YOSEFA WA KU ALAMATIYA kathzivukile mwawanene ndthzili ya kuya kuli nguvulu wa Valoma na kulomba lithetha. Pontiyu Pilato wapwile munalume wa vutenu manene. Kwatondekele munu wa kuthimpa akalombe lithetha kuli Pilato mangana muvila wa Yesu vakauthsinde mu kathingimiko. Nameme Yosefa walishoshomwenene, oloni vyuma kuvyalingiwile ngwe mwathinganyekelele. Omwo Yosefa walombele Pilato ngwendi akathsinde muvila wa Yesu, vamutavethele kulinga ngocho. Yosefa waile kuje kuvashukikilile Yesu, nameme wakele mu vuthiwa vwakama.—Mako 15:42-45.

• Yosefa wa ku Alamatiya wapwile iya?

• Likwatathano muka lyakele mukati ka Yesu na Yosefa wa ku Alamatiya?

• Vika vinenetha ngwavo ñanda yendi imithzivithe kuvwaha kuitanda?

Mukanda wa Mako watumbula Yosefa ngwavo “wapwile wa kathingimiko mu Munga yavo,” ije nkuta yakele na kutwamenena vyuma vyoshe ha thimbu oyo. (Mako 15:1, 43) Yosefa wapwile ntwama, cho echi chanenethele ngwavo nguvulu wa Valoma amwane lithetha. Yosefa wapwile lalo munalume wa kufuka.—Mateo 27:57.

Vaka-munga vathzindile manene Yesu, cho vayongwele kumuthsiya. Oloni Yosefa ikeye wapwile “munalume wamuvwa wa kathingimiko.” (Luka 23:50) Yosefa kalifwile ngwe vaka-munga vamo, mwafwa ikeye wapwile wa kulongwa na kwononoka mashiko a Njambi. “Wavandamenene kwija kwa Vumwene vwa Njambi,” cho hamo chikecho chamulingithile apwe ndongethi ya Yesu. (Mako 15:43; Mateo 27:57) Watolililile ku viñanda vya Yesu mwafwa wavimwene ngwendi vyapwile vya vuthunga.

Mukanda wa Yowano 19:38 ngwawo Yosefa “wapwile ndongethi ya Yesu, oloni wachilingile mu vushweke, omwo wathzivile lyova lya vaka-kushwana va Vayunda.” Vyuma muka vyamuthzivithile lyova? Wathzivukile vya vutumbe vwa Vayunda vwa kushaka kuthsiya Yesu na vithinganyeka vyavo vya kushaka kusheka munu mu sinangonge uje akulahela kuli Yesu. (Yowa. 7:45-49; 9:22) Munu ivashekele mu sinangonge vamuthzindile na kujeneka kulikwatathana nendi na kumwambata ngwe munu weka. Echi chikecho chalingithile Yosefa ajeneke kulimwetha ku mbunga ngwendi nendi wapwile ndongethi ya Yesu. Ngwe walimwethele ku mbunga ngwe vamutundithile ha chitwamo na kumushaula.

Yosefa kethi ikeye lika wapwile ndongethi ya Yesu wa mu vushweke. Mukanda wa Yowano 12:42 ngwawo: “Vaka-kushwana vavangi va Vayunda vakulahelele kuli Yesu, oloni omwo lyova lya Vafaliseo, kuvathele kuvyendeka chitona mesho, ngechi vene, kutewa vavasheka mu sinangonge.” Mukwavo lalo uje wakele muchitanga chakulifwa wapwile Nikondemo uje wapwile membala wa munga ya Vayunda.—Yowa. 3:1-10; 7:50-52.

Oloni Yosefa ikeye wapwile ndongethi ya Yesu wa mu vushweke. Kulinga ngocho kwapwile mulonga, mwafwa Yesu wendekele ngwendi: “Woshe akanjitava ku mesho a vanu, nange lalo njikamutava ku mesho a Tate ali mwilu. Oloni woshe akanjivyana ku mesho a vanu, nange lalo njikamuvyana ku mesho a Tate ali mwilu.” (Mateo 10:32, 33) Yosefa kavyanene Yesu nambe kulimwetha ku mbunga ngwendi wapwile ndongethi yendi. Neni mukemwo mumukalingi ndi?

Mbimbiliya inendeka ngwayo, Yosefa kemanenene vutumbe vwa vaka-munga ya Vayunda vwa kushaka kuthsiya Yesu. (Luka 23:51) Vanu vamo lalo ngwavo, Yosefa  kakeleko ha litangwa livathompele Yesu. Yosefa kalithzivile mwamuvwa ha kujeneka kuthompa mu vuthunga kwa vaka-munga ya Vayunda. Oloni kathele kulingaho chimo.

Ha thimbu ivathsiyile Yesu, Yosefa wathimpile na kulyangwila kupangela hamo na vaka-kukavangeya Yesu. Ku mukanda wa Mako 15:43 vanendekako vyuma vyangwile kulinga. Vanendeka ngwavo: “Wathimpile waile kuli Pilato na kulomba muvila wa Yesu.”

Chasholoka ngwe Yosefa kwakele ha thimbu yathsile Yesu. Wathzivukile ngwendi Yesu nathsi laja te Pilato kanda athzivuke ngocho. Ngechi omwo Yosefa walombele muvila wa Yesu, nguvulu “walikomokelele ha kuthziva ngwavo Yesu nathsi laja.” (Mako 15:44) Ngechi omwo Yosefa walimwenenene mwathsililile Yesu na kayando, kwamulingithile alyangwile kupwa muka-kumukavangeya. Yosefa kakwatakwatele lalo ku mathinde. Kapwile lalo ndongethi ya Yesu wa mu vushweke.

Vayunda vavashikile kuthsinda munu uje ivanathsiyi thimbu kanda litangwa litoke. (Kwitu. 21:22, 23) Oloni vithimbu vimo Valoma vakele na kuthethza vivimbi vya vanu vavashukikile ha miti nambe kuvithsinda mu vimbumbo. Oloni evi kethi vikevyo vyakele na kuthinganyeka Yosefa. Omwo Yosefa wakele kuyehi na kuje kuvashukikile Yesu, Yosefa wachokwele mbumbo mu limanya muje te kanda vathsindemo munu. Kujeneka kuthsinda munu muje mu mbumbo kwamwethele  ngwavo Yosefa watundile ku Alamatiya * na kuya ku Yelusalema, cho lalo ije mbumbo yapandele kupwa ya vaka-nanga yendi. (Luka 23:53; Yowa. 19:41) Kuthsinda Yesu mu mbumbo ya Yosefa ije te kanda vathsindemo munu kwamwethele ngwavo Yosefa wapwile muka-kwana, cho washulithilile vupolofweto vwakukundama kuli Mesiya vuje vwendeka ngwavo vakamuthsinda hamo na “vaka-kufuka.”—Isaya 53:5, 8, 9.

Mu mikanda iwana ya Viñanda Vyavivwa vanathonekamo ngwavo hanima ya kutunditha muvila wa Yesu ha chiti, Yosefa wambatele uje muvila na kuwuthzengela ha nanga yaiha ya linyu, cho waulangekele mu mbumbo yendi. (Mateo 27:59-61; Mako 15:46, 47; Luka 23:53, 55; Yowa. 19:38-40) Munu ivanendeka ngwavo wakwathele Yosefa, wapwile Nikondemo, uje wanenele mathzi a kunika lwengo lwaluvwa. Kutwatha kwendeka ngwetu ava vanalume va vulemu vambatele chivimbi likalyavo. Mpamo vangamba vavo vakevo vambatele chije chivimbi na kukachithsinda. Nameme vapangethele vangamba vavo, oloni chipangi chivalingile ava vanalume chapwile cha theho. Munu woshe uje wakwatele chivimbi wapwile wa kujwala ha matangwa 7, cho chuma choshe chakwatele chapwile cha kujwala. (Kula. 19:11; Hanga. 2:13) Kukwata chivimbi kwalingithile vanu vajeneke kukala hamo na vakwavo ku vilika vyoshe vya Pasovala ha chalumingo cha mutunu. (Kula. 9:6) Kuthsinda Yesu kunethi kulingithile vavuthamba va Yosefa vamuyengule. Oloni ha thimbu eyi walyangwilile kuthsinda Yesu mu kathingimiko na kulisholola ku mbunga ngwendi wapwile ndongethi ya Kilisitu, nameme kulinga ngocho kwathele kumunenela vukalu.

Munima ya kuthsinda Yesu, Yosefa wa ku Alamatiya kuvamwendekele lalo mu Mbimbiliya, ngechi vanu vanatha kulihula ngwavo: Vika vyalingithile ngwavo vajeneke kumutumbula lalo mu Mbimbiliya? Kututhzivuka. Oloni kwetheketha na vyuma vitunathimutwiya, chasholoka ngwe ou munalume wakulisholwele ku mbunga ngwendi wapwile ndongethi ya Kilisitu. Cho lalo tunamono ngwetu wathimpile na kulinga vyuma vyathzivukile ngwendi vinethi kumukoveletha mu vukalu. Echi chamwethele ngwavo wakele na likulahelo.

Eyi ñanda inena chihula cha theho chije tunapande kuthinganyekethethaho: Kuma vyuma vya kufwa ngwe vulemu na vipangi na vufuko na chithzemo chetu kuli vaka-nanga yetu nambe ndthzili ya kulyangwila vya kulinga vyatha kutwonowetha kulikwata vuthamba na Yehova ndi?