1, 2. (a) Muka-Kilisitu atha kulinga vati nga vyuma vitenguluka mu kuyoya kwendi? (b) Kwetheketha na mukanda wa Myatho 131 vithinganyeka muka vyatha kutukwatha tutwaleleleho kupwa va kushuvuluka?

LLOYD na Alexandra vapangelele ha Mbetele ha myaka ya kutuvakana 25. Muvavalekele ngwavo vatunda ha Mbetele, valithzivile vuthiwa ha kulivanga. Lloyd ngwendi: “Njethzililile manene kukala ha Mbetele, cho njathzemene chipangi change. Ha kulivanga njathzivithithile vinjatundilile ha Mbetele, oloni munima ya vyalumingo na vingonde njashangumukile kulithziva ngwe vanjiyengwile. Njakele na kulinga thimbu eyi njashuvuluka, thimbu ikwavo cho vuli vwanjiwana.”

² Nga vyuma vitenguluka mu kuyoya twatha kuthinganyeka vyavingi na kuthzeya. (Vithi 12:25) Kunatha kutukaluwila kuthzivithitha nga vyuma vitenguluka. Vika vitukwatha tupwe va ‘kuthimpa na kukala mu kwoloka’ nga tuliwana mu vukalu vwa chifwa echi. (Tandeni Myatho 131:1-3) Tuchimoneni vyuma  vyakwathele vanu va kuthañulu nevi vinakwatha vanu va matangwa ano vatwaleleleho kupwa va kuvwahelela nameme vyuma vyatengulukile.

3. Vukalu muka vwaliwanene navwo Yosefa?

³ Yosefa wakele na myaka 17 vandolome vendi vaka-chipululu muvamulandethele mu vundungo. Yosefa ikeye mwana ivathzemene manene kuli Ishe. (Kusha 37:2-4, 23-28) Yosefa wakayandelele mu Ingito kulako na Ishe ha myaka 13. Wakapwile ndungo, cho vakamukutile. Vika vyakwathele Yosefa athimpe?

4. (a) Yosefa wakele na kuthinganyeka vika mwakele mu kamenga? (b) Yehova wakumbulwile vati lilombelo lya ?

⁴ Hamo ha thimbu yakele mu kamenga, Yosefa wakele na kuthinganyeka ha vivethzikitho vya Yehova. (Kusha 39:21; Myatho 105:17-19) Vilota vya vupolofweto vyalotele hamo vyamulingithile akulahele ngwendi Yehova wamwaka mbunge. (Kusha 37:5-11) Hamo ha vithimbu vyavingi walombelele kuli Yehova na mbunge yendi yoshe. (Myatho 145:18) Yehova wakumbulwile lilombelo lya Yosefa ha kumukulahetha ngwendi ‘akala hamo nendi.’—Vili 7:9, 10. *

5. “Kwoloka kwa Njambi” kutukwatha vati tutwaleleleho kumupangela?

⁵ Nameme tuliwana na vukalu ano matangwa, twatha kulimwena mukukatuthzembelekela “kwoloka kwa Njambi” na kunyunga vimbunge vyetu mwamuvwa. (Tandeni Filipu 4:6, 7) Ngechi, ha thimbu itulithziva kuthzeya, tulombeleni kuli Yehova, cho kwoloka kwendi kutukwatha tutwaleleleho kumupangela. Tuchithimutwiyeni ha myanja ya vandolome na vandokathzi vamo mangana tumone vuthunga vwowo majwi.

6, 7. Kuleka Yehova vukalu vwetu kutukwatha vati tukale mu kwoloka? Endekeni chakumwenako.

⁶ Ryan na Juliette muvavalekele ngwavo chipangi chavo cha vupainiya vwa kulitila chinahu valithzivile vuthiwa. Ryan ngwendi: “Oho vene twalekele Yehova vukalu vwetu. Eyi ikeyo yapwile thimbu ya kumwetha ngwetu twakulahela Njambi. Vavangi mu chikungulukilo vapwile vavaha, ngechi twalombelele kuli Yehova ngwetu atukwathe tuvakele mwanja wauvwa wa likulahelo.”

⁷ Yehova wakumbulwile vati lilombelo lyavo? Ryan ngwendi: “Mutwamanethele lika kulombela, vuthiwa na vithinganyeka vya kuhenga vitwakele navyo vyahwile. Kwoloka kwa Njambi kwanyungile vimbunge na vithinganyeka vyetu. Twanangukile ngwetu nga tutwalelelaho kukala na vithinganyeka vyavivwa, cho atwalelelaho kutupangetha.

8-10. (a) Sipilitu ya Njambi yatha kutukwatha vati nga tuli mu vishoti? (b) Yehova atha kutuvethzikitha vati nga tutwalelelaho kumupangela nameme vyuma vikaluwa?

⁸ Sipilitu ya Njambi yatha kututakametha na kutwanukitha vithoneka vije vitukwatha tuthzivuke vyuma vya theho manene mu kuyoya. (Tandeni Yowano 14:26, 27) Chakumwenako, ndolome Philip na munakathzi wendi Mary vapangelele ha Mbetele ha myaka ya kweta ku 25. Mu vingonde viwana lika vaina ya Philip na vaina ya Mary na kavushoko kavo mukwavo voshe vatokele, cho lalo vaishe ya Mary vavinjile mushongo wa ku vwongo.

⁹ Philip ngwendi: “Njathinganyekele ngwange njakele na kulikoletha, oloni kuli vimo kunjalingile. Njatandele mukanda wa Kolose 1:11 mu Kaposhi ka Kukengela ka kulilongetha.  Njanangukile ngwange kunjalikolethele mu kushula. Njapandele ‘kukakateya na kuthimpa.’ Eyi vesi yanjanukithile ngwayo nga sipilitu ya Njambi injitwamenena, ikeyo injikwatha njipwe wa kuvwahelela kethi muvyendelamo vyuma mu kuyoya kwange.”

¹⁰ Yehova wavethzikithile Philip na Mary mu vingila vyavingi mwafwa vatwaleleleho kumupangela nameme vyuma vyakaluwile. Muvatundile ha Mbetele vakawanene vaka-kulilongetha Mbimbiliya vaje vathzemene manene vuthunga, cho vashakele kulilongetha navo lwalwingi ha chalumingo na chalumingo. Mary ngwendi: “Vatuthzivithile manene kuvwaha, cho Yehova wavapangethele mu kutukwatha tumone ngwetu vyuma vikala mwamuvwa.”

11, 12. (a) Vyuma muka vyalingile Yosefa vije vyalingithile Yehova amuvethzikithe? (b) Vuvwa muka vwatundile mu kulikoletha kwa Yosefa?

¹¹ Nga vyuma vitenguluka mu kuyoya kwetu, twatha kulishoshomwena na kuthzeya. Yosefa nendi wathele kuthzeya. Oloni kalingile ngocho. Walikolethele na kulinga vyavivwa, cho Yehova wamuvethzikithile. Ha thimbu yakele mu kamenga, Yosefa wononokele ngwe mwalingile kuli Potifalo na kulinga vyuma vyoshe vyamushikile muka-kunyunga kamenga.—Kusha 39:21-23.

¹² Litangwa limo Yosefa vamwanene chipangi cha kunyunga vanalume vavali vaje vakele na kupangela ku lipela lya Mwene Falo. Muvanangukile ngwavo Yosefa ali na ngothzi, vamulekele vukalu vwavo vwoshe na vilota vya kukomoketha vivalotele. (Kusha 40:5-8) Yosefa kathzivukile ngwendi kuli vuvwa vutunda mu vyuma vyavivwa vyalinga. Nameme watwaleleleho kukala mu kamenga ha myaka ivali, oloni wapatukile mu kamenga, cho ha litangwa vene lyapatukile, vamwangwile kupwa mwata wa Mwene Falo.—Kusha. 41:1, 14-16, 39-41.

13. Vika vitunapande kulinga mangana Yehova atuvethzikithe?

¹³ Netu twatha kuliwana na vukalu vuje kutwatha kumanetha mu ndthzili yetu ngwe Yosefa. Oloni nga tulikoletha na kulinga vyavivwa, cho Yehova atuvethzikitha. (Myatho 37:5) Vithimbu vimo tukakala mu “vitanga,” oloni Paulu wendekele ngwendi kutwethi “kwombwa.” (2 Koli 4:8) Tulimwena mwamuvwa vuthunga vwowo majwi a Paulu nga twaka mbunge ku chipangi cha kwambulula.

14-16. Filipu uje wapwile muka-kwambulula wakele vati mbunge ku chipangi cha kwambulula nameme muvyatengulukile vyuma?

¹⁴ Filipu uje wapwile muka-kwambulula, natwakela mwanja wauvwa ha kwaka mbunge  ku chipangi cha kwambulula nameme vyuma vitenguluka. Hanima ya kuthsiya Setefano, vashangumukile kuyandetha manene vaka-Kilisitu mu Yelusalema. * Ha thimbu ije Filipu wakele na kulikuwa chipangi chachiha. (Vili 6:1-6) Oloni vaka-kukavangeya Kilisitu muvalishandokele, katumbamene lika ngocho na kulavelela vyuma vilingiwa embwe. Waile na kwambulula ku Samaliya mwafwa vanu vavangi vakeleko tahi kanda vathzive muthzimbu wauvwa.—Mateo 10:5; Vili 8:1, 5.

¹⁵ Filipu waile kwoshe kuje kuyamutwamenenene sipilitu ya Njambi, ngechi wamupangethele mu kulongetha vanu vuthunga. Vasamaliya vamuthzemene manene mwafwa ikeye kakele na kangu ngwe Vayunda vakwavo. Cho mbunga ya vanu “yatolililile vije vyendekele Filipu.”—Vili 8:6-8.

¹⁶ Sipilitu ya Njambi yatwalele lalo Filipu mu nganda Ashendonde neyi ya Sesaliya, muje mwalithalele manene vanu vaje kuvapwile Vayunda. (Vili 8:39, 40) Munima ya kwambulula mu Samaliya ha myaka ya kweta ku 20, vyuma vyatengulukile mu vuyoye vwa Filipu. Ha thimbu eyi wakele na nanga, cho watungile vene mu Samaliya. Nameme vyuma vyatengulukile, oloni Filipu kechelelele chipangi cha kwambulula, cho Yehova wamuvethzikithile hamo lika na nanga yendi.—Vili 21:8, 9.

17, 18. Kuthzethzama mu chipangi cha kwambulula kututakametha vati nga vyuma vitenguluka mu kuyoya?

¹⁷ Vavangi vaje vali mu chipangi cha thimbu yoshe vanalimwena ngwavo kwaka mbunge ku chipangi cha kwambulula nameme vyuma vitenguluka kukatakametha ku sipilitu. Ndolome Osborne na munakathzi wendi Polite muvatundile ha Mbetele, vathinganyekele ngwavo vawana vwathi vipangi noku kwakukala. Oloni Osborne ngwendi: “Cha luvinda, kutwawanene vwathi vipangi ngwe mutwathinganyekele.” Munakathzi wendi Polite ngwendi: “Twakele vingonde vitatu na chipangi vene chahi, cho na kambongo ketu kahwile. Twakele mu vukalu vwakama.”

¹⁸ Vika vyavakwathele valikolethe mu vukalu vwavo? Osborne ngwendi: “Kulikwatathana manene na chikungulukilo mu chipangi cha kwambulula kwatukwathele tukale na vithinganyeka vyavivwa. Twalyangwilile kuthzethzama  mu chipangi cha kwambulula, cho oku kwatushuvulwithile manene. Twatwaleleleho kushakethzeka vipangi, cho mu kwita kwa thimbu twaviwanene.”

19-21. (a) Vika vitukwatha tutwaleleleho kupwa va kuvwahelela? (b) Vuvwa muka vutundamo nga tulikoletha ha thimbu ya kutenguluka kwa vyuma?

¹⁹ Eyi myanja inamwetha ngwayo nga tulikoletha ha thimbu ya vukalu na kukulahela Yehova, cho tutwalelelaho kupwa va kuvwahelela. (Tandeni Mika 7:7) Twatha kunanguka ngwetu kuli vuvwa vuli mu kulithzilitha yoyethi yaiha. Polite itunavanga kwendeka wendekele ha vyuma vyaliwanene navyo ngwendi: “Kutengulula chipangi change kwanjikwatha njithzivithithe mwamuvwa vyalivungila mu kukulahela manene Yehova nga vyuma vikaluwa. Vuthamba vwange nendi vwakanyama.”

²⁰ Mary itunendeka, achili na kuvinjitha vaishe, oloni ali na kulinga vupainiya. Wendekele ngwendi: “Njalilongetha ngwange nga njili mu vukalu, njinapande kukwata mbunge na kulombela na kuthethzela Njambi chipangi. Njalilongetha ngwange kwaka vukalu vwange mu mavoko a Yehova kwapwa kwa theho manene thimbu yoshe.”

²¹ Lloyd na Alexandra vatunendekele ku maputukilo ngwavo kutenguluka kwa vuyoye vwavo kwethekele likulahelo lyavo mu ngila ije kuvathinganyekele. Oloni vendekele lalo ngwavo: “Vyetheko, vikatukwatha tumone indi tuli na likulahelo lije lyatha kututakametha na kututhzembeleka ha thimbu ya vukalu. Cho lalo vikatulingitha tupwe vanu va kuhya ku sipilitu.”

22. Njambi atha kutuvethzikitha vati nga tulikoletha mu vukalu?

²² Nga vyuma vitenguluka mu kuyoya mwafwa ya kutwana chipangi cheka mu munga ya Njambi nambe mwafwa ya mishongo nambe kukala na nanga, kethi twivale ngwetu Yehova watwaka mbunge, cho atukwatha ha thimbu inapande. (Heve 4:16; 1 Petu 5:6, 7) Ha thimbu ya vukalu kwapwa kwa theho manene kulikoletha. Lekeni Ishweni wa mwilu vukalu vweni kwitila mu lilombelo, cho thethzeni ovwo vukalu mu mavoko endi. Nga mulinga ngocho, cho mwatha kutwalelelaho kupwa va kuvwahelela nameme vyuma vitenguluka.