MUTWE WAKAMA | VIMONA VIJE VISHOLOLA VYUMA VYA MWILU
Vihula ha Vanu va ku Sipilitu va Mwilu
Mwalihulaho laja vya vanu va mwilu va ku sipilitu ndi? Nga ngocho, cho kethi yeni lika embwe. Kushwa kuthañulu, vanu vakathinganyeka vyavingi ha ñanda eyi. Vamo vatava ngwavo mwilu mwakala vakulu vaje vatunapande kuthingimika. Veka vakathinganyeka ngwavo mwilu mwakala tungelo vavangivangi na vanu vavavwa vaje vathsile laja. Vakwavo cho vakathinganyeka ngwavo mwilu mwakala tulunga vavangivangi.
Vanu vavangi vakalingi vimata ngwavo na chimo chayi chituthzivuka hali vanu va ku sipilitu, mwafwa na umo wayi wavamonaho uje atha kutuleka vuthunga. Oloni evi vithinganyeka vya chifwa echi kuvyathungamene. Yesu Kilisitu wapwile munu wa ku sipilitu mwilu thimbu kanda achije hano hathi. Wendekele kwa kujeneka kushweka kuli vakululu va mu vulombelo va mu chita cha myaka chakulivanga ngwendi: “Njatundile mwilu kethi kulinga chithzango change embwe, oloni kulinga chithzango cha uje wanjitumine.” Kutundaho, Yesu walekele lalo tupositolo vendi ngwendi: “Mu njuvo ya Tate mwakala milili yaingi.”—Yowa. 6:38; 14:2.
Ishe ya Yesu wapwa Njambi uje lithzina lyendi Yehova, cho lalo “njuvo” ya Yehova yakala mwilu. (Myatho 83:18) Ngechi, Yehova Njambi na Yesu Kilisitu vakevo lika vatha kulumbununa mwamuvwa vyuma vya mwilu. Vanasholola viñanda vyavingi ha vanu va ku sipilitu kwitila mu vimona vivamwethele vanu va kulongwa.
Chilongetha chinakavangeyaho, chithimutwiya ha mitamba ya mu Mbimbiliya ije imwetha vimona vyavingi vivamwene vanalume vamo. Omwo mutanda evi vimona, anukeni ngweni vanu va ku sipilitu vavanendekamo kutwatha kuvakwata na mavoko etu nambe kuvamona. Njambi akapangetha evi vimona mangana tuthzivithithe mwamuvwa vanu va ku sipilitu vaje vakala mwilu. Evi vimona vimikwatha kuthzivithitha mwamuvwa ava vanu va ku sipilitu ‘vakala mu milili yaingi.’
