Nga mushaka kuthzivuka thimbu, mulinga vati? Hamo mutala ha wachi yeni. Nga kavuthamba keni amihula thimbu, mumukumbulula vati? Kuli vingila vyavingi vya kulekelamo munu thimbu. Vingila muka?

Twendekeni ngwetu kuneti ola na minutu 30 kutunda ha twelufu ya mutanya. Mwatha kukumbulula ngweni 1:30. Kwetheketha nokwo kumwakala nomwo muvakatumbwilamo thimbu, mwatha kwendeka ngweni 13:30. Nameme vanu vakatumbula thimbu mu vingila vyavingi, oloni litangwa lyakala lika na maola 24. Ku mitambela imo thimbu ya kulifwa vaitumbula ngwavo “hafu 2” kulumbununa ngwavo kunathala minutu 30 thimbu kanda 2 kiloko yete.

Ha kupwa vaka-kutanda Mbimbiliya, mwatha kwihula ngweni: ‘Kuthañulu vanu vakele na kutumbula vati vithimbu?’ Vavitumbwile mu vingila vyavingi. Mu Vithoneka vya Chihevelu vanatumbulamo thimbu ya “mutondotondo” na “mutanya” na “mutanya mwelu” na “chingwethzi.” (Kusha 8:11; 19:27; 43:16; Kwitu 28:29; 1 Vimye 18:26) Ha vithimbu vimo vakele na kutumbula thimbu hayo.

Kuthañulu, thimbu vakele na kuithzivukila kuli vaka-kunyunga. Maneneni ku vuthsiki. Kuthañulu thimbu kanda Yesu athemuke, Vaisalele vatepele vuthsiki mu mitamba itatu. Oloni mu thimbu ya Yesu, Vayunda vatepele vuthsiki mu vithimbu viwana ngwe muvakele na kulingila Vangiliki na Valoma.

Evi vithimbu vanavitumbula manene mu Vithoneka vya Viñanda Vyavivwa. Chakumwenako, Yesu wendele ha mema ha thimbu ya “mungulu ngengu” mwaile kuli vandongethi vendi vaje vakele mu vwato. (Mateo 14:25) Mu chithimo, Yesu wendekele ngwendi: “Nga vavenya njuvo nathzivukile thimbu yakaija mwithzi, nga natumbamene na kutona ngechi mwithzi kethi atuve njuvo yendi.”—Mateo 24:43.

Yesu mwalongethele vandongethi vendi watumbwile vithimbu vyoshe viwana. Ngwendi: “Toneni, omwo kumuthzivuka thimbu ije yakeluka vavenya njuvo, nambe ku chingwethzi, nambe hakati ka vuthsiki, nambe ha vindemba, nambe ku mutondo.” (Mako 13:35) Thimbu ya kulivanga ya “chingwethzi” yashangumukile ha kulauka kwa litangwa kweta na 9 kiloko ya mangwethzi. Ya mu chivali ya “hakati ka vuthsiki” yashangumukile na 9 kiloko ya mangwethzi kutwala ha vindemba. Ya mu chitatu ya “ha vindemba” yashangumukile ha vindemba kutwala na 3 kiloko ya mutondo. Hamo ikeyo thimbu yatambekele ndemba muvakutile Yesu. (Mako 14:72) Ya mu chiwana yashangumukile “mutondotondo” kweta na ku mutondo nga litangwa linatuhuka.

Nameme vanu va kuthañulu kuvakele na viwachi, oloni vathzivukile vithimbu vya vuthsiki nevi vya mutanya.