MUTWE WAKAMA | NGA MUNU IMWATHZEMA NATHSI
Mwakulifwitila na Vuthiwa
Nga muli mu vuthiwa, vanu vanatha kumileka vyavingi. Oloni vyuma vimo vivakendeka kuvyethi kukwatha. Chakumwenako, vamo vanatha kumivindika kulila na kumileka ngwavo kethi mumoneke ngwe muli na vuthiwa. Vamo cho vanatha kumileka ngwavo mulile mangana mumwethe vuthiwa vweni. Mbimbiliya yamwetha ngila yaivwa ya kulifwitilamo na vuthiwa ije ivanakundwiya vaka-kutondethetha va matangwa ano.
Mu vithemwa vimo, vamona ngwavo vanakathzi vakevo lika vanapande kulila. Kuma kulila ha mbunga wapwa mulonga ndi? Vaka-kulilongetha vya vwongo ngwavo, kulila kwapwa kwakuvwa. Kumikwatha mulikolethe, nameme mulithziva ngweni mwathzimbaletha chuma chakama. Oloni kutulika vuthiwa mu mbunge kwatha kunena vukalu. Mbimbiliya kuyendekele ngwavo kuthziva vuthiwa na kulila kwakuvi. Achanukeni Yesu. Nameme Yowano 11:33-35.
wakele na ndthzili ya kuthangula vathsi, oloni walilile omwo kavuthamba kendi Lazalu wathsile.—Vamo cho vuthiwa vwavo vwapwa kuluvala, maneneni nga munu ivathzema nathsi mu kukathumuna. Kuli vyuma vimo vikaluvaletha munu uje nathsitha. Thimbu imo vikapu vyendeka vya vanu vaje vakulahela manene. Mike wa ku South Africa ngwendi: “Vatate muvathsile, njakele lika na myaka 14. Ha vya kuthsa, mulongethi umo wa mu vulombelo vwa Anglican wendekele ngwendi Njambi washaka vanu vavavwa, cho akavambata vwathi. * Awa majwi anjiluvalethele mwafwa twashakele manene kukala na vatate. Nameme muneti myaka 63, anga njikathzivi kuvavala ku mbunge.”
Vaticho kulithziva mulonga? Nga munu nathsitha kavuthamba nambe kavushoko mu kukathumuna, natha kuthinganyeka mu mbunge yendi ngwendi: ‘ngwe njalingile mu ngandi, ngwe vyoshe evi kuvyalingiwile.’ Kuli chuma chikwavo chatha kumilingitha mulithzive mulonga. Mpamo mwalingile vimata na muthsi thimbu kanda athse.
Nga neni mulithziva ngweni muli na mulonga, cho kumwashuvulukile, kethi muthsile mu mbunge. Lekeniko kavuthamba keni uje atha kumitolilila na kumikwatha muthzivithithe ngweni na vakweni muvakathsitha vakalithzivi ngocho. Mbimbiliya itwanukitha ngwavo: “Vathamba vamwetha chithzemo chavo thimbu yoshe, vavushoko vanathemukila ngechi vamwene hamo tuyando.”—Vithimo 17:17.
Ishamatanga, Yehova Njambi ikeye atha kupwa kavuthamba wamuvwa kuli muka-kuthsitha. Lekeni Njambi vili ku mbunge yeni mwafwa “ikeye ali na kumilela.” (1 Petulu 5:7) Nakulahetha ngwendi voshe valinga ngocho, “kwoloka kwa Njambi kuje munu naumo wai atha kuthzivithitha” kunyunga vimbunge vyavo na viyongola vyavo mwamuvwa. (Filipu 4:6, 7) Cho lalo tavetheni Njambi amikangwithe na Lijwi lyendi, Mbimbiliya. Thonekeni chinoneko cha vithoneka vije vyatha kumithzembeleka. (Kengeni chipalo.) Ethekeni kulyanukithako vimo. Nga mukalifwiti na chilavu-lavu vuthsiki mwafwa ya vuthiwa, kuthinganyeka ha vithoneka kumikwatha manene.—Isaya 57:15.
Jack uje ali na myaka 40, nathsitha munakathzi wendi uje wakele na mushongo wa cancer. Jack ngwendi thimbu imo akathzivi manene vuli. Oloni kulombela kunamukwatha. Nendeka ngwendi: “Omwo njilombela kuli Yehova, kunjethi kulithziva vuli. Vuthsiki munjikanyangumuka, njikonwa kwilukila mu tulo. Oloni munjikatanda viñanda vya kuthzembeleka vya mu Mbimbiliya na kuthinganyekaho na kuleka Njambi vili ku mbunge yange vyoshe, mbunge yange ikatulu, cho njikatha kwilukila mu tulo lalo.”
Mumbanda umo wa lithzina lya Vanessa wathsithile vaina. Nendi lalo kulombela kwamukwathele. Nendeka ngwendi: “Kakangi munjikakala mu vukalu, njikatumbula lika lithzina lya Njambi na kulila. Yehova akatolilila ku malombelo ange na kunjana ndthzili injishaka.”
Vaka-kunangula vanu vaje vanathsitha, vakaleke vaje vali mu vuthiwa ngwavo vanapande kukwathako vakwavo nambe kulyana mu kulingako vipangi vimo. Kulinga ngocho kukathzivitha munu nathsitha kuvwaha na kumuthzembeleka. (Vilinga 20:35) Vaka-Kilisitu vanathsitha vanawana ngwavo kulitangula na vipangi vya kukwatha vakwetu veka kukathzembeleka.—2 Kolinte 1:3, 4.
^ par. 5 Mbimbiliya kuilongetha ngocho. Mbimbiliya inendeka vyuma vitatu vyanena kuthsa.—Muka-kwambulula 9:11; Yowano 8:44; Loma 5:12.