Naumo wahi athzivuka mwamuvwa mwafwilililemo Paulu. Ngechi, vikupulo vya Paulu vitukamwetha mu mavulu etu vikapu lika vya chifwitha, cho kethi ikeye vene ivakupwile.

Oloni kuli vukaleho vuje vumwetha mwafwilililemo Paulu. Chakumwenako, mangazini ya Zion’s Watch Tower ya March 1, 1902 yendekele ngwayo: “Chifwa cha Paulu . . . vachithonekele mu livulu lya ‘Acts of Paul and Thecla ,’ . . . lije livathonekele mu mwaka wa A. D. 150. Eli livulu likelyo linendeka mpundu mwafwililile Paulu na chithemwa chendi. Omu mu livulu, vathonekelemo ngwavo Paulu wakele na ‘muvila wa kupwamo na livula na mendi a kupetuka, cho wapwile wa kukanyama muvila, cho vikuku nambe ngwetu vikenikeni vyendi vyaliwanenene mu luholo, cho wakele na lijulu lya kushongomoka.’”

Livulu lya The Oxford Dictionary of the Christian Church lya mu 1997 lyendekele ha majwi avathonekele akukundama kuli kapositolo Paulu ngwalyo: “Chasholoka ngwe livulu lya kuthañulu lya The Acts of Paul and Thecla lyendekele vuthunga ha mithzimbu imo ya kuthañulu.” Eli livulu lyathsimanene manene mu vita vya myaka vya kulivanga, cho kwakele mavulu a kupwa 80 avathonekele mu Chingiliki na mu vindaka vyeka. Ngechi, vikupulo vya kapositolo Paulu vitukamwetha mu mavulu etu Vakaleho vinalitombola na viñanda vya mu mavulu a kuthañulu, vije vimwetha mwafwilililemo kapositolo Paulu.

Anukeni ngweni kuli vyuma vikwavo vya theho vitulilongetha kuli Paulu kethi kuthzivuka lika mwafwilililemo. Ha thimbu yakele mu chipangi chendi cha kwambulula, vanu vamo vaka-kulwitha vendekele ngwavo: “Omwo ali netu napu wa kuthzeya na vyendeka vyendi vyangocho.” (2 Koli. 10:10) Tunapande kuthzivuka lalo ngwetu Paulu watengulukile na kupwa muka-Kilisitu omwo Yesu washolokele kuli ikeye mu chimona. Tunapande kuthinganyeka ha vyuma vyalingile Paulu omwo ‘vamwangwile ngechi apangele [Kilisitu] mu kusholola lithzina lya [Yesu] kuli vaje kethi Vayunda.’ (Vili. 9:3-5, 15; 22:6-8) Mikanda ya kuhwiminina kuli Yehova ije yathonekele Paulu, ikatukwatha manene.

Paulu kalishashele ha vyuma vyalingile te kanda apwe muka-Kilisittu, cho kendekele lalo mwafwilililemo. (Vili. 26:4, 5; Fili. 3:4-6) Wendekele ngwendi: “Omwo yange njapwa wa kukotokela kuli voshe miluwa, cho kunjapandelemo mu kunjitumbula muluwa.” (1 Koli. 15:9) Wathonekele lalo ngwendi: “Yange njapwa wamundondo kutuvakana vanu voshe va Njambi, oloni Njambi wanjanene vwana ovu vwa kutwala viñanda vyavivwa vya vufuko vuje vwa myaka yoshe vwa Kilisitu kuli vaje kethi Vayunda.” (Efeso 3:8) Awa majwi athonekele Paulu akewo a theho manene kuli yetu kutuvakana kuthinganyeka lika mwafwilililemo.