1. Vika vinalingitha vipangi vya Njambi vyathe kwenda mwamuvwa kushwa ku maputukilo?

 YEHOVA na Yesu vatwalelelaho kulikwatathana kushwa havyashangumukilile kukalako vya kutanga. Yehova walivangele kutanga Yesu thimbu kanda atange vyoshe. Yesu wapangele nendi cho wakele “kuyehi na Shukulu Kalunga, ngwe munendi wamundondo [Mutongwe].” (Vithimo 8:30) Vangamba va Yehova navo vakalikwatathana mu vipangi vivakalingi. Chakumwenako, Nowa na nanga yendi valikwatathanene mu kutunga vwato. Cho lalo na vaIsalele navo valikwatathanene mu kutunga mbalaka na mu kuitungulula na mu kuijalwitha. Ku tembele, vakele na kwimba vimbendo na myatho yaivwa ya kushangathzala Yehova. Vanu va Yehova vathele kulinga evi vyuma mwafwa valikwatathanene.—Kushangumuka 6:14-16, 22; Kulava 4:4-32; 1 Mithzimbu 25:1-8.

2. (a) Vyuma muka vyavivwa vivalingile vaka-Kilisitu va kulivanga? (b) Tuthimutwiya ha vihula muka?

² Vaka-Kilisitu va Mu chita cha Myaka cha kulivanga navo  valikwatathanene. Kapositolo Paulu wendekele ngwendi nameme vakele na vindthzili na vipangi vya kulithethzathethza, oloni vapangelele hamo. Voshe vakavangeyeye Ntwama wavo Yesu Kilisitu. Paulu wavethekethele ku muvila uje wakala na vilyo vya kulithethza-thethza vije vikalikwatathana. (Tandeni 1 Kolinte 12:4-6, 12.) Vaticho yetu matangwa ano? Twatha kulikwatathana vati mu chipangi cha kwambulula na mu chikungulukilo na mu nanga?

3. Kapositolo Yowano wamwene chimona muka?

³ Mu chita cha myaka cha kulivanga, kapositolo Yowano wamwene chimona cha tungelo 7 vaje vakele na kwimba malupembo. Omwo kangelo wa mu chitanu wembile lupembo, Yowano wamwene “ngongonothi ije yawililile hathi kutunda kwilu.” Oyo “ngongonothi” yapangethele thapi mu kusholola ku mbulu ya kujeneka mathima. Ha kulivanga, mwatuhukile vwithi kondakani, cho omwo mu vwithi mwakele na kuchapuluka vimbimba. Ava vimbimba kuvomithile miti, oloni vavulumwine “vanu vaje kuvethi na chithzivukitho cha kathatetho ka Njambi ha maholo avo.” (Kujombolola 9:1-4) Yowano wathzivukile ngwendi vimbimba vavangi vatha kuviyitha vyuma vyavingi, mwafwa vavangele kulinga ngocho ku Ingito mu thimbu ya Mosesa. (Kutuhuka 10:12-15) Ava vimbimba vamwene Yowano, vemanena vaka-Kilisitu va kuvwavetha vaje vanambulula muthzimbu wa ndthzili kuli vaka-vulombelo vwa makuli. Cho kuli vanu vavangi vanalikwatathana navo, oloni vakevo vakayoya hano hathi. Voshe vali na kupangela hamo chipangi cha kwambulula. Echi chipangi chinakwatha vanu vavangi kutunda mu vulombelo vwa makuli, cho vanapatuka ku kutwamenena kwa Satana.

4. Chipangi muka chakama chivali nacho vanu va Njambi, cho vatha kuchipanga vati?

⁴ Vanatwana chipangi chakwambulula “viñanda vyavivwa” ku vanu mu kaye mwoshe thimbu kanda mamanethelelo aije. Echi chipangi chakama. (Matthew 24:14; 28:19, 20) Tunapande kulanya vanu vaje vali na “lihwila” kwa kunwa “mema a mwonyo” kulumbununa ngwavo tunapande kulongetha vanu vaje vashaka kuthzivithitha vuthunga vwa mu Mbimbiliya. (Kujombolola 22:17) Twatha kulinga ngocho nga ‘tulinungakana hamo lika’ na kulikwatathana mu chikungulukilo.—Efeso 4:16.

5, 6. Twalikwatathana vati mu kwambulula muthzimbu wauvwa?

⁵ Nga tupangela hamo, twatha kwambulwila vanu vavangi. Vivakatunangula ku chikungulukilo vikatukwatha tupange echi chipangi mwamuvwa. Tukalingi tahi chiwano cha kuya mu lihya, athina tuya na kwambulula muthzimbu wauvwa wa Vumwene ku vanu. Tukavana na mavulu aje ali na viñanda vya mu Mbimbiliya. Tunana vanu mavulu amangi mu kaye koshe. Thimbu imo tukakala na kampeni ya kulitila ya kwambulula. Omwo mulinga echi chipangi cha kwambulula, mulikwatathana na vanu vavangi mu kaye vaje vali na kuchilinga. Cho lalo mupangela hamo na tungelo vaje vakakwatha vanu va Njambi vaka-kwambulula muthzimbu wauvwa.—Kujombolola 14:6.

⁶ Mutukatanda mu livulu lya Yearbook, tukavwahelela ha kumona vuvwa vuli na kutunda mu chipangi cha kwambulula chivali na kulinga vandolome na vandokathzi mu kaye koshe. Thinganyekeni lalo likwatathano litukamwetha ha kulanya vanu ku viwano vyakama. Oku kuviwano, tukalilongetha vyuma vyakulifwa mu kaye mwoshe. Viñanda na vweho na vimwetho vikakalako, vikatushongangeya tupangele Yehova na ndthzili yetu yoshe. Tukalikwatathana lalo na vandolome na vandokathzi vetu mutukalingi chilika cha Chanukitho mwaka na  mwaka. (1 Kolinte 11:23-26) Tukakunguluka ha litangwa lya kulifwa lya Nisan 14, mangana tukandelele kuli Yehova ha vyuma vyanatulingila na kunyunga lishiko lya Yesu. Cho mu vyalumingo vije vikokela ku chilika, tukai na kulanya vanu vavangi mangana tukunguluke navo ku chilika echi cha theho.

7. Kupangela hamo kukatulingitha twatha kulinga vika?

⁷ Mbimba umo katha kuvihitha vimena. Munu umo lika nendi katha kwambulwila vanu voshe. Oloni twatha kuleka vanu vavangi vya Yehova mwafwa twalikwatathana, cho vamo twavakwatha vamushangathzale na kumulemetha.

8, 9. (a) Paulu wapangethele mwanja muka mu kulongetha vaka-Kilisitu valikwatathane (b) Twatha kulikwatathana vati mu chikungulukilo?

⁸ Paulu walekele vaka-Efeso muchalikwatathanenemo chikungulukilo, na kuvaleka ngwendi voshe mu chikungulukilo vanapandele “kukola mu vyuma vyoshe.” (Tandeni Efeso 4:15, 16.) Paulu wapangethele chakumwenako cha muvila mu kumwetha ngwendi kuli vyanatha kulinga muka-Kilisitu na muka-Kilisitu mangana tulikwatathane mu chikungulukilo na kukavangeya Yesu, Ntwama wa chikungulukilo. Wendekele ngwendi muvila woshe “vanautungu hamo mu manunga ngwe ku theteko yawo.” Cho nameme tuvanike indi tuvakulunu, vakangule nambe embwe, vika vyanapande kulinga munu na munu?

⁹ Yesu nangula vakulunu mangana vatwamenene chikungulukilo, cho ashaka ngwendi tuvathingimike na kukavangeya kutwamenena kwavo. (VaHevelu 13:7, 17) Kulinga ngocho thimbu imo kukapu kwakukalu. Oloni tulombeni Yehova mangana atukwathe. Sipilitu Yendi ya kujela itukwatha tukavangeye kutwamenena kwa vakulunu. Thinganyekeni lalo omwo mutwatha kukwathela chikungulukilo nga tulikehetha na kulikwatathana na vakulunu. Tulikwatathana mu chikungulukilo na kulithzema manene umo na mukwavo.

10. Vaka-kupangele vakakwatha vati mu kunena likwatathano mu chikungulukilo?

¹⁰ Vaka-kupangele navo vakakwatha mu kunena likwatathano mu chikungulukilo. Vakapanga na ndthzili mu kukwatha vakulu, cho tukakandelela manene ku vyuma vivakalingi. Chakumwenako, vakatulombela mavulu a kupangetha mu lihya, cho vakatambula vangendthzi vaje vaija ku viwano. Cho lalo vakafwitangana mu kuvwahetha na kujeletha Njuvo ya Vumwene. Nga tupangela hamo nava vandolome, cho tulikwatathana mu kupangela Yehova.—Etheketheniko Vilinga 6:3-6.

11. Vavaha vatha kulinga vika mangana mu chikungulukilo mukale likwatathano?

¹¹ Vakulunu vamo vanapanga na ndthzili mu chikungulukilo ha myaka yaingi. Oloni hamo ano matangwa kuvatha kupanga na ndthzili ngwe laja mwafwa ya kukuluvala. Vandolome vavaha vanapande kuvakwatha. Umona vanavalongetha, cho vatha kuvana vipangi vya kulithethzathethza mu chikungulukilo. Cho lalo nga vaka-kupangela vapanga na ndthzili, cho vakevo vakapwa vakulu mu chikungulukilo kulutwe. (1 Timateo 3:1, 10) Vakwenje vamo vavanangwile kupwa vakulunu, vanakolo vwathi ku sipilitu. Vanavangula kupwa vantwama va kuthzenguluka, cho vali na kukwatha vandolome na vandokathzi mu vikungulukilo. Tukavwahelela ha kumona vakwenje na vambanda valyana kupangela vandolome na vandokathzi.—Tandeni Myatho 110:3; Muka-kwambulula 12:1.

12, 13. Vika vyatha kunena likwatathano mu Nanga?

¹² Vika vitwatha kulinga mangana tulikwatathane mu nanga? Kukala na chiwano cha kulemetha kwa nanga ha chalumingo, kutukwatha. Nga vithemi na vana vawana  thimbu ya kukala hamo na kulilongetha vya Yehova, cho valithzema manene mukati kavo. Ha thimbu ya kulemetha kwa nanga, vatha kulivwahethela vivakendeka mu lihya, kulinga ngocho kuvakwatha vakambulule mwamuvwa. Omwo vathziva umo na umo wavo athimutwiya ha vuthunga na kunanguka ngwavo voshe vathzema Yehova na kushaka kulinga vyavivwa, cho valikwatathana manene.

¹³ Vanu va kulyambata vatha kulikwatathana vati? (Mateo 19:6) Nga voshe vathzema Yehova na kumupangela, cho valikwatathana na kupwa va kuvwahelela mu vulo. Vanapande kulithzema umo na mukwavo ngwe mwalingilile Avilahama na Sala, Isake na Lembeka, Elekana na Hana. (Kushangumuka 26:8; 1 Samwele 1:5, 8; 1 Petulu 3:5, 6) Nga munalume na munakathzi valingamo, cho valikwatathana na kulikuta vuthamba na Yehova.—Tandeni Muka-kwambulula 4:12.

14. Nga muka-njuvo yeni kethi na kupangela Yehova, mulinga vika mangana vulo vweni vutwaleleleho kukanyama?

¹⁴ Mbimbiliya imwetha ngwavo kutwapandele kulyambata na munu uje kethi kupangela Yehova. (2 Kolinte 6:14) Oloni vandolome na vandokathzi vamo valyambata na vaje kuvapwile Vakaleho va Yehova. Vamo valilongethele vuthunga oku vanalyambata laja, cho vaka-njuvo yavo shavo kupwa Vakaleho. Vakwavo cho mpamo valyambatele na ngamba ya Yehova, oloni muka-njuvo yavo natundu mu chikungulukilo. Mu vifwa evi, vaka-Kilisitu vaketheka muvathela mwoshe kukavangeya mashiko a mu Mbimbiliya mangana vakanyamethe vulo vwavo. Oloni kulinga ngocho kethi kwakwathi. Chakumweneko, va Mary na va munalume wavo va David vakele na kupangela Yehova hamo lika. Cho va David valikelele kukunguluka. Oloni va Mary vethekele kutwalelelaho kulikehetha na kusholola vifwa vya vaka-Kilisitu. Va Mary valongethele vana vavo 6 vya Yehova, cho vatwaleleleho kuya ku viwano vyakama nevi vyavindondo. Omwo mwetile myaka, vana vavo vakolele na kutunda hembo. Va Mary vatwaleleleho kupangela Yehova nameme kulinga ngocho kwakaluwile. Oloni va David vashangumukile kutanda mangazini akele na kuvathethzela munakathzi wavo Mary. Omwo mwetile thimbu, vashangumukile kukunguluka ku viwano vimo lalo. Mutekulyavo wa mukwenje wa myaka 6 wakele na kuvavwahethela ha kutumbama ku viwano, cho nga va David kuvasholokele,  wakele na kuvaleka ngwendi: “Kuku, lelo kunjamimwene ku viwano.” Va David velukile kuli Yehova munima ya myaka 25, ngechi ano matangwa vali na kulikwatathana na munakathzi wavo mu kupangela Yehova.

15. Vaje vaneshwala mu malo vatha kukwatha vati vaje vanalyambata ololo?

¹⁵ Vangamba va Yehova va kulyambata vanapande kulikwatathana, mwafwa ano matangwa Satana ali na kulwitha manene vinanga. Nameme munambata thimbu yailaha mu vulo, munapande kuthinganyeka vimwendeka na vimulinga vije vikanyametha vulo vweni. Yeni muneshwala mu vulo, mwatha kwakela mwanja vaje vanalyambata ololo. Mwatha kuvalanya ku kulemetha kweni kwa nanga. Cho vamona ngwavo kumani vaka-kulyambata voshe vanapande kulithzema na kulikwatathana.—Tito 2:3-7.

16, 17. Vyuma muka vyavivwa vivanavandamena kumona vangamba va Njambi?

¹⁶ VaIsalele muvaile ku chilika ku Yelusalema, valikwatathanene. valivwahethelele vyoshe vyatondekele mu vungendthzi. Cho vendele hamo na kulikwatha umo na mukwavo. Voshe Vakele na kulemetha na kushangathzala Yehova hamo lika ku tembele. (Luka 2:41-44) Ino ikeyo thimbu ya kulivwahethela vuyoye vwa mu kaye kakaha, ngechi tunapande kulikwatathana na kupangela hamo. Vika vimwatha kulinga mangana mulikwatathane manene na vakweni?

¹⁷ Vanu vaka-kaye, kakangi vakalingi vimata na kulwa. Oloni yetu twakandelela manene kuli Yehova omwo natukwatha tuthzivuke vuthunga na kukala mu kwoloka. Vanu vendi mu kaye mwoshe vali na kumulemetha mu ngila ije yashaka. Matangwa ano a mamanethelelo, vanu va Yehova vanalikwatathana manene kutuvakana laja. Ngwe muje wendekele kapolofweto Isaya na Mika, tuvavoshe tuli na ‘kulamata ha lilundu lya’ Yehova. (Isaya 2:2-4; tandeni Mika 4:2-4.) Tukavwahelela manene mu kaye kakaha omwo vanu voshe ‘vakalinungakana hamo lika’ na kulikwatathana mu kulemetha Yehova.