1. Tunapande kumona vati likulahelo lya vaka-Kilisitu?

LIKULAHELO lya vaka-Kilisitu lyapwa chifwa cha theho. Vanu vamo kuvethi nalyo. (2 Tesa. 3:2) Oloni, Yehova nana muka-kumulemetha umo na umo theteko ya ‘likulahelo.’ (Loma 12:3; Ngala. 5:22) Vaje vali nalyo vanapande kukandelelako manene.

2, 3. (a) Vivethzikitho muka vyatha kuwana munu uje akulahela? (b) Tuthimutwiya ha vihula muka?

² Yesu Kilisitu wendekele ngwendi Ishe wa mwilu akanene vanu kuli ikeye kwitila muli Munendi. (Yowano 6:44, 65) Munu uje amwetha likulahelo muli Yesu vatha kumuthambetha ku vuvi vwendi. Nga munu vanamuthambetha, cho atha kulikuwa vuthamba na Yehova myaka yoshe. (Loma 6:23) Vika twalingile mangana tuvethzike ngocho? Ha kupwa vaka vuvi twapandele lika kuthsa. (Myatho 103:10) Oloni Yehova wamwene vuvwa muli yetu. Omwo ya kutetela kwendi kwakama, natuleke muthzimbu wauvwa. Ngechi twashangumukile kukulahela muli Yesu na kukala na lilavelelo lya kukayoya myaka yoshe.—Tandeni 1 Yowano 4:9, 10.

 ³ Oloni kukulahela kwapwa kuka? Kwapwa lika kutava vyuma vyanatukulahetha Njambi ndi? Cho lalo tunapande kumwetha likulahelo lyetu mu vingila muka?

4. Vika twendekela ngwetu kukulahela kukwapwile lika kuthzivithitha chuma? Lumbununeni.

⁴ Kukulahela kukwapwile lika kuthzivithitha viyongola vya Njambi. Kukekwo kunapande kushongangeya munu alinge vyuma mwaya chithzango cha Njambi. Vaje vanakulahela ngwavo Njambi akovola vaka-kukulahela, vakalekeko vakwavo muthzimbu wauvwa. Kapositolo Paulu walumbunwine ngwendi: “Nga ulitavela ngwove Yesu ikeye Mwene na kukulahela [mu mbunge yove] ngechi Njambi wamuthangwile ku vathsi, ukovoka. Omwo a kukulahela kwetu mukemwo vanatupwitha vaka-vuthunga ku mesho a Njambi, ha kulitavela kwetu mukemwo tunovoka.”—Loma 10:9, 10; 2 Koli. 4:13.

5. Mwafwa vika likulahelo lyapwa lya theho, cho twatha kutwalelelaho vati kulikanyametha? Endekeni chakumwenako.

⁵ Chili vene, nga kutukala na likulahelo lya kukanyama, kutwatha kukalikuwa mwonyo wa myaka yoshe mu kaye kakaha ka Njambi. Likulahelo lyetu lyashaka kulikanyametha thimbu yoshe ngwe nemo muyatonda kuishangelela thimbu yoshe. Nemo ya kuyoya yalithethza na ije ya kupanga, ikeyo ikatenguluka. Nemo ya kuyoya yatha kujujwama nga kumuishangelela, oloni nga muishangelela thimbu yoshe, isholoka mwamuvwa. Nga mulikela kuishangelela, nemo ije yasholoka mwamuvwa yatha kuthsa lalo. Na likulahelo mukemwo mulyafwa. Nga kutulikanyametha, lyatha kuthzeya na kunyonga. (Luka 22:32; Heve. 3:12) Oloni nga twaka manene mbunge ku likulahelo lyetu, cho litwalelelaho kuyoya na “kukola,” cho lalo tupwa “vaka-kuthungama mu kukulahela.”—2 Tesa. 1:3; Tito 2:2.

6. Mukanda wa VaHevelu 11:1 walumbununa likulahelo mu vingila muka vivali?

⁶ Likulahelo valilumbununa mu Mbimbiliya ku mukanda wa VaHevelu 11:1. (Tandeni.) Likulahelo lyemana ha vyuma vivali vije kanda tumone: (1) “Vyuma vije vituli na kulavelela”—evi vinatha kwambatethelela na vyuma vya kulutwe vivanatukulahetha vije kanda tumone vya kufwa ngwe kunyongetha vuvi vwoshe na kwija kwa kaye kakaha. (2) “Vyuma vije kanda tumone.” Lijwi lya chiNgiliki livananungulula aha ha mukana ngwavo “vukaleho vumwetha mwamuvwa,” lilumbununa vukaleho vwa vuthunga ha vyuma vije kanda tumone, vwa kufwa ngwe vukaleho vuje vumwetha ngwavo Yehova Njambi na Yesu Kilisitu na tungelo kuvakala na vyuma vi vuli na kulinga Vumwene vwa mwilu. (Heve. 11:3) Twatha kuthzivuka vati ngwetu likulahelo lyetu lili na kuyoya, cho tutava vyuma vivanendeka mu Lijwi lya Njambi vije kanda tumone? Twatha kuthzivuka ngocho nga tukendeka na kulinga vyuma vije vimwetha ngwavo tuli na likulahelo lya vuthunga.

7. Mwanja wa Nowa utukwatha vati tuthzivithithe vikulumbununa kukala na likulahelo? (Kengeni chikupulo ha liputa 26)

⁷ Ku VaHevelu 11:7 vanendekako vya likulahelo lya Nowa uje “wathzivile kunangula kwa Njambi ha vyuma vya kulutwe vije kathele kumona. Wononokele, ngechi washongele vwato muje ikeye na vana vendi vovokelele.” Nowa watungile lije livwato lyakama mwafwa wakele na likulahelo. Hamo vanu vaje valyatele nendi vamwihwile vyakele na kutungila vwato vwakama ngocho. Nowa wolokele lika na kuvaleka ngwendi vatale lika vyavo ndi? Embwe. Likulahelo lyendi lyamulingithile ambulule mu kuthimpa na kunangula vakwavo vya kuthompa kwa Njambi. Mpamo Nowa wavalekele majwi amulekele  Yehova uje wendekele ngwendi: “Njayongola kuthzilula vanu voshe. Njikavanyongetha voshe hamo lika na kaye, omwo kaye kanashulu na vilinga vyavo vyavivi. . . Njikatuma livathzi lyakama hano hathi mu kunyongetha vyoshe vije viyoyaho. Vyuma vyoshe vili hano hathi vikathsa.” Wavalekele lalo vyamushikile Njambi kulinga mangana ovoke ngwendi: “Ukakovela mu vwato.” Ngechi Nowa, wamwethele likulahelo lyendi omwo “wambulwile vuthunga.”—Kusha. 6:13, 17, 18; 2 Petu. 2:5.

8. Majwi a ndongethi Yakomba a kuhwiminina anamwetha ngwavo likulahelo lya vuthunga lya vaka-Kilisitu linapande kufwa vati?

⁸ Mukanda wa Yakomba vauthonekele omwo Paulu wamanethele kuthoneka vililumbununa likulahelo. Ngwe muje wamwethele Paulu, Yakomba nendi wamwethele ngwendi likulahelo lya vuthunga lya vaka-Kilisitu kulyemanene lika ha kutava vyuma vimo, oloni lyemana ha vipangi. Yakomba wathonekele ngwendi: “Njileke vatijo munu atha kupwa muka-kukulahela kujeneka vipangi. Yange njikumwetha kukulahela kwange ha vipangi vyange.” (Yako. 2:18) Yakomba watwaleleleho kumwetha kulithethza kuli mukati ka likulahelo lya vuthunga neli lya makuli. Vandemone vatava ngwavo Njambi kwakala, oloni kuvakele na likulahelo lya vuthunga. Oloni vaketheka muvathela mwoshe kwonowetha viyongola vya Njambi. (Yako. 2:19, 20) Yakomba  wendekele hali munu mukwavo lalo wa kuthañulu uje wamwethele likulahelo ngwendi: “Vatijo kukulwila yetu Avilahama vamupwithile muka-vuthunga ku mesho a Njambi? Echi chapwile cha vilinga vyendi.” Cho ha kushaka kukanyametha thimpi ya kumwetha ngwendi likulahelo linapande kusholola vipangi, Yakomba wendekele lalo ngwendi: “Ngechi vene nga muvila kuwethi na mundthzindthzime [kuyoya], cho unathsi, na kukulahela lalo nga kukwethi na vilinga cho kunathsi.”—Yako. 2:21-23, 26.

9, 10. Kapositolo Yowano natukwatha vati kuthzivithitha theho ya kukala na likulahelo?

⁹ Munima ya myaka ya kutuvakana 30, kapositolo Yowano wathonekele Ñanda yendi Yaivwa na mikanda itatu. Vati, nendi wendekele vikulumbununa kukala na likulahelo lya vuthunga lya vaka-Kilisitu ngwe muvalingile vakwavo vaka-kuthoneka Mbimbiliya ndi? Mu kulithethza na vaka-kuthoneka Mbimbiliya vakwavo, ikeye wapangethele lijwi lya chiNgiliki lije livakanungulula thimbu imo ngwavo “kukulahela.”

¹⁰ Chakumwenako, Yowano wendekele ngwendi: “Woshe akulahela kuli Mwana ali na mwonyo wa myaka yoshe, woshe avyana Mwana kakala na mwonyo, oloni vukalu vwa Njambi vukala hali ikeye.” (Yowa. 3:36) Likulahelo lya vaka-Kilisitu linambatethelela na kwononoka mashiko a Yesu. Yowano welukilile kwendeka majwi a Yesu aje amwetha ngwavo tunapande kutwalelelaho kukala na likulahelo.—Yowa. 3:16; 6:29, 40; 11:25, 26; 14:1, 12.

11. Twatha kumwetha vati ngwetu twakandelela ha kuthzivuka vuthunga?

¹¹ Twakandelelako manene kuli Yehova uje napangetha sipilitu yendi ya kujela mu kutujombolwela vuthunga na kutukwatha tukulahele muthzimbu wauvwa. (Tandeni Luka 10:21.) Tunapande kutwalelelaho kukandelela kuli Yehova omwo natushwenyetha kuli ikeye na kuli Munendi, “uje kukulahela kwetu kunemana.” (Heve. 12:2) Tunapande kukanyametha likulahelo lyetu kwitila mu kulombela na kulilongetha Lijwi lya Njambi mangana tumwethe kukandelela ku kutetela kwakama ngocho.—Efeso. 6:18; 1 Petu. 2:2.

12. Tunapande kumwetha likulahelo lyetu mu vingila muka?

¹² Tunapande kutwalelelaho kukulahela vyuma vyanatukulahetha Yehova. Tunapande kulinga ngocho mu vingila vije vivatha kumona na vakwetu. Chakumwenako, tukambulula vya Vumwene vwa Njambi na kupanga chipangi cha kupwitha vanu kupwa vandongethi. Cho lalo tukalingi “vuvwa kuli munu na munu, vunene vene kuli vaje vanakundama ku nanga yetu mu kukulahela.” (Ngala. 6:10) Tukapanga lalo na ndthzili mu ‘kushulula kuyoya kwa vunu vwa laja hamo na vilinga vyavwo,” na kulinyungilila ku vyuma vije vyatha kututhzeyetha ku sipilitu.—Kolo. 3:5, 8-10.

13. “Kukulahela kuli Njambi” kwapwa kwa theho vati? Kunalifu na vika? Mwafwa vika?

¹³ Mbimbiliya ngwayo: “Na umo wahi atha kuvwaheleletha Njambi ha Kujeneka kukulahela, omwo uje aija kuli Njambi napande kukulahela ngechi Njambi kwali na ikeye muka-kwana chikandelela kuli vaje vali na kumushakethzeka.” (Heve. 11:6.) Lijwi lya Njambi limwetha ngwavo “kukulahela kuli Njambi” kwapwa “luvula” lwanapande kujala munu mangana atwaleleleho kupwa muka-Kilisitu wa vuthunga. (Heve. 6:1) Nga muka-Kilisitu najala olwo luvula napande “kuvwethzelela” vifwa vikwavo vya theho ku “kukulahela” kwendi mangana ‘akale mu chithzemo cha Njambi.’—Tandeni 2 Petulu 1:5-7; Yunda 20, 21.

14, 15. Chifwa muka cha theho manene hakati ka chithzemo na likulahelo?

¹⁴ Vaka-Kilisitu vaje vathonekele Mbimbiliya vamwethele theho ya likulahelo omwo  valitumbwile lwalwingi mu vithoneka vyavo. Kukulahela chikecho lika chifwa cha vaka-Kilisitu chivanendeka lwalwingi. Echi chilumbununa ngwavo kukulahela chikecho lika chifwa cha theho cha vaka-Kilisitu ndi?

¹⁵ Omwo Paulu wethekethele likulahelo ku chithzemo, wendekele ngwendi: “Nga Njili na kukulahela kwoshe ngechi njathe kushwenyetha minkinda, oloni nga kunjethi na chithzemo njinapu wa ngocho.” (1 Koli. 13:2) Yesu wamwethele ngwendi kuthzema Njambi kwapwa kwa theho omwo wakumbulwile echi chihula: “Mulongithi lishiko mukajo lyakama ku Mashiko?” (Mateo 22:35-40) Chithzemo chikecho chapwa chifwa cha theho manene kutuvakana vifwa vyoshe vya vaka-Kilisitu, kwambatethelela na likulahelo. Mbimbiliya ngwayo: ‘chithzemo chikakulahela’ vyuma vyoshe. Chikakulahela vyuma vya vuthunga vyanendeka Njambi mu Lijwi lyendi.—1 Koli. 13:4, 7.

16, 17. Chithzemo na kukulahela vanavikanyametha vati mu Vithoneka? Chifwa muka chakama ha vifwa evi, cho mwafwa vika?

¹⁶ Vaka-Kilistu vaje vathonekele Mbimbiliya vendekele lwalwingi ha likulahelo na chithzemo mwafwa vyapwa vifwa vya theho. Vithimbu vyavingi vakele na kuvitumbwila hamo mu mukana umo. Paulu washikile vandolome vendi ngwendi ‘vathzale kukulahela na chithzemo ngwe ntelo ya ha nulo.’ (1 Tesa. 5:8) Petulu wathonekele ngwendi: “Yeni mwamuthzema, nambe kumwamumwene [Yesu], mwamukulahela nambe ha thimbu ino kumwamumwene.” (1 Petu. 1:8) Yakomba walekele vandolome vendi va kuvwavetha ngwendi: “Njambi wangwile tuhutu mu kaye kano ngechi vapwe vaka-kufuka mu kukulahela, cho vakashwane vumwene vuje vwakulahethele kuli vaje vamuthzema.” (Yako. 2:5) Yowano wathonekele ngwendi: “Echi chikecho chanashiki [Njambi] ngechi tukulahele mu lithzina lya Munendi Yesu Kilisitu, cho tuli na kulithzema umo na mukwavo.”—1 Yowa. 3:23.

¹⁷ Nameme likulahelo lyapwa lya theho, oloni theho yechi chifwa ikahwa omwo vikulahetho vya Njambi vikalishulithilila nomwo tukamona vyuma vitwalavelelele. Oloni kutukalikele kuthzema Njambi na vakwetu vanu. Mukemwo Paulu nathoneka ngwendi: “Ngechi vene, ololo, vyuma evi vitatu vinathala, kukulahela, chinyangavili, na chithzemo, cho chinatuvakana ku vyuma vyoshe evi chinapu chithzemo.”—1 Koli. 13:13.

18, 19. Vyuma muka vimwetha ngwavo vanu vavangi vakamwetha likulahelo matangwa ano, cho iya navakwatha?

¹⁸ Matangwa ano, vanu va Yehova vali na kumwetha likulahelo mu Vumwene vwa Njambi vuvanashimbika. Echi chinalingitha palandaisi ya ku sipilitu ya mu kaye mwoshe ikole, mukemwo omu mu palandaisi muli vanu va kutuvakana 8 milyoni. Mukemwo mwakala vushuka vwavwingi vwa sipilitu ya Njambi. (Ngala. 5:22, 23) Evi vyuma vinamwetha mwamuvwa likulahelo na chithzemo cha vuthunga cha vaka-Kilisitu.

¹⁹ Kukwethi munu atha kwathiwitha evi vyuma kulingiwa. Njambi yetu ikeye natukwatha. Vyuma vivanondangana vanu vinapu “chithzivukitho cha vumpau vwa Shukulu Kalunga ku myaka yoshe.” (Isaya 55:13) Vunapu “vwana vwa Njambi” ngechi ‘twovoke ha kukulahela.’ (Efeso 2:8) Palandaisi yetu ya ku sipilitu ikatwalelelaho kukola kweta noho mu kaye mwoshe mukashula vanu va kulumbunuka na kuthungama na kuvwahelela vaje vakashangathzala lithzina lya Yehova ku myaka yoshe. Tutwaleleniho kukulahela vyuma vyanatukulahetha Yehova.