1, 2. (a) Mashiko muka aje anovola vanu vavangi? (Kengeni chikupulo ha liputa 23.) (b) Mashiko muka aje atha kwovola vangamba va Njambi?

 “IMANA, KENGA, TOLILILA.” Awa majwi avathonekele ku mukulo wa njanji ya mu North America anakalaho myaka 100. Mwafwa vika? mangana minyau ije itumbuka njanji kethi ilindyange mu kumboyo ije ili na kushatuka. Kukavangeya awa Mashiko, kunovola vavangi.

² Yehova kethi kutwana lika mashiko a kutunyanyametha. Akatwamenena vanu vendi mangana vakayoye myaka yoshe, na kujenjuka vukalu. Yehova wapwa ngwe kanyungi wa chithzemo uje akatwamenena vimanga vendi na kuvashika mangana vajenjuke kuya mu vingila vya vushonde.—Tandeni Isaya 30:20, 21.

3. Vanu valiwanene vati mu ngila ya kuya ku kuthsa?

³ Kutunda lika hatangelele vanu, Yehova natwalelelaho kuvana mashiko. Chakumwenako, mu lihya lya Endeni, Yehova wanene vanu mashiko a kuvakwatha vakakale na mwonyo wa myaka yoshe na kupwa va kuvwahelela. (Kushangumuka 2:15-17) Oloni Andama na Eva vavyanene kutwamenena kwa Ishavo wa  chithzemo. Eva watolililile ku kunangula kuje kwasholokele ngwe kwatundile ku linyoka, Andama cho ikeye watolililile kuli munakathzi wendi. Vika vyatundilemo? Voshe vavali vayandele, cho vathsile kwa kujeneka lilavelelo lya kukathanguka. Cho lalo, vanu voshe valiwanene mu ngila ya kuya ku kuthsa mwafwa, ya kujeneka kwononoka kwa va Andama na Eva.

4. (a) Mwafwa vika kwatondekele mashiko akwavo munima ya livathzi? (b) Kutenguluka kwa vyuma kukamwetha vati vithinganyeka vya Njambi?

⁴ Njambi wanene Nowa mashiko aje ovwele vanu. Munima ya Livathzi, Yehova washikile vanu ngwendi kethi valye maninga nambe kuwanwa. Mwafwa vika? Mwafwa washakele kuvatavetha kulya thitu. Echi chapwile chuma chachiha, mukemwo wavanene lishiko lyaliha ngwendi: “Oloni kumwapandele kulya thitu na maninga ayo.” (Kushangumuka 9:1-4) Eli lishiko limwetha omwo Njambi wamwena kuyoya, kuje kwatunda kuli ikeye. Ali na moko ya kutwana mashiko mwafwa ikeye Ishamatanga, cho ikeye watwanene mwonyo. Chakumwenako, washikile vanu ngwendi kethi vathsiye vakwavo. Njambi wamona kuyoya na maninga kupwa vya kujela, ngechi akana kashitiko vaje vavipangetha mwamuvi.—Kushangumuka 9:5, 6.

5. Vika vituthimutwiya, cho mwafwa vika?

⁵ Nameme munima ya matangwa a Nowa, Njambi natwalelelaho kutwamenena vanu vendi. Omu mu chilongetha, tuthimutwiya vyakumwenako vimo vije vimwetha mwavatwamenenenemo. Vituthimutwiya vitushongangeya twangule kukavangeya Yehova uje atutwamenena kuya mu kaye kakaha.

6. Mwafwa vika vanu va Njambi vapandele kwononoka mashiko avanene kwitila muli Mosesa, cho vaIsalele vapandele kulinga vati?

⁶ Mu thimbu ya Mosesa, Yehova wanene vanu vendi mashiko a kukundama ku vilinga vyavo na kulemetha kwavo. Mwafwa vika? Mwafwa vyuma vyatengulukile lalo. VaIsalele vapwile vindungo mu Ingito ha myaka ya kutuvakana 200. Vanu va mu Ingito vakele na kulemetha vathsi na kupangetha tuponya na kulinga vyuma vyavingi vije vyashawile Njambi. Njambi wapandele kwana mashiko ku vanu vendi omwo vapatukile mu Ingito. Vapandele kupwa muyati uje ukavangeya lika Mashiko a Yehova. Mavulu amo amwetha ngwavo Lijwi lya chiHevelu lya “Lishiko,” lilumbununa “kwinikila nambe kutwamenena nambe kulongetha.” Mashiko akwathele vaIsalele vajenjuke ku vilinga vyavivi na ku vulombelo vwa makuli vuje vwalithalele manene ku vanu vavalyatele navo. Vaisalele muvatolililile kuli Njambi, wavavethzikithile. Oloni omwo kuvononokele, valiwanene mu vukalu vwakama.—Tandeni Kwituluka mu Mashiko 28:1, 2, 15.

7. (a) Mwafwa vika Yehova wakele na kutwamenena vanu vendi? Lumbununeni. (b) Mashiko apwile vati muka-kushika [muka-kunyunga] vaIsalele?

⁷ Kuli chuma chikwavo lalo chalingithile kukale mashiko akwavo. Yehova wanene vaIsalele Mashiko mangana valivwahethele kwija kwa Mesiya, Yesu Kilisitu. Echi chapwile chuma cha theho manene ku vyuma vyayongwele kulinga. Mashiko anukithile vaIsalele ngwavo vapwile va kujeneka kulumbunuka. Avanukithile lalo ngwavo vashakele ndando ya kupatula kulumbununa ñombelo ya kulumbunuka ije imanetha vuvi vwavo vwoshe. (Ngalatiya 3:19; VaHevelu 10:1-10) Mashiko lalo anyungililile chikota cha Mesiya, cho akwathele vaIsalele vamuthzivuke omwo wethzile. Mashiko apwile ngwe muka-kutwamenena wa thimbu yaindondo nambe “muka-kushika” [muka-kunyunga] uje wakele na kutwamenena vanu kuli Kilisitu.—Ngalatiya 3:23, 24.

8. Mwafwa vika tunapande kukavangeya vinangulo vya mu Mashiko a Mosesa?

 ⁸ Ha kupwa vaka-Kilisitu, netu twatha kuwana vukwathi mu Mashiko aje anene Yehova. Mu ngila muka? Twatha kwimana na kukenga ha vinangulo vije vinemana hali awa Mashiko. Nameme kutwethi mwithi ya Mashiko, oloni twatha kuwapangetha mangana atutwamenene mu kuyoya kwetu kwa litangwa na litangwa na mu kulemetha Yehova. Watavethele ngechi vathoneke awa mashiko mu Mbimbiliya mangana atulongethe na kututwamenena kwitila mu kutunangula, cho lalo tukandelele omwo Yesu watulongethele chuma chakama manene kutuvakana Mashiko. Tolilileni vyendekele Yesu. Wendekele ngwendi: “Mwathziva laja muje vendekele ngwavo, ‘kethi mulinge vupangala.’ Oloni yange njimileka ngwange, woshe akenga shwii munakathzi na lishungu nalingi laja nendi vupangala mu mbunge yendi.” Ngechi, kutwapandele lika kujenjuka ku vupangala, oloni tunapande lalo kujenjuka ku vithinganyeka vyavivi na mashungu amavi.—Mateo 5:27, 28.

9. Vyuma muka vyatengulukile vije vyalingithile Njambi anene Mashiko amaha?

⁹ Munima ya Yesu kupwa Mesiya, Yehova wanene Mashiko amaha na kusholola vyuma vyavingi vya kukundama ku viyongola vyendi. Vika vyalingilile ngocho? Mu mwaka wa 33, Yehova wavyanene muyati wa Isalele, cho wangwile chikungulukilo cha vaka-Kilisitu kupwa vanu vendi. Ngechi vyuma vyatengulukile lalo kuli vanu va Njambi.

10. Mwafwa vika chikungulukilo cha vaka-Kilisitu vachanene mashiko amaha, cho awa mashiko alithethzele vati na mashiko avanene vaIsalele?

¹⁰ Yehova wanene vaIsalele Mashiko a Mosesa mangana avalongethe mwakutumbamena mwamuvwa na mwakumulemethela. Kushwa mu chita cha myaka cha kulivanga, vanu va Njambi kuvapwile va muyati umo lika, oloni vapwile va miyati na vithemwa vya kulithethzathethza, cho vavatumbwile ngwavo Isalele wa ku Sipilitu. Vakevo vashangumukile chikungulukilo cha vaka-Kilisitu, cho vakele mu chikumiyo chachiha. Yehova wavanene mashiko amaha nambe ngwetu mashiko akwavo a kuvaleka mwakutumbamena mwamuvwa na mwakumulemethela. Mwa vuthunga vene, “Njambi kethi na kangu. Oloni woshe amukomoka na kulinga vije vyavivwa vakamutambula kuli ikeye.” (Vilinga 10:34, 35) Vakavangeyeye “lishiko lya Kilisitu,” lije lyemanene manene ha vinangulo vivathonekele mu vimbunge vyavo, kethi ha limanya. Eli lishiko lyatwamenenene vaka-Kilisitu kwoshe kuvakele, cho lyavakwathele.—Ngalatiya 6:2.

11. Vyuma muka vivali vyalivungila mu “lishiko lya Kilisitu”?

¹¹ Mashiko a Yehova aje anene Yesu kuli vaIsalele va ku sipilitu avakwale manene. Yesu thimbu kanda akute chikumiyo chachiha wavangele kwana mashiko a theho avali. Ha kulivanga wavashikile ngwendi vambulule. Cho lalo washikile vaka-Kilisitu muvapandele kuyoyela. Awa Mashiko anapu a vaka-kilisitu voshe, vaje vali na lilavelelo lya kuya mwilu nambe kukala hano hathi.

12. Chipangi cha kwambulula chalivwethzelelele vati?

¹² Kulaja, vaka-mafuti vakele na kuya ku Isalele kukapangela Yehova. (1 Vimyene 8:41-43) Oloni munima Yesu wanene lishiko lituwana ku Mateo 28:19, 20. (Tandeni.) Yesu walekele vandongethi vendi ngwendi “yeni” ku vanu Voshe. Ha Pentekosita ya mu mwaka wa 33, Yehova washolwele ngwendi ashaka muthzimbu wauvwa vawambulule mu kaye mwoshe. Olyo litangwa, vanu 120 va mu chikungulukilo chachiha vashulile na sipilitu ya kujela, cho  vashangumukile kwendeka vindaka vya kulithethzathethza ku vaYunda na vaje kethi vaYunda. (Vilinga 2:4-11) Kutundaho, chitingitingi chajangumukile kuketa na ku Samaliya. Cho mu mwaka wa 36, chitingitingi chamene kwambatethelela na vaje kuvatukile. Echi chimwetha ngwavo vaka-Kilisitu vambulwile ku vanu voshe mu kaye.

13, 14. (a) Vika vyalivungila mu “Lishiko lyaliha” lya Yesu? (b) Vika vitulilongetha ku mwanja wa Yesu?

¹³ Yesu wanene lalo “lishiko lyaliha” lije limwetha mwakuyoyela na vandolome na vandokathzi vetu. (Tandeni Yowano 13:34, 35.) Tunapande kutwalelelaho kuvathzema, oloni lalo tunapande kulyana kuvathsila. Oloni mu Mashiko a Mosesa kuvendekelemo vyakufwa ngocho.—Mateo 22:39; 1 Yowano 3:16.

¹⁴ Yesu ikeye wavangele kumwetha echi chithzemo cha kutundilila kwithi ya mbunge. Wathzemene manene vandongethi vendi, cho walyanene kuvathsila. Yesu ashaka ngwendi vaka-kumukavangeya voshe vamutembwinine. Ngechi, tunapande kukanyama mu thimbu ya vukalu na kulyana kuthsila vandolome na vandokathzi vetu.—1 Tesalonika 2:8.

15, 16. Vyuma muka vinatenguluka kuli yetu matangwa ano, cho Njambi ali na kututwamenena vati?

¹⁵ Yesu nangula “ndungo wa kulongwa na mana” mangana ane vaka-kumukavangeya “vyakulya” vya ku sipilitu “ha thimbu yaivwa.” (Mateo 24:45-47, NWT) Evi vyakulya vinambathelela na mashiko avakana vanu va Njambi nga kuli vimo vinatenguluka. Vyuma vinatenguluka vati mu thimbu yetu?

¹⁶ Tuli na kuyoya mu “matangwa a kukotoka,” cho ololo tukovela mu ñavava yakama ije kanda ikaleko. (2 Timateo 3:1; Mako 13:19) Kutundaho lalo, Satana na vandemone vendi vanavombila hano hathi, cho vananene tuyando twakama ku vanu. (Kujombolola 12:9, 12) Cho lalo tuli na kunyunga  lishiko lya Yesu omwo tuli na kwambulwila vanu vavangi mu vindaka vyavingi mu kaye mwoshe kutuvakana laja.

17, 18. Vika vitunapande kulinga nga vatwana mashiko?

¹⁷ Munga ya Njambi ikatwana vinoma vyavingi vya kupangetha mu chipangi cha kwambulula. Mukavipangetha ndi? Ku viwano, vakatulongetha mwakupangethela evi vinoma mwamuvwa. Mukamono ngweni Njambi ikeye akatulongetha mwakupangethela evi vinoma ndi?

¹⁸ Nga tushaka ngwetu Njambi atuvethzikithe, cho tunapande kukavangeya mashiko oshe akatwana kwitila mu chikungulukilo cha vaka-Kilisitu. Nga twononoka thimbu ino, cho kukapwa kwakwathi kukavangeya mashiko avakatwana mu thimbu ya “ñavava yakama” omwo vakanyongetha kaye kakavi ka Satana koshe. (Mateo 24:21) Nameme vene mu kaye kakaha kakavwa muje kumukakala Satana, anga vakatutwamenena.

19, 20. Mavulu muka avakafukula, cho vuvwa muka vukatundamo?

¹⁹ Mu thimbu ya Mosesa, vaIsalele vapandele kuvatwamenena, mukemwo Yehova wavanene Mashiko. Oloni chikungulukilo cha vaka-Kilisitu chinapandele kukavangeya “lishiko lya Kilisitu.” Mbimbiliya ituleka ngwayo mu kaye kakaha, netu tukakala na mavulu amaha a mashiko. (Tandeni Kujombolola 20:12.) Mpamo omwo mu mavulu mukakala mashiko aje akamwetha vyashaka Njambi ku vanu ha thimbu oyo. Kulilongetha owo mavulu, kukakwatha vanu voshe, hamo lika na vaje vakathanguka vathzivuke vyashaka Njambi kuli vakevo. Akatukwatha lalo tulilongethe mwakamwenamo vyuma Yehova. Mu Palandaisi, tukalithzema umo na mukwavo na kulithingimika mwafwa tukathzivithitha mwamuvwa Mbimbiliya. (Isaya 26:9) Achithinganyekeni ha vwingi vwa vyuma vitukalilongetha na kukalongethako vakwetu omwo akatutwamenena Mwene Yesu Kilisitu.

²⁰ Omwo vakatwetheka lwa mamanethelelo, nga tukakavangeya mashiko ‘avakathoneka mu mavulu,’ na kutwalelelaho kulongwa kuli Yehova, cho vakatuthoneka mu “livulu lya mwonyo.” Twatha lalo kukayoya myaka yoshe. Ngechi tunapande KWIMANA kulumbununa kutanda Mbimbiliya na KUKENGA kulumbununa kuthzivithitha vitutanda na KUTOLILILA kulumbununa kukavangeya kutwamenena kwa Njambi thimbu ino. Nga tulinga evi vyuma, cho tukovoka ñavava yakama na kulilongetha vya Yehova Njambi wetu wa chithzemo na mana haya myaka.—Muka-kwambulula 3:11; Loma 11:33.