YESU wendekele ngwendi vaka-kumukavangeya vakakala na chipangi chakama cha kuteja mu thimbu ino ya kukotoka. (Mateo 9:37; 24:14) Tuchithimutwiyeni ha vyuma vyalingiwile mu mutambela wa Transcarpathia, ku Ukraine mangana tumone vuthunga vwawa majwi a Yesu. Kuli vikungulukilo vya kupwa 50 na vaka-kwambulula va kutuvakana 5,400 mu vimbongi vitatu vya mu Transcarpathia. * Eyi nambala inapu yakama manene. Nga tutepa vanu vawana ha nambala yoshe ya vanu vomu mu vimbongi vitatu, umo lika napu Mukaleho wa Yehova.

Vanu vomu mu vimbongi vakatambula vati muthzimbu? Ndolome Vasile wendekele ngwendi: “Vanu vacho vakathingimika manene Mbimbiliya na kuthingimika mashiko na kulikwatathana na vinanga vyavo, cho vashaka kulikwatha umo na mukwavo.” Wendekele lalo ngwendi: “Kuvethi kutava vyuma vitwakulahela, oloni nga muvaleka viyendeka Mbimbiliya, vakatolilila mu kathingimiko.”

Nameme ngocho, kuli vukalu vumo vuvakaliwana navwo ava vandolome na vandokathzi. Vaka-kwambulula vapwa vavangi manene, oloni vinjuvo vyakwambulwila vyapwa vyavindondo. Chakumwenako, chikungulukilo chimo lika chili na vaka-kwambulula va kupwa 134, oloni vinjuvo vili mu chitingitingi chavo, vinapu 50. Cho vakambulula vati?

Vwingi vwa vandolome na vandokathzi vakalyana kukambulwila kuje kuli vujene vwakama. Ndolome Ionash uje ali na myaka 90 wendekele ngwendi: “Mu chikungulukilo chetu, muka-kwambulula umo ali lika na vinjuvo vivali vya kwambulwila.” Ou ndolome wendekele lalo ngwendi: “Thimbu kanda mushongo wange unjithindakane, njakele na kwenda makilomita 160 kukambulwila ku mantaka-ntaka mu ndaka ya Hungarian, kuje kukwethi vaka-kwambulula. Oloni ano matangwa njikambulwila lika hembo.” Vaka-kwambulula vakalyana mangana vakambulwile ku vitingitingi vyeka. Ionash wendekele lalo ngwendi: “Njakele na kwinduka na thimbu ya 04:00 mangana njikalonde kumboyo, cho njakele na kwambulula kweta na thimbu ya 18:00 na kukalonda lalo kumboyo na kwiluka kwimbo. Njakele na kulinga ngocho luvali nambe lutatu mu chalumingo.” Kuma walithzivile ngwendi kulinga ngocho kwapwile kwa theho ndi? Wendekele ngwendi: “Njavwahelelele ha kulinga echi chipangi. Njavethzikile manene kukwatha nanga imo ya kuje ku mutambela vathzivuke vuthunga.”

Kethi voshe mu vikungulukilo vyokwo ku mutambela vathele kukambulwila kulako. Oloni voshe, kwambatethelela na tukulukathzi valifwitile kwambulwila mu chitingitingi chavo. Ngechi mu 2017, hafu ya nambala ya vanu voshe va muje mu vimbongi vitatu vakungulukile ku Chanukitho. Kwoshe kutuli, ‘tuli na vipangi vyavingi mu chipangi cha Mwene.’—1 Koli. 15:58.