THINGANYEKENI ngwe muli na kwenda mu ngila vuthsiki, cho kuli lithuthulungu vwi. Oloni kumulishoshomwena ngweni muthzimbala mwafwa, mwakulahela tachi ya ndthzili ije ili mu livoko lyeni. Nga muteteka hathi, mumona vyuma vije vili hayehi neni. Cho lalo nga muteteka kulutwe, mumona na vyuma vije vili halako.

Mu ngila imo lika, Mbimbiliya inapu ngwe ije tachi. Ngechi mutunathimutwiya mu viñanda vinahu, Lijwi lya Njambi lyatha kutukwatha kukolethela vukalu vutuliwana navwo ha litangwa na litangwa muno mu kaye kakavi. Cho lalo, Mbimbiliya ikatukwatha mu vingila vikwavo. Ikatukwatha kukala na lilavelelo lya vyuma vya kulutwe na kutukwatha kupwa va kuvwahelela na kushuvuluka. (Myatho 119:105) Ikatukwatha vati?

Tuchithimutwiyeni ha vingila vivali vije vimwetha muyatha kutukwathela Mbimbiliya kukala na lilavelelo mu vyuma vya kulutwe. 1 Ikatukwatha kuthzivuka vituli na kuyoyela na 2 kutulongetha mwa kulikutila vuthamba vwa kukanyama na Ishamatanga yetu.

Mu Mbimbiliya mwakala vinangulo vyavivwa vije vitukwatha kukolethela vukalu, nameme ngocho kuyethi kwendeka lika vya vukalu. Oloni ikatulongetha mwakupwila va kuvwahelela. Cho oku kutukwatha kuthzivuka vituli na kuyoyela.

Chakumwenako, Mbimbiliya yanangula ngwayo: “Muli kujolela kwakama manene mu kwana kutuvakana mu kutambula.” (Vilinga 20:35) Kuma mwatha kwanukako munu umo imwanene vukwathi vwa ku muvila, nameme munu uje imwatolilile na mbunge yeni yoshe omwo wakele na kumileka vishoti vyendi ndi? Kuma kumwalithzivile kuvwahelela omwo mwamukwathele ndi?

Tuvwahelela manene nga twana vakwetu na kujeneka kuvandamena kutwilwithila. Munalume  umo wathonekele ngwendi: “Nga uje ana chuma akala na viyongola vya kuvandamena ngwendi nendi vamwane, cho kumupwila kwakukalu kwana vanu vaje vathzivuka ngwendi kuvatha kumwana nendi lalo.” Oloni nga twana na mbunge yetu yoshe maneneni vaje kuvatha kutwanako vimo, cho tuwana vivethzikitho. Tupwa va kuvwahelela manene. Tupanga hamo lika na Ishamatanga yetu uje akamono ngwendi nga twana, cho kunapu ngwe twamukumwitha. (Vithimo 19:17) Akakandelela manene nga tukwatha vaje vali mu vujene, cho nakulahetha ngwendi akatwana fweto kulutwe ya kukayoya myaka yoshe mu palandaisi hano hathi.—Myatho 37:29; Luka 14:12-14. *

Mbimbiliya itulongetha ngwayo twatha kupwa va kuvwahelela nga tulemetha Yehova Njambi mu kuyoya kwetu. Lijwi lyendi litushongangeya kumushangathzala na kumuthingimika na kumwononoka. (Muka-kwambulula 12:13; Kujombolola 4:11) Kulinga ngocho, kutukwatha tuthzivithe Ishamatanga yetu kuvwaha ku mbunge. Mukemwo atuleka ngwendi: “Kala na mana, cho njikavwahelela.” (Vithimo 27:11) Anukeni ngweni nga tukavangeya vinangulo vya mu Mbimbiliya omwo twangula vya kulinga, cho tuthzivitha Tate yetu wa mwilu kuvwaha ku mbunge. Mwafwa vika? Mwafwa watuthzema, cho washaka ngwendi tumone vuvwa vuli mu kukavangeya mashiko endi. (Isaya 48:17, 18) Kunapu kuvethzika kwakama kulemetha Njambi Muka-ndthzili yoshe na kuyoya mu ngila ije imuthzivitha kuvwaha ku mbunge.

Mbimbiliya itulongetha mwa kulikutila vuthamba na Ishamatanga yetu. Vithoneka ngwavyo: “Shwenyeni kuyehi na Njambi, cho na ikeye lalo akashwenya kuyehi neni.” (Yakomba 4:8) Thimbu imo tunatha kuthinganyeka ngwetu kutwatha kulikuta vuthamba na Ishamatanga wa ndthzili yoshe. Oloni Mbimbiliya imwetha ngwayo nga ‘tumushakethzeka,’ cho ‘tumuwana’ mwafwa “kakele kulyala netu embwe.” (Vilinga 17:27) Chinangulo cha mu Mbimbiliya cha kulikuta vuthamba na Njambi chitukwatha kukala na lilavelelo lya vyuma vya kulutwe. Mu ngila muka?

Achithinganyekeni ha ñanda eyi: Tuvavoshe kutwatha kulihenga ku chitothzi chetu wakama, kuthsa. (1 Kolinte 15:26) Oloni Njambi wapwa wa myaka yoshe. Kethi kuthsa, ngechi atonda ngwendi na vavuthamba vendi navo vakayoye myaka yoshe. Mbimbiliya yamwetha ngwayo Yehova washaka ngwendi vaje vamushakethzeka, “vapwe va kuvethzika ku myaka yoshe.”—Myatho 22:26.

Mwatha kukanyametha vati vuthamba vweni na Njambi? Twaleleleniho kulilongetha Lijwi lyendi, Mbimbiliya. (Yowano 17:3; 2 Timateo 3:16) Mulombeni mangana amikwathe kuthzivithitha Vithoneka. Mbimbiliya imwetha ngwayo nga ‘tulomba kuli Njambi’ ngwetu atwane mana, cho atwanawo. * (Yakomba 1:5) Kutundoho, ethekeni mumwathela mwoshe kupangetha vimunalilongetha nambe ngwetu kutavetha Lijwi lya Njambi lipwe ngwe “ndeya ku myanja [yeni]” na “cheke mu ngila [yeni]” ha thimbu ino na ku myaka yoshe.—Myatho 119:105.