Delphine itunendeka mu ñanda inahu, wathinganyekele ngwendi kunwa manene vwala kwatha kutepulula ku vishoti vyendi. Mbimbiliya kuyavindikile kunwa vwala mu kwethekela, oloni yendeka ngwayo: “Kethi ukalipandakane hamo na vaka-kunwa [“manene,” NWT] vinyu.” (Vithimo 23:20) Kunwa manene vwala kunavinjitha vanu mishongo yakama na kujeneka kulithzivathana na vanu na kuthsiya malo, cho lalo ma milyoni a vanu vali na kuthsa ku vwala mwaka na mwaka. Ovu vukalu vwoshe, vanu vanatha kuvujenjuka nga vapangetha vinangulo vya mu Mbimbiliya.

Mukemwo mwalingile Delphine. Ngechi wendekele ngwendi: “Kunwa vwala kukwamanethele vishoti vinjakele navyo. Oloni njapangethele chinangulo chili ku Filipu 4:6, 7, chije chendeka ngwavo: ‘Kethi mushote mbunge ha chuma chimo, oloni . . . lombeni Njambi ha vije munajeneka.’ Muvyakele na kunjiwana vishoti vuthsiki, njakele na kulombela kuli Yehova na kumuleka mwoshe munjakele na kulithzivila, nga njinaluvala na kukala na vishokotima na kuthzeya mangana anjikwathe kukala na vithinganyeka vyavivwa. Mutondo munjakele na kwinduka njakele na kuthziva ngwange vithinganyeka vyange vinatepuluka. Kulombela thimbu yoshe kwanjikwathele njijauke na vyuma vinjakele navyo. Ngechi, njalyangwilile kulikela kunwa vwala. Njakele na kuyoya mwamuvwa omwo njalikelele kunwa vwala, mukemwo kunjishaka lalo kuvwilukila.”

Kuli vukalu vwavwingi vukatundu mu kulinga vupangala. Oloni vinangulo vya mu Mbimbiliya vitukwatha tujenjuke ku vyuma vije vyatha kutulingitha tulinge vupangala, vya kufwa ngwe kulipathula na kuyongola vikupulo vya mushelengwa. Samuel wendekele ngwendi: “Kwapwile kwakwathi kulithetheka mwamuvi. Thimbu imo kunjakele na viyongola vya kutonda munakathzi, oloni vanakathzi vakevo vashangumukile kulithetheka nange mwamuvi, ngechi njamwene ngwange ava vanakathzi vali na kunjitonda, ngechi njashangumukile kulipathula navo.” Samuel wamwene ngwendi kethi kukala na viyongola vya kutonda vanakathzi, oloni omwo vakalipathula nendi, kukamulingitha ashangumuke kulipathula navo. Oloni kulinga ngocho kwakele na kumuthzivitha kuvavala ku mbunge. Wendekele lalo ngwendi: “Oku kwapwa kwakuvi manene mwafwa kukalingitha munu ajeneke kukala na kathingimiko.”

Samuel watandele ñanda imo mu livulu lya young people lije lili ha wembusaiti ya jw.org. Cho lalo wanukile majwi ali ku Vithimo 20:11, aje endeka ngwavo: “Vilinga vyavivwa nambe vilinga vyavivi vije vyalinga mwanike, visholola chifwa cha uje mwanike.” Awa majwi amukwathele vati? Samuel wamwene ngwendi viyongola vyendi vya kulipathula na vanakathzi vyapwile vyavivi. Wendekele ngwendi: “Njalilongetha ngwange nga munu uje achili mwanike alithzilitha kulipathula, cho akakala na vifwa vyavivi omwo akovela mu vulo. Njashangumukile kuthinganyeka omwo munakathzi injikambata kulutwe akalithzivila nga akanjimona njili na kulipathula na munakathzi weka. Oku kwanjikwathele njimone ngwange kulipathula kwapwa kwakuvi. Nameme vanu vakathzivi mwamuvwa nga valipathula, oloni kukanene vukalu vwakama.” Ngechi, Samuel watengulukile. Kulikela kulipathula kwamukwathele lalo kujenjuka ku vupangala.

Antonio wakele mu vukalu vwakama vwa kulinga vupangala, mwafwa walikovelethele manene mu kuyongola vikupulo vya mushelengwa. Nameme washombwele munakathzi yathzemene manene, oloni thimbu yoshe wakele na kalingolingo ka kuyongola vikupulo vya mushelengwa. Oloni, mwathinganyekele ha mukanda wa 1 Petulu 5:8, kwamukwathele manene. Ou mukanda wendeka ngwavo: “Pweni vaka-kukengelela. Chitothzi cheni Liyavolo ali na kwendangana na kwanena ngwe ndumba, ashakethzeka umo, ngechi amuthanyothzole.” Antonio wendekele ngwendi: “Vikupulo vya mushelengwa vinalithala manene muno mu kaye, cho vyatha kukala mu vithinganyeka vyetu. Eyi vesi yanjikwathele manene kunanguka kuje kukatundu evi vyetheko. Ngechi, njanangukile vwathivwathi ngwange evi vikupulo vya mushelengwa vikatundilila kuli Liyavolo. Ha thimbu ino njathzivuka ngwange Yehova lika ikeye atha kunjikwatha ‘kupwa muka-kukengelela’ mangana njitundithe vithinganyeka vyavivi mu mbunge yange na kukanyametha vulo vwange. Antonio wawanene vukwathi vwa ku sipilitu, ngechi wahyanene kalingolingo kendi kakavi. Cho oku kwamukwathele kulihenga na ku vukalu vweka.

Chili vene, mu Mbimbiliya muli vinangulo vyavivwa vije vyatha kutukwatha tujeneke kukovela mu vukalu vwakama. Kuma vukalu vuje vunatanda mithzi mu mbunge nambe ngwetu vuje vuchitwalelelaho, vwatha kuhwa ndi? Tuchimoneni omwo Lijwi lya Njambi lyatha kutukwathelamo kumanetha ovwo vukalu vwakama.