DANIEL NA MIRIAM valyambatele mu September 2000. Cho vakele mu nganda ya Barcelona, ku Spain. Daniel wendekele ngwendi: “Twakele na kuyoya mwamuvwa. Vipangi vyetu vyatukwathele kulya vyakulya vya ndando ya helu na kwendela mafuti eka na kulanda vuthzalo vwavuvwa. Cho twakele na kuya mu kwambulula thimbu yoshe.” Oloni vyuma vyatengulukile.

Ñanda imo ya ha chiwano cha mutambela cha mu 2006, yetele Daniel ku mbunge. Omu mu ñanda vehwile ngwavo: “Vati, tuli na kukwatha vanu vaje ‘vaya ku kuthsa’ mangana vende mu ngila iya ku mwonyo wa myaka yoshe ndi?” (Vithi. 24:11) Eyi ñanda yatushongangeyeye twambulule muthzimbu wa kwovola wa mu Mbimbiliya na ntwima. (Vili. 20:26, 27) Daniel wendekele lalo ngwendi: “Njalithzivile ngwe Yehova ali na kuleka yange.” Muje mu ñanda vendekele ngwavo, kufwitangana manene mu kwambulula kukanene vivethzikitho vyavingi. Daniel wathzivukile ngwendi vivendekele vyapwile vya vuthunga. Ha thimbu oyo, Miriam te napu laja payiniya, cho washangumukile kulikuwa vivethzikitho.

Daniel wendekele ngwendi: “Njathinganyekele ngwange ikeyo vene thimbu yange ya kulingako vimo.” Cho walingile vene ngocho. Watepulwile ku thimbu yendi ya kupanga vipangi vyeka na kushangumuka vupayiniya, cho wathinganyekele ha vivethzikitho vyanethi kuwana ikeye na Miriam nga vakapangela kuje kuli vujene vwa vaka-kwambulula vya Vumwene.

Mu May 2007, Daniel na Miriam vechelele vipangi vyavo na kuya ku lifuti livathzivukile lya Panama. Vakambulwilile ha mañanda a ku Bocas del Toro Archipelago, mu Lishali lya Caribbean. Vanu vakalako vapwa Vaguaymi. Daniel na Miriam vathinganyekele ngwavo vimbongo vivakele navyo vyatha kuvakwatha kukala mu Panama ha vingonde 8.

Vapangethele mato na vikinga mu kwambulula. Vakathinganyeka vya vungendthzi vumo vuvendele na vikinga ha kulivanga vwa kweta ku vimailu 20 (32 km) ha minkinda, mu litanya. Daniel washakele kulethzumuka, mwafwa ya kujuka. Oloni munima ya kulilongetha Chiguaymi Vaguaymi valikwatathanene navo mwamuvwa. Vashangumukile kwendetha vilongetha vya Mbimbiliya vya kupwa 23.

Omwo vimbongo vyavo vyahwile, valinyengele manene. Daniel wendekele ngwendi: “Twathinganyekele kwiluka lalo ku Spain. Kutwalithzivile mwamuvwa kuthethza chipangi chetu na vandongethi vetu va Mbimbiliya.” Oloni munima ya ngonde imo, vatambwile muthzimbu wauvwa. Miriam ngwendi: “Vatwangwile kupwa vapayiniya va kulitila. Twavwahelelele manene kutwalelelaho kupanga chipangi chetu.”

Mu 2015, Daniel na Miriam vavechelethele kupwa vapayiniya va kulitila na kushangumuka lalo vupayiniya vwa thimbu yoshe, mwafwa ya vyuma vije vyatengulukile mu munga. Valingile vati? Vakulahelele majwi ali ku Myatho 37:5, aje endeka ngwavo: “Kundika ngila yove kuli Shukulu Kalunga, kulahela kuli ikeye, cho akakukwatha.” Vawanene chipangi chije chili na kuvakwatha kutwalelelaho na vupayiniya, cho vali na kupangela mu chikungulukilo cha ku Veraguas, mu Panama.

Daniel ngwendi: “Thimbu kanda tutunde mu Spain, kutwathzivukile indi twatha kukayoya vuyoye vwavwathi. Matangwa ano, tuli na kuyoya vuyoye vwavwathi, cho twathzivukoni vyuma vya theho.” Vika vili na kuvathzivitha manene kuvwaha ku mbunge? Vanendeka ngwavo: “Vyuma vili na kututhzivitha manene kuvwaha vinapu, kukwatha vanu va vimbunge vyavivwa valilongethe vya Yehova.