MU KAYE koshe, tukulukathzi vathzema vipangi vyavo kuli Njambi. Tukakandelela manene ku vipangi vyavo. Ha myaka inahu kunakala kutenguluka kwa vyuma. Vakulunu va tukulukathzi vavalekele ngwavo vane vipangi vyakama kuli vakulunu va vanike. Mu ngila muka?

Vatengulwile ngwavo vantwama va kuthzenguluka na valongethi va masikola a vumwene, kuvapandele kutwala lutwe na chipangi chavo nga veta ha myaka 70. Cho lalo vakulunu vaje vanete ha myaka 80 vanapande kwana vipangi vyavo ku vakulunu va vanike, vya kufwa ngwe kukwatathana Komiti ya Munango na kukwatathana chivunga cha vakulunu. Ava vakulunu va tukulukathzi vanalingi vika hali oku kutenguluka? Vanapu va kulongwa kuli Yehova na ku munga yendi.

Ken uje wapwile muka-kukwatathana Komiti ya Munango ha myaka ya kweta ku 49 wendekele ngwendi: “Njavwahelelele manene kuthziva oku kutenguluka. Litangwa linjalombelele ngwange kunapande kukala ndolome wa mwanike apwe muka-kukwatathana,  likelyo linjathzivile oku kutenguluka. Mwalithzivililemo Ken, mukemwo muvakalithzivila tukulukathzi va kulongwa mu kaye koshe. Nameme ngocho, ha kulivanga vakalithzivi kuthzeya kamandondo, mwafwa vathzema kupangela vandolome vavo.

Esperandio uje wapwile muka-kukwatathana chivunga cha vakulunu ngwendi: “Njathzeyele kamandondo.” Oloni wendekele ngwendi: “Njapandele kukala na thimbu yaingi ya kulitolilila.” Esperandio natwalelelaho kupangela Yehova mu kulongwa, cho ali na kukwatha manene mu chikungulukilo.

Vaticho vantwama va kuthzenguluka vaje vavanana vipangi vyeka? Allan uje napu ntwama wa kuthzenguluka ha myaka 38 ngwendi: “Njalithzivile kuthzeya muvatengulwile chipangi change.” Nameme ngocho, wamwene vuvwa vuli mu kulongetha vandolome vipangi, cho natwalelelaho kupwa wa kulongwa.

Russell uje wapwile ntwama wa kuthzenguluka na mulongethi wa masikola a vumwene ha myaka 40, wathzeyele na mwevwendi. Wendekele ngwendi: “Twathzemene manene chipangi chetu, cho twamwene ngwetu tuli na ndthzili ya kuchipanga.” Russell na mwevwendi vali na kupangetha lyethzi lyavo mu kukwatha chikungulukilo chavo, cho vandolome vanavwahelela kupanga navo.

Nga kanda mulithziveho ngwe muvalithzivile vanu vatunendeka ku maputukilo, cho ñanda ili ku 2 Samwele yatha kumikwatha muthzivuke muvakalithzivila vaje vanetimo.

Anukeni Mwene Ndaviti muvamutengulukilile kuli munendi Avisalome. Ndaviti watundile mu Yelusalema na kutewela ku Mahanaime, ku ngangela ya Ndonga ya Yondao. Ndaviti na vanu vendi vakakele mu vujene. Mwanuka vyalingiwile ndi?

Vanalume vatatu va kuje ku mutambela, vavanene myela na vyakulya vya kulithethzathethza na vyeka vya kupangetha. Umo wavo wapwile Mbazilai. (2 Samwe 17:27-29) Kutengulukila kwa Avisalome mukwahwile, Ndaviti welukile ku Yelusalema, cho wamuthindikiyiye na ku Yondao. Ndaviti wamulombele ngwendi aye nendi ku Yelusalema. Nameme Mbazilai “wafukile manene,” oloni Ndaviti wamwanene vyakulya. (2 Samwe 19:31-33) Ndaviti washakele vifwa vya Mbazilai, cho washakele akale nendi mangana amunangule mwafwa wakele na myaka yaingi na lyethzi. Mbazilai wavethzikile mwafwa ngwe wapwile muka-kunangula mwene.

Oloni omwo ya kulikehetha kwendi, Mbazilai wendekele ngwendi wakele na myaka 80. Cho lalo ngwendi: “Kunjatha kuthzivuka vyakulya indi vitovala.” (2 Samwe 19:35)  Mbazilai wakele na mana mwafwa ya kuyoya myaka yaingi. Wakele na chashu cha kunangula mwamuvwa ngwe muvalingile “vanalume va vakulunu” kuli Mwene Lehovowame. (1 Vimye 12:6, 7; Myatho 92:12-14; Vithi 16:31) Mbazilai mwendekele ngwendi katha kuthzivuka vyakulya indi vitovala, hamo walumbunwine vuthzeye vwendi mwafwa ya vukulukathzi. Wathzivukile ngwendi vukulukathzi vumwonowetha kuthziva vyakulya kutovala nambe kuthziva vivendeka vanu. (Kwambu 12:4, 5) Ngechi Mbazilai walekele Ndaviti ngwendi aye na mukwenje, Cimehame, hamo muna Mbazilai.—2 Samwe 19:36-40.

Viyongola vya Mbazilai kukundama ha myaka, vinalitombola nevi vitunendeka ku maputukilo. Ngwe mwamwene Mbazilai, matangwa ano, kuvethi na kutala lika ha vuyoye na chashu cha munu umo lika. Vali na kutala ha vakulunu va kulongwa va mu kaye koshe.

Nga ava vandolome va tukulukathzi va likehetha na kwana vipangi vyavo ku vandolome va vanike, cho munga ya Yehova ikanyama omwo ili na kuya kulutwe. Mbazilai ikeye walongethele munendi, cho Paulu ikeye walongethele Timateo. Mu ngila imo lika, vandolome va kukola kakangi vakevo vakalongetha vandolome va vanike. (1 Koli 4:17; Fili 2:20-22) Ngechi, ava vandolome va vanike vanapu “vwana kuli vanu,” cho vali na “kutunga muvila wa Kilisitu.”—Efeso 4:8-12; etheketheni Kulava 11:16, 17, 29.

Vanu va Njambi vavangi mu kaye vaje vanana vipangi vyavo ku vakwavo, vatha kupangako vipangi vyeka mu munga ya Yehova.

Marco uje wapwile ntwama wa kuthzenguluka ha myaka 19 ngwendi: “Njili na thimbu ya kukwatha vanalume vaje kethi vakaleho, vaje vanambata vandokathzi va mu chikungulukilo chetu.”

Geraldo uje wapwile ntwama wa kuthzenguluka ha myaka 28 ngwendi: “Hano chilengo chetu chinapu kukwatha vaje vanathzeye na kutwamenena vilongetha vya Mbimbiliya.” Cho lalo ngwendi ikeye na mwevwendi vali na vilongetha vya Mbimbiliya vya kutuvakana 15, cho vamo vaje vathzeyele vali na kukunguluka.

Allan itunendeka ku maputukilo ngwendi: “Hano tuli na thimbu yaingi ya kwambululula. Tuli na kulikuwa kwambulwila ku mbunga na kwambululwila mu mitamba ya mingotho na vatwatunga navo, cho vavali vali na kukunguluka.”

Nga neni vanamyana chipangi cheka mu munga ya Njambi, cho kuli vingila vyavingi vimwatha kukwatha. Mwatha kupangetha lyethzi lyeni mu kukwatha vandolome va vanike vali mu chikungulukilo. Russell itunendeka ku maputukilo ngwendi: “Yehova ali na kulongetha na kupangetha vanike.” Ngechi vandolome mu vikungulukilo vali na kuwana vukwathi ku vilongetha na vunyungi vwavo.”—Kengeni chipalo cha “ Kwatheni Vakwenje Vapangethe Mwamuvwa Ndthzili Yavo.”

Nga vanamyana chipangi cheka, cho kethi muthzeye. Chipangi cheni chakutundilila kwithi ya mbunge chinakwatha vanu vavangi, cho mwatha kutwalelelaho kulinga ngocho. Vandolome vamithzema manene.

Cho lalo munathzivitha Yehova kuvwaha ku mbunge. Njambi ‘kakevala vipangi vyeni vimwalingile, nambe chithzemo chimunamwetha ku lithzina lyendi, omwo yeni mwakwathele vaka-kukulahela, cho muchili na  kuvakwatha.’ (Heve 6:10) Echi chithoneka cha kuhwiminina chimwetha ngwacho vipangi vyetu kuvikai mwangocho. Mu va theho kuli Yehova, cho katha kwivala vimunapanga nevi vimupanga vije vimuthzivitha kuvwaha.

Vaticho nga kuvatengulwile vipangi vyeni ngwe mutunendeka helu? Eyi ñanda yatha kumikwatha. Mu ngila muka?

Nga muli na kupanga na ndolome wa kukola uje ivanana chipangi cheka, cho atha kumikwatha mwafwa ali na lyethzi ha kupanga myaka yaingi. Lombeni vukwathi kuli ikeye. Nangukeni mwali na kupangethela lyethzi lyendi mu chipangi chali na kupanga.

Nga mu vandolome va tukulukathzi vaje vavanana vipangi vyeka nambe mu vandokathzi na vandolome va vanike vaje vali na kuwana vukwathi, cho anukeni ngweni Yehova wathzema vanu vendi vaje vanamupangela mu kulongwa ha thimbu yailaha.