NGAYU na vakwavo vaka-Kilisitu va mu chita cha myaka cha kulivanga valiwanene na vukalu vwa kulithethzathethza. Vanu vamo vakele na kulongetha vyuma vya makuli vije vyathzeyethele vakwavo na kwangununa vikungulukilo. (1 Yowa. 2:18, 19; 2 Yowa. 7) Ndiyotelefese wakele na kwendeka vyuma vya “makuli” hali kapositolo Yowano na vakwavo, cho wavyanene lalo kutambula vangendthzi na kuvindika vaje vashakele kuvatambula. (3 Yowa. 9, 10) Evi vikevyo vyalingiwile omwo Yowano wathonekele mukanda kuli Ngayu. Mukanda wathonekele kapositolo Yowano mu 98 C.E., tuuwana mu Vithoneka vya Chingiliki vya Vaka-Kilisitu, cho vautumbula ngwavo: “Mukanda wa mu Chitatu wa Yowano.”

Ngayu watwaleleleho kupangela Yehova mu kulongwa nambe ngwavo waliwanene na vukalu. Wamwethele vati kulongwa? Mwafwa vika tushaka kukavangeya mwanja wa Ngayu ano matangwa? Mukanda wa Yowano utukwatha vati kulinga ngocho?

Muka-kuthoneka mukanda wa mu chitatu wa Yowano walitumbwile ngwendi “mukulunu.” Awa majwi akwathele Ngayu ananguke ngwendi kapositolo Yowano ikeye wamuthonekelele mukanda. Yowano wathonekelele munendi wa ku sipilitu ngwendi: “Muka chithzemo change Ngayu, uje injathzema mu vuthunga.” Kutundoho, Yowano wendekele lalo ngwendi, Ngayu wapwile wa kulikangula ku muvila na ku sipilitu. Awa apwile majwi amavwa a kumushangathzala na kumutakametha.—3 Yowa. 1, 2, 4.

Ngayu hamo wapwile mukulunu mu chikungulukilo, oloni mukanda kuwendekele ngocho. Yowano washangathzalele Ngayu ha kutambula vandolome vendi nameme kavathzivukile. Ovu vukaleho vukevwo vwakwathele Yowano atanekeye kulongwa kwa Ngayu, mwafwa vangamba va Njambi vakavathzivukila ha kutambula vangendthzi.—Kusha. 18:1-8; 1 Tima. 3:2; 3 Yowa. 5.

Majwi a Yowano a kushangathzala Ngayu mwafwa ya kutambula mwamuvwa vandolome vendi, amwetha ngwavo ava vaka-Kilisitu vakele na kwita kuli Yowano omwo vendelele vikungulukilo, cho vakele na kumuleka vyuma vivakele na kuliwana navyo. Hamo vakevo lalo vakele na kumuleka vyuma vyakele na kulingiwa mu vikungulukilo.

Vaka-Kilisitu vaje vakele mu chipangi cha kuthzenguluka vashakele kutulila kuli vakwavo vaka-kukulahela. Mwafwa ku vinjuvo vya kutulila vangendthzi kwakele manene vukalu. Vangendthzi kuvakele na kuvatambula  mwamuvwa, cho kwalithalele vupangala. Mukemwo vangendthzi vamo vashakele kutulila kuli vavuthamba vavo. Na vaka-Kilisitu vaje vakele mu chipangi cha kuthzenguluka vakele na kutulila kuli vakwavo vaka-Kilisitu.

Yowano washongangeyeye lalo Ngayu atambule vangendthzi omwo wamuthonekelele ngwendi: ‘Vakwathe [vangendthzi] ngechi vatwaleleleho ha vungendthzi vwavo mu ngila ije ithzivitha Njambi kuvwaha ku mbunge.’ Yowano aha walumbunwine ngwendi Ngayu ane vangendthzi vyuma vya kulikwatha navyo mu ngila kweta nokwo kuvaya. Kuli vukaleho vwamwethele ngwavo Ngayu watambwile mwamuvwa vangendthzi, mwafwa kuli vamo vakalekele Yowano vya chithzemo na likulahelo lya Ngayu.—3 Yowa. 3, 6.

Ava vangendthzi hamo vapwile vamishinali nambe miluwa nambe vantwama va kuthzenguluka. Vakele na kutwala muthzimbu wauvwa ku vanu. Mukemwo Yowano wendekele ngwendi: “Vaile vungendthzi vwavo mu kupangela Kilisitu.” (3 Yowa. 7) Omwo Yowano wendekele ngwendi: “Vaile vungendthzi vwavo mu kupangela Kilisitu,” walumbunwine ngwendi ava vandolome navo vakele mu nanga ya chikungulukilo cha vaka-Kilisitu, cho vapandele kuvatambula na ndthzandthzu. Mukemwo Yowano wathonekele ngwendi: “Tunapande kukwatha vanu ava, ngechi tulipangethzele navo mu vipangi vyavo vya vuthunga.”—3 Yowa. 8.

Kuli vyuma vyavingi vyanenethele ngwavo Yowano athonekele Ngayu mukanda. Yowano washakele kukwatha Ngayu amanethe vukalu vuje vwakeleko. Ndiyotelefese uje wakele mu chikungulukilo cha vaka-Kilisitu kashakele kutambula vangendthzi. Wavindikile na vakwavo vaje vashakele kutambula vangendthzi.—3 Yowa. 9, 10.

Vaka-Kilisitu va vuthunga kwavakaluwilile kukala na Ndiyotelefese. Mwafwa wathzemene manene kupwa ntwama mu chikungulukilo, cho kathingimikile Yowano. Wakele na kwendeka lalo vyuma vya makuli hali kapositolo Yowano na vakwavo. Nameme Yowano katumbwile Ndiyotelefese ngwendi wapwile mulongethi wa makuli, oloni wavyanene kuthingimika kapositolo Yowano. Futithi ya Ndiyotelefese ya kulijundula yamwethele ngwavo kapwile muka-Kilisitu wa kulongwa. Vanu vamo vaje vakalijundula na kuthzema kupwa vantwama vanatha kunena vukalu mu chikungulukilo ngwe mwalingile Ndiyotelefese. Mukemwo Yowano walekele Ngayu, hamo lika netu ngwendi: “Kethi utembwinine vije vyavivi.”—3 Yowa. 11.

Yowano wendekele ngwendi Ndemetelyase wakele na vilinga vyavivwa kutuvakana Ndiyotelefese. Yowano wathonekele ngwendi: “Vanu voshe vali na kushangathzala Ndemetelyase . . . Cho netu tuvwethzelelako vukaleho vwetu, cho mwathzivuka ngweni vije vituli na kwendeka vinapu vya vuthunga.” (3 Yowa. 12) Ngayu mpamo wapandele kukwatha Ndemetelyase, mukemwo kapositolo Yowano wanene mukanda wendi wa mu chitatu kuli Ndemetelyase wakukamuthzimbula kuli Ngayu. Ha kupwa muluwa wa Yowano, nambe ntwama wa kuthzenguluka, Ndemetelyase walumbunwine mwamuvwa vyuma vyathonekele Yowano mu mukanda.

Mwafwa vika Yowano washongangeyeye Ngayu atwaleleleho kutambula vangendthzi okuni wakele na kulinga ngocho? Kuma Yowano wapandele kushongangeya Ngayu ngwendi apwe wa kuthimpa ndi? Indi hamo kapositolo Yowano walishoshomwenene ngwendi Ngayu nalikele kutambula vangendthzi mwafwa ya Ndiyotelefese uje wakele na kusheka vaka-Kilisitu va ngothzi mu chikungulukilo? Nameme kututhzivuka mwamuvwa vyanenethele ngwavo Yowano amutakamethe, oloni walekele Ngayu ngwendi: “Woshe uje alinga vyavivwa ikeye wakundama kuli Njambi.” (3 Yowa. 11) Evi vikevyo vyanenethele ngwavo  Yowano ashongangeye Ngayu kutwalelelaho kulinga vyuma vyavivwa.

Kuma mukanda wa Yowano washongangeyeye Ngayu atwaleleleho kutambula vangendthzi ndi? Eyo wamushongangeyeye, mwafwa mukanda wa mu chitatu wa Yowano vauthoneka mu Mbimbiliya, cho uchishongangeya vanu ‘vatembwinine vyavivwa.’

Vanendeka lika mu vundondo ha vuyoye vwa Ndolome yetu, Ngayu. Nameme kuvendekele vyavingi, oloni tulilongetha vyuma vyavingi kuli ikeye.

Cha kulivanga, vwingi vwetu hamo twalilongethele vyavingi kuli vakwetu vaka-kukulahela vaje vakele na kwendela vikungulukilo. Oloni ano matangwa, kethi vaka-Kilisitu voshe vakayi kulako na kwambulula muthzimbu wauvwa. Tunapande kutembwinina Ngayu mu kukwatha na kutakametha vakwetu vaje vakendela vikungulukilo, vakufwa ngwe vantwama va kuthzenguluka na vanakathzi vavo. Tunatha lalo kukwatha vandolome na vandokathzi vaje vanayi na kupangela kuje kuli vujene vwa vaka-kwambulula vya Vumwene mu lifuti lyetu nambe mu lifuti lyeka. Tutwaleleniho “kutambula vangendthzi.”—Loma 12:13; 1 Tima. 5:9, 10.

Cha mu chivali, kutwapandele kukathama nga vithimbu vimo vanu kuvathingimika vakulunu va chikungulukilo. Yowano na kapositolo Paulu navo kuvavathingimikile. (2 Koli. 10:7-12; 12:11-13) Tunapande kulinga vati nga vamo mu chikungulukilo vajeneka kuthingimika vakulunu? Paulu wanangwile Timateo ngwendi: “Ngwe ngamba ya Mwene, kuwapandele kupwa muka-vimata. Unapande kupwa muka-ngothzi kuli voshe, mulongethi wamuvwa wa lukakateya, wa lyovwa ovwa omwo ashungametha vaka-kumulwitha.” Nga tukwata mbunge omwo vanu vatushangumuka na kutulwitha, cho vanatha kutengulula vithinganyeka vyavo. Kukapwa muje, Yehova “akavana thimbu ya kutenguluka, ngechi vathzivuke vuthunga.”—2 Tima. 2:24, 25.

Cha mu chitatu, tunapande kukandelela kuli vaka-Kilisitu vaje vali na kupangela Yehova mu kulongwa nambe ngwavo vali na kuliwana na vukalu. Kapositolo Yowano watakamethele Ngayu mukumuleka ngwendi wakele na kulinga vyuma vyavivwa. Na matangwa ano, vakulunu vanapande kukavangeya mwanja wa Ngayu mu kutakametha vandolome na vandokathzi vavo mangana kethi ‘vajuke.’—Isaya 40:31; 1 Tesa. 5:11.

Mukanda wathonekele Yowano kuli Ngayu wakele na majwi amandondo akupwa 219 mu Chingiliki. Oloni uli na vilongetha vyavingi kuli vaka-Kilisitu ano matangwa.