Kapositolo Paulu wendekele ngwendi, Yehova * ikeye “Njambi kuje kukatundu vukwathi vwoshe. Ikeye muka-kututhzembeleka mu tuyando twetu twoshe.” (2 Kolinte 1:3, 4) Mukemwo Mbimbiliya yatukulahetha ngwavo Njambi atha kukwatha munu woshe, cho atha kumuthzembeleka mu vukalu vwoshe vwoshe.

Oloni kuli vimo vitunapande kulinga mangana Njambi atuthzembeleke. Ndotolo atha kutukwatha vati nga kutwalithzivathanene nendi? Kapolofweto Amose wehwile ngwendi: “Kuma vanu vavali venda hamo lika kujeneka kulithzivathana kwenda hamo ndi?” (Amose 3:3.) Mukemwo vatuleka mu Vithoneka ngwavo: “Shwenyeni kuyehi na Njambi, cho na ikeye lalo akashwenya kuyehi neni.”—Yakomba 4:8.

Mwafwa vika tukulahela ngwetu Njambi atha kushwenya kuyehi netu? Cha kulivanga, watuleka lwalwingi ngwendi ashaka kutukwatha. (Kengeni  chipalo.) Cha mu chivali, kuli lalo vukaleho vwa vuthunga vuje vumwetha ngwavo Njambi nakwatha vanu kushwa kuthañulu kweta na mu thimbu yetu.

Mwene Ndaviti nendi waliwanene mu vukalu ngwe vuje vuvakaliwana navwo vanu vavangi vaje vakalombo vukwathi kuli Njambi matangwa ano. Thimbu imo walombele kuli Yehova ngwendi: “Njitolilile omwo njitambeka kuli yove ngechi unjikwathe.” Kuma Njambi wamukwathele ndi? Eyo. Ndaviti wendekele lalo ngwendi: “Ikeye anjikwatha na kunjivwaheleletha.”—Myatho 28:2, 7.

Njambi wanene Yesu chipangi cha kuthzembeleka vanu. Wamutumine kuya “mu kukoletha vaka-vimbunge vya kupokoka” na “kuthzembeleka voshe vaje vali na kulila.” (Isaya 61:1, 2) Yesu wakelele mana kuli vaje ‘vanajuka na kwambata vya kulema,’ ngwe muvapolofwetelele.—Mateo 11:28-30.

Yesu wathzembelekele vanu kwitila mu kuvanangula na kuvalinga mwamuvwa, vamo cho wavakangwithile ku mishongo yavo. Litangwa limo, muka-mbumba walambelelele Yesu ngwendi: “Shukulu, nga mushaka, mwatha kunjijeletha.” Yesu wamuthzivilile ngothzi, cho wamukumbulwile ngwendi: “Njishaka, jela.” (Mako 1:40, 41) Uje muka-mbumba wakangukile.

Ano matangwa, muna Njambi kethi kwija hano hathi na kututhzembeleka ha kapandi. Oloni Ishe Yehova, “Njambi kuje kukatundu vukwathi vwoshe,” akakwatha vaje vali mu vukalu. (2 Kolinte 1:3) Kengeni vyuma viwana vyakapangetha Njambi mu kuthzembeleka vanu.

• Mbimbiliya. “Vyuma vyoshe vije vivathonekele mu vithoneka vavithonekele mu kutulongetha, ngechi tukale na chinyangavili cha kutunda ku lukakateya na kukutakametha kuje kutunda ku Vithoneka.”—Loma 15:4.

• Sipilitu ya Njambi ya Kujela. Mukwetile lika thimbu yaindondo kutunda ha kuthsa kwa Yesu, vikungulukilo vyoshe vya vaka-Kilisitu vyakele mu thimbu ya kwoloka. Mwafwa vika? “Ha kukwatha kwa mundthzindthzime wa kujela. . . ngwe ha kuyoya kwavo mu kukomoka Mwene.” (Vilinga 9:31) Sipilitu ya kujela nambe ngwetu ndthzili ya Njambi, ikakwatha. Njambi atha kuipangetha mu kuthzembeleka munu uje ali mu vukalu vwoshe vwoshe.

• Lilombelo. Mbimbiliya itunangula ngwavo: “Kethi mushote mbunge ha chuma chimo.” Oloni itushongangeya ngwavo: “Mulombeni na mbunge ya kukandelela. Cho kwoloka kwa Njambi, kuje munu naumo wai atha kuthzivithitha, kukanyunga vimbunge vyeni na viyongola vyeni.”—Filipu 4:6, 7.

• Vakwetu vaka-Kilisitu Vatha kututhzembeleka nga tuliwana mu vukalu. Kapositolo Paulu wendekele ngwendi vavuthamba vendi vakevo ‘vamukwathele’ mu ‘tuyando twendi twoshe na ñavava.’—Kolose 4:11; 1 Tesalonika 3:7.

Oloni munatha kwihula ngweni, evi vyuma vyatha kulingiwa vati? Tuchithimutwiyeni kamandondo ha vanu vatunendeka ku maputukilo vaje valiwanene mu vukalu. Neni mwatha kukulahela Njambi ngweni akashulithilila chikulahetho chachivwa cha kwendeka ngwavo: “Njikamithzembeleka mu Yelusalema, ngwe chithemi athzembeleka munendi” ndi?—Isaya 66:13.