1, 2. (a) Majwi a Yesu ali ku Mateo 24:12 alivangele kulishulithila kuli veya? (b) Livulu lya Vilinga limwetha vati ngwavo vaka-Kilisitu vavangi va kulivanga vakele na chithzemo? (Kengeni chikupulo ha liputa 17)

YESU wendekele vya chithzivukitho chije chikamwetha ngwavo tuli mu matangwa a ‘kukotoka’ ngwendi: “Chithzemo cha vanu ku vakwavo vanu chikatonola.” (Mateo 24:3, 12) Mu chita cha myaka cha kulivanga, Vayunda vaje valishashele kupwa vanu va Njambi, vechelele chithzemo chavo chitonole.

² Oloni ha thimbu ije, vaka-Kilisitu vavangi vathzethzamene mu “kwambulula viñanda vyavivwa vya Yesu wa Kuvwavetha” na kumwetha chithzemo kuli Njambi na kuli vaka-kujeneka kukulahela. (Vili. 2:44-47; 5:42) Nameme ngocho, vandongethi va Yesu vamo va mu chita cha myaka cha kulivanga vechelele chithzemo chavo chitonole.

3. Vyuma muka hamo vyanenethelele chithzemo cha vaka-Kilisitu vamo chitonole?

³ Yesu Kilisitu uje wathangukile, wendekele kuli vaka-Kilisitu va  ku Efeso ngwendi: “Kuli chuma chimo njalinyenge hali yove, kuwethi na kunjithzema ngwe muje muwanjithzemene ha kulivanga.” (Kujo. 2:4) Vika vyanenethele ngwavo chithzemo chavo chitonole? Ava vandongethi va Kilisitu va kulivanga vongumukile na vithinganyeka vya vaka-kaye. (Efeso 2:2, 3) Mu nganda ya Efeso mwalithalele vyuma vyavivi, ngwe muvinalithalela matangwa ano mu vinganda vyavingi. Omu mu nganda mwakele vufuko vwavwungi, ngechi vanu vakelemo vathzethzamene manene mu kushakethzeka vufuko mangana vayoye mwamuvwa. Kushaka manene kuyoya mwamuvwa kwatonwethele chithzemo chavo. Cho lalo, vupangala na vilinga vikwavo vyavivi vyalithalele manene.

4. (a) Mu vingila muka omwo chithzemo cha vanu chinatonola matangwa ano? (b) Vyuma muka vitatu vitunapande kulinga?

⁴ Vupolofweto vwa Yesu vuje vwendeka ha kutonola kwa chithzemo vuli na kulishulithilila na matangwa ano. Vanu kuvethi na kuthzema Njambi. Vanu vavangi kuvakulahelele Njambi, oloni vanakulahela vimunga vya vanu ngwavo vikevyo vimanetha vukalu vwavwo. Ngechi, chithzemo cha vanu vaje kuvethi na kulemetha Yehova Njambi chili na kutonola. Vaka-Kilisitu va vuthunga matangwa ano, vanatha kuthinganyeka ngwavo vyuma vili mwamuvwa, na kwechelela chithzemo chavo chitonole, ngwe mukwafwile mu chikungulukilo cha vaka-Efeso. Tuthimutwiya ha vyuma vino vitatu: (1) Kuthzema Yehova na (2) kuthzema vuthunga vwa mu Mbimbiliya na (3) kuthzema vandolome vetu.

5. Mwafwa vika tunapande kuthzema Njambi?

⁵ Ha litangwa lije Yesu wanangwile ngwendi chithzemo cha vanu chikatonola, watumbwile munu itunapande kuthzema manene kutuvakana vyuma vyoshe. Wendekele ngwendi: “‘Thzema Shukulu Kalunga Njambi yove na mbunge yove yoshe, na mwonyo wove woshe, na mana ove oshe.’ Eli likelyo lishiko lyakama lya kulivanga.” (Mateo 22:37, 38) Kuthzema manene Yehova Njambi, kutukwatha twononoke mashiko endi na kupwa va kuthimpa na kuthzinda vyuma vyavivi. (Tandeni Myatho 97:10.) Oloni Satana na kaye kendi vakatushongangeya tujeneke kuthzema Njambi.

6. Vyuma muka vinatundu mu kujeneka kuthzema Njambi?

⁶ Vanu mu kaye vali na vithinganyeka vya kuhenga ha chithzemo. Kuvethi na kuthzema Ishamatanga, oloni vanapu “vaka-kulithzema vakevo vavenya.” (2 Tima. 3:2) Kano kaye ka Satana kakashongangeya ‘mashungu amavi a vunu na vije vanu vamona na kuvishungwiya na vyuma vyoshe vya muno mu kaye vije vanu vali na kulyaletha navyo.’ (1 Yowa. 2:16) Kapositolo Paulu wanangwile vaka-Kilisitu ngwendi kethi vatembwinine futithi ya kano kaye. Wendekele ngwendi: “Nga chithzango cha vuthitu chikutwamenena, cho fweto yacho kuthsa . . . Omwo chithzango cha vuthitu chikecho chinena vutothzi kuli Njambi.” (Loma 8:6, 7) Vanu vaje vakaviyithila thimbu yavo yoshe ku kushakethzeka vufuko nambe kushaka kukutitha mashungu avo a kulilala, vakaliwana mu vukalu.—1 Koli. 6:18; 1 Tima. 6:9, 10.

7. Vukalu muka vuvakaliwana navwo vaka-Kilisitu matangwa ano?

⁷ Mu mafuti amo, vaka-kujeneka kuthzivuka Njambi na vaka-kutava ngwavo vyuma vyalithzilile ngocho, vakendeka vyuma vije vishongangeya vanu vajeneke kuthzema Njambi na kumukulahela. Vakendeka ngwavo vanu vaje vatava ngwavo Ishamatanga kwali, kuvethi na mana. Ha thimbu imo lika, vanu vakathingimika manene vaka-sayansi, kuhyana kuthingimika Ishamatanga. (Loma 1:25) Nga tutolilila ku vilongetha vya chifwa echi, tunatha kungumuka  na kutunda kuli Yehova, cho chithzemo chetu chitonola.—Heve. 3:12.

8. (a) Vanu va Yehova vavangi vakaliwana na vukalu muka vuje vwatha kuvathzeyetha? (b) Majwi muka a kutakametha ali ku Myatho 136?

⁸ Kuthzeya kwatha kwilwithila likulahelo lyetu munima na kutonwetha chithzemo chetu kuli Njambi. Vithimbu vimo, tuvavoshe tukaliwana na vyuma vije vyatha kututhzeyetha, mwafwa tuli mu kaye ka Satana. (1 Yowa. 5:19) Hamo tunatha kuliwana na vukalu vuje vukaija omwo ya vukulukathzi nambe mishongo nambe kujeneka vimbongo. Tunatha kulithziva ngwe tuvangocho, mwafwa ya vyuma vimo vije kuvyalingiwile nambe vuthzeye vwetu vavenya. Kutwapandele kwechelela vithinganyeka vya chifwa echi vitulingithe tuthinganyeke ngwetu Yehova natuyengula. Oloni tunapande kuthinganyeka ha majwi aje amwetha ngwavo Yehova watuthzema. Awa majwi ali ku mukanda wa Myatho 136:23. Wendeka ngwavo: “Ikeye katwivalele omwo vatufungulwile, omwo chithzemo chendi chije kuchethi kutenguluka chakala ku myaka yoshe.” Chithzemo cha Yehova ku vangamba vendi chapwa cha thimbu yoshe. Ngechi twatha kukulahela ngwetu akatolilila ku “malombelo” etu na kutukwatha.—Myatho 116:1; 136:24-26.

9. Vika vyatakamethele Paulu atwaleleho kuthzema Njambi?

⁹ Paulu nendi watakamene ku sipilitu omwo wathinganyekethethele ha vukwathi vuje vukatundu kuli Yehova, ngwe mwalingile muka-kwimba myatho. Paulu wathonekele ngwendi: “Shukulu Kalunga ikeye mukwathi wange, cho kunjithzivi lyova. Munu atha kunjilinga vikajo?” (Heve. 13:6) Kukulahela Yehova kwakwathele Paulu akolethele vukalu vwaliwanene navwo. Kechelele vithinganyeka vyavivi vimuthzeyethe. Ha thimbu yakele mu kamenga, Paulu wathonekele mikanda yaingi ya kutakametha vakwavo. (Efeso 4:1; Fili. 1:7; Filim. 1) Nambe omwo wakele mu vyetheko, Paulu watwaleleleho kuthzema Njambi. Vika vyamutakamethele? Wakulahelele “Njambi kuje kukatundu vukwathi vwoshe. Ikeye muka-kututhzembeleka mu tuyando twetu twoshe.” (2 Koli. 1:3, 4) Twatha kutembwinina vati mwanja wa Paulu na kutwalelelaho kuthzema manene Yehova?

10. Twatha kukanyametha vati chithzemo chetu kuli Yehova?

¹⁰ Paulu wendekele ha chuma chije chatha kutukwatha tutwaleleleho kuthzema manene Yehova. Wathonekelele vakwavo vaka-kukulahela ngwendi: “Lombeleni thimbu yoshe.” (1 Tesa. 5:17; Loma 12:12) Kulombela kukekwo kutukwatha kupwa kavuthamba ka Njambi. (Myatho 86:3) Nga tulomba Yehova kutundilila kwithi ya mbunge yetu na kumuleka vithinganyeka vyetu vyoshe, cho atukwatha tushwenye kuyehi nendi mwafwa wapwa Tate yetu wa mwilu, uje ‘akakumbulula malombelo.’ (Myatho 65:2) Cho lalo, nga tunanguka ngwetu Yehova akakumbulula malombelo etu, chithzemo chetu kuli ikeye chikanyama. Tunanguka lalo ngwetu Yehova “ali muyehi na vanu vaje voshe vatambeka kuli ikeye.” (Myatho 145:18) Kuthzivuka ngwetu Yehova watuthzema kutukwatha kukolethela vyetheko.

11, 12. Twatha kushangumuka vati kuthzema vuthunga vwa mu Mbimbiliya?

¹¹ Ha kupwa vaka-Kilisitu, twathzema vuthunga. Ovu vuthunga tuvuwana mu Lijwi lya Njambi. Yesu walombelele kuli Ishe ngwendi: “Lijwi lyove lyapwa vuthunga.” (Yowa. 17:17) Ngechi, kulilongetha Lijwi lya Njambi kumwetha ngwavo twashangumuka kuthzema vuthunga. (Kolo. 1:10) Oloni kuli vyuma vyavingi vyalivungila mu kuthzivuka vuthunga. Muka-kuthononeka Myatho 119, atukwatha kuthzivithitha vikulumbununa kuthzema  vuthunga vwa mu Mbimbiliya. (Tandeni Myatho 119:97-100.) Vati, tukawanako thimbu ya kuthinganyekethetha ha vyuma vitunatanda mu Vithoneka mukati ka litangwa ndi? Nga tuthinganyekethetha ha vyuma vitutanda na kumona mu vitukwathelamo mu kuyoya kwetu, cho tuthzema manene vuthunga vwa mu Mbimbiliya.

¹² Muka-kwimba myatho wendekele lalo ngwendi: “Majwi ove apwelelela mu kanwa kange, apwelelela manene, kutuvakana ngenga ya vuki.” (Myatho 119:103) Mu ngila imo lika, netu tunapande kulikuwa vyakulya vya ku sipilitu vituli na kutambula ku munga ya Njambi. Tunapande lalo kulya “majwi” amavwa akupwelelela, kulumbununa, kuwatanda thimbu yoshe mangana tuwathzivithithe mwamuvwa na kulongethako vakwetu.—Kwambu. 12:10.

13. Vika vyakwathele Njelemiya athzeme vuthunga vwa mu Vithoneka, cho vwamukwathele vati?

¹³ Kapolofweto Njelemiya wathzemene vuthunga vwa mu Vithoneka. Wathzemene manene lijwi lya Njambi, ngechi wendekele ngwendi: “Omwo wendekele kuli yange, njatolililile majwi oshe na kuwononoka, omwo njapwa njiwove, yove Shukulu Kalunga Muka-ndthzili yoshe.” (Njele. 15:16) Njelemiya walile majwi a Njambi mu chifwitha mu kuwathinganyeka thimbu yoshe. Kulinga ngocho kwamukwathele apange chipangi chamwanene Njambi na ntwima. Kuma kuthzema vuthunga vwa mu Mbimbiliya kukatushongangeya tunanguke ngwetu tuli na chipangi cha theho cha kukundwiya lithzina lya Njambi na kwambulula vya Vumwene vwendi, thimbu mamanethelelo kanda ete ndi?

14. Twatha kuthzema vati vuthunga vwa mu Mbimbiliya?

¹⁴ Vyuma muka vikwavo vitukwatha tuthzeme vuthunga vwa mu Mbimbiliya? Kukunguluka thimbu yoshe ku viwano vya chikungulukilo, kutukwatha tuthzeme manene vuthunga vwa mu Mbimbiliya. Tukalilongetha Mbimbiliya kupangetha Kaposhi ka Kukengela mu chalumingo na chalumingo. Ngechi, tunapande kulivwahethela mwamuvwa chilongetha na chilongetha cha mu Kaposhi ka Kukengela mangana tukathzivithithe vitukalilongetha. Ngila imo itwatha kulinga ngocho inapu kutanda vithoneka vyoshe  vili mu chilongetha. Matangwa ano, twatha kulyambatela Kaposhi ka Kukengela ha wembusaiti yetu ya jw.org nambe kukakenga ha JW Library app mu vindaka vikwavo. Makina amo atha kutukwatha kuwana vwathi vithoneka vivanamwetha mu chilongetha. Nameme kutwethi na makina, oloni kutanda evi vithoneka mwamuvwa na kuthinganyekethetha kutukwatha tuthzeme manene vuthunga vwa mu Mbimbiliya.—Tandeni Myatho 1:2.

15, 16. (a) Mukanda wa Yowano 13:34, 35, watuleka kulinga vika? (b) Kuthzema vandolome na vandokathzi vetu, kwendelela vati na kuthzema Njambi na Mbimbiliya?

¹⁵ Ha vuthsiki vwa mamanethelelo vwa kuyoya kwendi hano hathi, Yesu walekele vandongethi vendi ngwendi: “Njimyana lishiko lyaliha ngwange, lithzemeni umo na mukwavo. Ngwe yange munjinamithzeme, ngechi vene, munapande kulithzema umo na mukwavo. Nga mulithzema umo na mukwavo, athinoni voshe vakathzivuka ngechi mu vandongethi vange.”—Yowa. 13:34, 35.

¹⁶ Kuthzema vandolome vetu na vandokathzi kwendelela na kuthzema Yehova. Kutwatha kuthzema Njambi nga twathzinda vandolome vetu. Kapositolo Yowano wathonekele ngwendi: “Kutwatha kuthzema Njambi, uje kanda tumone, nga kututhzeme vakwetu vaje tunamono.” (1 Yowa. 4:20) Kutundoho, kuthzema Yehova na vandolome na vandokathzi vetu, kwendelela na kuthzema Mbimbiliya. Mwafwa vika? Mwafwa kuthzema vuthunga vwa mu Mbimbiliya kutushongangeya kwononoka lishiko lya mu Vithoneka lya kuthzema Njambi na vandolome vetu.—1 Petu. 1:22; 1 Yowa. 4:21.

17. Twatha kumwetha vati chithzemo mu chikungulukilo chetu?

¹⁷ Tandeni 1 Tesalonika 4:9, 10. Twatha kumwetha vati chithzemo mu chikungulukilo chetu? Twatha kutwala ndolome nambe ndokathzi wa kakulukathzi ku viwano vya vaka-Kilisitu nga katha kwenda. Twatha kukwatha lalo fwile nga njuvo yendi kuyethi mwamuvwa. (Yako. 1:27) Tuvavoshe tunapande kukwatha na kuthzembeleka vandolome na vandokathzi vetu vaje vanathzeye nambe vaje vali mu vyetheko. (Vithi. 12:25; Kolo. 4:11) Nga tulinga ngocho, cho tumwetha ngwetu twathzema vandolome vetu vaje “vanakundama ku nanga yetu mu kukulahela.”—Ngala. 6:10.

18. Vika vitukwatha kumanetha vukalu mu ngila yaivwa na vakwetu vaka-kukulahela?

¹⁸ Mbimbiliya yapolofwetele ngwavo mu “matangwa a kukotoka,” vanu vakapwa vaka-nuna na vaka-kulithzema vakevo vavenya. (2 Tima. 3:1, 2) Ha kupwa vaka-Kilisitu, tunapande kuthzema manene Njambi na kuthzema vuthunga vwa mu Mbimbiliya na kulithzema umo na mukwavo. Thimbu imo tunatha kulithevuka na vakwetu vaka-kukulahela. Oloni, tunapande kufwitangana mu kumwetha chithzemo na kumanetha vukalu vwoshe mu ngila yaivwa. (Efeso 4:32; Kolo. 3:14) Ngechi, kethi twechelele chithzemo chetu chitonole. Oloni tutwaleleniho kuthzema manene Yehova na Lijwi lyendi na kuthzema vandolome vetu.