Mwavinjaho laja mushongo wakama ha thimbu yaindondo ndi? Hamo mwakangukile vwathi, cho munevala mumwayandelele. Vuthiwa kuvwafwile ngocho. Dr. Alan Wolfelt wathonekele mu livulu lyendi lya Kuthzembeleka Munu Nathsitha Muka-njuvo Yendi ngwendi: “Kukwethi chuma cha kuvavala ngwe ‘kulifwita’ na vuthiwa.” Oloni wendekele lalo ngwendi: “Mu kwita kwa thimbu, na vukwathi vwa kutunda ku vakweni, munatha kukanyama.”

Chakumwenako, thinganyekeni mwalingilile chivendthzi Avilahama omwo munakathzi wendi wathsile. Mbimbiliya ngwayo “Avilahama walinyengele na kulila manene a kuthsa kwa Sala.” Majwi a kwendeka ngwavo “walinyengele” amwetha ngwawo Avilahama walifwitile na vuthiwa vwendi ha myaka yaingi. * Chakumwenako chikwavo lalo chinapu cha Yakomba. Vamukwithile ngwavo munendi Yosefa vamuthsiyile ku chikashama wa mushwata. Yakomba walithzivile vuthiwa ha “thimbu yakama,” cho vaka-nanga yendi kuvathele kumuthzembeleka. Nameme mwetile myaka yaingi, oloni Yakomba anga wakele na kuthinganyeka vya kuthsa kwa Yosefa.—Kushangumuka 23:2; 37:34, 35; 42:36; 45:28.

Na matangwa ano, mukemwo muvakalithzivila vavangi nga vanathsitha munu ivathzema manene. Achikengeni evi vyakumwenako vivali.

• “Munalume wange Robert wathsile lya July 9, 2008. Vitwalingile ha litangwa lyathsile mu monde, vikevyo vitwakele na kulinga na matangwa akwavo oshe. Olyo litangwa munima ya kulyaula mutondo, twalithsembele na kulivumbateya na kwendeka ngwetu ‘njakuthzema,’ ngwe mutwakele nakulingila matangwa oshe thimbu kanda aye ku vipangi. Nameme muneti myaka 6, anga njichili na kuthziva kuvavala ku mbunge. Yanini indi tangwa njikamwivala Rob.”—Va Gail, va myaka 60.

• “Nameme muneti myaka ya kutuvakana 18 kutunda hatokelele munakathzi wange, oloni anga njikamutondo na kulithziva manene vuthiwa. Nga njimona chuma chimo chachivwa, cho njimwanuka na kuthinganyeka kuvwahelela kwanethi kulithziva ha kumona vyuma vinjili na kumona.”—Va Etienne, vali na myaka 84.

Kulithziva ngocho kuvavala ku mbunge ha thimbu yailaha kukwavihile. Yetu vanu tukamwetha vuthiwa vwetu mu vingila vya kulithethzathethza, cho kutwapandele kujola vakwetu ha kumona muvalingilamo mu thimbu ya vukalu. Cho lalo netu kutwapandele kulilumbilitha nga tumona ngwetu vuthiwa vwetu vwahyanetha. Twatha kulifwita vati na vuthiwa?