Seth. * ngwendi: “Nange na munakathzi wange vatutundithile vipangi ha thimbu imo lika. Twayoyelele ha vyuma vyakutwana na kupanga tuvipangi twa mavoko ha myaka ivali. Ocho chalingithile munakathzi wange Priscilla ombwe, cho yange njalithzivile ngwange kunjakele na theho.

“Vika vyatukanyamethele? Priscilla wakele nakwanuka majwi a Yesu ali ku Mateo 6:34 thimbu yoshe. Wendekele ngwendi kutwapandele kulishoshomwena ku litangwa lya imene, mwafwa litangwa na litangwa lili na vukalu vwalyo. Kulombela kutundilila kwithi ya mbunge kwamukanyamethele. Yange cho mukanda wa Myatho 55:22 ukewo wanjithzembelekele. Njakundikile tuyando twange kuli Yehova, cho njamwene ngwange wanjikwathele ngwe mwakwathelele muka-kwimba. Nameme thimbu ino njili na kupanga, oloni tuli na kwathiwitha kuyoya kwetu mu kulitombola na majwi a Yesu aje ali ku Mateo 6:20-22. Kutundaho lalo, twashwenye kuyehi na Njambi na kuli umo na mukwavo.”

Jonathan ngwendi: “Mingotho yetu muyawile, njalijakamenene muvukakela vuyoye kulutwe. Vyuma vitwapangele mu myaka 20 kuvyatukwathele, mwafwa vimbongo mu lifuti lyetu vyalelukile. Nange na munakathzi wange twashangumukile kulijokota ha vimbongo. Twalikelele kulanda vyuma kupangetha makati a kukumwitha vyuma, mwafwa twatewele ngwetu kuvawatavetha.

“Oloni Lijwi lya Njambi na sipilitu yendi vyatukwathele twangule mwamuvwa vya kulinga. Njalilongethele ngwange kunjapandele kupanga lika vipangi vya mu ofisi, cho twalikelele kulanda vyuma vya kujeneka theho. Cho lalo ha kupwa Vakaleho va Yehova, twawanene vukwathi kuli vakwetu vaka-kukulahela. Vatushongangeyeye na kutukwatha mu thimbu ya vukalu.”

Raquel ngwendi: “Munalume wange mwanjithethzele, njalithzivile kuvihya na kuluvala. Njalithzivile vuthiwa thimbu yoshe. Oloni njalikutile vuthamba na Njambi, cho wanjithzembelekele. Omwo njakele na kulombela kuli Njambi litangwa na litangwa, kwoloka kwendi kwanyungile mbunge yange. Njalithzivile ngwe nakangula mbunge yange ije yapokokele.

“Njakandelela kuli Njambi ha kunjana Lijwi lyendi Mbimbiliya, mwafwa yanjikwatha njilikele kuluvalaluvala. Njanukile majwi endekele kapositolo Paulu ku mukanda wa Loma 12:21 ngwendi: ‘Kethi mutave vuvi vumihyane, oloni hyaneni vuvi na vuvwa.’

“Kavuthamba kange umo wanjikwathele njiye kulutwe. Wanjimwethele mukanda wa Muka-Kwambulula 3:6 na kunjileka ngwendi kwakala thimbu ya ‘kuthzimbaletha’ vyuma. Ocho chinangulo chapwile chachikalu kuchithzivithitha, oloni chikecho chinjatondele. Hano njili na vilengo vyeka mu vuyoye.”

Elizabeth ngwendi: “Nga vulo vweni vunathsi, vanu vanapande kumithzembeleka. Kuli kavuthamba kange umo uje wanjikwathele litangwa na litangwa. Wanjikwathele na kunjithzembeleka, cho wanjilingithile njilithzive ngwange vanu vanjithzema. Njakulahela ngwange Yehova wamupangethele mangana akangule vimbandu vyange.”

Luis itunavanga kwendeka mu chilongetha cha kulivanga cha ino mangazini wavinjile mbunge, cho, kamandondo lika ngwe wathsile. Ano matangwa akahwimina ku oxygen maola 16 ha litangwa. Nendeka ngwendi: “Njikalombela kuli Yehova thimbu yoshe. Cho munima ya kulomba, njikalithzivi ngwange sipilitu ya Njambi inanjitakametha. Kulombela kukanjikwatha njiye kulutwe mwafwa njakulahela Njambi, cho njithzivuka ngwange wanjaka mbunge.”

Petra uje ali mu myaka ya kutuvakana 80 ngwendi: “Njishaka kulinga vyuma vyavingi, oloni kunjatha. Vuyoye vwanjikaluwila, mwafwa kunjethi na ndthzili. Njikalithzivi kuthzeya, cho njili na kuyoyela ha mambanda thimbu yoshe. Kakangi njikanuka omwo Yesu walombele Ishe ngwendi nga chitava, vukalu vumo kethi vumwithzile. Oloni Yehova wakanyamethele Yesu, cho nange akanjikanyametha. Lilombelo likelyo lyapwa vumbanda vwange vwa litangwa na litangwa. Munima ya kuthimutwiya na Njambi, njikalithzivi mwamuvwa.”—Mateo 26:39.

Julian uje nalifwiti na mushongo wa kalepa ha myaka 30 nendi mukemwo mwakalithzivila. Nendeka ngwendi: “Njinapandele kupwa mukulunu ha chipangi, oloni njikatumbama lika mu chitumbamo cha kuthindumuna. Oloni njili na kuyoya mwamuvwa mwafwa njili na kupangela vanu. Kwana kwatha kutepulula ku tuyando, cho Yehova akashulithilila chikulahetho chendi cha kutukanyametha mu thimbu ya vukalu. Njatha kwendeka mwendekelele kapositolo Paulu ngwange: ‘Njatha kulinga vyuma vyoshe ha ndthzili ije yananjana Kilisitu.’”—Filipu 4:13.

Antonio ngwendi: “Ha kulivanga munjathzivile ngwange vatate vanathsi mu monde ya ha tapalo, kunjatavele. Njalithzivile ngwange kuvavalingile mwamuvwa mwafwa vakevo vanakala na kwendela ku mutambela unapande. Oloni na vimo vinjathele kulinga vyai. Vavinjile manene ha matangwa atanu, thimbu kanda vathse. Munjakele na vanana, kunjakele na kulila, oloni munjakele likalyange, njonowele kulikoletha. Njakele na kulihula yange vavenya ngwange, ‘mwafwa vika? Mwafwa vika?’

“Mu thimbu ya vukalu ovu, njatwaleleleho kulomba Yehova anjikwathe mangana njikanyame na kukala mu kwoloka. Kukapwa muje, njalithzivileko mwamuvwa. Njanukile ngwange Mbimbiliya yendeka ngwavo ‘luvinda’ lwatha kwija kuli umo na umo wetu. Njakulahela ngwange tangwa njikamona vatate lalo ha thimbu ya kuthanguka mwafwa Njambi kethi kukwitha.”—Muka-kwambulula 9:11; Yowano 11:25; Tito 1:2.

Robert itunendeka kunima nendi mukemwo mwalithzivilile. Nendeka ngwendi: “Nange na munakathzi wange twawanene kwoloka kuje kuvanendeka ku mukanda wa Filipu 4:6, 7. Kulombela kuli Yehova kukekwo kwatukwathele tukale mu kwoloka. Oku kushuvuluka kwatulingitha twambulule kuli vaka-mithzimbu vya lilavelelo li tuli nalyo ha vathsi. Nameme munetu wa mukwenje wathsile mu monde ya fulayi, oloni hanga tukalikuwu kwanuka vyuma vyavivwa vitwakele na kulinga hamo nendi. Tukathinganyeka manene hali ovyo vyuma.

“Vakwetu Vakaleho muvakele na kutuleka ngwavo vakele na kutumona tuli na kwendeka vya likulahelo lyetu ha ma T.V, twavalekele ngwetu twakele na kumwetha kukandelela kuli vanu vavangi vaje vakele na kutulombelelako. Njakulahela ngwange Yehova ikeye wakele na kuvapangetha mangana vatukwathe kwitila mu mithzimbu ya kuthzembeleka ivakele na kututumina.”

Evi vyakumwenako vitunavanga kuthimutwiya, vimwetha ngwavo Njambi atha kuthzembeleka vanu vaje valiwana mu vukalu vwakama. Yeni cho? Nameme vene muliwana mu vukalu vwakama mu kuyoya, Njambi atha kumithzembeleka. * Lombeni Yehova amithzembeleke. Ikeye “Njambi kuje kukatundu vukwathi vwoshe.”—2 Kolinte 1:3.