LISHIKO lya Mosesa lyatavethele vanu kulithinga ku mesho a Njambi mu ngila yaivwa. Oloni Vayunda va mu thimbu ya Yesu vamwene kulithinga ngwe mbilo lika, cho vakele na kulithinga ha chuma choshe choshe chivendeka. Vakele na kulinga ngocho mangana vamwethe ngwavo vyuma vivendeka vinapu vya vuthunga. Oloni Yesu wavindikile kulithinga. Mukemwo wavalongethele ngwendi: “Kwendeka kweni kupwe ‘Eyo’ nambe ‘Embwe.’”—Mateo 5:33-37; 23:16-22.

Livulu lya Theological Dictionary of the New Testament, nambe ngwetu lya Talmud limwetha ngwavo Vayunda vakele na kulithinga ha vyuma vyoshe vivendekele mu kushaka kumwetha ngwavo vya vuthunga. Oloni livulu lya Talmud limwetha ngwavo kuli vyuma vimo vivapandele kulithinga ku mesho a Njambi vimocho embwe.

Kethi Yesu lika wamwene ngwendi kulinga ngocho kwapwile kwakuvi. Chakumwenako, Flavius Josephus muka-kulilongetha viñanda vya kuthañulu wendekele ha ka chivunga kamo ka Vayunda ngwendi: “Vakevo kuvethi kulithinga mwafwa vamona ngwavo kulinga ngocho kwapwa kwendeka makuli. Cho munu uje wakele na kulithinga ha vyuma vyoshe vyendekele vamumwene kupwa muka-makuli.” Livulu limo lya Vayunda livatumbula ngwavo Wisdom of Sirach, nambe ngwetu Ecclesiasticus (23:11) nalyo lyendekele ngwalyo: “Munu muka-kulithinga vya makuli wapwile muka-vuvi.” Ngechi Yesu wavindikile kukala na futithi ya kulithinga. Nga twapwa vaka-vuthunga, cho tunapande kwendeka lika vuthunga na mbunge yetu yoshe kethi kulithinga ha vyuma vimo embwe.