Waneni Vukwathi ku Vyuma Vyanamyana Yehova
“Yange Kalunga Njambi yeni, uje amilongetha vyuma vyavivwa.”—ISAYA 48:17.
MYATHO: 117, 114
1, 2. (a) Vakaleho va Yehova vamona vati Mbimbiliya? (b) Viñanda muka vimwashaka manene mu Mbimbiliya?
YETU Vakaleho va Yehova twashaka Mbimbiliya. Ikatuthzembeleka na kutwana lilavelelo na kutulongetha vyuma vije vitwatha kukulahela. (Loma 15:4) Kumwakele vithinganyeka vya vanu, oloni yapwa “lijwi lya Njambi.”—1 Tesalonika 2:13.
2 Mwa vuthunga, munu na munu kuli viñanda vya mu Mbimbiliya vyashaka manene. Vamo vashaka Viñanda vyavivwa, mwafwa vanendekamo futithi ya Yesu ije yamwethele mwafwila Yehova. (Yowano 14:9) Vamo vashaka mavulu a vupolofweto a kufwa ngwe Kujombolola ije yajombolola vyuma “vikalingiwa vwathi-vwathi.” (Kujombolola 1:1) Vamo mukanda wa myatho ukavathzembeleka, vekacho vakalikuwu kutanda kunangula kwa mu livulu lya Vithimo. Mbimbiliya yapwa livulu lya vanu voshe.
3, 4. (a) Twamona vati mavulu etu? (b) Mavulu muka akwavo atukatambula avakathonekela mbunga imo ya vanu?
3 Mavulu etu nawo twawashaka, mwafwa viñanda vyakalamo vikatundu mu Lijwi lya Njambi. Mavulu oshe na mambuloshuwa na mangazini na mavulu eka vyapwa vwana vwa kutunda kuli Yehova. Akatukwatha tulikute vuthamba nendi na kukanyametha likulahelo lyetu.—Tito 2:2.
4 Mavulu etu amangi vakawathonekela Vakaleho va Yehova voshe. Oloni amo vakawathonekela chivunga chimo. Vanatha kuthonekela vanike nambe vithemi. Vilongetha na mavindiyo amangi a ha wembusaiti yetu, vanawavwahethela vaje kuvapwile Vakaleho va Yehova. Ovu vwana vwakulithethzathethza vumwetha ngwavo Yehova nashulithilila chikulahetho chendi cha kwana vanu voshe vilongetha vyavingi.—5. Yehova alithziva mwamuvwa nga tulinga vika?
5 Vungi vwetu mpamo twashaka kukala na thimbu yaingi ya kutanda Mbimbiliya na mavulu etu. Ngechi, thimbu itunatha kwambata ha kutanda mu mavulu atukatambula inatha kulithethza. Tuthzivuka ngwetu Yehova alithziva mwamuvwa nga tupangetha thimbu yetu ku kutanda na kulilongetha Mbimbiliya na mavulu etu. (Efeso 5:15, 16) Oloni kuli vukalu vumo vutunapande kujenjuka. Vukalu muka?
6. Vithinganyeka muka vyatha kunena ngwavo vilongetha vya Yehova vitwite?
6 Nga kutunyanyama, tunatha kuthinganyeka ngwetu viñanda vimo vya mu Mbimbiliya nambe mu mavulu etu vipanga lika ku vakwetu veka. Chakumwenako, tulinga vati nga ñanda imo ya mu Mbimbiliya kuitukundama? Nambe hamo ñanda imo ya mu mavulu etu vanaithonekela veka? Tundandametha lika kutanda viñanda vya chifwa echi nambe kulikela kuvitanda ndi? Nga mukemwo, cho viñanda vimo vije vinapande kutukwatha vitwita. Twatha kujenjuka vati ovu vukalu? Tunapande kwanuka ngwetu viñanda vyoshe vya mu mavulu etu na mu Mbimbiliya vitunda kuli Yehova. Mu Mbimbiliya tukatanda ngwetu: “Yange Kalunga Njambi yeni, uje amilongetha vyuma vyavivwa.” (Isaya 48:17) Omu mu chilongetha, tuthimutwiya ha viñanda vitatu vije vitukwatha kukandelela ku vyuma vyakatwana Yehova.
VYUMA VITULINGITHA TUWANE VUKWATHI MU KUTANDA MBIMBILIYA
7. Mwafwa vika tunapande kushuvuluka omwo tutanda Mbimbiliya?
7 Shuvulukeni omwo mutanda. Eyo, viñanda vimo vya mu Mbimbiliya vavithonekelele munu umo nambe chivunga chimo cha vanu. Oloni Mbimbiliya yamwetha mwamuvwa ngwavo: “Vithoneka vyoshe Njambi wahwimininemo ngechi vili na theho.” (2 Timateo 3:16) Ngechi tushuvulukeni omwo tutanda Mbimbiliya. Ndolome etheka kwanuka ngwendi atha kulilongetha vyuma vyavingi ha ñanda imo. Echi chimukwatha ananguke vilongetha vimo vije kuvimukundama manene. Ngechi thimbu kanda tutande Mbimbiliya, tunapande kulomba Yehova atukwathe tushokoloke mu mutwe na kutwana mana a kuthzivithitha vyuma vyashaka ngwendi tulilongethe ha thimbu ije.—Ezela 7:10; tandeni Yakomba 1:5.
Muli na kuwana vukwathi mu kutanda Mbimbiliya kweni ndi? (Kengeni palangilafu 7)
8, 9. (a) Vihula muka vitunapande kulihula omwo tutanda Mbimbiliya? (b) Vyuma vyanapande kulinga munu mangana apwe mukulunu muka-Kilisitu vimwetha vika hali Yehova?
8 Ihuleni vihula. Omwo mutanda Mbimbiliya, echeleni tahi kutanda kamandondo, cho lihuleni ngweni: ‘Evi vinjinatanda vinjileka vika hali Yehova? Eyi ñanda injikwatha vati mu kuyoya kwange? Njatha kuipangetha vati mu kukwatha vakwetu?’ Nga tuthinganyeka ha vihula evi, cho tuthzivithitha mwamuvwa vitutanda. Tumoneni chakumwenako. Mbimbiliya yatumbula vifwa vimo vivanapande kukala navyo vakulunu vaka-Kilisitu. (Tandeni 1 Timateo 3:2-7.) Tunatha kuthinganyeka ngwetu evi viñanda kuvitukundama mwafwa vwingi vwetu kethi tu vakulunu. Oloni tuchipangetheni vihula vitatu vitunathimutwiya ha kulivanga mangana tumone omwo ou mukana uli ku mukanda muutukwathelamo tuvavoshe.
Vilinga 20:28) Ngechi Yehova ashaka ngwendi vakulunu vapwe myanja yaivwa, cho lalo vakalitavela kuli ikeye kwetheketha nomwo vanyungilamo chikungulukilo. Ashaka tulithzive ngwetu vali na kutunyunga mwamuvwa. (Isaya 32:1, 2) Omwo tutanda evi vyuma vilingitha munu apwe mukulunu, tumona ngwetu Yehova watwaka manene mbunge.
9 “Evi vinjinatanda vinjileka vika hali Yehova?” Yehova natuleke vyuma vyanapande kulinga munu mangana apwe mukulunu. Watonda ngwendi vanalume vaje vanyunga chikungulukilo vapwe va kuhya. Echi chimwetha ngwavo Yehova wamona chikungulukilo kupwa cha theho manene. Mbimbliya imwetha ngwavo wachilandele na “ñombelo ya kuthsa kwa Munendi.” (10, 11. (a) Twatha kupangetha vati vyuma vilingitha munu apwe mukulunu vitukatanda mu kuyoya kwetu? (b) Twatha kupangetha vati evi viñanda mu kukwatha vakwetu?
10 “Eyi ñanda injikwatha vati mu kuyoya kwange?” Nga mu vakulunu, munapande kutandatanda evi vyuma thimbu yoshe na kupangela haje hanapande. Nga ‘mushungwiya vipangi vya vantwama,’ munapande kulinga evi vyuma kwetheketha na ndthzili yeni. (1 Timateo 3:1) Oloni vaka-Kilisitu voshe vatha kulilongethako vimo kuli evi vyuma vya vakulunu. Chakumwenako, Yehova ashaka ngwendi munu na munu apwe na kalemetho na kwangula mwamuvwa vya kulinga. (Filipu 4:5; 1 Petulu 4:7) Nga vakulunu vapwa “chimwetho ku vutanga,” cho tulilongetha kuli vakevo na ‘kutembwinina kukulahela kwavo.’—1 Petulu 5:3; VaHevelu 13:7.
11 “Njatha kuipangetha vati mu kukwatha vakwetu?” Twatha kupangetha mukana wa vyuma vije vilingitha munu apwe mukulunu mu kukwatha vilongetha vyetu vya Mbimbiliya na vaje vashaka kulilongetha vathzivithithe omwo vakulunu muvalithethzela na va mu vulombelo vwa makuli. Ou mukana utukwatha lalo kuthzivuka vivakondangana vakulunu mu chikungulukilo. Cho utulingitha tuvathingimike. (1 Tesalonika 5:12) Omwo tuvathingimika, cho vapanga chipangi chavo mu kuvwahelela.—VaHevelu 13:17.
12, 13. (a) Twatha kutondethetha vika kupangetha vinoma vituli navyo? (b) Endekeni chakumwenako chije chimwetha omwo viñanda vyeka vyatha kutukwathela kulilongethako vimo ha viñanda vije kuvyatukundamene manene.
12 Tondethetheni. Omwo tulilongetha Mbimbiliya, twatha kutonda vikumbululo ku vihula evi:
-
Iya wathonekele eyi ñanda ya mu Mbimbiliya?
-
Waithonekelele kuli, cho mwaka uka waithonekele?
-
Omwo vathonekele eli livulu, vyuma muka vya theho vyalingiwile?
Vikumbululo ku vihula evi, vitukwatha tuthzivuke vilongetha vije kuvyatukundamene manene ha thimbu oyo.
13 Chakumwenako, ku Ezekiyele 14:13, 14 ngwavo: “Nga lifuti lilinga vuvi, na kujeneka kulongwa kuli yange, cho njikolola livoko lyange na kuviyitha vyakulya vyamwo. Cho njikatumamo njala ya lyangengela na kuthsiya vanu na tuthitu mu chifwa chimo lika. Nameme nga vaje vanalume vatatu, Nowa na Ndanyele na Yombi, vakelemo, nga vanamena lika myonyo yavo. Mukemwo mwanedeka Shukulu Kalunga wa Hakamwa ya Vyoshe.” Nga tutondethetha, tuwana ngwetu Ezekiyele wathonekele awa majwi myaka 612 thimbu Yesu kanda akaleko. Nowa na Yombi te vanathsi laja, oloni Yehova wachikele na kwanuka kulongwa kwavo. Oloni Ndanyele wachikele na kuyoya. Mpamo wakele na myaka 20 omwo Yehova wamwendekele ngwendi wapwile wa kulongwa ngwe Nowa na Yombi. Vika vitulilongethaho? Yehova wamona vangamba vendi voshe va kulongwa, vanike na vakulunu kupwa va theho.—Myatho 148:12-14.
WANENI VUKWATHI MU MAVULU A KULITHETHZATHETHZA
14. Viñanda vivathonekela vanike vikavakwa vati, cho vyatha kukwatha vati na vakwavo veka? (Kengeni chikupulo chili ha liputa 27)
14 Mavulu a vanike. Twalilongetha ngwetu viñanda vyoshe vya mu Mbimbiliya vyatha kutukwatha. Mu ngila imo lika, mavulu etu oshe nawo atha kutukwatha. Tuthimutwiyeniko ha myanja imo. Mu myaka inahu, Yehova natwana mavulu amangi a vanike. [1] (Kengeni viñanda vya kushongo.) Viñanda vili omu mu mavulu, vikavakwatha vakanyamene vyetheko ku sikola na vukalu vwa mu kuyoya omwo vakola. Cho viñanda vili omu mu mavulu a vanike vyatha kutukwatha vati tuvavoshe? Nga tuvitanda, tuthzivuka vukalu vuvali na kuliwana navwo vanike, cho tuwana vingila mwakuvakwathelamo na kuvatakametha.
15. Mwafwa vika vaka-Kilisitu va kukola kuvapandele kwombwanetha viñanda vivathonekela vanike?
15 Vaka-Kilisitu va kukola kuvapandele kwombwanetha kutanda viñanda vya vanike. Viñanda vivakathimutwiya omu mu mavulu a vanike, vyakundama vaka-Kilisitu voshe. Chakumwenako, tuvavoshe tunapande kwimanena likulahelo lyetu na kwilula vithinganyeka vyetu na kuvyana kushongangeya kwakuvi na kujenjuka vuilanyo vwavuvi. Ngechi nameme awa mavulu vawathonekela vanike, oloni viñanda vilimo vitunda mu Mbimbiliya, cho vyatha kukwatha vaka-Kilisitu voshe.
16. Mavulu etu akakwatha vanike valinge vika lalo?
16 Mavulu avathonekela vanike atha kuvakwatha vakanyamethe vuthamba vwavo na Yehova. (Tandeni Muka-kwambulula 12:1, 13.) Na vakulunu atha kuvakwatha. Chakumwenako, mu Toneni! ya Silozi ya mu July 2009 mwakele ñanda yendekele ngwavo: “Ba Banca ba Buza . . . Ni Kona ku Eza Cwañi Kuli ni Ikole ku Bala Bibele?” Omu mu ñanda mwakele vilongetha vyavivwa vyavingi cho kwakele mutamba wakupangetha ha thimbu ya kulilongetha uvatavethele kuteta na kuutulika. Eyi ñanda yakwathele na vakulunu ndi? Munakathzi umo wakala na vana wendekele ngwendi kutanda Mbimbiliya chapwile chachikalu kuli ikeye. Oloni wapangethele viñanda vyomu mu chilongetha, cho hano washakaka manene kutanda Mbimbiliya. Nendeka ngwendi akalikuwu kumona omwo mavulu a mu Mbimbiliya alitombwelamo na kumona vyatanda mu vithinganyeka. Wendekele lalo ngwendi: “Laja kunjathzemene manene kutanda Mbimbiliya ngwe matangwa ano.”
17, 18. Viñanda vivakathonekela mbunga netu vyatha kutukwatha vati? Endekeni chakumwenako.
17 Mavulu a mbunga. Kushwa mu 2008, tukatambula Kaposhi ka Kukengela ka kulilongetha. Viñanda vikakala omu mu kaposhi, kakangi vikapu vya Vakaleho va Yehova, oloni kuli mangazi avavwahethela mbunga. Viñanda vikakalamo vyatha kutukwatha vati? Chakumwenako echi. Nga mulanya munu ku Njuvo ya Vumwene cho aija, mukavwahelela. Omwo muka-kwendeka ñanda athimutwiya, muthinganyeka hali mungendthzi weni. Muthinganyeka mwalithzivila ha viñanda vyali na kutolilila, nomwo vyatha kutengulwila kuyoya kwendi. Omwo mulinga ngocho, neni ije ñanda yanana uje ndolome imithzivitha manene kuvwaha ku mbunge.
18 Vikevyo vinatha kulingiwa omwo tutanda mavulu avanathonekela mbunga. Chakumwenako, viñanda vya mu Kaposhi ka Kukengela ka mbunga na vya ha jw.org vyavyathi kuvithzivithitha. Omwo tuvitanda, cho tuthzivithitha vyavingi na kuthzema manene vuthunga vwa mu Mbimbiliya vututhzivuka. Cho lalo tunatha kulilongetha mwakulumbunwina vyuma vimo vyaviha vitwakulahela mu lihya. Na mangazini ya Toneni! ikatukwatha tukulahele ngwetu Ishamatanga kwakala. Ikatulongetha lalo mwakukundwiyamo likulahelo lyetu.—Tandeni 1 Petulu 3:15.
19. Twatha kumwetha vati ngwetu twakandelela kuli Yehova ha vyuma vyanatwana?
19 Yehova natwana viñanda vije vitunangula na kututwamenena mu ngila yaivwa. (Mateo 5:3) Tutwaleleniho kutanda na kupangetha viñanda vyoshe vyanatwana. Nga tulinga ngocho, cho tumwetha ngwetu tukandelela ku vyuma vyoshe vyanatwana Yehova.—Isaya 48:17.
^ [1] (palangilafu 14) Evi viñanda vya vanike, mwatha kuviwana mu livulu lya Questions Young People Ask—Answers That Work, Volyumu 1 na 2, na ha wembusaiti yetu vakavyakaho thimbu yoshe mwithi ya ka mutwe ka “Young People Ask.”