Vavwahelela Vaje Vapangela “Njambi wa Kuvwahelela”
“Vanavethzika vanu vaje Njambi yavo ikeye Shukulu Kalunga.”—MYATHO 144:15.
MYATHO: 44, 125
1. Mwafwa vika vanu va Yehova vapwa va kuvwahelela? (Kengeni chikupulo ha liputa 17)
VAKALEHO VA YEHOVA vapwa vanu va kuvwahelela. Muvakakala ku viwano vyavo vyakama nevi vyavindondo, vakathimutwiya mu kuvwahelela na kulikuwa kujola. Mwafwa vika vapwa va kuvwahelela? Mwafwa vathzivuka Yehova, cho vali na kumupangela na kumutembwinina ha kupwa “Njambi wa kuvwahelela.” (1 Tima 1:11, NWT; Myatho 16:11) Njambi uje wapwa nthsina ya kuvwahelela, washaka ngwendi tupwe va kuvwahelela, cho akatwana vyuma vije vikatuthzivitha kuvwaha.—Kwitu 12:7; Kwambu 3:12, 13.
2, 3. (a) Kuvwahelela kwapwa kuka? (b) Mwafwa vika kunapu kwakukalu kupwa va kuvwahelela?
2 Neni mwapwa va kuvwahelela ndi? Mwatha kupwa vati va kuvwahelela thimbu yoshe? Kuvwahelela kwapwa “kulithziva mwamuvwa ku mbunge na kushuvuluka mwafwa ya kujauka na vyuma vyali navyo munu na kushaka kutwalelelaho kulithziva ngocho mu kuyoya.” Mbimbiliya imwetha ngwayo munu atha kupwa wa kuvwahelela nga vanamuvethzikitha kuli Yehova. Oloni
matangwa ano kwakukalu kupwa va kuvwahelela. Mwafa vika?3 Nga munu itwathzema athsa nambe atunda mu chikungulukilo, nambe nga vulo vwetu vuthsa nambe nga vatutunditha vipangi kwatha kutwonowetha kupwa va kuvwahelela. Vukalu vwa mu nanga na kulichokota vyatha kutwonowetha kupwa va kuvwahelela. Kutushendumuna kuli vakwetu vatukapanga navo nambe vatukakovela navo sikola na kutupaketha mwafwa ya likulahelo lyetu nambe kutukuta, kwatha kutwonowetha kupwa va kuvwahelela. Vukalu vukwavo vwatha kutwonowetha kupwa va kuvwahelela vunapu mishongo yakama na mishongo ya kujeneka kwola nambe kwombwa. Nameme ngocho, Yesu Kilisitu uje wapwa ‘Muka-kushika umo lika wa kuvwahelela,’ washaka kuthzembeleka vanu mangana vapwe va kuvwahelela. (1 Tima 6:15; Mateo 11:28-30) Mu Ñanda yendi ya ha Munkinda, Yesu wendekele vifwa vitunapande kukala navyo mangana tupwe va kuvwahelela nameme tuliwana na vukalu muno mu kaye ka Satana.
KUKANYAMA KU SIPILITU KUTULINGITHA TUPWE VA KUVWAHELELA
4, 5. Twatha kutwalelelaho vati kupwa va kuvwahelela?
4 Yesu wendekele chuma cha theho cha kulivanga ngwendi: ‘Vanavwahelela vaka-kuhutwa ku sipilitu omwo Vumwene vwa mwilu vunapu vwavo.’ (Mateo 5:3) Tumwetha vati ngwetu tuvaka-kuhutwa ku sipilitu? Nga tulilongetha Mbimbilliya na kwononoka mashiko a Njambi na kutwameka vya Vumwene vwa Njambi kulutwe. Nga tulinga ngocho, cho tupwa va kuvwahelela manene. Cho lalo tutakametha likulahelo lyetu ha vyuma vyanatukulahetha Njambi. Cho lalo vikulahetho vya mu Lijwi lya Njambi vije vikatunenela kuvwahelela vitutakametha.—Tito 2:13.
5 Tunapande kukanyametha vuthamba vwetu na Yehova mangana tutwaleleleho kupwa va kuvwahelela. Kapositolo Paulu wathonekele ngwendi: “Joleleni muli Mwene [Yehova] thimbu yoshe, njichendekamo lalo ngwange, joleleni.” (Fili 4:4) Tunapande kushakethzeka mana a Njambi mangana tulikuwe vuthamba vwetu nendi. Lijwi lya Njambi ngwalyo: “Vavethzika vanu vaje vawana mana, vaje vawana kuthzivithitha. Mana anapu ngwe muti wa mwonyo, nthsina ya kuvwahelela kwa voshe vauvumbatela.”—Vithi 3:13, 18.
6. Kupwa va kuvwahelela thimbu yoshe kunemana haka?
6 Oloni nga tushaka kutwalelelaho kupwa va kuvwahelela, tunapande kutanda Lijwi lya Njambi na kupangetha vitutanda. Yesu wamwethele theho ili mu kupangetha vitutanda omwo wendekele ngwendi: “Nga mwathzivuka vyuma evi, mukavethzika nga mukavilinga.” (Yowa 13:17; tandeni Yakomba 1:25.) Kulinga ngocho kutukwatha tukanyame ku sipilitu na kupwa va kuvwahelela thimbu yoshe. Oloni twatha kupwa vati va kuvwahelela okuni kuli vyuma vitwonowetha kupwa va kuvwahelela? Tuchithimutwiyeni vyuma vikwavo vyendekele Yesu mu Ñanda yendi ya ha Munkinda.
VIFWA VIJE VITULINGITHA TUPWE VA KUVWAHELELA
7. Vaka-kulila vatha kupwa vati va kuvwahelela?
7 ‘Vanavwahelela vaje vali na kulila, omwo Njambi akavathzembeleka.’ (Mateo 5:4) Vamo vatha kwihula ngwavo: ‘Munu atha kupwa vati wa kuvwahelela okuni ali na kulila?’ Yesu kalumbunwine vaka-kulila voshe. Vanu vaka-vilinga vyavivi navo vali na kulila mwafwa ya vukalu vuli muno mu ‘thimbu ya kukaluwa.’ (2 Tima 3:1) Oloni vakevo vakaka manene mana ku vyavo kethi kuli Yehova, mukemwo kuvatha kupwa vavuthamba vendi, cho kuvatha kupwa va kuvwahelela. Yesu walumbunwine vanu vaje vanaka mbunge ku vyuma vya ku sipilitu. Vakevo vali na kulila omwo vamona vanu vavangi vavyana Njambi na kuliyoyela muvatondela vakevo vavenya. Vathzivuka ngwavo kuvalumbunukile, cho vakathzivi kuvavala ku mbunge mwafwa ya vyuma vyavivi vinaija omwo ya kujeneka kulumbunuka. Yehova akamono vaka-kulila mu ngila yaivwa, cho akapangetha Mbimbiliya mu kuvathzembeleka mangana vapwe va kuvwahelela mu kuyoya.—Tandeni Ezekiyele 5:11; 9:4.
8. Kulikongomeka kutukwatha vati tupwe va kuvwahelela? Lumbununeni.
8 ‘Vanavwahelela vaje vaka-kulikongomeka, omwo vakaswana hano hathi.’ (Mateo 5:5) Kulikongomeka kutukwatha vati tupwe va kuvwahelela? Vanu vakatenguluka muvakalilongetha vuthunga. Hamo kunima vapwile vaka-kukenyuka na vaka-lwothzi na vaka-kutenuka. Oloni vanathzala “vunu vwavuha” na kumwetha “lyovwaovwa na ngothzi na kulilumbilitha na vuvwa na likakateya.” (Kolo 3:9-12) Ngechi, vali na kuyoya mu kwoloka na kulikwatathana mwamuvwa na vakwavo, cho vanapu va kuvwahelela. Cho lalo Lijwi lya Njambi lyavakulahetha ngwalyo “vakaswana mu lifuti.”—Myatho 37:8-10, 29.
9. (a) Vaka-kulikongomeka “vakaswana lifuti” mu ngila muka? (b) Vaje vali na “kuthziva njala na lihwila lya vuthunga” vatha kupwa vati va kuvwahelela?
9 Vaka-kulikongomeka “vakaswana lifuti” mu ngila muka? Vandongethi va Yesu va kuvwavetha vakaswana lifuti omwo vakapwa vimyene na tupilisitu muvakayula kano kaye. (Kujo 20:6) Vanu vavangi vaje kuvethi na lilavelelo lya kukayula mwilu vakevo vakaswana lifuti omwo vakayoya hano hathi myaka yoshe mu kulumbunuka na kwoloka na kuvwahelela. Cho lalo vanavwahelela mwafwa ya “kuthziva njala na lihwila lya vuthunga.” (Mateo 5:6) Njala na lihwila lyavo lya ku sipilitu vikahwa mu kaye kakaha. (2 Petu 3:13) Njambi mwakamanetha vuvi vwoshe, na vimo vyahi vikonowetha vanu kupwa va kuvwahelela.—Myatho 37:17.
10. Kukala na mema ku mbunge kulumbununa vika?
10 ‘Vanavwahelela vaje vaka-kuthzivila vakwavo mema ku mbunge, omwo na vakevo Njambi akavathzivila mema ku mbunge.’ (Mateo 5:7) Mu Chihevelu lijwi lya mema ku mbunge limbununa “kuthzivila munu ngothzi nambe kumutetela na kumwaka mbunge.” Mu ngila imo lika eli lijwi mu Chingiliki, lilumbununa kulithziva muvali na kulithzivila vaje vali mu vukalu. Oloni mema ku mbunge kuapwile lika kulithziva mwali na kulithzivila munu. Mu Mbimbiliya, lilumbununa kumwetha ngothzi.
11. Chithimo cha Kasamaliya chitulongetha vika ha kukala na mema ku mbunge?
11 Tandeni Luka 10:30-37. Chithimo chatele Yesu cha Kasamaliya chimwetha vikulumbununa kukala na ngothzi. Mema ku mbunge na kutetela vyalingithile Kasamaliya akwathe uje ivapupangele ku mapwepwe. Mwamanethele chithimo chendi, Yesu wendekele ngwendi: “Nove lalo ya ukalinge ngachije.” Oloni twatha kulihula ngwetu: ‘Nange njili na kulinga ngocho ndi? Njili na kuthzivila vanu mema ku mbunge ngwe mwa Kasamaliya ndi? Kuma njatha kumwetha ngothzi na kukwatha vaje vali na kuyanda ndi? Njatha kukwatha tukulukathzi na vifwile na vanike va mu chikungulukilo chetu vaje vithemi vavo kuvapwile Vakaleho ndi? Kuli ngila injatha ‘kutakamethelamo vaje vanathzeye’ ndi?—1 Tesa 5:14; Yako 1:27.
Teteleni vakweni, mangana mupwe va kuvwahelela (Kengeni palangilafu 12)
12. Kukala na ngothzi kutukwatha vati tupwe va kuvwahelela?
12 Kukala na mema ku mbunge kutukwatha vati? Nga tukwatha vakwetu, cho tupwa va kuvwahelela kuje kukaija mwafwa ya kwana. Cho lalo tuthzivuka ngwetu tuli na kuthzivitha Yehova kuvwaha. (Vili 20:35; tandeni Vahevelu 13:16.) Mwene Ndaviti wendekele hali muka-ngothzi ngwendi: “Shukulu Kalunga akamunyunga na kumuyoyetha, cho akavethzika mu lifuti.” (Myatho 41:1, 2) Nga tumwetha ngothzi, cho Yehova nendi atuthzivila ngothzi na kutukwatha kukayoya mu kuvwahelela myaka yoshe.—Yako 2:13.
MWAFWA VIKA “VAKA-KUJELA MU VIMBUNGE” VAPWA VA KUVWAHELELA?
13, 14. Kuvwahelela kunalikwatathana vati na kukala na mbunge ya kujela?
13 Yesu wendekele ngwendi: ‘Vanavwahelela vaje va kujela mu vimbunge, mwafwa vakamona Njambi.’ (Mateo 5:8) Nga tushaka kupwa va kujela mu vimbunge tunapande kukala na viyongola na mashungu amavwa. Tunapande kukala na vithinganyeka vyavivwa mangana tutwaleleho kulemetha lika Yehova.—Tandeni 2 Kolinte 4:2; 1 Tima 1:5.
14 Yehova wendekele ngwendi: ‘Vanavwahelela vaje vakusha vuthzalo vwavo.’ (Kujo 22:14) ‘Kukusha vuthzalo’ kulumbununa vika? Vaka-Kilisitu va kuvwavetha “vakusha vuthzalo vwavo” omwo vapwa va kujela ku mesho a Yehova, cho vakavana mwonyo wa kujeneka kuthsa na kukalikuwa kuyoya mu kuvwahelela mwilu. Mbunga yakama ya vanu vaje vali na lilavelelo lya kukayoya hano hathi navo vatha kulikuta vuthamba na Njambi. Nameme ha thimbu ino ‘vali na kukusha vuthzalo vwavo na kuvutoketha to mu maninga a Muna Manga.’—Kujo 7:9, 13, 14.
15, 16. Vaka-kujela mu vimbunge vatha “kumona Njambi” mu ngila muka?
15 Vaka-kujela mu vimbunge vatha “kumona” vati “Njambi” okuni “naumo wahi wamona [Njambi], cho ayoye”? (Kutu 33:20) Lijwi lya Chingiliki lya “kumona” linatha kulumbununa kulinga ngwe uje amona vyuma kamwene na kuvithzivithitha na kuvithzivuka. Vaje vamona Njambi na “mesho a vimbunge” vamuthzivuka na kuthzivuka mwamuvwa vifwa vyendi. (Efeso 1:18) Yesu watembwininine mwamuvwa vifwa vya Ishe mukemwo wendekele ngwendi: “Woshe uje nanjimono namono Tate.”—Yowa 14:7-9.
16 Vaka-Kilisitu va vuthunga vatha “kumona Njambi” nga vananguka mwali na kuvakwathelamo. (Yombi 42:5) Vatha kukenga na ‘mesho a vimbunge vyavo’ ha vyuma vyanakulahetha Njambi kuli vaka-kujela mu vimbunge na vaje vali na kumupangela mu kulongwa. Va kuvwavetha vamona Yehova omwo vavana chikandelela chavo cha kuthanguka na kuya mwilu.—1 Yowa 3:2.
PWENI VA KUVWAHELELA NAMEME MULIWANA NA VUKALU
17. Kwolwetha ñole kutukwatha vati tupwe va kuvwahelela?
17 Yesu wendekele lalo ngwendi: ‘Vanavwahelela vaje vaka-kwolwetha ñole.’ (Mateo 5:9) Vaka-kwolwetha ñole vapwa va kuvwahelela. Ndongethi Yakomba wathonekele ngwendi: “Vushuka vwa kuthungama vakavukunu mu kwoloka kuli vaje vali na kunena kwoloka.” (Yako 3:18, NWT) Nga tunalipyakana na mukwetu mu chikungulukilo nambe mu nanga, tunapande kulomba Njambi atukwathe tuyoye nendi mu kwoloka. Cho tukala na sipilitu ya Yehova na vilinga vyavivwa na kupwa va kuvwahelela. Yesu wamwethele theho ili mu kwolwetha ñole omwo wendekele ngwendi: “Ngechi vene, nga ukombelela ñombelo ku mutula, cho kuje vene wanuka mulonga uwavulumwine kuli mukweni, thethza ñombelo yove ku mutula, ha kulivanga ya ukalithambethe na mukweni, athinoni wiluka na kukombelela ñombelo yove.”—Mateo 5:23, 24.
18, 19. Mwafwa vika vaka-Kilisitu vakavwahelela nameme vavapaketha?
18 ‘Muvwahelela omwo vamishaula na kumiyandetha na kumivangeya vya makuli vyeka na vyeka omwo yange.’ Yesu walumbunwine vika? Wendekele lalo ngwendi: “Vwaheleleni na kujolela manene omwo vanamitulikila chikandelela cheni chakama mwilu. Omwo omu mukemwo muvayandethelele vaka-kwimanena vaje valivangele kulutwe lweni.” (Mateo 5:11, 12) Omwo tupositolo vavapupangele na kuvavindika ngwavo kethi vambulule, “vathethzele ije Munga, vavwahelelele manene.” Kethi ngwavo vavwahelelele mwafwa ya kuvapupanga. Oloni vavwahelelele ‘omwo vapandele kuyanda na kushauka omwo ya lithzina lya Yesu.’—Vili 5:41.
19 Matangwa ano, vanu va Yehova vanapu va kuvwahelela nameme vali na kuvayandetha mwafwa ya lithzina lya Yesu nambe valiwana na vyetheko vyakama. (Tandeni Yakomba 1:2-4.) Ngwe mwa tupositolo, kethi ngwavo tukavwahelela mwafwa ya kutuyandetha. Oloni tukavwahelela mwafwa ya kupwa va kulongwa kuli Njambi. Nga tulinga ngocho mu thimbu ya tuyando, cho Yehova atukwatha tulikolethe. Chakumwenako, mu August 1944 Henryk Dornik na ndolome yendi vavakutile na kuvatwala ku chilombo cha vafunge. Oloni vaka-kuvayandetha vendekele ngwavo: “Kutwatha kuvavindika kulinga vyuma. Kuvayandethela likulahelo lyavo kuvalingitha vavwahelele.” Ndolome Dornik wendekele ngwendi: “Nameme kunjashakele kunjiyandetha mwafwa ya likulahelo lyange, oloni njavwahelelele omwo njathimpile na kupwa wa kulongwa kuli Yehova. . . . Kulombela thimbu yoshe kuli Yehova kwanjikwathele njishwenye kuyehi nendi, cho wanjitakamethele.”
20. Mwafwa vika twavwahelela kupangela ‘Njambi wa kuvwahelela’?
20 Nga tulinga vyavivwa ku mesho a ‘Njambi wa kuvwahelela,’ cho tuvwahelela nameme vatupaketha nambe vatulwitha mu nanga nambe tuvinja nambe twakuluvala. (1 Tima 1:11) Cho lalo tuvwahelela mwafwa ya vikulahetho vya Njambi, “uje kethi kukwitha.” (Tito 1:2) Yehova mwakashulithilila vikulahetho vyendi, kutukanuka tuyando tutuli na kuliwana natwo. Vivethzikitho vya Yehova vya mu Palandaisi vikapwa vyavivwa manene kutuvakana mutuvithinganyekela. Tukavwahelela manene. ‘Tukajolela na kukala mu kwoloka.’—Myatho 37:11.