VAMO VAKAKUMBULULA NGWAVO EMBWE. Ndotolo umo wendekele ngwendi, munu uje apangetha vinangulo vya mu Mbimbiliya napu ngwe mulongethi uje apangetha livulu lya sayansi lya mu ma 1920 mu kulongetha vana va sikola va matangwa ano. Vaka-kujeneka kuthingimika Mbimbiliya vanatha kuthinganyeka ngwavo munu katha kupangetha livulu lya mashiko a vikompyuta vya kuthañulu ku vikompyuta vya matangwa ano. Ngechi, vanu vamona ngwavo Mbimbiliya kuyatha kukwatha vanu ano matangwa.

Mwafwa vika vanu vakakavangeya vinangulo vya mu livulu lya kuthañulu, okuni mana analivwethzelela ano matangwa? Ha intaneti hanalithala mithzimbu yaingi ije yatha kunangula na kutwamenena vanu. Ha TV hakakala vaka-kulilongetha vithinganyeka vya vanu na vaka-kulilongetha vya vuyoye vwa vanu na vaka-kuthoneka mavulu vaje vakalongetha vanu mana. Kutundoho lalo, mu vitanda muli mavulu amangi aje akakwatha vanu, cho vakawalanda manene.

Mwafwa vika vanu vakapangetha Mbimbiliya ivathonekele myaka 2,000 kunima, okuni kwalithala mithzimbu yaingi ano matangwa? Kuma vithinganyeka vya vaka-kujeneka kuthingimika Mbimbiliya vya kwendeka ngwavo vinangulo vya mu Mbimbiliya vinalifu na viñanda vya mu mavulu a sayansi a kuthañulu nambe viñanda vya mu mavulu a mashiko a vikompyuta vya kuthañulu vinapu vya vuthunga ndi? Embwe. Vyuma vivanalingi vaka-sayansi vinatenguluka. Kuma vyuma vivatonda vanu navyo vinatenguluka ndi? Vanu vashaka kuyoya mu kuvwahelela na kwoloka na kukala na vinanga vya kulikwatathana na kukala na vavuthamba vavavwa.

Nameme Mbimbiliya yapwa ya kuthañulu, oloni ichikwatha vanu mu vingila vyavingi. Yapwa ya kuhwiminina kuli Ishamatanga yetu. Ikatutwamenena mu kuyoya kwetu kwoshe na kutumwetha ngila ya kutakamenamo vukalu. (2 Timateo 3:16, 17) Mu Mbimbiliya mwakala vinangulo vije vikatukwatha thimbu yoshe, cho vichitwalelelaho kukwatha vanu. Mbimbiliya ngwayo: “Lijwi lya Njambi lili na kuyoya.”—Vahevelu 4:12.

Kuma vyuma vili mu Mbimbiliya vyapwa vya vuthunga ndi? Viñanda vilimo vichipanga indi kuvyethi na kupanga? Viñanda vili muno mu Kaposhi ka Kukengela kakulivanga ka kulitila, vimikwatha kuwana vikumbululo ku vihula evi.