Rosie wendekele ngwendi: “Thimbu yoshe njakele na kulishoshomwena manene ha vyuma vije kanda vichilingiwe.” Mukanda muka wa mu Mbimbiliya wamukwathele? Wapwile wa Mateo 6:34 uje wendeka ngwawo: “Kethi mulishoshomwene ku litangwa lya imene, omwo litangwa lya imene likalimwena likelyo vavenya. Kuchitava kuvwethzelelako ku tuyando tuje tuli na kwija ha litangwa na litangwa.” Rosie wendekele ngwendi awa majwi a Yesu amukwathele ajeneke kulishoshomwena ha vyuma vya kulutwe. Wendekele lalo ngwendi: “Kunjakele na kuvwethzelela ku vukalu vwange ha kulishoshomwena vyuma vije kanda vichilingiwe nambe vije hamo kuvyatha kulingiwa.”

Yasmine nendi wakele na vishoti mu kuyoya kwendi. Wendekele ngwendi: “Matangwa amo mu chalumingo njakele na kulila, cho lalo vithimbu vimo vuthsiki kunjakele na kulala tulo. Vithinganyeka vyange vyavivi vyakele na kunjithzeyetha manene.” Chithoneka muka chamukwathele? Wanukile majwi ali ku mukanda wa 1 Petulu 5:7 uje wendeka ngwawo: “Akeni vukalu vweni vwoshe hali [Njambi], omwo ikeye ali na kumilela.” Yasmine wendekele ngwendi: “Mukwita kwa thimbu njalombelele kuli Yehova, cho wakumbulwile malombelo ange. Munima ya kulombela, njathzivile ngwe vananjitulu chitele cha kulema manene ha vithsili vyange. Nameme ngocho, vithimbu vimo njikakala na vithinganyeka vyavivi, oloni njathzivuka mwa kuvihyanena.”

Isabella wendekele ngwendi: “Kukala na ndthzengulu njachitambula kuli vatate, mwafwa na vakevo kuvethi kumanetha vwathi vipangi. Vipangi vimo kunjethi kuvimanetha vwathi mwafwa thimbu yange ikavihila ku kuthikama na ku kuyongola TV. Aka kalingolingo kapwa kakavi manene mwafwa kakalingitha munu apwe mulwa na kujeneka kupanga mwamuvwa vipangi.” Chinangulo cha mu Mbimbiliya cha mu kwathele chili ku 2 Timateo 2:15, chije chendeka ngwavo: “Panga mwamuvwa ngechi utambule vukaleho vwavuvwa ku mesho a Njambi, ngwe muka-vipangi uje kethi na shwamwa ku vipangi vyendi.” Isabella wendekele ngwendi: “Kunjashakele kuthzivitha Yehova shwamwa ha kujeneka kumanetha vwathi vipangi.” Echi chinangulo chinamukwatha manene kwaka mana ku vipangi.

Kelsey nendi wendekele ngwendi: “Kunjakele na kwakela manene mana ku vipangi, kuvanga njamono ngwange kunathala lika thimbu yaindondo athina njivipange. Oku kwakele na kunjililitha na kujeneka kulala tulo na kulishoshomwena manene. Kukala na ndthzengulu kwapwile kwakuvi.” Kelsey wawanene vukwathi ku mukanda wa Vithimo 13:16, uje wendeka ngwavo: “Vaka-mana thimbu yoshe vakalivanga kuyongola thimbu kanda vapange, oloni vilema vambulula vya vulema vwavo.” Wendekele lalo ngwendi: “Kuthinganyekethetha echi chithoneka kwanjikwathele kumona ngwange kwapwa kwakuvwa kulinga vipangi na thimbu na kuthinganyekela kulutwe. Ha thimbu ino, njili na kalivulu mu njikathoneka vipangi vinjinapande kulinga, cho oku kwanjikwatha kumanetha vwathi vipangi na thimbu.”

Kirsten wendekele ngwendi: “Vulo vwange vwathsile, cho njakele na vana vawana.” Chithoneka muka chamukwathele? Mukanda wa Vithimo 17:17 ngwawo: “Vathamba vwamwetha chithzemo chavo thimbu yoshe, vavushoko vanathemukila ngechi vamwene hamo tuyando.” Kirsten wawanene vukwathi mu chikungulukilo. Chikungulukilo chamukwathele vati? “Vandolome na vandokathzi vanjikwathele mu vingila vyavingi. Vamo vakele na kuthethza vukwathi ku chikolo nga kuvanjiwanene ha njuvo. Vandolome vamo vakele na kunjilanya kukala ku vinjuvo vyavo ha vithimbu vimo. Cho munu umo wanjiwanenene chipangi. Vandolome na vandokathzi vakele na kunjaka mbunge thimbu yoshe.”

Delphine uje itunendeka mu ñanda inahu nendi walifwitile na vulika. Wendekele ngwendi: “Njalithzivile manene vulika na kupwa wa kujeneka kuvwahelela omwo njamwene vakwetu vali na kuyoya na vinanga vyavo.” Chithoneka cha Myatho 68:6 chije chendeka ngwavo: “Njambi akana njuvo ya kulala kuli vaje vali avo lika” chakwathele manene Delphine. Wendekele lalo ngwendi: “Njathzivuka ngwange eyi vesi kuilumbununa njuvo vene mpundu. Oloni ilumbununa njuvo ya ku sipilitu ije ikanyungilila vanu vaje vathzema Yehova mangana valikwatathane hamo lika. Cho lalo, njamwene ngwange kunjatha kulikwatathana na vakwetu kuvanga njishwenye tahi kuli Yehova. Ngechi, majwi ali ku Myatho 37:4 anjikwathele, aje endeka ngwavo: ‘Vwahelela muli Shukulu Kalunga, cho akwana vije viwushaka.’”

Cho lalo wendekele ngwendi: “Njamwene ngwange njapandele kukanyametha vuthamba vwange na Yehova mwafwa ikeye wapwa kavuthamba wamuvwa manene. Ngechi, njanonekele vyuma vije vinjapandele kulinga mangana njilikute vuthamba na vanu vaje vathzema Yehova. Njalilongethele kumona vilinga vyavivwa ku vakwetu na kujeneka kwakela mana ku tupenga twavo.”

Vanu vaje vakapangela Njambi vapwa va kujeneka kulumbunuka. Vakaleho va Yehova navo vakaliwana na vukalu vuje vukawana vanu voshe. Oloni kulilongetha Mbimbiliya kukavashongangeya kukwatha vakwavo vatakamene vukalu. Kwapwa kwa theho kulikuta vuthamba na vanu va Njambi. Kuma vinangulo vya mu Mbimbiliya vyatha kutukwatha kutakamena vukalu vwakama vuje kuvwatha kuhwa mu thimbu ino, vwa kufwa ngwe mishongo ya lulanga na kuthsitha ndi?