MITHZIMBU YETU YA THEHO YA KUNIMA
“Vatushongangeyeye Kukala Manene na Chithzemo na Ntwima”
LYA MU chitanu mutondo, September 1922, kwashalukile. Ha litangwa eli, vanu vakupwa 8,000 valikungulwile ku chiwano cha mutambela. Cheyamani wendekele ngwendi ha thimbu ya chiwano, vanu vatha kutuhuka hanja, oloni nga munu natuhuka kapandele kukovela lalo mukati.
Vembile myatho ya kushangumuka chiwano, kutundoho Joseph F. Rutherford waile ha vutenda. Vanu vavangi vatumbamene na kuvandamena kulikuwa chiwano. Vamocho, vakele na kukatothzoka mwafwa ya kushaluka. Muka-kwendeka ñanda wavalekele ngwendi vatumbame na kutolilila. Omwo washangumukile kwendeka ñanda, vanu vavangi kuvathzivukile ngwavo kwakele nanga imo ivathzengele na kuishukika ku vutenda.
Ndolome Rutherford wendekele ha ñanda ya mutwe wa: “Vumwene vwa mwilu vuli muyehi.” Ha ola na minutu 30, wendekele na ntwima ha tupolofweto va kuthañulu vaje vambulwile vya kwija kwa Vumwene vwa Njambi mu kuthimpa. Omwo ñanda yendi yetele ha ntwitwi, wehwile ngwendi: “Mwakulahela ngweni Mwene wa vumpau nashangumuka kuyula ndi? Mbunga yakumbululwile mu kukangoka ngwavo: “Eyo.”
Ndolome Rutherford wavalekele ngwendi: “Yeni na kwambulula, eni vana va Njambi wa hakamwa ya vyoshe. Mwene ali na kuyula, cho munapande kwambulula Vumwene vwendi. Ngechi, ambululeni, ambululeni, ambululeni.”
Ha thimbu oyo vene, hakeho havajangumwinine ije nanga ivashukikile ku vutenda, haje havathonekele ngwavo: “Ambululeni Mwene na Vumwene Vwendi.”
Ray Bopp wendekele ngwendi: “Ije ñanda yakwatele vanu ku vimbunge.” Anna Gardner wendekele ngwendi: “Mbunga yakandele manene mavoko.” Fred Twarosh ngwendi: “Mbunga yoshe yakatukile ha thimbu imo lika.” Evangelos Scouffas ngwendi: “Twalithzivile ngwe kuli chuma chimo chatukatwile, cho twakatukile na mithothzi yetu mu mesho.”
Hakati ka vanu vaje vakungulukile, vamo te vanashangumuka laja kwambulula muthzimbu wauvwa wa Vumwene. Oloni vivathzivile haje ha chiwano vyavwethzelelele ku ntwima ivakele nayo. Ethel Bennecoff wendekele ngwendi, echi chiwano chakwathele Vaka-kulilongetha Mbimbiliya vakale manene “na chithzemo na ntwima.” Odessa Tuck uje wakele na myaka 18 ha thimbu ije, mwatundile ku chiwano wakumbulwile chihula cha: “Iyajo injikatuma?” Wendekele ngwendi: “Kunjathzivukile kuvanethi kunjituma nambe vinjikalingako nomwo mwakukavilingila. Njashakele lika kutembwinina Isaya, uje wendekele ngwendi: ‘Yange unoye, njitumeni.’” (Isaya 6:8) Ralph Leffler wendekele ngwendi: “Kushwa vene lije litangwa, vanu vanapanga chipangi cha kwambulula vya Vumwene na ntwima chije chinete mu mitambela yoshe ya kaye.”
Mukemwo na lelo lino tuchili na kuthimutwiya hali chije chiwano cha mutambela cha kulitila chakeleko mu 1922 ku Cedar Point, Ohio. George Gangas wendekele ngwendi: “Chije chiwano chanjilingithile njikalekale ku viwano vya chifwa echi thimbu yoshe.” George Gangas walingile ngocho vene. Julia Wilcox wathonekele ngwendi: “Njikathzivi manene kuvwaha munjikatanda vya chiwano cha ku Cedar Point cha mu 1922 mu mavulu etu. Thimbu yoshe njikendeka ngwange: ‘Yehova njakandelela manene omwo wanjikwathele kukala kuje ku chiwano.’”
Mpamo netu kuli chiwano chimo cha mutambela chije chatuthzivithile kuvwaha na kutushongangeya kukala na ntwima na chithzemo cha kuthzema Njambi yetu na Mwene yetu. Omwo twanuka vithimbu vya chifwa echi, netu tunatha kwendeka ngwetu: “Yehova Njakandelela manene ha kunjikwatha kukala kuje ku chiwano.
Hamo Mushaka Lalo Ebi
KAPOSHI KA KUKENGELA (KA KULILONGESA)
Muchashangumukilile Chipangi cha Vumwene mu Portugal
Vukalu muka vuvaliwanene navwo vaka-kwambulula vya Vumwene va kulivanga va mu Portugal?
KAPOSHI KA KUKENGELA (KA KULILONGESA)
Viñanda vya Mbunga Vije Vyakwathele vaka-Ireland Kuthziva Muthzimbu Wauvwa
Vika vyalingithile C. T. Russell akulahele ngwendi lihya lili na “vimbuto vije vinavandamena vaka-kuteja”?
KAPOSHI KA KUKENGELA (KA KULILONGESA)
“Tangwa Lika Tukakala na Chiwano Chikwavo?”
Vika vyanenethele ngwavo chije chiwano chachindondo chakele mu Nganda ya Mexico mu 1932 chithsimane?
KAPOSHI KA KUKENGELA (KA KULILONGESA)
“Kukwethi Tapalo Yayivi Manene Nambe Yailaha Manene”
Ku mamanethelelo a myaka ya ma 1920 na ku maputukilo ama 1930, vapayiniya va ntwima vapangele na ndthzili mu kutwala muthzimbu wauvwa wa Vumwene vwa Njambi ku mitambela ya kulako ya mu Australia.
KAPOSHI KA KUKENGELA (KA KULILONGESA)
“Njili na Kuteja Vushuka Vuje Vushangathzala Yehova”
Nameme Vaka-Kulilongetha Mbimbiliya kuvathzivukile vyavingi ha ñanda ya kulyangununa ku kaye mu thimbu ya ndthzita ya kaye ya kulivanga, oloni kuli vuvwa vwatundile mu kulongwa kwavo.
