vije vyatha kutanwitha vakwetu nambe kuvatanganetha. (1 Koli. 10:31-33) Nga tuyoya yoyethi yashaka Yehova, tumwetha ngwetu twathzema chiyulo chendi, cho lalo tushaka kuchimanena.

17, 18. Mu vingila muka omwo vaka-kulyambata vatha kwimanena chiyulo cha Yehova?

¹⁷ Tuchimoneni omwo vaka-Kilisitu va kulyambata muvatha kumwethelamo ngwavo vashaka kulinga vyuma mwaya chithzango cha Yehova na kwimanena chiyulo chendi. Vanapande kulinga vati nga vyuma mu vulo kuvyende ngwe muvanathinganyekelele? Hamo vanatha kushangumuka kuliveya. Kwakuvwa kuthinganyeka vyalingile Yehova kuli Vaisalele. Walitumbwile ngwendi wapwile munalume wa muyati wa Vaisalele. (Isaya 54:5; 62:4) Vulo vwacho vwapwile vwa vukalu manene. Oloni Yehova kashatukilile kuthsiya vuje vulo. Wamwethele ngothzi kuli Vaisalele mu vithimbu vyavingi na kushulithilila chikumiyo chalikumiyiye navo. (Tandeni Myatho 106:43-45.) Kuma chithzemo cha Yehova chije kuchethi kutenguluka kuchitushwenyetha kuli ikeye ndi?

¹⁸ Ngechi, vaka-kulyambata vaje vashaka kulinga vyuma mwaya chithzango cha Yehova vakamutembwinina. Kuvethi kumanetha vulo mu ngila ije kuilitombola na Vithoneka. Vathzivuka ngwavo Yehova navapandakana hamo, cho ashaka munalume na munakathzi wendi ‘valipandakane’ hamo lika. Mulonga lika watha kunenetha ngwavo valyangunune uvanamwetha mu Vithoneka unapu vupangala. (Mateo 19:5, 6, 9) Nga vetheka muvathela mwoshe kutepulula ku vukalu vwavo na kutwalelelaho kulikwatathana, cho vamwetha ngwavo vemanena chiyulo chachivwa cha Yehova.

19. Nga tulinga vyuma vije vimwetha ngwe kutwethi na kwimanena chiyulo cha Yehova, tunapande kulinga vika?

¹⁹ Ha kupwa vaka-kujeneka kulumbunuka, thimbu imo tunatha kulinga vyuma vije kuvithzivitha Yehova kuvwaha ku mbunge. Njambi athzivuka ngocho mukemwo watwanene ndando ya kupatula ya Kilisitu. Ngechi nga tunalingi mulonga, tunapande kulomba Yehova atukonekele. (1 Yowa. 2:1, 2) Kutwapandele kutwalelelaho lika kuliveya, oloni tunapande kulilongethaho chimo ha kuthevuka kwetu na kutenguluka. Nga tushwenya kuyehi na Yehova, cho atukonekela na kutukwatha tujeneke kulinga mulonga wa kulifwa thimbu ikwavo.—Myatho 103:3.

20. Mwafwa vika tunapande kwimanena chiyulo cha Yehova hano vene?

²⁰ Mu kaye kakaha vanu voshe vakemanena chiyulo cha Yehova na kulilongetha chithzango chendi. (Isaya 11:9) Oloni nambe ha thimbu ino vene tuli na kulilongethacho. Cho lalo ololo vatundithako chiyulo cha Satana. Ngechi, ino ikeyo thimbu ya kwimanena chiyulo cha Njambi kwitila mu kupwa va kulongwa na kumupangela na kwetheka mutwathela mwoshe kumutembwinina mu vyoshe vitulinga.